• 14/12/2019 9:12 16

Gatsibo: Bamwe mu baturage bubatse ikibuga cy’indege i Gabiro barambuwe

Bamwe mu bafundi n’abayede bubaka ikibuga cy’indege za gisirikare mu kigo cy’ingabo cya Gatsibo babwiye Umuseke ko bamaze hafi umwaka bambuwe ayo bakoreye. Ngo iyo basabye shebuja witwa Emmanuel Nyandwi kubahemba ababwira ko na we atarahembwa. Ubuyobozi bwa Horizon Construction bwabwiye Umuseke ko hari ibyo bukigenzura mu kazi uriya mugabo yabahaye imirimo yabakoreye.

Abafundi n’Abayede bakoze imirimo muri iki kigo bamwe bavuga ko baheruka guhembwa muri Werurwe 2018

Umusore utashatse ko dutangaza amazina ye yavuze ko Nyandwi Emmanuel yamuzanye amuvanye muri kamwe mu turere tw’umugi wa Kigali.

Yagezeyo ngo aba umufundi nk’uko n’ubundi yari asanzwe abikora, ku mubyizi wa buri munsi akabarirwa Frw 5000. Umuyede (aide-maçon) yahembwaga hagati ya Frw 2000 na Frw 3000.

Uriya musore yemeza ko rwiyemezamirimo amurimo Frw 280 000 ajyanye n’akazi yakoze kuri kiriya kibuga k’indege.

Avuga ko akurikije uko abona ibintu, asanga atakwizera ko bazishyurwa vuba.

Ati: “None se reba maze amezi ane ntahembwa, kandi ubundi duhembwa buri taliki 15. Ubwo se urumva wakwizera ko uzahembwa vuba?”

Uyu mufundi avuga ko ikibabaza ari uko we na bagenzi be bakorera Emmanuel Nyandwi ari bo badahembwa ariko abakorera ibindi bigo bafatanyije kubaka kiriya kibuga bo ngo bahembwa neza.

Umugore bahuje ikibazo witwa Rebecca Murebwayire utuye mu murenge wa Karangazi mu kagari ka Musenyi avuga ko uriya rwiyemezamirimo amurimo Frw 98 000.

Murebwayire avuga ko kuba ari umugore ufite abana bane ariko akaba atarahembwa guhera muri Werurwe, 2018 byamutindahaje.

Ngo yabuze n’amafaranga yo kugurira abana impuzankano (uniform) yo kujyana ku ishuri. Ngo we yakoraga akazi ko gukotera nka aide-maçonne.

Ati: “Bandimo  Frw 98 000 kuko njye nakoraga akazi ko gukotera. Birababaje kubona umugore yirirwa aterura ihene (batwaraho amabuye) ku zuba ryo muri aka gace, ariko ntahembwe. Tekereza nawe guhera muri Werurwe, 2018 tudahembwa!”

Murebwayire avuga ko ikibabaje kurushaho ari uko rwiyemezamirimo Emmanuel Nyandwi yanze kubishyura agahitamo kujya gusubukura ibikorwa bye mu murenge wa Kimironko mu karere ka Gasabo.

Ngo biriya ni agasuzuguro kandi ntibikwiye mu Rwanda. Asaba Leta guca ba rwiyemezamirimo bahemukira abaturage nk’uko yaciye nyakatsi mu Rwanda.

Bariya bakozi babwiye Umuseke ko bakora nka nyakabyizi kuko nta masezerano y’akazi bafite ariko bandikirwa ku gipande. Ngo imibyizi yabo iba yanditse.

Abandi bakorera ibigo bafatanya kubaka iki kibuga k’indege barahembwa, Murebwayire avuga ko ikibazo cye agisangiye n’abandi bagera kuri 68 barimo abafundi, abayede n’abakotezi.

Umuseke wahamagaye umuyobozi w’iriya Kampani yambuye abaturage witwa Emmanuel Nyandwi kuri telefoni, nta byinshi yavuze, mu mvugo ye arakaye yavuze ko arambiwe abamutesha umutwe.

Ati “Byaba byiza murekeye aho kumbaza ibintu nk’ibyo, kuko sinakomeza kuvuga ku bintu bintwara umwanya w’ubusa.”

Yahise adukura ku murongo (arakupa).

