• 23/01/2020 3:03 54

Gakenke: Ingo zirenga 2000 zatangiye kugezwaho amashanyarazi

Abaturage bo mu Mirenge ya Cyabingo, Kivuruga na Busengo mu Karere ka Gakenke bari mu byishimo kubera umuriro w’amashanyarazi batangiye kugezwaho nyuma y’aho imirimo yo kubaka umuyoboro muri iyi mirenge itatu irangiriye, babwiye Umuseke ko ubu bagiye gutangira ibikorwa by’iterambere.

Muri Gakenke amashanyarazi mashya azagezwa ku ngo 2000

Mukangwije Clementine utuye mu Mudugudu wa Cyabingo, Akagari ka Mutanga, Umurenge  wa Cyabingo yavuze ko mbere bacanaga udushishimure, amashanyarazi akaba abahaye gutura ahabona.

Yagize ati “Abana bajyaga kwiga nijoro bagakenera urumuri, ubu biroroshye. Ikindi itumanaho twari dufite twajyaga gushaka umuriro muri Centre, ubu na byo biratworoheye tuzajya tuwubona iwacu.”

Yakomeje avuga ko umuriro ugiye kubafasha kwiteza imbere bakajyana n’icyerekezo cy’igihugu. Ngo bahoraga batekereza umwuga bakora wafasha imiryango yabo kwiteza imbere bikaba ikibazo, ariko uyu muriro w’amashanyarazi babonenye ngo uzabafasha kugira imishinga mishya bakora.

Aya mashanyarazi aje bayakeneye, ngo bari bamaze imyaka itatu bayategereje, ahagezwa muri gahunda y’umuyoboro uzayageza ku ngo 9387 mu Ntara y’Amajyaruguru.

Nyirakubwimana Gaudance na we utuye mu Kagari ka Mutanda avuga ko yanejejwe no kubona amashanyarazi ageze iwe.

Ati “Ubundi twacanaga udutoroshi waba uri kugira icyo ukora utubuye (piles) tukaba turashize, waba utabonye amafaranga ukaba mu mwijima.”

Buri muturage ahabwa ibikoresho bijyanye n’amashanyarazi ku buryo kuyageza mu nzu iwe bitamugora

N’ubwo ageze mu zabukuru,  avuga ko agiye gushaka akantu yacuruza cyangwa akagura urusyo, akajya akorera iwe.

Nizeyimama Jean Nepo utuye Cyabingo avuga ko ubwo abonye umuriro w’amashanyarazi agiye kuba ahabona aho mbere yacanaga itoroshi yo mubwoko bwa briquette.

Yagize ati “Ubu ndumva mfite icyizere cy’iterambere rwose kuko ubu nshobora kugura akamashini gasya cyangwa nkashinga ka salon umwana akajya yogosha bikaba byafasha Umuryango kwiteza imbere.”

Ati “Ubundi twajyaga tujya kwiyogosheshereza mu Ngambi cyangwa mu Mashya, aho twakoraga urugendo rurerure. Ubu turuhutse ingendo twakoraga.”

Munyabugingo Charles umuyobozi w’ishami rya Sosiyete y’u Rwanda Ishinzwe Ingufu (REG) mu Karere ka Gakenke avuga ko uyu mushinga  wo gukwirakwiza amashanyarazi wakorewe mu Turere dutatu tw’Intara y’Amajyaruguru, Gakenke, Burera na Musanze.

Imirimo yo kubaka imiyoboro yatangiye mu 2015 iza guhagarara bitewe n’uko  rwiyemezamirimo  yaje kunanirwa kuyirangiza biba ngombwa ko REG isesa amasezerano yiyubakira iyi miyoboro.

Ati “Rwiyemezamirimo yahagaze amaze gukora nka 50% by’imirimo, ariko ubu REG igeze kure irangiza kubaka iyi miyoboro.”

Umuyobozi w’ishami rya REG muri Gakenke avuga ko ku ikubitiro, abaturage bose bazahabwa amashanyarazi mu Karere ka Gakenke bafatiye kuri uriya muyoboro barenga ibihumbi bibiri (2000).

Ubwo Umuseke wasuraga aba baturage, ingo zigera kuri 68 zari zamaze guhabwa umuriro mu gihe izindi na zo zikomeje guhabwa.

Akomeza avuga ko kugeza ubu, mu Karere ka Gakenke, ingo zisaga  34,3% zifite amashanyarazi harimo 24,3% zifite amashanyarazi afatiye ku muyoboro mugari naho 10% zifite amashanyarazi adafatiye ku muyoboro mugari yiganjemo akomoka ku mirasire y’izuba.

Umutekinisiye wa REG afasha abaturage gucomeka intsinga zijyana umuriro muri mubazi
Atuye muri Cyabingo biteguye ko aya mashanyarazi azabagirira akamaro
Ngo bari bamaze igihe kirekire bategereje ko amashanyarazi abageraho
Abo muri aka gace bishimiye ko amashanyarazi yabagezeho ngo azabafasha mu iterambere
Munyabugingo Charles uyobora REG muri Gakenke yemeza ko uyu mushinga uzasiga ingo zisaga 9000 mu Ntara y’Amajyaruguru zibonye amashanyarazi
Iyi Transformer ni yo izajya ifasha abatuye hariya kubona umuriro udacika

Josiane UWANYIRIGIRA
UMUSEKE.RW

1 Igitekerezo

  • Ntibavuga bagambaga: ni Cyabingo, cangwa ni Cabingo?

Subiza

Your email address will not be published. Required fields are marked *