• 16/12/2019 3:50 36

Gicumbi: Urubyiruko ntirwitabira umuganda…Bo bati “tuba twaraye muri Weekend”

Urubyiruko rwo mu murenge wa Byumba mu karere ka Gicumbi ruranengwa kutitabira ibikorwa by’umuganda wo gufasha abatishoboye mu gihe bamwe muri bo bavuga ko akenshi biriya bikorwa bikunze kuba mu mpera z’icyumweru kandi baba bafite amavunane baba bakuye mu myidagaduro.

Urubyiruko ruzamuri ibi bikorwa ruba ari mbarwa

Mu mpera z’icyumweru gishize, mu kagari ka Gisuna mu murenge wa Byumba habaye umuganda wo kubakira umukecuru utishoboye wenda kugwirwa n’inzu abamo kuko ishaje.

Icyo gihe hitabiriye urubyiruko rutarenze 20 mu gihe nyiri gufashwa yari yizeye ko baza ari benshi bakamukorera umuganda nk’uko bari barabimwijeje.

Umuhoza Aliane uhagarariye urubyiruko mu kagari ka Gisuna  avuga ko bagenzi be badakunze kwitabira ibikorwa nk’ibi.

Avuga ko ikibazo ari imyumvire yabo igitsikamiwe bakaba batarumva akamaro ko gufasha Leta mu bikorwa nk’ibi iba igomba gushoramo imari.

Uyu mukobwa uri mu bahagarariye urubyiruko avuga ko bagenzi be bakwiye kumva ko igihugu kizubakwa n’abana barwo babinyujije mu bikorwa nka biriya byo gufasha abatishoboye.

Ati “Bakwiye kumva ko ibikorwa nk’ibi na bo hari igihe bashobora kuzageramo bagakenera uwabibakorera.”

Umukecuru wahawe umuganda yitwa Karugwiza ashima abitabiriye iki gikorwa

Mu murenge wa Byumba ugizwe n’utugari ikenda habarirwa urubyiruko rugera ku bihumbi 2 000 mu gihe abitabiriye kiriya gikorwa cyo kubakira uriya mukecuru batarenga 20 kandi hari hitabiriye utugari tune.

Ngabo Jimmy umwe mu rubyiruko rutuye mu murenge wa Byumba avuga ko  akenshi babatumira mu minsi ya  Week-end kandi bamwe baba baraye mu birori.

Ati “Gusa bateguye umuganda mu minsi y’imibyizi baboneka ku bwinshi kuko nta mavunane baba bafite.”

Uwera Christine uhagarariye inama y’igihugu y’urubyiruko mu murenge wa Byumba, avuga ko abahwituzi basanzwe bahamagarira abantu kwitabira ibikorwa nka biriya batagera mu midugudu yose ariko ko bagiye kongera ubukangurambaga mu rubyiruko rukumva ko kwitabira ibikorwa nk’ibi ari ukubaka igihugu cyabo bazasigarana mu myaka iri imbere.

Umukecuru Karugwiza Spesioza uri mu kigero k’imyaka 70 ubana n’abuzukuru be babiri, ashima urubyiruko rwaje kumukorera iki gikorwa cy’urukundo.

Ati “Gusa Imana ibahe ubwenge bajye bazirikana ko buri muntu atangira ari muto afite imbaraga , nyuma na we yagera mu zabukuru akananirwa, nzabashima buri munsi ibikorwa bankorera kugeza yuzuye  nkuko babifite muri gahunda yo kumfasha.”

Aba ni abaturutse mu tugari tune

Evence NGIRABATWARE
UMUSEKE.RW/GICUMBI

Subiza

Your email address will not be published. Required fields are marked *