• 18/01/2020 2:03 28

Iburasirazuba: Barikanga amapfa kubera kubura imvura

Mu bice binyuranye by’uturere twa Ngoma, Kirehe na Kayonza baturage baganiriye n’Umuseke bavuga ko bafite impungenge zikomeye ko bazahura n’inzara niba imvura ikomeje kubura. Iki gihe babaga babagara ibishyimbo ariko benshi byarumye abandi bongeye gutera bushya babonye imvura imanutse.

Uyu yateye ibi bishyimbo mu kwa cyenda, byabuze imvura biruma nawe abura indi mbuto
Uyu yateye ibi bishyimbo mu kwa cyenda, byabuze imvura biruma nawe abura indi mbuto

Igihe cy’ihinga bagitangiranye na Nzeri batera imyaka bizeye imvura ihagije yateganywaga, siko byagenze. Imvura yarabuze imbuto zuma zikizamuka, kuva icyo gihe kugera ubu nta mvura ihagjije barabona.

Mukashumbusho Claudine utuye mu kagali ka Mvumba mu murenge wa Murama mu karere ka Ngoma avuga ko n’imvura ubu iherutse kugwa ari nke, gusa ngo yarihanganye arongera aratera nyuma y’uko ibyo yateye mbere byumye.

Ati “ubu tuba turi kubagara none nibwo turi gutera, nta uzi niba imvura izakomeza kugwa ku buryo ibyo turi guhinga bizera, dufite ubwoba.”

Mutabaruka Simeon utuye mu kagali ka Rwantonde mu murenge wa Gatore muri Kirehe avuga ko babonaga imvura mu kwa cyenda bagatera noneho bageze mu Ugushyingo nta mvura bafite.

Ati “n’iyo iguye igwa gake, na nijoro (ku cyumweru) yaguye uyu munsi ntayaguye.” 

Imyaka y’abahinzi yumiye mu butaka indi imera intagarane, bamwe bahisemo kuyisimbuza bashaka imbuto batera bushya, ariko ikizere ni gike ngo kuko babona imvura ishobora gucika vuba.

Twizerimana Jeannette wo muri Rwinkwavu ati “Abahinze ibishyimbo mbere byarumye bamwe twarongeye dusubizamo ariko nta uzi ko bizera.” 

Meteo Rwanda mu ntangiriro za Nzeri yatangaje amakuru y’umuhindo kugera mu Ukuboza.

Uyu muhinzi we ibyo yateye mu kwa cyenda byarumye ashaka indi mbuto atera ibi ubu bimaze kuzamuka, nyamara igihe nk'iki ubundi yabaga abagara
Uyu muhinzi we ibyo yateye mu kwa cyenda byarumye ashaka indi mbuto atera ibi ubu bimaze kuzamuka, nyamara igihe nk’iki ubundi yabaga abagara

Dr Telesphole Ndabamenye ufite ibijyanye n’umusaruro mu nshingano mu kigo k’Igihugu cy’Ubuhinzi RAB avuga ko nta makuru ahagije y’iteganyagihe bafite kuko ayo bafite agarukira mu kwa 12 kandi imyaka irimo guhingwa ikaba izera mu kwa kabiri umwaka utaha.

Dr Ndabamenye avuga ko bateganya kuganira na Meteo Rwanda ngo barebe niba babaha amakuru y’ikirere mu kwa mbere n’ukwa kabiri.

Ati”Abenshi barateye abandi barimo baratera ariko nta makuru y’imvura ahagije  dufite, ayo dufite aragera mukwa 12.  Ariko urabona ko nayo bari baduhaye muri aya mezi atatu yahindaguritse, ubwo rero nukuganira na Meteo bakatubwira ikirere uko kizaba kimeze.”

Mugunga Mathieu wasigariyeho ukuriye ishami ry’iteganyagihe mu Kigo cy’igihugu cy’iteganyagihe yabwiye Umuseke ko batanze amakuru ko kariya gace k’Iburasirazuba(Kayonza, Ngoma na Kirehe) kazagira imvura nke nkurusha ahandi mu Rwanda.

Avuga ko ubu nta makuru y’iteganyagihe rya nyuma y’Ukuboza ahari kuko ubusanzwe itaganyagihe bakora riba ari iry’amezi atatu.  Mu Ukuboza ngo nibwo bazakora irindi teganyagihe rya Mutarama, Gashyantare na Werurwe, 2019

Mugunga avuga ko nko muri iki Cyumweru muri turiya duce bazongera kubona imvura kuwa Gatandatu no ku Cyumweru gukomeza.

Agira inama abahinzi gukoresha gahunda yo kuhira imyaka, bakanegera ba agronomes n’abafashamyumvire mu by’ubuhinzi bakabibafashamo.

Gusa abahinzi muri ibi bice bavuga ko imvura muri iyi minsi yari itangiye gusa n’igwa ariko bacibwa intege n’uko itagwa hose kandi igwa ari nke. Bikabatera ubwoba bwo kurumbya nanone.

Elia BYUK– USENGE
UM– USEKE.RW

Subiza

Your email address will not be published. Required fields are marked *