• 11/12/2019 4:24 46

Gusoresha imitungo yose itimukanwa: Abayifite bose barasabwa kuyandikisha

  • Ibibazo by’u Rwanda na Uganda ngo ntibyagize ingaruka ku misoro y’Ibicuruzwa biva hanze.

Ubuyobozi bw’ikigo k’Igihugu k’Imisoro n’Amahooro kiributsa abaturarwanda ko imitungo yose itimukanwa izajya isoreshwa bityo ko abayifite bakwiye kuyandikisha mu buryo bw’ikoranabuhanga kugira ngo bizorohere inzego zishinzwe gukusanya imisoro.

Komiseri Mukuru Ruganintwali

Itegeko rishya rigenga inkomoko y’umusoro w’inzego z’Ibanze, ingingo yaryo ya 12 iteganya ko imitungo yose itimukanwa igomba gusoreshwa.

Iyi ngingo ishyira umwihariko ku nyubako kuko umuntu ufite inzu zirenze imwe, iyo adasorera ari iyo abamo gusa ariko izindi zose akazisorera.

Komiseri Mukuru w’Ikigo k’Igihugu gisinzwe Imisoro n’Amahooro, Bizimana Ruganintwali Pascal avuga ko abafite abafite imitungo itimukanwa bose bakwiye kuzirikana iri tegeko riyisoresha.

Ati “Ubwo ni amazu, abafite amashyamba, hari ibibanza by’amazu, hari n’abafite ama ferms [ibikingi], abafite imitungo itimukanwa inyuranye, yose igomba gusora.”

Avuga ko bene iyi mitungo bagomba kuyandikisha mu buryo bw’Ikoranabuhanga bw’Ikigo k’Igihugu gishinzwe gukusanya imisoro n’amahoro bugifasha gusoresha abantu batandukanye.

Ruganintwali avuga ko kuyandikisha ari byo byonyine bizagena ingano y’imisoro bene yo bazasora kuko buriya buryo bw’Ikoranabuhanga bwerekana umusoro ukwiye ku mutungo runaka bitewe n’ubuso bwawo.

Avuga ko imisoro igenda itandukanye bitewe n’uko yagiye igenwa na njyanama z’uturere. Ati “Kugira ngo isore ni uko igomba kuba izwi.”

Ngo umuturage azajya yandikisha kandi asorere umutungo we mu gace uherereyemo.

Ati “Niba kanaka atuye i Kigali akaba afite isambu i Gahanga cyangwa ahandi, azabyandikisha i Gahanga, akurikije uko Njyanama ya Kicukiro yagennye uko ikibanza cya hariya gisora, ako kanya azahita amenya amafaranga azajya asora buri mwaka.”

Avuga ko ku nzu zikodeshwa, bene zo bakwiye kujya batanga amakuru mashya kuri zo ku buryo nk’igihe itarimo umuntu abimenyekanisha kugira ngo atazayisoreshwa kandi itinjije.

RRA ivuga ko iri tegeko risonera imisoro imwe n’imwe nk’inzu imwe umuntu abamo n’ubutaka bugenewe guhinga no kororeraho butarenge hegitari ebyiri. Gusa ngo iyi mitungo yose na yo igomba kwandikishwa.

 

Ibibazo by’u Rwanda na Uganda ngo ntibyagize ingaruka ku misoro y’Ubucuruzi

Komiseri Mukuru Ruganintwali wanagaragaje ishusho y’imisoro n’amahoro yinjiye mu mwaka w’Ingengo y’Imari wa 2018-2019, avuga ko ibicuruzwa bituruka mu bihugu bigize Umuryango wa Africa y’Uburasirazuba bitajya bisoreshwa.

Avuga ko ibi bikuraho impungenge z’abatekerezaga ko ibibazo u Rwanda rwagiranye na Uganda bikanazahaza ubucuruzi hagati y’ibi bihugu bishobora kuba byaragize ingaruka ku misoro y’ibicuruzwa bituruka hanze.

Ngo ahubwo biriya bibazo bya Politiki hagati y’u Rwanda na Uganda byatumye Imisoro y’ibicuruzwa bituruka hanze izamuka kuko abajyaga gukura ibicuruzwa muri Uganda ntibasore ubu bari kubivama mu bindi bihugu nka China na Dubai bakabisorera.

Imisoro yinjiye muri uyu mwaka wa 2018-2019 yiyongereyeho miliyari 164,7 Frw kuko hinjiye miliyari 1 398,8 Frw mu gihe muri 2016-2017 hari hinjiye imisoro ingana na miliayari 1 234,1 Frw, ni ukuvuga ko yazamutseho 13,3%.

Martin NIYONKURU
UMUSEKE.RW

2 Ibitekerezo

  • Muri iki gihugu umutungo utimukanwa utanditse mu buyobozi se ni uwuhe? Twabonye igihe kirekire amatangazo avuga ngo: ibitakwanditseho si ibyawe. N’utararisomye bararimusomeye. Ariko se ko n’amasambu gakondo twarazwe n’abakurambere dusigaye tuyakodesha!! N’akataraza muzakazana!!

  • Aha ndabona no kuzaguma ku muvumu aho abasekuru bawe bashyinguye bizaba ikibazo gikomereye kuri bene uwo muvumu.Mana dutabare udukize aba bantu barya utwabo bakanarya utw’abandi kandi ntibahage.

Subiza

Your email address will not be published. Required fields are marked *