• 29/01/2020 12:12 59

Episode11: Ganza yakiranye ibyishimo icyo yahoraga asaba Imana

Duherukana…

Mpereza Annie akanoti ngo ajye kugurira Fanta abana bigana bari bamusuye, maze nawe akabanteza agasohoka avuga ko nahembwe bose bagasakuriza rimwe, hashira akanya ngasohoka ngasanga bicaye batuje bagatangira kumvuga imyato… ariko byari ugushyenga.

Annie yazanye Fanta baranywa tuganira nyuma nkazakwisanga nsigaye njyenyine muri salon, ngasohoka hanze ngasanga nta n’ inyoni itamba.

Njyewe-“Uuuh! Inka yanjye! Ibi niki ra? Abantu bari aha se bagiye kandi?”

Natangiye guhamagara Annie ariko ntiyanyitaba, nkomeza guhamagara ariko ndamubura, nisubirira mu nzu ndicara ndatimaza mfata agatabo ka Annie kari karambitse ku meza ntangira gusoma,

Nyuma y’ akanya gato nagiye kumva numva abantu baririmbiye icyarimwe ndikanga, baririmbaga ngo ngire isabukuru nziza.

Nkibyumva nabuze icyo nkora n’ icyo ndeka, nibwo nari menye umunsi wanjye w’ amavuko, Annie yari imbere afite umureti ku isahani, ba bakobwa bandi batatu bo, umwe yari afite buji yaka, undi icyuma uwa gatatu we yari afite telephone ifotora ari gufotora ibyabaga byose.

Bamaze kuririmba bakomye amashyi maze wa mukobwa wari wambwiye ko yitwa Bwiza bakamuserereza ngo ari kuvuga yirya ahita avuga,

Bwiza-“Ganza! Umunsi mwiza w’ amavuko, twishimiye ko utunguwe, iyo utaza gutungurwa twari kuba dusebye, hanyuma rero ndagusaba uhaguruke utuje, utuzimirize iriya buji maze udukatire n’ iriya Gateau Annie yaguteguriye ihwanye n’ ubushobozi bwe”

Disi nongeye kwishimira Annie mushiki wanjye wari wahihibikanye ngo anshimishe, muri ako kanya yanyeretse ko ibyishimo bihenda ariko bidasaba ibihenze.

Narahagurutse ndatambuka maze nzimya buji Cynthia yari afite maze Gatesi ampereza icyuma nkata umureti…nako gateau nari nateguriwe bongera kumpa amashyi.

Bwiza-“Urakoze cyane, tukwifurije umunsi mwiza kandi twishimiye ko kuri uyu munsi Annie nawe yizihiza ko yavukanye nawe, natwe, ni umukobwa mwiza turamukunda kuba tumukunda bivuze ko nawe….”

Gatesi-“Eeeeh! Bivuge! Bivuge ko watakayemo erega!”

Bose-“Hhhhhhhh!”

Bwiza-“Niyo byaba se naba nguye habi?”

Gatesi-“Yesu! Urakoze kunzimya nari nashyuhiranye!”

Twese twongeye gusekera rimwe turicara, urwenya rwari rwinshi, Bwiza yategetswe kuza kwicara iruhande rwanjye ngo nta muntu wizihije isabukuru wicara wenyine…sibwo bamunshyingiye!

Amasaha yakomeje kwicuma bidatinze Ntwari yaratashye, akinjira natunguwe n’ impano yari afite mu ntoki,

Ntwari-“Ooohlala! Mumbabarire natinze, nanjye si njye ni akazi, Ganza! Akira impano ibonetse vuba, nka mukuru wawe kwifurije kuzaramba kugeza ubwo uzareba umukino wa nyuma amavubi atwara igikombe cy’ isi! umunsi mwiza w’ amavuko”

Twese-“Hhhhhh!

Nongeye kwishima cyane, ibi bizwi na buri wese wagize amahirwe yo kugaragirwa, aririmbirwa, aturwa amaturo, uwo munsi nongeye gushinga ndahamya, nibuka akahise kanjye ndetse nongera kureba imbere hanjye, nibwo nabonye ko byanga byakunda ari heza.