Samuel Mugisha ushinzwe ibikorwa bya tekiniki muri Horizon Fair Construction yabwiye Umuseke ko koko batarishyura Emmanuel Nyandwi ariko ngo ni ukubera ko batararangiza kubarura ibyakozwe byose kugira ngo babone uko bamubarira n’ibye na we ngo yishyurwe.

Ati: “Aho hantu projet irimo kurangira. Rero ibirimo gukorwa, ubu ni ukubarura imirimo yose yakozwe kuva projet {umushinga} igitangira kugeza aho igeze harimo n’iyo yakoze kuko we yakoze utuntu dutoya. Ni ukubarura byose muri rusange kugira ngo natwe batwishyure na we tumwishyure… Ni uko bigenda.”

Avuga ko iyo bamaze kubarura bagaha ababayobora raporo yabo ikemerwa, bitarenza ibyumweru bibiri batarahabwa amafaranga yemejwe ngo na bo bishyure abo bahaye akazi.

Mugisha avuga ko ibyerekeye kubarura n’ibindi byose bijyanye ko kubona amafaranga bitazarenza ibyumweru bitatu biri imbere bidatunganye.

Ikibuga cy’indege aba baturage bavuga ko bubatse ho kiri mu kigo cy’ingabo z’u Rwanda cya Gabiro.

Jean Pierre NIZEYIMANA
UM– USEKE.RW

8 Ibitekerezo

  • Ariko iyo urebye abambura abaturage babakoreye, usanga hari inzego za Leta zimwe ziba zibifitemo uruhare. Ni gute bishyura rwiyemezamitimo amafaranga yose batagenzuye niba abo yakoresheje bishyuwe?!
    Njye hari aho nakoze, mbere yo kwishyura rwiyemezamirimo baramutunguraga,bakabaza abakozi be niba bariahyuwe, bataba batishyuwe bagahamagara ushinzwe abakozi bakicarana bagahamagara buri mukozi akazana ikarita y’imibyizi ye, bakandika amafaranga ye yose, byarangira bagakora igiteranyo, nyuma bakazana amafaranga Bagahagararira Rwiyemezamirimo agahemba abakozi, bakababaza niba nta kindi kibazo bagifitanye nawe,ndetse n’abagemuraga ibikoresho barahamagarwa bose bagahembwa, byarangira Rwiyemezamirimo akajya yahabwa amafaranga asigaye. Ibi aho bidakorwa, biba bigaragaza ko ba nyiri igikorwa bafitanye ubugambanyi na Rwiyemwzamirimo. Kubicyemura rero ji ugukora amasezerano y’uburyo rwiyemwzamurimo azishyurwa hatirengagijwe abo yakoresheje. Kutabikora ni ubujura bugamuje guhindura abanyarwanda abaja b’abanyamitungo.

  • Komereza aho rwose mujye muvugira abanyarwanda ntibakabure utwo baruhiye. Bishyurwe rwose kandi nibishyurwa nabwo muzatubwire.

  • Muri iki gihugu se wakwamburwa n’abasirikare ukajya kurega hehe? Nyir’imbunda byose ni ibye.

    • Kuki mukunda amatiku adafite umumaro koko? Ubu se uyu rwiyemezamirimo ni umusirikare?

  • Ab baturage nibihanagure, abitw ba rwiyemezamirimo muri kino gihugu wagirango bahawe uburenganzira bwo gukoresha rubanda nta gihembo, kandi ibi birumvikna kuko kgirango babone amasoko babanza gutanga ibycumi ahantu hanyuranye, bajya no kwishyurwa bikagenda gutyo. Kugirango bagabanye igihomo bahitamo kutishyura rubanda rugufi ruba rwabakoreye. Gusa nubwo bigenda gutya biragayitse, ntabwo umuturage yaakwiye kuburara kandi yakoze naho abo yakoreye bari kurya no kunywa ibyuya bye.

  • Uwakubwira SGES/ATT ya Kajuga na Nyiramugwera! Imana yonyine izabahembe!

  • Sha ibya SGSS/ATT byo wagirango kwambura ni zimwe mu nshingano bafite.Ubu banyambuye plus de 500000 yanjye nakoreye kuva muri may 2018 baranyimye amafaranga yanjye. Iherezo tuzakizwa n’inkiko

  • Njyewe banyimye ayo muri 2016 inkiko zo nazo bizamara indi myaka ishobora kuruta iyo maze nishyuza. Ese ubundi mwaretse tukiyakira ko ubanza ari ko system ya transport yubatswe!

Subiza

Your email address will not be published. Required fields are marked *