• 13/12/2019 6:44 17

Ibibazo mu nyubako za ADEPR i Karongi byateje rwaserera

Abaturage bagera kuri 70 bishyuzaga rwiyemezamirimo wahawe akazi ko gusana no kubaka na ADEPR Ururembo rw’Iburengerazuba kuwa gatatu bakoze ikimeze nko kwigaragambya bishyuza amezi abiri bamaze bakora badahembwa, kuri uyu wa kane habaye inama irimo impande zose n’abashinzwe umutekano ngo bige iki kibazo, abayobozi ba ADEPR ntibakivugaho rumwe.

Aha ni ku kicaro cya ADEPR i Karongi
Aha ni ku kicaro cya ADEPR i Karongi

Isoko ryo gusana no kubaka inzu za ADEPR ururembo rw’Iburengerazuba ry’agaciro ka miliyoni zirenga 250 ryahawe kompanyi yitwa ECO Ltd. Mu mezi ashize atangira imirimo, bigeze hagati bizamo ikibazo arahagarikwa.

Abafundi n’abayede (aide-maçons) n’abandi bakoraga imirimo inyuranye kuri uyu mushinga bamaze amezi abiri badahembwa n’akazi karahagarara.

Babonye birambiranye, aba bakozi kuwa gatatu bagiye ku biro by’ururembo rwa ADEPR Iburengerazuba bavuga ko bahava ari uko babishuye. Ubuyobozi bwite bwa Leta bwasabye aba baturage kwihangana iki kigashakirwa igisubizo vuba.

Kuri uyu wa kane, inzego z’umutekano, ubuyobozi bw’Akarere n’Ubuyobozi bwa ADEPR ku rwego rw’igihugu na rwiyemezamirimo bakoze inama yamaze amasaha arindwi (7) mu muhezo w’itangazamakuru bashaka uko iki kibazo kirangizwa.

Nyuma y’inama rwiyemezamirimo wa ECO Ltd yabwiye Umuseke atishyuye abakozi kuko nawe ADEPR itamwishuye uko babisezeranye ahubwo bahagaritse imirimo yariho akora.

Bakoraga imirimo yo gusana izi nyubako birahagarara kandi bamaze amezi abiri batishyurwa
Bakoraga imirimo yo gusana izi nyubako birahagarara kandi bamaze amezi abiri batishyurwa

 

Isoko ngo ryatanzwe ADEPR hejuru itabizi

Pst Karangwa John Umuvugizi wa ADEPR wungirije wari wavuye i Kigali yabwiye Umuseke ko iby’iri soko babimenye bibatunguye, ko Pasteur Sebadende Emmanuel wayoboraga uru rurembo (ubu yimuriwe mu rw’Amajyepfo) nta burenganzira yahawe bwo gukora uyu mushinga n’ubuyobozi bukuru bwa ADEPR.

Ati “Amakuru twamenye ni uko regional wacu, Sebadende Emmenuel bifuje kubaka hano bakazana rwiyemezamirimo bagapatana bagahita basenya, twabimenye dusanga byamaze kurenga urugero kandi byarakozwe bitemewe n’amategeko.

Pst Karangwa avuga ko uyu muyobozi atigeze abimenyesha ubuyobozi bwa ADEPR i Kigali ko nabo byabatunguye.

Karangwa avuga ariko ko abaturage bakoreshejwe akazi bakwiye kwishyurwa kugira ngo ikibazo cyabo gikemuke, ngo nubwo aba baturage ubundi bakabaye bishyurwa na rwiyemezamirimo wabahaye akazi.

Ati “twebwe kuko turi itorero kandi tukaba twifuza ko abaturage baba amahoro, turifuza ko babara imibyizi bakoze tukabahemba ibya rwiyemezamirimo bigakurikiranwa mu buryo bukwiriye.”

Karangwa avuga amategeko agenga ibikorwa nk’ibi byo kubaka n’imyubakire muri ADEPR avuga ko ko ibi byakozwe i Karongi ubundi bitangirwa uruhushya  n’Umuvugizi w’Itorero wenyine kandi mu buryo bwanditse. Hano ngo bikaba bitarabayeho.

