• 16/12/2019 3:28 47

‘Fashion’ mu mboni y’abanyamakuru bayikoraho ibiganiro mu Rwanda

Uruganda rwa ‘Fashion’ mu Rwanda rurakiyubaka ariko ruracyahura n’ibibazo bitandukanye, hari icyo abanyamakuru ba ‘fashion’ batangaza ku ikemuka ry’ibyo bibazo.

Kwizera Sam umunyamakuru wa Contact Tv

Kugeza ubu iyo bavuze ‘Fashion industry’ cyangwa uruganda rw’imideri, abenshi bumva imyenda ya ‘Made in Rwanda’, mu gihe uruganda rw’imideri ruhurirwamo n’ibintu bitandukanye birimo abamurika imideri, abategura ibitaramo by’imideri, abadoda imyambaro, abajyanama mu myambarire bazwi nka Stylist, abahanga imideri, abanyamakuru bateza imbere fashion n’abandi.

Tugendeye ku bibazo bigaragazwa n’abahanga imideri n’abamurika imideri, twifuje kumenya icyo abanyamakuru bateza imbere fashion mu Rwanda batangaza ku n’uko byakemuka.

Ingabire Faustine ni umunyamakuru ku Isango Star TV, akora ikiganiro cya Isango Berwa atangaza ko uruganda rw’imideri rugihura n’imbogamizi ariko cyane cyane rukagorwa n’imyumvire y’abagifata umwuga w’ubudozi nk’akazi gakorwa n’umuntu uciriritse.

Mu bindi bibazo uyu munyamakuru yatangaje ni ibijyanye no kuba abategura ibitaramo by’imideri bataramenya uko bakorana n’itangazamakuru.

Yagize ati “Muri rusange uruganda rw’imideri rurakennye kuko rubura abaterankunga n’abashoramari mu ngeri zose, ibitaramo byo kumurika imideri kuko bitamamazwa usanga akenshi na byo bihomba.”

Mu bitangazamakuru byo mu Rwanda na byo ngo si shyashya,  televiziyo na radiyo ntibikunze gutangaza amakuru y’ibijyanye n’imideri nk’uko batangaza amakuru ya muzika n’indi myidagaduro, bituma ngo Abanyarwanda batabonera  igihe amakuru avugwa muri Fashion.

Kabagire Christelle na we ni umunyamakuru wa RBA akora ikiganiro cya In style, atangaza ko muri rusange uruganda rw’imideri rugihura n’ibibazo.

Yagize ati “Abategura ibitaramo ntibaraha agaciro abamurika imideri kuko babicisha inzara ku munsi w’igitaramo, abamurika imideri birirwa aho igitaramo kiri bubere batagaburiwe, ntibakora akazi neza kuko baba bashonje. Abamurika imideri bahembwa amafaranga make cyane ugereranyije n’imvune bakura muri aka kazi.”

Hari abahanga imideri bakora imyenda ndetse bakaba banayimurika no mu bitaramo mu rwego rwo kuyikundisha abaguzi bikarangira ibuze abayigura akabona ko abategura ibitaramo by’imideri bakwiye gushyiraho uburyo iyi myambaro yajya igurirwa muri ibyo bitaramo.

Kwizera Sam na we ni umunyamakuru waganiriye n’Umuseke, akora ikiganiro cya Fashion Focus kuri Contact TV, atangaza ko bikigora abahanga imideri bakizamuka kumenyerana n’ababa bamaze igihe muri uyu mwuga.

Uruganda rw’imideri ngo rukeneye ko abategura ibitaramo by’imideri bakarishya ubwenge mu mitegurire y’ibitaramo byabo kuko ngo ibitaramo birushaho gusubira inyuma aho kugira ngo bitere imbere.

Akomeza avuga ko ihuriro ry’abamurika imideri rikwiye guhugura n’abamurika imideri kuko ngo benshi bafite byinshi byo kwiga, kuko ubumenyi bwabo ari buke mu kumurika imideri.

Kwizera asanga abahanga imideri n’abamurika imideri bataramenya uko bakwiye gukorana n’itangazamakuru, ngo biragorana kubona amakuru yabo.

Mu nkuru zabanje abaganiriye n’Umuseke batangaje ko ibyo bakora mu ruganda rw’imideri bitaratangira kubabyarira inyungu, abandi bagatangaza ko ibyo bakora bitarakirwa neza n’Abanyarwanda muri rusange.

Kabagire Christelle umunyamakuru wa RBA
Ingabire Faustine . umunyamakuru wa Isango TV

Robert KAYIHURA
UM– USEKE.RW

Subiza

Your email address will not be published. Required fields are marked *