• 13/12/2019 9:19 42

Guverineri Gasana ntashaka ko hari umuturage w’Amajyepfo urangwaho umwanda

Mu kiganiro Umuyobozi w’Intera y’Amajyepfo CG Gasana Emmanuel yahaye Umuseke ku ngendo arimo mu Turere tunyuranye tw’aho ayobora, yavuze ko bashaka gufatanya na buri wese ubishaka kuzamura isuku y’abaturage n’iy’ahandi hose.

Goverineri CG Gasana Emmanuel abaza umwe mu bahagarariye Urugaga rw’Ibikorera uruhare rwabo mu iterambere rya Kaduha

Umuseke uheruka gusohora inkuru igaragaza ko mu Karere ka Nyamagabe hari abaturage babayeho mu bukene bukabije kandi bafite umwanda, Guverineri Gasana yavuze ko ibiyirimo biri mu byo babonye bikaba byaratumye bashyiramo imbaraga kugira ngo bahangane n’umwanda.

Ati “Turi mu bukangurambaga bw’isuku, sitwe gusa na Ministeri y’Ubutegetsi bw’Igihugu, bugamije isuku n’umutekano, umuturage utekanye kandi ufite isuku utanga ikizere mu bikorwa bya Leta, ibyo muvuga ntibinyuranye n’ibyo.”

CG Gasana Emmanuel yongeyeho ati “twagira ngo ufite ico ku mubiri, yaba umwana, umuturage, umuryango n’ahantu hose, haba kwa muganga, ku mashuri, iki ni igikorwa dukora kugira ngo tugire isuku…ibyo ni ubukangurambaga dukora nk’urubyiruko kugira ngo tugire isuku.”

Ibijyanye n’ubwiherero, ngo muri iriya nama bavuze ko mu mihigo y’Intara nta muturage wo mu Majyepfo kimwe n’ahandi hose ukwiye kuba adafite ubwiherero bwiza bwasuzumwe,…

Guverineri w’Intara y’Amajyepfo yasuye Imirenge ya Kaduha na Musange ku wa mbere tariki 19 Kanama yari i Muhanga, kuri uyu wa gatatu tariki 21 Kanama yasuye Nyaruguru.

Mu bibazo bitandukanye yakiriye birimo iby’akarengane, kudakemurirwa ibibazo n’abayobozi kandi byakabaye bikemuka, akaba yabwiye Umuseke ko yahavuye ibibazo bihawe umurongo.

Abaturage babwiye Guverineri ko bafite ibibazo byo kutarangirizwa imanza kandi bafite cashet mpuruza n’ibibazo by’amakimbirane mu ngo n’ibibazo by’ubutaka.

CG Gasana Emmanuel ati “Mu Mudugudu hari ibyiciro byinshi bifasha Umukuru w’Umudugudu, uretse Komite nyobozi harimo Abajyanama b’Ubuzima, abafashamyumvire mu buhinzi n’ubworozi, abafashamyumvire mu iterambere, inshuti z’umuryango, amasibo, bose usanga barenga 60, tukavuga ngo bagiye hamwe bakifatanya bahujwe n’Umukuru w’Umudugudu iterambere ry’Umudugudu ryakwihuta.”

Mu Mirenge ya Kitabi, Musebeya, Uwinkindi, Muko, na Musange igenzura ryagaragaje ko harimo ibibazo by’abantu barwaye amavunja, inzu zishaje cyane, n’ibindi.

Umuyobozi w’Akarere ka Nyamagabe na we yahise atangira ingendo muri iriya Mirenge kuva kuri uyu wa gatatu tariki 21 Kanama 2019, akazafatanya n’abandi bayobozi kugenzura biriya bibazo byagaragaye.

Umunyamabanga Nshingwabikorwa w’Umurenge wa Kaduha Irakuzwa Aime Patrick yabwiye Umuseke ko aho ayobora hakiri imyumvire ikiri hasi, kandi Kaduha iri mu mirenge ikize.

Ati “Dufite ibikorwa remezo bihagije, ibitaro bigezweho amashuri, isoko rya kijyambere n’umuhanda uva i Kirengere ukagera i Kaduha mwiza cyane ariko wareba ibyo byose ukibaza impamvu Kaduha idatera imbere, niyo mpamvu Guverineri yaje ngo turebere hamwe impamvu Kaduha idatera imbere kandi ifite abantu bakomeye.”

