• 16/12/2019 2:50 17

Ibibazo byugarije umuryango: Evode, Solina na Sr Immaculée uko babibona

Umunyamabanga wa Leta ushinzwe Itegeko Nshinga n’andi mategeko, Evode Uwizeyimana yabwiye Inteko Ishinga Amategeko ko ibibazo byugarije umuryango nyarwanda bishingiye ku kutabasha kujyanisha umuco n’iterambere kandi bidakwiriye gukomeza kureberwa hejuru mu mategeko ahubwo abantu babihera mu muryango mugari.

Minisitiri Solina Nyirahabimana avuga ko bene ibi bibazo byakemuka abantu basubiye ku muco
Minisitiri Solina Nyirahabimana avuga ko bene ibi bibazo byakemuka abantu basubiye ku muco

Hari mu nama nyunguranabitekerezo yahuje abagize Inteko Ishinga Amategeko n’abandi bayobozi n’abafatanyabikorwa ba Leta bafite aho bahuriye no gukemura ibibazo binyuranye bibangamiye umuryango nyarwanda, kuri uyu wa kane tariki 6 Ukuboza.

Ibibazo byagarutsweho byugarije Umuryango Nyarwanda ni; amakimbirane mu bashakanye, ubusambanyi, ibiyobyabwenge, ababana nta sezerano, guhishanya imitungo kw’abashakanye, ibibazo bituruka ku guta umuco n’indangagaciro n’ibindi.

Solina Nyirahabimana Minisitiri w’Uburinganire n’Iterambere ry’Umuryango avuga ko kuva 2005 aribwo hashyizweho Politiki igamije kubaka umuryango utekanye ariko hakiri imbogamizi zikomeye.

Ati “Politiki zishobora kuba nziza, amategeko akaba meza abantu bakagerageza gushyira mu bikorwa ibyo byose ariko ntibihagije, hakenewe ubufatanye bwa bose ngo ibibazo biri mu muryango bibashe gukemuka.”

Minisitiri Nyirahabimana avuga ko ibi bibazo bishobora gukemuka abantu basubiye ku muco bakareba uko abo hambere basigasiraga umuryango n’uko bakemuraga amakimbirane.

Ku mpamvu z’ibibazo byugarije Umuryango Sr. Immaculée Uwamariya washinze Famille Espérance (FAES) avuga ko ababyeyi batagifata umwanya ngo baganirize abana babo no kwita ku burere bwabo bitewe no gushaka amafaranga. Ngo hari abashakana batazi inshingano zabo bagashaka gukomeza kubaho mu buzima babagamo bakiri ingaragu.

Soeur Marie Immaculee avuga ko hari abashakana bagakomeza gushaka kubaho nk'ingaragu
Soeur Marie Immaculee avuga ko hari abashakana bagakomeza gushaka kubaho nk’ingaragu

Umunyamabanga wa Leta ushinzwe Itegeko Nshinga n’andi mategeko, Evode Uwizeyimana we avuga ko ibibazo biri mu muryango nyarwanda ahanini bishingiye ku iterambere ababyeyi batabasha guhuza n’umuco ngo bafashe ababyiruka kubijyanisha.

Ati “Abantu ntibakwiye gukomeza kwizirika ku bya kera ngo bari ku muco kuko ntibajyana n’aho isi igeze.”

Avuga kandi ko usanga hari ibisubizo abantu n’abayobozi bahora bavuga ariko bakongera bakabisubiramo kuko bidashyirwa mu bikorwa.

Usanga abantu ngo bashaka guhana icyaha cyabayeho ariko ntibashake gukurikirana ngo bakemure icyagiteye. Ibi kuri we ngo ni nko kuvura ibyuririzi by’indwara ntuvure indwara.

Nko mu by’uburinganire ati “Dukwiye kwigisha neza abantu politiki ya Gender bakayumva neza, bakumva ko guteza imbere umugore bitavuze gukandagira umugabo. Ntekereza ko dukwiye guteza imbere ikintu cya ‘respect mutuel’.”

Min Evode Uwizeyimana atanga ikiganiro ku bibazo byugarije Umuryango Nyarwanda
Min Evode Uwizeyimana atanga ikiganiro ku bibazo byugarije Umuryango Nyarwanda

Nk’amategeko ngo aratorwa, akanakomezwa ku bakora ibyaha ariko ngo usanga abaturage benshi batanayazi nyamara abagiraho ingaruka mu buzima buri munsi.

