• 23/01/2020 9:00 26

Gicumbi: Min Mukabaramba yamaganye abarya amafaranga y’abatishoboye

Kuri uyu wa 23 Kanama 2019 mu Karere ka Gicumbi basabwe kwitandukanya n’imwe mu mikorere irangwamo ruswa yakunze kugaragara mu bice bitandukanye by’ubuzima bw’igihugu, Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza, Dr Mukabaramba Alvera, yavuze ko uzafatirwa mu cyuho arya iby’abatishoboye azabibazwa.

Visi Mayor Ushinzwe mibereho myiza Mujawamariya Elizabeth, Dr Mukabaramba Alvera Umunyamabanga wa Leta muri Minisiteri y’Ubutegetsi bw’Igihugu, na DPC/Gicumbi Minani Jean Bosco

Yagarutse cyane ku bakozi bo mu mirenge yagezemo gahunda ifasha abatishoboye ya VUP, asaba ko buzuza inshingano basabwa bakarengera abaturage, babafasha kubona inkunga bagenerwa aho kumva ko umuturage ari we ugomba gutanga ruswa, kugira ashyirwe mu kiciro cy’abatishoboye.

Mu karere ka Gicumbi imirenge yagezemo VUP ni 12 ifite abagenerwabikorwa bagera ku 4945.

Bose bagenewe ingengo y’imari ingana na miliyoni 603Frw, iyi nkunga ni yo Umunyamabanga wa Leta muri Minisiteri y’Ubutegetsi bw’Igihugu asaba ko izagera ku bo igenewe bigakorwa hatabayemo ibyo gusaba abaturage ruswa.

Dr. Mukabaramba Alvera yasabye ibintu bitatu abakorera mu mirenge yagezemo gahunda ya VUP. Kurwanya ruswa, guhembera ku gihe, no kwakira abagenerwabikorwa bujuje ibisabwa batagendeye ku marangamutima cyangwa ruswa.

Ati: “Muri Gicumbi ntituvuze ko ariho habamo ruswa gusa, twazungurutse mu bice bitandukanye by’igihugu, ariko birababaje kubona umuturage utishoboye atanga ruswa kugira ashyirwe mu Kiciro cy’abagomba gufashwa, kandi agikwiriye ari we mugenerwabiko.”

Dr Mukabaramba yatanze urugero rubaho no mu kwivuza, aho ngo umuntu ajya kwa muganga ari mu kiciro cyo kwirihira, yabona bamuciye amafaranga menshi akagaruka ku Muyobozi w’akagari akamuhindurira ikiciro cy’Ubudehe.

Ati “Ibyo bigomba gucika burundu, kuko abo bizagaragaraho bazabihanirwa by’intangarugero.”

Umuyobozi w’Akarere ka Gicumbi wungirije ushinzwe imibereho myiza, Mujawamariya Elizabeth, avuga ko Gicumbi ifite abaturage 435,724, muri bo abari mu kiciro cya mbere bakaba 96 356.

Yavuze ko bakurikirana abakozi b’Imirenge umunsi ku munsi, bakamenya uko bageza serivisi ku bagenerwabkorwa, na we akemeza ko uzafatwa arya ruswa y’abagenerwabikorwa batazamwihanganira.

Nyuma y’uruzinduko Umunyamabanga wa Leta muri Minisiteri y’Ubutegetsi bw’Igihugu yakoreye mu Murenge wa Byumba aganiriza abashinwe imibereho myiza y’abaturage, yanasuye inteko y’abaturage muri Kageyo mu kagari ka Kabuga.

Aha yasabye abaturage kwiteza imbere no kudahishira buri wese ukorerwa ihohotera. Muri iyi Nteko y’abaturage Dr Mukabaramba yafatanyije n’inzego z’ibanze gukemura bimwe mu bibazo yagejejweho n’abaturage byananiranye kubibonera umuti.

EVENCE NGIRABATWARE
UMUSEKE.RW/GICUMBI

2 Ibitekerezo

  • Iyi si niko imeze.Mu bihugu byose usanga Abakire barya Abakene.Urugero,abakene nibo benshi batanga imisoro.Nyamara agakiza ahanini abantu bakomeye bahembwa za millions buri kwezi,mu gihe ba Mwarimu baba bahembwa urusenda hafi ku isi yose.Iyo misoro niyo yubakira amazu no kugurira imodoka zihenze babandi bakomeye.Niyo ibajyana kwivuza I Burayi.UBUSUMBANE buzavaho gusa igihe ubutegetsi bw’isi yose buzahabwa Yesu

  • Mu Rwanda byihariye twugalijwe nabantu bafoye ibifu barya, bahuguza utwabandi ikibabaje nuko niyo ushatse kujya munzego zubutabera usanga baragutanzeyo. Aka kaga kazarangira ryari koko?

Subiza

Your email address will not be published. Required fields are marked *