Yavuze ko Guverineri w’Intara y’Amajyepfo ari ku nshuro ya kabiri asuye uriya Murenge kandi azasubirayo tariki ya 10 Nzeri 2019 kureba ko ibyo bavuganye byashyizwe mu bikorwa.

Umurenge wa Kaduha ufite abaturage ibihumbi 22,780, abari mu kiciro cya mbere bafashwa ni 4,013.

Muri uru ruzinduko Guverineri yagiye abonana n’andi bavuga bakumvwa cyane muri iriya Mirenge, abikorera, abanyamadini abasaba kugira uruhare muri buriya bukangurambaga haba ku ijwi cyangwa mu bikorwa bifatika kugira ngo bubakire abakennye inzu n’ubwiherero.

Guverineri Gasana avuga ko nta muturage w’Intara y’Amajyepfo n’ahandi ukwiye kugira umwanda

Jean Paul NKUNDINEZA
UMUSEKE.RW

4 Ibitekerezo

  • Uyu musilikare wahindutse umupolisi none akaba yarahinduwe umunyapoliti arasetsa. Hari umukire ugirumwanda? Muzanyereke umukire urwaye amavunja. Ese umuntu niwe uhitamo kugirumwanda no kurwara amavunja? Uyu nawe uwamusaba kujya kuba mu nzu zimwe na zimwe amazi akoresha akajya kuyavoma yayabura akarariraho maze mukazamutwereka nyuma y’amaze 3. Bakamushyira muri za nzu nabonye Nyamagabe rahirako nayo mezi yayamara batamujyan,ye muri Fayisali? Mujye murya ariko mureke gukina kumubyimba wabanyarwanda.

  • Mbona abategetsi benshi mu Rwanda bazi ko gukena arubushake no kwigiza nkana umuntu utinjiza ifaranga agira isuku ate? Umuntu utarya yabura kurwara bwaki ate? Ubonye iyaba ahubwo haruwavugaga ati ndetse V8 reka ngende muri Rav 4 dusaranganye? Miliyoni zimishahara na mission indamnite kilometrique mugabanyemo kabiri buget bitwara igiboke ba nyagupfa banana ningurube munzu bubakirwe? Ubonye iyaba abayobozi bicaraga bakabanya cg bagakuraho umusoro kubyibanze umuturage akenera ngo arye yavuze ature? Ibitaribi ni indirimbo izabyinwa kugeza umwuka ushize mubatera…muti ubukangurambaga imbaga irakangutse Bwana governor icyabuze ni agafaranga nawe bataguhaye ririya yabo wafashe kuva ningabo, police, no kubugavuna wareba uko murugo bihinduka..baza kugukangura se ntiwaba uzi ko ari byiza…muzahamagare abayobozi kaboneka yara bye ivu murebe uko 90% byabo basa sibo babwiraga abantu ko gusa nabi ari uburangare

  • #Kajangwe rwose no kuva kera hari abayobozi ntibabaye ubu kdi ibyo bagenerwaga n ubu barabigenerwa. Ikibazo twifitemo abanyarwanda ni ukurera amaboko ntidukore tukumva ko hari uzaza kudukemurira ibyacu. Ko nabaye muri icyo cyaro mu bihe byashize ….sinabonaga abantu bacya kandi umuryango ugaharanira gutera imbere…..ko nta murtango waburaga ubwiherero kandi bukajya ahiherereye koko? Umwana ntiyitabgwaho akabona iby ingenzi bimutunga? Ahubwo icyaduhinduye tukumva ko tugomba kurera amaboko ……. ntidutekereze nicyo kibazo!!!!!! Naho nubwo nubwo bareka V8 nizindi zose ntacyo byahindura mu gihe tudahinduye imitekekerereze n imyumvire!!!!!!!! Kuko muri iki gihe mbona baguha bakaguhaaaaaaa ukarya ukamara utizigamiye cg bgo ugire undi mushinga watekereza! Biradsba imbaraga za buri wese kugira ngo dufashanye mu buryo bwose umunyarwanda abone imibereho myiza binyuze mu bukangurambaga nkuko Guverineri yabivugaga kandi abayobozi, abafatanyabikorwa n abaturage ubwacu tukabigiramo uruhare kandi tukabigira ibyacu…..

  • Bien hereux a celui qui connait et qui vit dans le confort du bienetre, Bienhereux aussi a celui qui ignore totalement qui ne conait pas et qui ne vit pas dans le confort du bienetre.

Subiza

Your email address will not be published. Required fields are marked *