Ku bibazo byugarije umuryango usanga ngo umwana muri iki gihe ababyeyi batamuganiriza ku buzima bwe bw’imyororokere, mu gihe umwana wa kera aya makuru hari uburyo yayabonagamo mu muryango.

Evode Uwizeyimana yibaza niba inama nk’izi zigenda zikagera no ku bo zikwiriye kugirira akamaro.

Ati “Ubundi ikibazo gihari ni ukwibazo ngo ‘ibi bintu tuvuga hano turabikora? cyangwa turabisiga hano?’  Ntekereza ko dukwiye kureka gukomeza gukabakaba uruhande rw’ikibazo tukareba ikibazo kuko ntabwo ibibazo bikemurwa no kubyifuza ahubwo bikemurwa no kugira icyo ukora ngo bikemuke

Abagize Inteko Ishinga Amategeko basabye ko abayobozi barushaho kumanuka bagasobanurira Abanyarwanda amategeko kuko ngo kuyavuga gusa bidahagije.

Josiane UWANYIRIGIRA
UM– USEKE.RW

0 Igitekerezo

  • Tureke kubica iruhande, politiki y’uburinganire ifite uruhari rutari ruto mu isenyuka ry’umuryango kubera ko abagore bamwe bayifashe nk’aho ije kubafasha kwigaranzura abagabo, mu gihe hari n’abagabo bamwe bayifashe nk’aho igamije kubagira inganzwa.

  • Amategeko amwe abadepite bacu batora afite uruhare mu kudurumbanya Irene ry’umuryango.

    Dufashe urugero nko mu itegeko rireba umuryango aho bavuga ko mu rugo rw’abashakanye umugabo atari umutware w’urugo, ibyo rwose ni ikosa rikomeye abatora amategeko bakoze kuko birengagije umuco karande nyarwanda none ubu bikaba biteye impagarara mu miryango imwe n’imwe.

    Muri iki gihe hari abagore basigaye bajya gufata inguzanyo muri banki bakanatanga ingwate y’isambu y’umuryango abagabo babo batabizi. Ibyo ugasanga birazana amakimbirane muryango.

  • Amategeko mugenda mushyiraho niyo agenda asenya umuryango buhoro buhoro, ibitekerezo biza ngo umugabo si umutware w’urugo, ngo bose bararinganiye,… maze byagera mu njiji ziri hano hanze ugasanga zirisenyeye nibyo byeze. Guterura amategeko abazungu bagenderaho ukayazana mu Rwanda uko yakabaye bizatwerekeza habi, ibi kandi Evode uyu wigiza nkana ari mu bayazana kandi arimo no kubyivugira ko ngo tutagomba kuguma ku muco nyarwanda ngo tugomba kugendana n’ibigezweho!!! Ngaho aho ruzingiye.

    Ko urugo rwamunaniye mwumva yatanga musanzu ki wo kubaka iz’abandi? Ubu mu minsi iri imbere ntimuri hafi kuzana niryemera ubutinganyi?

    Nimwicecekere twagenderewe na free masonry n’ibitekerezo byayo bigamije kurimbura umuryango hitwajwe icyiswe “ubwigenge bwa muntu” ngo no gushimisha abazungu.

    Ntimukavugengo ababyeyi ntibaganiriza abana kandi muzi amategeko mwihyiriyeho abuza umubyeyi kurera umwana ufite umuco nyarwanda, turi kurera ibirara nyine. Mu minsi iri imbere haduhishiye byinshi.

  • @ Ryamukuru, Rwayitare, Bagabo ….. Igipimo isi igenderaho cyarahindutse ntimwabimenya! Umutware ni ufite akantu, ibindi ni ibigambo. Niba ntako umeze umugore wawe aryibitseho, ubwo ni wowe mugore, we ni umugabo. Araje avuge ryijyane. Muve hasi musubirane ubutware niba mubutsimbarayeho! Bitabaye ibyo muyoboke!

  • Igisubizo kubyo yabwiye padiri mu mushyikirano ngo wowe nta rugo ugira ubwo mukaba mubinyuze inyuma.Kuko yanzanye Ma soeur. Abanyarwanda bitwa Hishamunda erega.

  • Uwabyishe ni uwabemereye kujya muri guverinoma mutujuje ubuziranenge. Ukumva ministre w’umuryango ntabana n’umugabo! Uwo aba aje kubaka uruhe rugero muri iyo ministeri ishinzwe umuryango?! Ukumva undi ngo yananiranye n’uwo bashakanye barangije bamushinga gutegura amategeko agenga umuryango! Turagana he?!

Subiza

Your email address will not be published. Required fields are marked *