Bigeze nka saa mbiri za nijoro abana b’ abandi barasezeye ngo batahe butarira cyane, Ntwari yarasigaye njye na Annie turabaherekeza.

Mu nzira tugenda Annie, Gatesi na Cynthia babaye nk’ abadusiga, njye na Bwiza dusigara inyuma, tuboneraho kugenda twiganirira,

Njyewe-“Ewana ntabwo wakumva ukuntu nishimye kabisa, Eeeh! Mwakoze cyane, muri abana beza!”

Bwiza-“Urisanga Ganza! Ahubwo hagarara neza ngufate amafoto, ano matara yo ku muhanda uzi ukuntu agira ifoto nziza”

Narahagaze maze ntangira gufata poster zitandukanye nawe ariko amfotora, arangije kuyafata,

Bwiza-“Reka noneho dufate na Selfie”

Usibye kumva babivuga ni ubwa mbere nari nifotoye iyo photo, tumaze kuzifotora dukomeza kugenda,

Njyewe-“Nshimye ko umfotoye kuri birthday yanjye, none se uzazihanaguza uzimpe?”

Bwiza yarasetse cyane arahagarara arongera ariyongeza amaze gutuza dukomeza kugenda,

Bwiza-“Oya ntabwo nzayahanaguza ahubwo ndayapostinga kuri facebook igihe uzagiraho uzayakuraho nta kibazo”

Napfuye kwikiriza nubwo ntari nsobanukiwe dukomeza kugenda dufata ba Annie bari badusize, cyari igihe cyo gusezeranaho.

Maze kubashimira nanone baragenda natwe turagaruka, mu kugaruka njye na Annie twaje tuganira,

Njyewe-“Annie! Nemeye pe! Urabikoze! Unteye ibyishimo uyu munsi kabisa”

Annie-“Hhhhh! Kubera Bwiza ngushyingiye se?”

Njyewe-“Oyaa! Bwiza se? Bwiza…Nako reka kunyatsa ntagurumana kandi uzi ko nta mahirwe ngira yo kubona uwo turohamana mu nyanja y’ urukundo aho tutazarohorwa nundi wese”

Annie-“Ariko se amaherezo azaba ayahe Ganza?”

Njyewe-“Ahubwo se nkubaze, ko najyaga ku kazi mu gitondo ngataha bwije, nta Peace uherutse kumbonera?”

Annie-“Ariko we kandi koko nibagiwe kukubaza, barambwiye ngo ukundana na Peace cyane”

Njyewe-“Hmmm! Sha umutima udafite uwo wihariye uhora ubungabunga, Peace ni umukobwa mwiza, anyemeye naba mpiriwe gusa ndamukumbuye, kandi mbabajwe nuko ngiye ntamuhaye umwanya nifuzaga”

Annie-“Subiza amerwe mu isaho rero!”

Njyewe-“Ngo? Kubera iki se?”

Annie-“Baragutanze cyera, hari umusore wirirwa aha bakundana, akenshi yazaga ku mureba njyewe yaranabinyibwiriye”

Annie yambwiye atyo nshika intege, nongeye kubona ko nta mahirwe mfite mu rukundo ntangira kubaza Imana impamvu gusa ndihangana mbyikuramo kuko wari umunsi wanjye w’ amavuko.

Twageze mu rugo ibyishimo birakomeza, Ntwari mubwira ko nahembwe ndetse niteguye kwigurira bimwe mu bikoresho by’ ishuri arishima, twagiye kuryama ntawe ubishaka.

Nubwo twiberagaho muri ubwo buzima icyadukomezaga ni ugushyira hamwe, ikizere Ntwari yaturemyemo nicyo cyatumaga tutigunga, ubuzima bugakomeza buri wese agahagarara ku izamu rye.

