• 29/01/2020 3:44 37

Haje uburyo bushya bwo kugura Gaz nk’uko bagura amashanyarazi

Haje uburyo bushya bwo kugura gaz yo gutekesha busa n’ubusanzwe bwifashishwa mu kugura unites z’umuriro w’amashanyarazi ku buryo uzajya aba afite 500 Frw azabasha kugura unites za gaz zashiramo igahita ihagarara gukora bigasaba uyikoresha kongera kugura izindi.

Icupa ry’iyi gaz ririho mubazi

Ubu buryo buzanywe na Kompanyi isanzwe icuruza serivizi n’ibikoresho bijyanye n’ingufu zikomoka ku mirasire y’izuba BBOXX , ngo buje gukuraho imbogamizi z’abantu badafite amikoro ahagije bifuza gutekesha gaz n’abasanzwe bayikoresha byajyaga bigora kugura indi iyo yabaga ishizemo.

Icupa ririmo iyi gaz, ririho mubazi [izwi nka Cash Power] umuntu azajya yifashisha mu kongeramo gaz bitewe na unites azajya aba yaguze yifashishije ikoranabuhanga rya Mobile Money.

Umunyamabanga Uhoraho muri Minisiteri y’Ibikorwaremezo, Eng Patricie Uwase avuga ko ikoreshwa ry’ibikomoka ku biti [Inkwi n’amakara] mu Rwanda riri kuri 79% mu gihe Leta ifite intego ko muri 2024 iki gipimo cyazaba cyaragabanutseho 1/2.

Avuga ko iki gikorwa k’iriya Kompanyi cyo korohereza abaturarwanda gutekesha Gaz kije kunganira Guverinoma kugera kuri iriya ntego yihaye.

Bamwe mu banyarwanda baracyafite impungenge zo gutesha gaz batinya ingaruka zayo kuko no mu minsi ishize yagiye iteza ibibazo by’inkongi zanatwaye ubuzima bwa bamwe.

Eng. Uwase Patricie uvuga ko abatekesha gaz bakwiye kubikorana ubushishozi, avuga ko mu rugendo rwo kugabanya ikoreshwa ry’ibikomoka kuri biti Leta izakomeza gukora ubukangurambaga bwo kwigisha abaturarwanda uko bakwiye gukoresha gaz neza.

Abazajya bakenera ubu buryo bushya bwo gukoresha gaz, bazajya bishyura ibihumbi 13 Frw ubundi iriya kompanyi ibazanire ibikoresho inabyubake [installation] aho bigomba kuba biri.

Umunyamabanga Uhoraho muri MININFRA, Eng. Uwase avuga ko ubu buryo buzanagabanya impungenge abantu bagiraga kuri gaz kuko ibikorwa byayo byose bizajya bicungwa n’iriya Kompanyi.

Ati «Ikiza cy’aba ni uko ari na bo baza kuguhindurira cylindre ya gaz bakamenya ko yagiyemo neza, ku buryo n’abafite ubwoba bagombye gufatira hafi.»

Umuyobozi wa Bboxx-Rwanda, Justus Mucyo avuga ko intego y’iyi Kompanyi ari ukorohereza abafite amikoro make kugera ku bikorwa by’iterambere n’ikoranabuhanga, akaba ari na yo mpamvu batangije ubu buryo bushya bwo korohereza abaturarwanda gutekesha gaz ariko batazitiwe n’amikoro ya buri muntu.

Ati «Ntabwo ari ngombwa kugura ibiro 20 bya gaz ahubwo ushobora kugura kimwe, bibiri cyangwa bitatu bitewe n’ibyo ukeneye kandi ufitiye ubushobozi »

Avuga ko ubu buryo bufite ikoranabuhanga rifasha iriya Kompanyi gukurikirana ikoreshwa rya gaz ku buryo idashobora kwangirika cyangwa guteza ibibazo.

