• 13/12/2019 10:35 44

FIBA World Cup: Africa irajwe ishinga no gushyiraho agahigo

Ku nshuro ya 18 irushanwa ry’Igikombe k’Isi mu mukino w’intoki wa Basketball (FIBA Basketball World Cup) rizatangira kuri uyu wa Gatandatu tariki ya 31 Kanama 2019, mu Bushinwa, umugabane wa Africa uzaba uhagarariwe n’amakipe menshi kurusha ibihe byabanje.

Nigeria ni imwe mu makipe ahagarariye Africa ikaba ihabwa amahirwe

Ibihugu bitanu ari byo: Angola, Tunisia, Côte d’Ivoire, Senegal na Nigeria, bizaba bihatanira kuzamura ibendera ry’umugabane wa Africa muri iri rushanwa rizahuriramo ibihugu 32.

Amateka agaragaza ko Misri ari cyo cyagerageje kwitwara neza muri iri irushanwa bwa mbere, ubwo mu 1950 mu Igikombe k’Isi muri Basketball,  cyatwaraga umwanya wa gatanu mu makipe 11 yari yitabiriye.

Nyuma yaho, byasabye imyaka 14 kugira ngo indi kipe yo muri Africa yitabire irushanwa mpuzamahanga muri uyu mukino w’intoki.

Kuva icyo gihe (1974), byibuze ikipe umwe yo ku mugabane wa Africa yabonaga itike yo kujya mu kiciro gikurikira amatsinda mu marushanwa make aheruka kuba.

Umuyobozi ucyuye igihe w’ishyirahamwe ry’umukino wa Basketball muri Africa, Hamane Niang avuga ko yizeye impinduka ku makipe azahagararira uyu mugabane, yerekana guhatana gukomeye muri iri rushanwa.

Hamane ukomoka muri Mali ahabwa amahirwe yo kuba umuyobozi wa Siporo mu nama ya FIBA izabera i Beijing, agira ati “Hashize igihe kirekire amakipe yo muri Africa yitabira Igikombe k’Isi ashaka ko adatsindwa asuzuguwe cyane. Icyo twakwishimira ni uko ayo makipe yo muri Africa yakinaga nta gihunga kandi yabaga ari ku rwego rumwe n’abo bahatana.”

Ikipe yo muri Africa ihabwa amahirwe menshi mu Igikombe k’isi cya Basketball ni Nigeria kuko ifite abakinnyi benshi bakina ndetse n’abigeze gukina muri shampiyona ya America (NBA) ifatawa nk’iya mbere ku Isi muri uyu mukino.

Nigeria iherereye mu itsinda rya kabiri rizaba ririmo ikipe y’igihugu ya Argentine, Uburusiya na Korea y’Epfo.

Izaba igendera ku mukinnyi rurangiranwa Al-Farouq Aminu uherutse guhabwa miliyoni 29 USD ku masezerano y’imyaka itatu muri Orlando Magic, nyuma y’uko atandukanye na Portland Blazers aho yesheje agahigo ko gutsinda amanota ku kigero cya 9.4 n’ibyo bita rebound 7.4 muri uyu mwaka w’imikino.

Undi mukinnyi uzwi ni Ike Diogu w’imyaka 35, wamaze imyaka irindwi akina muri NBA mbere y’uko yerekeza muri Aziya aho akina mu ikipe ya Shimane Susanoo Magic yo mu Buyapani. Undi uhanzwe amaso mu ikipe ya Nigeria ni Joshua Okogie ukinira Minnesota Timberwolves.

Andi makipe ane azahagararira Africa asa nk’ahuje ibigwi muri iri rushanwa. Senegal ntiyabashije kubona Tacko Fall uherutse gusinyira gukina mu ikipe ya Boston Celtics, ndetse na Gorgui Dieng wa Minnesota Timberwolves, kuko bavuze ko bashaka gushyira imbaraga muri shampiyona bakinamo.

Iyi kipe yo mu Burengerazuba bwa Africa izaba iri mu itsinda H ihuriyemo na Australia, Canada na Lithuania.

Umunya-Tunisia Salah Mejri uherutse gusezererwa n’ikipe ya Dallas Mavericks mu ntangiriro z’uyu mwaka, na we azaba ashaka kwigaragaza mu itsinda C bahuriyemo na Espagne, Puerto Rica na Iran, ashaka kureba ko hari ikipe yamubenguka.

Andi makipe abiri yo muri Africa, Angola na Côte d’Ivoire azaba aherereye mu itsinda D na A.

Arguably, izina riremereye muri Africa mu mukino wa Basketball ntazakinira ikipe ya Africa. Giannis Antetokounmpo ufite umubyeyi umwe wo muri Nigeria, na we azakinira Ubugereki.

Swingman w’imyaka 24 ufite amasezerano y’imyaka ine mu ikipe ya Milwaukee Bucks aho yaguzwe miliyoni 100 USD, aherutse kwandika amateka arangiza shampiyona ari mu bakinnyi 20 batsinze amanota menshi ndetse akanatanga imipira myinshi yagiye yinjizwa mu nkangara ikavamo amanota.

Antetokounmpo afite umuvandimwe witwa Thanasis na we wahamagawe n’ikipe y’Ubugereki, yabaye umukinnyi mwiza muri shampiyona ya America mu ntangiriro z’uyu mwaka.

Abakunzi b’uyu mukino mu Rwanda bazaba birebera igikombe k’Isi cya Basketball, (FIBA Basketball World Cup) kiri kuba ako kanya mu mashusho meza kuri shene za StarTimes Sports.

UMUSEKE.RW

Subiza

Your email address will not be published. Required fields are marked *