• 18/01/2020 1:07 47

Gisagara VC yatsinze UTB VC yaherukaga kuyitsinda inshuro 4 zikurikiranya

Mu mikino ya mbere ya kamarampaka (Playoffs) ihuza amakipe yasoje imikino ya shampiyona ari muri ane ya mbere mu mukino wa Volleyball, ku mugoroba wo kuri uyu wa Gatanu, Gisagara Volleyball Club yaraye itsinze UTB naho REG VC itsinda IPRC-Ngoma.

UTB yatangiye itsinda iseti ya mbere ariko biza guhinduka

Ni imikino yo gushaka ikipe izegukana igikombe cya Shampiyona mu mukino w’amaboko wa Volleyball umaze kugira abakunzi batari bake mu Rwanda.

Umukino wari utegerejwe na benshi ni uwahuje Gisagara VC na UTB V warangiye Gisagara itsinze UTB yaherukaga kuyitsinda mu mikino ibanza n’iyo kwishyura ya shampiyona ikaza no kuyisubira mu yindi ibiri y’irushanwa ryo kwibuka Padiri Kayumba Emmanuel wateje imbere uyu mukino w’amaboko.

UTB yatangiye umukino yitwara neza, ibanza Gisagara itsinda iseti ku manota 25 kuri 23, Gisagara VC igaruka neza itsinda iseti ya kabiri, iya gatatu n’iya kane (25-21na 26-24 na 25-22)

Undi mukino wakinwe kuri uyu wa Gatanu wahuje ikipe ya REG BBC yasoje imikino ya shampiyona ari iya mbere na IPRC-Ngoma yabaye iya Kane.

Ikipe ya REG VC yitwaye neza itsinda IPRC-Ngoma amaseti 3-0 (26-24 ;25-16 na 25-21).

Imikino yo kwishyura izakinwa tariki ya 19 Werurwe, REG VC izerekeza mu karere ka Ngoma naho UTB VC yerekeza mu karere ka Gisagara.

Yvonne IRADUKUNDA
UM– USEKE.RW

Subiza

Your email address will not be published. Required fields are marked *