• 24/01/2020 3:24 09

i Paris: Kagame yasobanuye uko ikoranabuhanga ryahinduye u Rwanda

Perezida Paul Kagame yitabiriye inama Mpuzamahanga yiga ku ikoranabuhanga, Viva Tech 2019 yabereye i Paris, yari kumwe na Perezida Macky Sall wa Senegal, yabwiye abitabiriye iriya nama ko ikoranabuhanga ryahiryuye imikorere mu bintu byinshi mu Rwanda.

Perezida Paul Kagame na Macky Sall wa Senegal bombi batanze ibiganiro muri VivaTech2019

Yabwiye abitabiriye inama ko nyuma y’ibihe bibi u Rwanda rwanyuzemo rwabashije kubona imbaraga zo gukora ibikomeye.

Paul Kagame yavuze ko mu myaka 25 igihugu cyahereye munsi ya zero kuko ibintu byose byari byarangiritse na benshi mu bagituye barahunze.

Nyuma yabyo ngo u Rwanda rwatangiye inzira yo kwegeranya abantu, ubwiyunge no kwita ku mutekano wabo, n’ubutabera, ibyo ngo ntibyari akazi koroshye.

Ku bijyanye n’impinduka u Rwanda rwagize, Perezida Paul Kagame yavuze ko hatangiye gutekerezwa impinduka mu mibereho n’ubukungu kuko ngo ntibyari kugarukira ku gutanga ubutabera, ubumwe n’ubwiyunge  no gushakira umutekano igihugu ngo abantu biturize.

Yavuze ko kugira ngo Abanyarwanda babashe kubaho inzira yose yagombaga gutekerezwa. Yavuze ko amahanga yari ikibazo mbere yaje kuba igisubizo ku Rwanda, ibikorwa by’ubugiraneza, ibihugu byose n’ibikomeye byongera kugira uruhare mu gushora imari no kubaka igihugu.

Ati “Rimwe na rimwe ubu buryo bwazanaga n’ibindi bibazo kuko iyo umuntu aguhaye ikintu ukeneye, hari ubwo agusaba kugira amabwiriza ukurikiza n’aho ibyo aguhaye ubushyira kabone n’iyo kuri wowe byaba atari byo byihutirwa.”

Ibyo byose ngo u Rwanda rwaje kubasha kubana na byo, ndetse rutekereza ubundi buryo bwo gukora rukabirenga.

Yavuze ko hari uburyo u Rwanda rwahisemo gukemura ibibazo byarwo, nk’aho mu butabera rwarenze inzira zisanzwe rugakoresha Gacaca rugakemura ibibazo by’imanza zirenga miliyoni.

Ati “Ni gute waburanisha abantu miliyoni irenga mu buryo busanzwe bw’inkiko? Wakenera inkiko zingana iki? Byari gutwara imyaka ingana iki kugira ngo abo bose babone ubutabera?”

Perezida Kagame yavuze ko mu myaka 12 iyo nzira y’ubutabera yatumye imanza miliyoni zicibwa kandi ku kiguzi cya miliyoni $37 mu gihe imanza zaciwe n’Urukiko Mpuzamahanga Mpanabyaha rwashyiriweho u Rwanda zari 62 zitangwaho miliyari $2.

Icyakurikiyeho ngo ni ugutekereza uburezi, ubuzima, ubutabera, ubuhinzi, ibikorwa remezo, kandi hagatekerezwa uko bikoresha ikoranabuhanga no kubaka ubukungu burishingiyeho.

Yagize ati “Abantu bari bamenyereye kutubwira ngo Abanyarwanda mufite ikibazo, ni gute muvuga gukoresha ikoranabuhanga mu gihe igihugu cyasenyutse, uburezi budakora, mukeneye kubaka ubuzima. Ati ‘Twababwiye ko nta kibazo tubibonamo. Gukoresha ikoranabuhanga byari bigamije ko buri gice cy’ubuzima ririmo gitanga umusaruro uko bikwiye ukiyongera.”

Kagame yabwiye abitabiriye VivaTech2019 ko ikoranabuhanga rigerwaho rikomoka ku mavugurura y’ikoranabuhanga ryatambutse, bityo ko mu gihe kiri imbere ikoranabuhanga rizayoborwa n’iririho ubu rizaba ryavuguruwe, bityo hakaba hakwiye kubakwa ikiraro ku bariho ubu kugira ngo abazaza bazajyane n’iryo koranabuhanga rizaba rigezweho.

Yavuze ko ibihugu bya Africa na byo bitasigaye inyuma ngo bigerageza uko bishoboye bikajyana n’ikoranabuhanga ndetse bigashoramo imari uko bishoboye.