 

Sebadende avuga ko ibyakozwe ADEPR i Kigali babizi

Pasteur Sebadende Emmanuel wari umuyobozi w’Ururembo rwa ADEPR Iburengerazuba akimurwa akoherezwa kuyobora urwo mu majyepfo kubera iki kibazo we avuga ko atakoze ibintu bidafitiwe uburenganzira.

Ati “Ni umushinga wari umaze imyaka ibiri.  Mbere y’uko ushyirwa mu bikorwa n’Umuvugizi wa ADEPR narawumumurikiye arawushima.”

Avuga ko isoko ryatanzwe biciye mu mucyo, ko hari umuntu woherejwe na ADEPR ya Kigali gukora igenzura akemeza agaciro k’uyu mushinga ko ari miliyoni 267.

We yemeza ko nta makosa yakoze ko iyo aza kuba yarakoze amakosa yari kubihanirwa atari kwimurwa ngo ajye kuyobora Ururembo rw’Amajyepfo kuko ngo yaje na hano avuye kuyobora Ururembo rw’Amajyaruguru.

Umushinga wo gusana izi nzu wajemo ikibazo urahagarikwa
Umushinga wo gusana izi nzu wajemo ikibazo urahagarikwa

Amafaranga yishyurwa n’abayoboke

Amafaranga yo gushyira mu ngiro uyu mushinga ni inguzanyo ya Banki, amakuru avuga ko kuva kuya mbere Kanama 2018 buri Paruwasi ya ADEPR Iburengerazuba yasabwe gutanga 2% by’amafaranga asanzwe abagarukira kugira ngo ajye muri uyu mushinga.

Inama y’ubutegetsi ya ADEPR yasanze ibi bidakwiye ndetse inenga abashumba bose bo muri uru rurembo. Naho Pst Sebadende we arimurwa.

Mu kindi kibazo cy’imicunire mibi y’imari y’iri torero, umwaka ushize uwari Umuvugizi wa ADEPR Bishop Jean Sibomana n’uwari umwungirije Bishop Tom Rwagasana hamwe n’abandi bari muri Komite yabo bafunzwe bashinjwa kunyereza amafaranga arenga miliyari ebyiri n’igice, nyuma bararekurwa ngo bakurikiranwe badafunze, urubanza rwabo byari biteganyijwe ko rusomwa uyu munsi.

ADEPR yiyemeje kwishyura aba bakozi ubundi bagera kuri 70 ibindi bikazakurikiranwa nyuma
ADEPR yiyemeje kwishyura aba bakozi ubundi bagera kuri 70 ibindi bikazakurikiranwa nyuma

Jean Paul NKUNDINEZA
UM– USEKE.RW

 

0 Igitekerezo

  • Buriya se iriya nzu niyo igomba kubakwa na miliyoni 250!! Abaryi baragwira!! Ahantu uzajya ujya ukumva baravuga amafranga aho kuvuga urukundo, bagatera amahane aho guhana amahoro, ujye uhita umenya ko Imana iba yahitaruye igategereza ko hagaruka ituze. Maze bagasigara bakoreshwa n’ibirwanira mibiri yabo gusa, nta mwuka wera ubagira inama.

    • YESU yavuze ko amadini y’ikinyoma tuzayamenyera ku mbuto yera.ADEPR ikabije gushinjwa ubujura n’ubuhemu.Namwe munyumvire ukuntu Abayobozi b’idini “mu rwego rw’igihugu” bashinjwa kwiba milliard/billions 2.5.Barangiza bakajya imbere y’abayoboke babo ngo “buzuye umwuka wera”.C’est dommage kabisa.

      • @masengesho ese waba uzi uwagambaniye Yesu idini yarimo ese ryari iry’ikinyoma cg niryo nawe wayobotse usome neza bibiliya uzasanga mu itorero rya Kristo hazaba harimo ubwoko bwose bw’abanyabyaha

  • Iyo abantu bitwa ko bakiriye agakiza batera amahane bakanambura, bigasaba ko ikibazo cyabo gikemurwa n’abandi barimo n’abatemera Imana (bo mu nzego za Leta) cyangwa batakiriye ako gakiza, baba bishyize ku karubanda.

