• 24/01/2020 1:20 12

Gare ya Muhanga n’ibice bimwe by’Umujyi byugarijwe n’Umwijima

Ikigo abagenzi bategeramo imodoka (Gare Routière) n’ibice bitandukanye by’Umujyi wa Muhanga, nta matara bifite. Ubuyobozi bw’Akarere buvuga ko butegereje ishyirwa mu bikorwa ry’Ingengo y’Imali y’Umwaka utaha wa 2019-2020.

Abakorera muri gare bavuga ko bamurikirwa n’amatara y’imodoka

Hashize ukwezi kurenga amatara ya Gare ya Muhanga ataka, abatwara ibinyabiziga ndetse n’abakorera  muri Gare imbere  babwiye Umuseke ko bamaze igihe batakambira Ubuyobozi bw’Akarere ko babangamiwe n’umwijima uboneka muri Gare.

Bavuga ko bahangana n’abajura n’abana bo mu Muhanda baba bashaka kwiba imitwaro y’abagenzi cyangwa bimwe mu bikoresho by’abacuruzi bahakorera.

Hatangimana Samuel Umuyobozi wa Gare ya Muhanga ati: “Iki ni ikibazo kiduhangayikishije, Ubushobozi Akarere gafite ntabwo kananirwa gukemura ikibazo cy’amatara ataka nijoro.”

Iribagiza Jeanne  umwe mu bacururiza muri Gare ya Muhanga, avuga ko iyo saa kumi n’ebyeri zigeze aba acungana n’Umwijima kugira ngo utamusanga mu kazi kuko atinya ibisambo ko bishobora kumusanga mu kazi bikamwambura amafaranga kuko hatabona.

Yagize ati: “Babashije kudushyiriramo amatara byaba byiza cyangwa se bagacana moteri. Muri gare harimo umwijima.”

Usibye ikibazo cy’amatara ataka muri Gare, n’abaturiye Umuhanda wa Kaburimbo cyangwa abagenzi bavuga ko amatara yo ku muhanda mu bice bya Gahogo, Ruvumera, Kibirigi, hafi ya Gereza no mu Cyakabiri hari ayapfuye Akarere katarasimbuza.

Bavuga ko bimwe muri ibi bice abanyamaguru batinya kubinyuramo kubera ko ibisambo bihabamburira amafaranga, telefoni cyangwa bigashikuza abagore ibikapu.

Umuyobozi wungirije ushinzwe Iterambere ry’Ubukungu mu Karere ka Muhanga yabwiye Umuseke ko amatara yo muri gare yapfuye biturutse ku nyubako y’uwikorera iherutse gushya.

Kayiranga akavuga ko ari byo byatumye n’insinga zitwara amashanyarazi muri gare zishya icyo gihe.

Ati: “Gukora ibarura ry’ibikoresho by’Amashanyarazi byangiritse igihe iyo nyubako yashyaga nibyo twabanje gukora, harakurikiraho gushakisha aho amafaranga azava dufatanyije na Holdings Limited.”

Uyu Muyobozi yongeyeho ko amatara yo ku muhanda akunze gushya buri gihe ari na yo bazasimbuza mu ngengo y’Imali y’Akarere iri hafi gutangira uyu mwaka.

Hari ababwiye Umuseke ko abashinzwe kugura amatara n’ibikoresho by’amashanyarazi bahitamo kugura ibikoresho bidafite uburambe kugira ngo bagire ayo basagura bishyirira mu mifuka.

Nta ngano y’amafaranga ibi bikorwa bizatwara Ubuyobozi bw’Akarere ka Muhanga bwagaragajeazagenda mu gusimbuza amatara yo muri gare n’ayo ku mihanda ataka.

Cyakora buvuga ko bugiye kubikora mu minsi ya vuba. Mu Mujyi wa Muhanga amatara rusange usanga ayaka ari make ugereranyije n’ayapfuye.

Kubona Inyubako ya Gare bisaba gushishoza nijoro
Amatara make muri aya ari ku muhanda niyo usanga yaka
Umuyobozi wungirije ushinzwe Iterambere ry’Ubukungu mu Karere ka Muhanga Kayiranga Innocent avuga ko bategereje ko amafaranga y’Ingengo y’Imali asohoka kugira ngo bashyireho amatara asimbura ataka

MUHIZI ELISEE
UMUSEKE.RW/Muhanga.

2 Ibitekerezo

  • Amatara se arahenda? EUCL yadukopa tukazaba twishyura! Mbega ubu see gufata abajura nibyo bihendutse? Birahenze se nk’ imodoka?

  • Biteye isoni! Ubwo bategereje ko hari uzaburira ubuzima muri uwo mwijima akaba ariho bazatabaza Leta!

Subiza

Your email address will not be published. Required fields are marked *