Ibyo gutanga urukingo rwa kabiri ku bakinnyi n’abatoza b’Amavubi bigeze he? | UMUSEKE

Ibyo gutanga urukingo rwa kabiri ku bakinnyi n’abatoza b’Amavubi bigeze he?

Hari abakinnyi b’Ikipe y’igihugu y’u Rwanda Amavubi bemeza ko bahawe urukingo rwa kabiri rwa Covid-19, hakaba abanda bavuga ko batararuhabwa kandi iminsi iteganywa yo kuruhabwa yarageze.

Urukingo rwa Covid-19 rwa mbere baruhawe bavuye mu mikino ya CHAN iherutse kubera muri  Cameroon aho u Rwanda rwasezerewe muri ¼.

Amakuru agera ku UMUSEKE arahamya ko aba basore bakiva muri CHAN bakingiriwe rimwe urukingo  rwa mbere n’abagize inteko ya Sena y’u Rwanda, ndetse ko bahise babwirwa na RBC ko bazongera gukingirwa urundi rukingo rwa kabiri nyuma.

Umwe mu bashinzwe itumanaho mu Ishyirahamwe ry’Umupira w’Amaguru mu Rwanda (FERWAFA) Thabit yabwiye UMUSEKE ko iki gikorwa ntacyabaye ndetse ko batakingira abagize ikipe y’igihugu mu gihe umutoza mukuru atarahamagara, gusa yemera ko bari bakingiwe mbere.

Yagize ati: “Ntabwo icyo gikorwa gihari, kandi ntabwo bakingira abakinnyi umutoza w’ikipe y’igihugu atarabahamagara. Ubwa mbere bararuhawe ariko ubu ntabwo barakingirwa.”

 

Abakinnyi bamwe bemeza ko bakingiwe bwa kabiri, abandi ntibarakingirwa

Nkuko bitangazwa n’ibigo bitanga inkingo zo gukingira Covid-19 ku Isi, bavuga ko byibura buri muntu agomba guterwa inkingo ebyiri zo kwirinda Covid-19. Bakavuga ko intera igomba kuza hagati y’iterwa ry’urukingo rwa mbere n’urundi ari iminsi 28.

Aha bivuze ko niba u Rwanda rwaravuye muri Cameroon mu matariki abanza y’ukwezi kwa kabiri kugeza uyu munsi tariki 5 Werurwe, iminsi 28 yashize ndetse ko abakinnyi bamwe bakabaye bamaze gukingirwa Covid-19.

Bamwe mu bakinnyi baganiriye na UMUSEKE batifuje ko amazina yabo atangazwa, bavuze ko batarahamagarwa ngo bajye gukingirwa urukingo rwa kabiri, abandi bavuga ko bagiyeyo.

Umutoza Mashami Vincent nta gihindutse arahamagara abakinnyi b’ikipe y’igihugu y’u Rwanda Amavubi bagomba kwitabira imikino ibiri yo gushaka itike yo gukina igikombe cya Afurika mu mpera z’uku kwezi, aho tariki 24 Werurwe bazakira Mozambique, bongere bakine na Cameroon i Yaounde ku wa 30 Werurwe.

ISHEMA Christian / UMUSEKE.RW

Subiza

Your email address will not be published. Required fields are marked *