• 29/01/2020 10:01 04

Gare y’i Nyanza ni ntoya, abagenzi batinda kubona imodoka bagakererwa

Abatwara abantu n’ibintu mu mujyi wa Nyanza kimwe n’abagenzi baravuga ko babangamiwe no kutagira gare bisanzuramo kuko iyo bafite ari nto cyane, bagaragaza ko bisaba gutegereza amasaha menshi kubera ubucye bw’imodoka zitwara abagenzi, bagasaba ko hakubakwa gare yakira imodoka nyinshi zabafasha mu ngendo zabo.  

Nyanza ngo nta gare ifite usanga imodoka ziparika mu gikari cy’isoko

Ahifashishwa nka gare kugeza ubu mu mujyi wa Nyanza ni imbuga nto iri hepfo gato y’isoko rya Nyanza. Hari harateganyirijwe parikingi y’isoko rikuru ry’Akarere.

Abagenzi kimwe n’abatwara imodoka mu mujyi wa Nyanza bagaragaza ko ubuto bw’aha hifashishwa nka gare butuma abatega bategereza imodoka zibatwara amasaha menshi.

Munyanshongore Musa ni umwe mu bakorera agency imwe mu zitwara abagenzi mu mujyi wa Nyanza aho avuga ko usanga bafite impungenge zo gutandukanya abaje ari abagenzi cyangwa abatari bo kubera ubutoya bwa gare.

Ati “Iyo imodoka zihahuriye ari nyinshi ubona ko zitabasha kuhakwirwa, gare ntiyubakiye, mbese usanga dufite impungenge zo gutandukanya abagenzi n’abaje mu isoko kuko ubundi aha hari parikingi y’isoko.”

Abagenzi bagaragaza ko bamara amasaha menshi bategereje imodoka bakavuga ko biterwa ahanini no kuba aha hifashishwa nka gare ari hato bigatuma itagerwamo n’imodoka zihagije. Basaba ubuyobozi bw’Akarere ka Nyanza kububakira gare yisanzuye.

Umwe ati “Nageze aha saa tanu ariko bampaye iya saa munani kuko imodoka ari nkeya bitewe n’uko ntaho zaparika, twubakiwe gare byazajya binadufasha kubona aho twugama izuba.”

Umuyobozi w’Akarere ka Nyanza NTAZINDA Erasme avuga ko ikibazo cya gare mu mujyi wa Nyanza kizwi. Gusa ngo inyigo yo kuyubaka iri kunozwa hakurikijwe igishushanyo mbonera. Ntazinda yizeza ko iyi nyigo nirangira imirimo yo kubaka gare izahita itangira.

Ati “Gare mu mujyi wa Nyanza irateganyijwe no ku gishushanyo mbonera, turi gushaka uburyo dufatanya n’abikorera n’uruhare rw’Akarere tugafatanya kuyubaka, kandi inyigo yayo iri hafi kurangira gukorwa.”

Kugeza ubu agency ebyiri zitwara abagenzi ni zo zonyine zikorera aho hifashishwa nka gare.

Muri gare y’i Nyanza ngo abagenzi batinda kubona imodoka bitewe n’uko izihaza ari nkeya
Akarere ka Nyanza ngo gafite gahunda yo kubaka gare iteganyijwe ku gishushanyo mbonera

UM– USEKE.RW/Nyanza

Subiza

Your email address will not be published. Required fields are marked *