  • Arikose nk ibyobintu byokwiba babihagaritse SEBADENDE uwo avuye mumajyarugu atanze inka zabaringa atesha agaciro gahunda ya Nyakubahwa Perezida wa Repuburika ya GIRINKA none ageze muburengerazuba ashenye amazu atabivuze ngo abone uko yiba bati turakwimuye ubwo habuze umusimbura kuburyo yakomeza gukora amakosa angana atyo aranabeshya kuko yasabye imbabazi ibaruwa irahari none arimo kubeshya itangazamakuru jye ndasaba ubuyobozi bwa ADEPR kumufatira ibyemezo kabisa.

  • Ibibazo biragwira rwose! Ubu se abanyarwanda b’abayoboke ba ADEPR bazakizwa nande ibisambo koko? Umuco mubi wo kwiba no kunyereza umutungo w’Itorero warimitswe burundu? Uyu Rev Sebadende yavuye mu majyaruguru atanze inka za baringa none ageze mu burengerazuba ati ngasenya amazu kugira ngo mbone uko ndya! Ubu se ko abeshya, Inama y’Ubuyobozi yahagaritse ko izo nyubako zikomeza kubakwa, iramugaya we n’abo yashutse kugira ngo umugambi we ugerweho itabonye ikibazo? Gusa impamvu avuga biriya ni uko ahubwo batamwirukanye kuko ubundi unyereza umutungo wa rubanda akwiye kwirukanwa kandi agakurikiranwa mu nkiko. None ngo nta kibazo? Inama nagira ADEPR uwibye cyangwa yakoze amakosa akomeye ajye ayahanirwa aho kumwimura kuko kwimura umuntu si ukumuhana ahubwo ni uguhana uwo umusimbuje ngo aze arwane no gukosora amakosa uwayakoze yigaramiye cyangwa wenda anakomeje gukora n’andi aho yimurirwe.

    ADEPR kandi mbona ikwiye gushyira imbere ubuyobozi butajenjeka bukumira bukanahana bwihanukiriye abiba ibya rubanda n’abababatekera imitwe. Kuba baramunenze si igihano ahubwo yari akwiye guhagarikwa akanashyikirizwa inkiko kuri aya makosa. Leta nayo ntirebere gusa kuko ibikorerwa muri ADEPR birakabije. Ubwo se iyo umuntu agambirira gukusanya miliyoni 250 mu baturage yitwaje ko ari pasitori, Guverineri cyangwa Meya bo babona badakwiriye kubibera maso? Kuko njye mperutse kujya gukorera mu burengerazuba ariko numvaga abaturage n’abapasiteri bato bitotombera aya mafaranaga bongeye gutangira kwakwa bitari ngombwa. Bavugaga ko batangiye kuyakwa kuva tariki ya 1 Kanama 2018. Ahubwo se ubwo yagiye he niba n’abakoze baramaze amezi abiri badahembwa bigasaba ko bigaragambya kugira ngo bisyurwe imibyizi yabo? ADEPR iki nacyo mugikurikirane. Leta ni ifashe ADEPR kwimakaza imiyoborere myiza kuko ndabona urwishe ya nka……..

  • Ntitugakunde byacitse! Kuba urwego runaka rwatanga isoko rirenze ubushobozi bwaryo ni erreur iboneka henshi kandi ntibivuga buri gihe ko biba bigamije kurya amafr. Ikizima ni uko ubuyobozi bukuru bwemera guhemba abaturage ibindi bikazakurikiranwa bitonze. Guhagarika imirimo rero ngo bishyirwe ku murongo ndumva nta kibazo. Naho @Gahinda wibaza niba inzu imwe ariyo itwaye 250m ntacyo umunyamakuru abivugaho kandi amafoto bashyizeho si inzu 1. Tujye twirinda guhita duca imanza no gushakisha icyashyira icyasha ku bandi!

