• 18/01/2020 6:48 34

Huye: Akarere kimuriye abaturage mu gakiriro gafite ubwiherero budakora

Abakorera mu gakiriro ka Sovu muri Huye bavuga ko Akarere ka Huye kubatse kariya gakiriro kagahaye ubwiherero budakora. Ngo bagerageje kwiyubakira ubwabo ariko ni buto bityo babubyiganiramo. Ibi ngo bituma bamwe bajya kubutira mu bagaturiye, rimwe na rimwe bakahahurira ari benshi bamwe bagategereza bigatuma bakererwa mu kazi, kagapfa. Aka gakiriro katangiye muri 2016.

Ubu bwiherero bwubatswe n’Akarere ubwo kubakaga Agakiriro ka Sovu ngo ntibwigeze bufungurwa na rimwe.

Abaturage bakorera muri kariya gakiriro basaba ubuyobozi bw’Akarere ka Huye kureba uko bwabatera inkunga runaka hakubakwa ubwiherero bugari kandi busa neza.

Agakiriro ka Sovu  gahakorerwamo imyuga inyuranye irimo ububaji, gusudira n’ubundi bukorikori.

Hirya gato y’ako gato hari  inzu irimo ubwiherero ariko imiryango yabwo irafunze.

Abahakorera  bavuga ko ubwo bwiherero kuva babuhabwa n’akarere butarakoreshwa na rimwe. Nta mazi bugira kandi buhora bufunze.

Bavuga ko bamaze kubona ko ubwo bwoherero nta kamaro bubamariye kuko bufunze, bahisemo kwicukurira ubwabo bufite imiryango ibiri ariko ngo ni buto ugereranyije n’abakenera kubukoresha.

Umwe mu bakorera muri aka gakiriro utashatse gutangaza amazina ye agira ati: “Ikifuzo ni uko badukorera ubwiherero bukwiranye n’agakiriro kuko hari ubwo umuntu usanga asize nk’ibikoresho bye yagaruka agasanga wenda undi arabikoresheje kandi ikibabaje cyane ni uko usanga bidufata umwanya tujya gutira ubwiherero hanze y’agakiriro ugasanga bigaragara nabi.”

Banenga ubuyobozi bw’Akarere bwabimuriye mu gakiriro katujuje ibyangombwa byose.

Ange Sebutege uyobora Akarere ka Huye avuga ko iki kibazo bagiye kugikurikirana bakareba neza ikigitera.

Sebutege avuga ko bazongera  umubare w’ubwiherero kuko n’umubare w’abahakorera ugenda wiyongera.

Ati: “Biragaragara ko agakiriro ka Sovu gakenewe ubwiherero bwinshi kurushaho bitewe n’umubare w’abagakoreramo wiyongera. Ubu ikibazo cy’ubwiherero tugiye kugikurikirana tunaganire n’abahakorera uburyo umubare wabwo wakwiyongera ukagendana n’uko abantu bahakorera bagenda biyongera.”

Kugeza ubu abantu 81 nibo bakorera mu gakiriro ka Sovu ariko ushobora kuziyongera bitewe n’abandi bashya bashobora kuzakitabira.

Abakorera mu gakiriro ka Sovu bibaza impamvu Akarere ka Huye kabimuriye mu Gakiriro kataruzuza ibyangombwa byose ngo bakore neza
Ubu ni ubwiherero biyubakiye ariko ngo nabwo ni buto, bigatuma bajya gutira mu baturiye agakiriro kandi ngo ‘bigaragara nabi’

UM– USEKE.RW/HUYE

2 Ibitekerezo

  • Nyabuna mugerageze.
    (mbona abanyarwanda tunakeneye n’ubukangurambaga ku miterere n’imikoreshereze y’ubwiherero bwa kizungu. Binashyizwe mu nteganyanyigisho mu mashuri byadufasha cyane mu gutegura abadukomokaho kuri iyo ngingo).

  • Ariko inkubiri iba mu kugenzura abikorera n’insengero kuki bidahera mu rugo ngo nyuma bijye hanze yarwo (ndavuga ibikorwa bya leta) nk’amasoko, amashuri ya leta, ibiro guhera mu kagari kugera ku karere. Iyo ugiye mu masoko kubona ubwoherero ntibyoroshye naho ububonye umwanda uba uhari ntawawuvuga, ku biro by’utugari n’imirenge naho nuko ntiwapfa kubona ubwiherero naho buba buri buba bufunze nawe urabyumva umuturage yagiye kubwira gitifu ngo mpa ubwiherero!!! Ngaho mbwira nkako gakiriro katagira toilet kandi ubwo uwakubwira insengero zafunzwe kubera ibibazo nk’ibyo, Restorant n’ahandi. Jye sinanze ibyo Leta isaba abantu kubahiriza harimo n’ibyo byo kugira ubwiherero ahantu benshi bahurira kuko ni nyungu z’abaturage bose ariko ndabasaba nabo kwibuka ibikorwa remezo byabo nabyo birebwa nayo mabwiriza. Ubwo rero mbere yo kwirirwa biruka ku bandi nabo nibabanze batunganye ibidatunganye iwabo.

Subiza

Your email address will not be published. Required fields are marked *