• 13/12/2019 10:57 12

FERWAFA yasubije aba-Veterans bayishinja kurigisa miliyoni 1Frw bari bemerewe

Nyuma yaho Umuseke utangaje inkuru ko Ikipe y’Abasaza bakinnye umupira yitabiriye Irushanwa ry’Igikombe cy’Amahoro 2019 ishinja Ishyirahamwe ry’Umupira w’Amaguru kubaha imidari idaherekejwe n’amafaranga nk’uko “bari babibwiwe”, Umuvugizi wa FERWAFA yavuze ko ikiciro bariya basaza bakinnyemo bagatwara n’igikombe nta gihembo cy’amafaranga cyari giteganyirijwe.

Iyi kipe yatwaye igikombe ngo bari bazi ko bazahabwa Miliyoni ariko nta yo bahawe

Bonnie MUGABE uvugira Ishyirahamwe ry’Umupira w’Amaguru mu Rwanda (FERWAFA) avuga ko ibirebana n’ibihembo amakipe ahabwa mu Gikombe cy’Amahoro birebwa na Komite nyobobozi ya FERWAFA, kandi ngo mu nama bakoze nta hantu bavuze ko ikipe y’Aba-Veterans izahabwa amafaranga nitwara igikombe.

Ikipe y’abakanyujijeho mu mupira w’amaguru mu Rwanda yitwa (ALWAHAD) yegukanye Igikombe cy’Amahoro mu kiciro cyabo, yari yabwiye Umuseke ko batunguwe babonye FERWAFA ibambitse imidari ariko ntibahabwa amafaranga kandi izindi kipe zatsinze nka As Kigali yatwaye irushanwa zo zarahembwe imidari na Sheki y’amafaranga.

Mu kiciro cy’aba-Veterans irushanwa rirangiye bahawe igikombe n’imidari gusa, nyamara bavuga ko FERWAFA yari yabemereye agera kuri 1000.000Frw.

Umuvugizi wa FERWAFA, Bonnie MUGABE mu kiganiro n’UMUSEKE yadutangarije ko ibihembo bariya basaza bahawe (igikombe n’imidari) ngo ari byo bari bemerewe na Komite ishinzwe kugena ibihembo.

MUGABE ati “Ibihembo byatanzwe ku makipe y’abagabo n’abagore n’aba-Veterans byemejwe na EXCOM (Komite nyobozi) ya FERWAFA. Ibihembo mvuga harimo ibikombe, hakabamo imidari n’amafaranga, ikiciro kitarimo amafaranga cyari icy’aba-Veterans.”

Avuga ko kuvuga ko habaye inama ikemera ko bariya bantu bemererwa amafaranga we atabizi kuko ngo ibyo yemera ni ibigenwa na Komite nyobozi ya FERWAFA.

Ati “Ni nde wabemereye miliyoni, hari aho byanditse n’uwabibabwiye? Ibyo mvuga ni ibyanditse byemejwe na Komite nyobozi ya FERWAFA.”

Ku munsi hasozwaga Irushanwa ry’Igikombe cy’Amahoro, Olivier Nduhungirehe Umunyamabanga wa Leta muri Minisiteri y’Ububanyi n’amahanga ushinzwe ibikorwa by’Umuryango wa Africa y’Iburasirazuba (EAC), yatangarije Umuseke ko ibihembo bitangwa muri ririya rushanwa biciriritse kandi bitangwa mu kavuyo.

Umuseke wifuje kumenya icyo FERWAFA ibivugaho, Bonnie Mugabe ati “Ibyo ni ibitekerezo bye nk’uko undi Munyarwanda wese yatanga igitekerezo ke. FERWAFA itegura ibihembo ikurikije ubushobozi bwayo.”

FWERWAFA ivuga ko uretse ikiciro cy’abagore, abandi bose bitabiriye Igikombe cy’Amahoro batanze umusanzu mbere yo kujya mu irushanwa, bariya basaza na bo bari bishatsemo ibihumbi 100Frw y’umusanzu n’andi bakoresheje mu gutegura imikino.

Umwe mu bantu b’imbere muri FERWAFA wakurikiranye itegurwa ry’Igikombe cy’Amahoro yabwiye Umuseke ko ikipe y’Abasaza mu nama yagiranye na FERWAFA bababwiye ko bazahabwa miliyoni y’amafaranga y’u Rwanda nk’igihembo ariko nyuma ngo biza kurangira bababwiye ko ntayo bazabaha.

Mugisha Suleiman wari uhagarariye ikipe y’Aba-Veterans yatwaye igikombe nk’umutoza wayo avuga ko mu nama FERWAFA yabakoresheje irimo uwitwa Peter n’undi Muyobozi ushinzwe umutekno muri FERWAFA bumvikanye ko ikipe izatwara igikombe mu kiciro bakinnyemo izahembwa miliyoni y’amafaranga y’u Rwanda gusa ngo byaje guhinduka ku munota wa nyuma bagiye guhembwa.

Avuga ko ku wa kabiri tariki 9 Nyakanga 2019 bandikiye FERWAFA bayimenyesha akarengane bagiriwe.

FERWAFA ngo yababwiraga ko ihugiye mu Iryushanwa rya CECAFA Kagame Cup2019, aba batwaye igikombe bakibaza aho CECAFA ihurira n’Igikombe cy’Amahoro.

Ngo agereranyije batanze amafaranga ibihumbi 500Frw mu gucumbikira abakinnyi no kubatwara ku mikino bakinnye mbere yo kwegukana igikombe.

Hitimana Jean Claude umwe mu banyamakuru b’imikino mu Rwanda avuga ko atazi irushanwa na rimwe rya FERWAFA ritegurwa uwaritsinze agatahana imidari gusa.

Ati “Urumva bishoboka ko umuntu yajya gukinira imidari yasabwe gutanga umusanzu w’Amafaranga ibihumbi 100?”

Mugisha Suleiman utoza ALWAHAD yatwaye igikombe mu kiciro cy’ABba-Veterans avuga ko mu mpaka zari zabanje mu biganiro bagiranaga na FERWAFA harimo n’izijyanye n’izina rizandikwa kuri sheki kuko bari bafite impungenge ko izina ry’ikipe yabo ko rizandikwa nabi kuko riri mu Cyarabu.

Avuga ko bahawe ibikombe by’amabati bitaba bihuye n’agaciro k’amafaranga miliyoni bari babwiwe.

Bonnie Mugabe Umuvugizi wa Ferwafa Aha yari ayobonye ikiganiro n’abanyamakuru ENYIMBA ikina na Rayon Sports (Archives)

Jean Paul NKUNDINEZA
UMUSEKE.RW

1 Igitekerezo

  • Uyu musore ari kurimanganya. Aha harimo amanyanga urumva bariya basaza benshi bakinnye mu makipe bazi Ferwafa kurusha uyu musore ko baba barumviranye bakajya gukina maze bahabwa imidali gusa babaza amafaranga muri make ukaba uri kubita abasazi kuko ngo nta mafaranga bari bemerewe? Aca wowe uri kubeshya ukingiye ikibaba abo uri kuvugira. Ferwafa, Ferwafa muzahaga ryari?

Subiza

Your email address will not be published. Required fields are marked *