• 13/12/2019 7:40 43

Gicumbi: Abahinzi bangirijwe n’imvura barasaba kugurizwa imbuto

Imvura nyinshi irimo urubura n’amahindu byaguye mu kwezi gushize bikangiza imirima y’abahinzi mu tugari tunyuranye tw’Umurenge wa Kageyo rwasize bari mu gihombo kuko imyaka bateye yangiritse, ubu barasaba gufashwa bakagurizwa imbuto bagatera bushya kugira ngo bahangane n’ingaruka z’ibyabaye.

Urubura rwaguye mu kwezi gushize bwangije bikomeye imyaka yabo

Aba baturage bavuga ko bahombye bikomeye kandi barimo n’abari bafashe imbuto ku nguzanyo kugira ngo batere iyi myaka.

Murekatete Cecile ni uwo mumudugudu wa Gatare Akagari ka Nyamiyaga muri Kageyo yari yarahinze ibishyimbo n’amashaza kuri Hegitari ebyiri byose byarangiritse ku buryo nta n’umushogoro yabonamo.

Ati “Urubura rwangije imyaka yanjye yose nari nashoye ibihumbi magana atandatu nteganya ko nzakuramo miliyoni imwe n’igice, ariko ubu nta n’ibihumbi ijana bizavamo. Turasaba gufashwa, n’iyo batuguriza imbuto twanayishyura tumaze gusarura, ariko tukabona uko twakongera kuzamuka.”

Haterera Jean Pierre ni umuhinzi mu mudugudu wa Musura Akagari ka Nyamiyaga avuga ko yari yashoye mu buhinzi agera kuri miliyoni ebyiri ubu akaba yarahombye kubera imvura nyinshi n’urubura byangije ibishyimbo yari yahinze by’amoko atatu.

Ahangayikishijwe n’abana be batatu bazajya kwiga mu kwa mbere asanzwe yishyurira amashuri yisumbuye iyo yasaruye, ndetse n’inguzanyo yari yafashe ngo ahinge.

Ibishyimbo bishingiriye byarangiritse ubu ni uku bimeze
Wakwibaza ko ari izuba ryabitwitse ariko ni imvura, amahindu n’urubura

Haterera ati “ubwoko bw’ibishyimbo nari nahinze  bya Kigondo, kuri hegitari imwe n’igice, ikiro kimwe kigura 700, n’ubwoko bwa Kansirida ndetse n’ibyo bita Mwirasi byose hamwe ntacyo nzaramura, ubu mbonye inguzanyo y’ibirayi nahinga nkagerageza gukuraho icyo gihombo nkanishyura n’inguzanyo y’imbuto natse mu mutamenwa.”

Jean Uwimana ni umuhinzi wo mu mudugudu wa Kageyo muri aka kagari ka Nyamiyaga mu murenge wa Kageyo, avuga ko kimwe na bagenzi be benshi bahinganga ku musozi urubura rwangije imyaka yabo. We yari yahinze Hegitari imwe amashaza n’ibigori. Byose birangirika.

Ubuyobozi bw’Umurenge wa Kageyo buvuga ko iki kibazo buri kugikorera ubuvugizi, gusa ngo kubabonera imbuto vuba aha ntibyakunda kuko bashobora kuzayibona mu gihembwe cy’ihinga gitaha mu ntangiriro za 2019.

Abahinze ututoki nabo bahuye n’akaga
Ibitoki byariho bikura byahise bitangira kuma

Asaba Gahima Emmanuel  Umunyamabanga Nshingwabikorwa w’Umurenge wa Kageyo ati “aho urubura rwangije imyaka ni ahitwa Musura,  Kageyo, Karihira na Munini.  Twabimenyesheje ababishinzwe ku karere bakora isesengura ry’imirima yangijwe n’urubura,  turi kubakorera ubuvugizi, ngo harebwe uburyo babona imbuto bakongera guhinga.”

Avuga ko imbuto bashobora kuyibona mu gihembwe gitaha cy’ihinga kuko ngo bayibahaye ubu ntacyo yamara ugendeye ku bihe by’imvura ‘ihinga. Gusa ngo bashobora kuzabashakira imbuto y’ibirayi n’ingano kuko ariyo yabonekamo umusaruro mu gihembwe gikurikira.

Aba bahinzi bavuga ko uretse igihombo banafite impungenge yo kwibasirwa n’inzara

Inama y’Abaministiri yo mu mpera z’ukwezi gushize yemeje gahunda y’ubwishingizi mu buhinzi n’ubworozi  igamije kugoboka cyane cyane abahinzi bato n’abaciriritse bahura n’ibibazo nk’ibi bagahomba.

Iyi gahunda nitangira mu mwaka utaha, biteganyijwe ko Leta izajya yishyurira umuhinzi cyangwa umworozi 40% y’ikiguzi cy’ubwishingizi naho ukora uyu mwuga we akitangira 60%. Maze akagobokwa mu gihe cy’ibibazo nk’ibi mu mwuga we.

Mu minsi ishize abahinzi mu karere ka Bugesera bo babwiye Umuseke akaga k’izuba ryumishije imyaka bari barateye ubu nabo bakaba bari kwikanga inzara.

Imyaka bari bahinze yarangiritse cyane
Ntacyo bizeye gusarura

Evence NGIRABATWARE
UM– USEKE.RW/ Gicumbi

0 Igitekerezo

  • Kuki mu nama y’umushyikirano irimo ubu nta muntu n’umwe wabajije ikibazo kijyanye n’umusoro w’ubutaka wongerewe mu itegeko rishya rizatangira gukurikizwa umwaka utaha.

    • Hahahaaa ngo ninde wari kubaza? gute se usibye gukoma amashyi?

Subiza

Your email address will not be published. Required fields are marked *