  • Uyu QUELQ’UN ndumva uwamuha kuyobora yabidogereza! Ngo urwego runaka gutanga isoko rirenze ubushobozi bwarwo ni erreur iboneka henshi? Ibi uvuga se icyo wita erreur ni iki? Iboneka he? Waba uzi amategeko agenga imitangire y’amasoko n’icyo ateganya? Waba se uai inzira bicamo? Ese niba wasomye inkuru neza ntiwabonye ko ikibazo atari ugutanga isoko rirengeje urwego ubushobozi ahubwo isoko ubwaryo ryatanzwe urwego rukuru rufite ububasha bwo kugenzura no kwemeza ibigomba gukorwa rutanabizi? Ntiwasomye se ahubwo ko ubuyobozi bukuru bwabimenye amazu yaramaze gusenywa, akaba ari bwo urwo rwego uvuga rubimenyesha nabwo rujya gusaba inguzanyo izishyura? Hatangwa isoko ubshobozi bwo kuryishyura budahari? Byanarangiza bagaca aha bakaka abaturage amafaranaga, ndetse bakanongeraho kujya gusaba ko bemererwa guhabwa inguzanyo izishyura iryo soko? Ari wowe biriho uyu munsi ibi nkaba mbivugiye mu rukiko ubanza bitarangira ba bagabo bakubita inyundo hasi batarugukaniye! Ntimugashake gushyigikira imikorere mibi no gushaka kuzimanganya ibibi bikorwa mubyita erreur! Ibi birimo amakosa akomeye yo mu kazi n’ibyaha bihanwa n’amategeko. Ahubwo uyu mugabo ni akurikiranwe ntibirangirire aho! Uwo twashakanye ni umu ADEPR ariko iyo urebye amafaranaga babatumaguza buri munsi kumbe baba bagira ngo birire ntiwaba uvuga gutya ugamije kubaka no gutuma abandi banyarwanda babaho mu mahoro badasahurwa!

  • Uti bakunda byacitse none se iyo umuntu nka Rev. Sebadende akora biriya aba azi ingaruka zabyo cyangwa, reka mvuge amakosa akomeye yakoze 1.gutanga isoko atabifitiye uburenganzira
    2.Gusuzugura nkana inzego zimukuriye kuko nkiyo avugango ikigali bari babizi Umuvugizi we avugako babimenye byarangiye ubwo turemera ibyande tureke ibyande
    3.kutubaha ibyemezo by’inama yize kuri icyi kibazo.
    4.Kujijisha inzego za Leta zaho yakoreraga(iburengerazuba)
    5.kwaka amafaranga abaturage babakristo 2% ariko ntanimpuhwe mugira kweri ubwo uzanye indi Gisozi koko mwaretse aba Kristo bakaruhuka
    Nagirango nibutse Sebadende ko akwiye gushyira agatima impembero akareka system yo kwiba kunyereza yo kwa Tomas kuko ibintu byarahindutse cg niba bimunaniye yegure kuko gahunda y’igihugu cyacu irasobanutse ntabwo warutysaho wiba ngo nuko uri mwidini Leta yacu iri maso nyamara.

  • Mugire amahoro nubwo bitoroshye abashumba nibyo birura bisigaye byihisha muntama?iyimyumvire ntamushumba ukwiye kuyigira,ariko iri nitorero ry’umwuka imana izajya ibagaragaza.ubwose uyumupastor ntazi aho abantu bageze biyubaka none arashaka kongera kwaka amafaranga abakristo gutyo?icyomvuze harabyumva.ubuyobozi imana ibahe umugisha batsinze kugoboka bakahatubera ngo tutagomeza guseba,abobose babategurire ibihano bibakwiye

  • Mwiriwe Rev.Sebadende Emmanuel niba nakurikiye neza ntabwo akwiye gukomeza kuyobora kuko yavuye mumajyaruguru atanze Inka zabaringa,kunyereza umutungo w’abakristo hano twavuga imodoka ya V8 yahoraga mwigaraje amafaranga yatwaye ntawayabara none iburengerazuba umva miliyoni zirenga 250 zari zigiye gusahurwa hanyuma abakristo bakazazishyura.Biro nifate icyemezo cyo kumwiruka kuko nibikomeza gutya ntabwo Itorero rizakira

  • Rev.Sebadende arakabije nawe da

Subiza

Your email address will not be published. Required fields are marked *