Kagame ati “Biragaragara cyane ko tutari dukwiye kwiheza twebwe ubwacu nk’ibihugu. Nyuma uzasanga ufashe igihugu kimwe cyonyine ari gito cyane kuruta uko wakwishyira hamwe n’ibihugu byose bigize Akarere cyangwa Umugabane. Twashyizeho ihuriro mu by’ikoranabuhanga (Smart African Alliance) rihuriza hamwe ibihugu bifite abaturage miliyoni 600.”

Yavuze ko hakenewe kwihuza mu birebana na politiki ariko no mu zindi nkingi z’ubuzima bw’ubukungu, mu rujya n’uruza rw’abantu bava mu gice iki n’iki bajya mu kindi muri Africa, kandi ngo barashaka no kwihuza mu gukoresha ikoranabuhanga.

Ati “Mu bijyanye n’itumanaho, igihe twagira umuyoboro umwe, byakoroha cyane, byashyira hamwe batuye Africa, byahenduka cyane. Tugomba gukora ku buryo iri koranabuhanga ryorohera abaturage kuribona ku buryo abantu bongerera agaciro ibyo dukora.”

Kagame avuga ko ikoranabuhanga rifite akamaro kanini cyane, rihuza abantu kandi rikihutisha serivise ndetse rigatuma umusaruro wiyongera.

Ku Rwanda ikoranabuhanga mu miyoborere ngo ryafashije mu mitangire ya serivise zihuse kandi mu buryo bworoheye abazikeneye mu byitwa ‘e-government’.

Yagize ati “Imiyoborere ishingiye ku ikoranabuhanga yatumye tuzigama amafaranga menshi, kandi twunguka byinshi. Twasanze gukoresha ikoranabuhanga bifasha gukusanya amafaranga menshi kandi bikagabanya ibihombo byakabaye bibaho mu nzira yo kuyakusanya.”

Perezida Kagame yavuze ko ikoranabuhanga rikoreshejwe nabi ryagira ingaruka, ariko avuga ko hagomba kubaho uburyo bwose bwo kugabanya ibyatuma rikoreshwa nabi.

Muri iyi nama y’i Paris, Perezida yanaboneyeho umwanya asura ikicaro cy’Umuryango w’Ibihugu bivuga Igifaransa uyobowe na Louise Mushikiwabo.

Viva Tech 2019 itegurwa n’ikigo kitwa Publicis Groupe kiyoborwa na Maurice Lévy usanzwe ari inshuti y’u Rwanda. Yitabiriwe n’abahanga mu ikoranabuhanga, abafata ibyemezo bya Politiki, abashinze ibigo bikomeye bitanga serivisi zikoresha ikoranabuhanga n’abandi.

Muri bitabiriye iyi nama barimo Jacky Ma washinze Alibaba, Mark Zucherberg washinze Facebook n’abandi.

Perezida Kagame yasuye aho umuryango wa Francophonie ukorera aganira na Louise Mushikiwabo uwuyobora
Perezida Kagame Paul yafotowe ari kumwe na Louise Mushikiwabo n’abandi banyacyubahiro

Amafoto: Internet

UMUSEKE.RW

4 Ibitekerezo

  • Abazi ibintu mujye munsobanurira, buriya hari inama yabera mu Rwanda, Perezida w’ikindi gihugu akayitabira, nyamara Perezida Kagame ntayigaragaremo, yewe n’uwo mushyitsi akazataha atabonanye na mugenzi we?!
    Ese iyi nama ntiyakagombye kuba yitabiriwe na Ministre ufite ikoranabuhanga mu nshingano ze?!
    Ibi binyibukije igihe Perezida Kagame yagayiraga abayobozi bakuru b’igihugu cyacu bahoraga mu ngendo zidashira ku cyicaro gikuru cya EAC! Ubanza barabicitseho. Natwe tuzarebe ingendo zikwiriye umukuru w’igohugu cyacu tujye tujyayo aho kumuhoza mungendo.

    • Ministre w’ Ikoranabuhanga nta gifaransa azi , yajya mu Bufaransa gukora iki ?

      • Eh uziko aribyo!!! Kandi koko Nyakubahwa we arakizi niyo mpamvu yagombaga kujyayo

  • Mbere yo kwandika comment mujye mubanza kumenya amakuru neza.
    Impamvu president yagiye France nuko afite inshingano zimwe batadusobanuriye. Ntabgo rero yagiye gutembera. Kandi simwe mwamugirira impuhwe z’ingendo kuko yarabyiyemeje, kuba president sukwicara ukarya ukanywa ukabyibuha. Cfr Kabila Joseph . Mbona jye izo ngendo ntacyo zimutwaye. Uretse ko ingendo z’indege si nziza ku buzima bwa muntu noneho ukongeraho kugenda imigabane itandukanye mu bihe bitandukanye. Uyu musaza arakomeye.

Subiza

Your email address will not be published. Required fields are marked *