• 15/12/2019 8:11 17

Gicumbi: Abahinzi bihanijwe ‘kotsa’ ibigori bikiri mu murima

Uyu munsi mu itangizwa ry’igihembwe cy’ihinga A mu karere Gicumbi aho bamaze icyumweru bateye ibigori mu gishanga cya Nyamugari mu murenge wa Ruvune, abayobozi bihanangirije abahinzi basarura ibitarera neza (ibyo bita kotsa) bagamije kubona ifaranga vuba.

Abahinzi batangiye igihembwe cy'ihinga A
Abahinzi batangiye igihembwe cy’ihinga A

Ibigori bisaruwe bitarera neza bibukijwe ko biba bipfuye ubusa kuko ku isoko babigura babahenze kandi bigatanga isura mbi mu buhinzi.

Ngendahimana  Barthazar  utuye mu murenge wa Ruvune avuga ko iyo babonye inzara ibarembeje batabasha kubyihanganira ngo hari abahita babyotsa bitarakura, abandi bakabigurishiriza mu murima bitarera bakabaha udufaranga ducye. Yemeza ko ari igihombo gikabije.

Nyirantezimana Francoise umuturage wo mu murenge wa Ruvune avuga ko hari n’abarya imbuto y’ibigori bahabwa n’ubuyobozi itari yamara n’icyumweru bakajya kuyiteka,  gusa nyuma babafatiye ingamba kuko hari imbuto ziterwa umuti batinye kurya.

Umuyobozi w’akarere ka Gicumbi wungirije ushinzwe ubukungu Nteziryayo Anastase, asaba abaturage kureka ibigori bikera ndetse bimwe bakareka bikuma, kuko bizabafasha kubona inyungu aho gushidukira udufaranga tubateza inzara.

Ati “bimwe tuba dushaka dusarure tunahunike, bimwe tuba dukeneye tuzabirye bikomeye byumye, cyangwa tukabigurishamo ifu y’akawunga, usanga babisarura  bitari byera, bakunze kubyotsa niko tuvuga cyangwa bakabigurisha bitari byera. Babiretse bikabanza bikera  bikuma nibwo bivamo impungure n’amafaranga “.

Abahinzi mu gutangiza igihembwe cy'ihinga
Abahinzi mu gutangiza igihembwe cy’ihinga

Uyu muyobozi avuga ko ibigori basaruye bitarera neza nta n’ikindi kintu kibivamo ndetse n’uwabigurishije amafaranga macye abivanamo atamuvana mu bukene. Niyo mpamvu ubu ngo bari mu bukangurambaga bwo kureka iyi migirire ya bamwe mu bahinzi.

Kayumba John ushinzwe ubuhinzi mu Ntara y’amajyaruguru asaba abafashamyumvire n’abajyanama mu by’ubuhinzi kwegera abaturage bakabafasha guhinga muri gahunda zo guhuza ubutaka nk’imwe mu nzira zo kongera umusaruro.

Evence NGIRABATWARE
UM– USEKE.RW/ Gicumbi

0 Igitekerezo

  • Ibigori byiza 6 bigurishijwe ari bibisi ku babirangura ku mirima, bishobora kubyara amafranga 300 (50 FRW ku kigori) . Ibyo bigori 6 kandi nibyo bibyara ikilo kimwe cy’impungure kitarenza amafranga 200 bigejejwe ku isoko, rimwe na rimwe ugasanga biragurishwa 100 FRW ku mwero byasabagiye, kandi hiyongereho imirimo yo kubyisarurira, kubyanika, kubihungura no kubishyira mu mifuka myiza ifite isuku. Hiyongereyeho n’igihe kirenze ukwezi n’igice mbere yo kubona ayo mafranga ku mpungure. Ariko ubwo mugira ngo umuhinzi we ntabara? Ko ubanza abarusha imibare ku bijyanye na cash yinjiza ra? Mwamwumvisha yenda ko kubyumisha ari nabwo yabihunika bikamutunga igihe kirekire, naho ku bya cash ishyushye murabashushanyije rwose. Nuko iyo bahinga igishanga cya Leta nta kundi baba bari bubigenze.

Subiza

Your email address will not be published. Required fields are marked *