• 29/01/2020 12:22 46

Hari gutegurwa itegeko rishya rigenga ibigo bicunga umutekano

Ibi byatangajwe n’Umuyobozi wa Polisi y’u Rwanda wungirije CP Felix Namuhoranye mu kiganiro yahaye abayobora ibigo biyifasha mu gucungira umutekano w’ibigo by’abikorera na bimwe mu bya Leta. Ngo iri tegeko rizaba rigamije kongerera biriya bigo ubunyamwuga no kurushaho kurengera umutekano w’abaturage.

Itegeko ryishya ngo rizafasha abarinda ibigo kurushaho kugira ubunyamwuga no gukorera mu mimerere myiza kurushaho

CP Namuhoranye yabibukije ko umutekano w’Abanyarwanda ari ikintu bakwiye gufatana uburemere bukomeye kandi ko itegeko rizaba rigamije kurushaho kunoza uburyo bacungirwa umutekano.

Bimwe mu byo yavuze bizaba bikubiye muri ririya tegeko harimo kumenya niba ikigo runaka gishaka kubona uburenganzira bwo kurinda umutekano gifite aho gitoreza abakozi bacyo, kureba niba gifite ibikoresho n’ibindi.

Yasabye ko bazariganiraho muri aya mahugurwa y’iminsi ibiri bakarimenya kandi bakaba batanga ibitekerezo by’uko bumva ryakorwa kuko aribo rizaba rireba kurusha abandi.

CP Félix Namuhoranye yongeye kubibutsa kuba maso mu kazi kabo kuko ngo hari ingero zerekenye ko muri bimwe mu bigo barinda hajya hakorerwa ibyaha birimo kunywa ibiyobyabwenge, urugomo, ifata ku ngufu n’ihohotera n’ibidi

Ati: “ Mukomeze mugenzure aho mukorera kugira ngo hatazagira ubaca mu rihumye akaba yahakorera icyaha.”

Andrew Nkurunziza uyobora ishyirahamwe ry’ibigo bicunga umutekano mu Rwanda yavuze ko ririya tegeko rizabafasha kurushaho kunoza imikorere kuko ngo mbere hari bimwe bitakorwaga neza.

Muri byo ngo harimo gukoresha amasaha y’ikirenga abakozi babo no kutabagenzura neza mu mikorere.

Yashimye imikoranire hagati ya Police y’u Rwanda n’ibindi bigo bicunga umutekano, avuga ko ituma akazi kabo gakorwa neza kandi aho bakeneye ubufasha bakayibusaba ikabutanga.

Nkurunziza yavuze ko kugeza ubu mu Rwanda hari ibigo bicunga umutekano bikorana na Police bigera kuri 17.

Muri 2013 ngo ntibyarengaga 13.

Ibi bigo bikoresha abakozi ibihumbi 27 mu Rwanda hose.

DIGP Felix Namuhoranye yabasabye kurushaho gucunga umutekano mu bigo byabo kugira ngo hatazagira ubaca mu rihumye akawuhungabanya
Abayobozi b’ibigo bicunga umutekano bikorana na Police bari mu nama y’iminsi ibiri
Ni inama izamara iminsi ibiri baganira uko barushaho kunoza umutekano mu bigo bakoreramo

Jean Pierre NIZEYIMANA

UM– USEKE.RW

Subiza

Your email address will not be published. Required fields are marked *