Ati «Dushobora kubona ko gaz yawe iri kumeneka, iyo igiye gushiramo turabibona tukaza tukayihindura utaduhamagaye. »

Uyu muyobozi w’iyi kompanyi avuga ko ubusanzwe umuntu ushaka gutangira gutekesha Gaz byamusabaga kuba nibura afite ibihumbi 80 Frw ariko ko abazakoresha buriya buryo bwiswe Clean Cooking For Every one (Uburyo bwo guteka busukuye kuri buri wese) bizajya bibasaba kwishyura ibihumbi 13 Frw ubundi agashyiramo gaz yifuza kuva kuri 500 Frw.

Ati «Nk’umuntu ukoresha umufuka w’amakara akoresha amafaranga ari hejuru y’ibihumbi icumi ku kwezi, icyo dushaka kugaragaza ni uko ushobora gukoresha gaz ugakoresha amafaranga angana cyangwa ari munsi n’ayo wakoreshaga. »

Ubu buryo bukiri mu igerageza bwatangiranye n’ibikoresho 100 bihita bishira ku isoko, ariko iyi kompanyi irizeza ko uyu mwaka uzarangira bafite ibikoresho byahaza ababyifuza bose mu Rwanda.

Umunyamabanga uhoraho muri MININFRA avuga ko ikibazo k’ibicanwa gihuriweho n’Isi yose

UMUSEKE.RW

9 Ibitekerezo

  • TWABAKURAHE NGO TUBABAZE UKO BIMEZE FONE NUMBER ZABO

  • Ibi bintu ni byiza cyane rwose! Mubitugezeho ahubwo vuba!

  • Uraho neza Nshimiye wabahamagara kuri 1044 cg 0788165399.
    Ugahabwa ubundi busobanuro gusa ubu birahabwa abatuye muri Kigali gusa muntara ho nimuminsi ya vuba. Cg se ugasura iduka rya BBOXX rikwegereye

    • Nyagatare/Matimba ko tuzikeneye twazibona gute?

  • waooooooo mbega byiza murakoze bboxx muzanye agashya,igishimishije nuko impungenge twagiraga twanga kugura gas nuko ikunda guteza impanuka,ikindi kwirirwa ubungana icupa ngo mumpe gas nkabantu badaturiye umujyi bikagorana kuba bayigura,ark ikibazo mfite gas muzajya muyohereza nkuko bigenda kumuriro how?sindabyiyumvisha

  • Muzashyireho za guichet hirya no hino mu Mirenge no mu Tugari kuko muzagira abakiriya benshi.
    Mutubwire igihe muzatangira kubigezaho abaturage.
    Ese uzaza muri Expo 2019 azababona mumuhereze kuri iyo service ?

  • Nibyiza rwose kubitekerezo mwatanze kuwavuze ngo tuzashyire Guichet mumirenge yose byo ntibyahita bidukundira gusa kugeza ubu dukorera muturere 27 twose two mu Rwanda byumvikane ko ari 3 gusa utadusangamo. Aho tutari ni Nyaruguru, Nyarugenge na Kicukiro. Aba Nyaruguru bagana ishami rya Huye, Naho aba Nyarugenge bakagana ishami rya Nyacyonga muri Gasabo, naho aba Kicukiro bakagana ishami rya Nyamata muri Bugesera ikindi kandi twebwe nitwe tukwisangira aho utuye wowe uduha address mugihe wiyandikisha tukakwisangira aho utuye ntakindi kiguzi utanze

  • ubu c koko byashoboka,
    gaz izajya ijyeramo gute.
    ibi biramutse bikunze mwaba mudufashije kbsa.
    nkunda gaz ariko nibazaga ukuntu naturuka Kuri nyabarongo nicupa nkajya kugura indi mumujyi wa Muhanga nkumva bigoranye.

  • Ariko niba numvise neza ndumva ubu buryo bwakundira abantu bataratangira gukoresha gaz ?abasanzwe bayifite c bo bizagenda gute?kko njye nkoresha safe gaz ubwo ndasabwa iki?

Subiza

Your email address will not be published. Required fields are marked *