Umunsi warageze nsezera Ntwari na Annie nsubira ku ishuri kurangiza umwaka wa nyuma, nta yindi nshuti nari mfite kuko yaba Bob ndetse na Gaelle bari barigendeye, birumvikana nari nsigaye wenyine.

Ibyo ariko kandi byatumye igihe cyanjye cyose ngihoza ku masomo, nakundaga kuba nicaye aha njyenyine nsubira mu masomo yanjye, byatumye ndushaho gutsinda cyane.

Kenshi nabaga nicaye ku kibuga cya football aho njye na Gaelle twakundaga kwicara, byatumaga nicara nkongera kumukumbura ngatangira kwivugisha nti;

“Gae! Buri gihe iyo nicaye hano ndakwibuka, iyo nteye intambwe nza aha mba nje kwibuka intambwe wanteje, ese ko wagiye ntumbwire ko uri amahoro ndetse ko n’ umugisha mpora ngusabira Imana yawuguhaye,

Ndibuka nifuza kugukunda by’ umwihariko nkaba boy friend wawe nawe ukambera girl friend ariko ukambwira ko bidashoka, ese hari igihe bizashoboka ko ntegerezanyije igishyika? Nifuza kukwitura byose mu rukundo, ndifuza kugukunda kuko aricyo mfite nk’ impano iruta izindi, Ahwiiiii! Nanjye ngo naba umutera agahinda, ubu se ndi kubwira utanyumva….yewe reka mpine akagongo nsubire mu ishuri”

Ako kanya nahise mpaguruka nkomeza ngana mu ishuri, negera Cherie wanjye w’ ikayi nkuko Directeur Nyundo yajyaga abitubwira.

Bidatinze igihembwe cya mbere cyararangiye, twe abiga muwa gatandatu twagombaga gusigara tugakomeza amaso kugira ngo tuzayarangize vuba tubone uko dusubiramo, twarasigaye igihembwe cya kabiri kirarangira ndetse umwaka w’ amashuri urarangira,

Ku munsi wo gutaha hahandi abazakora ikizamini baba babona neza ko urugamba rutangiye nari ndi ku muryango ndeba uko abandi bataha, ndambiwe nigira kwiryamira.

Ndyamye nagiye kumva numva umuntu unkozeho ndakanguka nasanze ari Doyen wacu nawe twiganaga,

Doyen-“Ganza! Bite se wangu ko waryamye urarwaye cyangwa ni ubwoba bw’ ikizamini cya leta?”

Njyewe-“Wapi nta bwoba kabisa nuko nari niryamiye ngo mbe nduhuka nze gusubira mu ikayi nimugoroba”

Doyen-“Eeeh! None se ko hari umuntu ugushaka mubwire ko wiryamiye?”

Njyewe-“Uuuh! Umuntu unshaka? Uwo muntu unshaka se ninde?”

Doyen-“Wowe gira vuba witunganye wambare neza uze tugende mukwereke”

Ako kanya narabyutse ariko yenda ngira ngo Doyen arambeshya, nditunganya maze ajya imbere turagenda nkomeza kumukurikira duhinguka ku muryango usohoka ikigo sinzi uko nitegereje neza mba mbonye umukobwa warebaga hirya, yari yambaye neza cyane.

Yari yambaye agakanzu kagufi gataratse ukuntu, udukweto twiza tw’ umutuku, umusatsi we wari usukuye ufunze udupfundo tubiri ku mutwe, agihindukira narikanze cyane,

Njyewe-“Yeee? Ndarota cyangwa?”

Natunguwe cyane no gusanga ari Gaelle maze Doyen ahita ahagarara mucaho nihuta Gaelle nawe aza ansanga muhobera ubwo ndamuterura ndamuzengurutsa ib’ abanyeshuri murabizi barafannye biratinda, maze kumushyira hasi twarebanye mu maso, natunguwe n’ imicyo yari afite mu gihe  kitari gito nari maze ntamubona! Wooow!

Gaelle-“Hmmm! Ganza! Urabona ibintu unkoreye?”

Njyewe-“Gae! Ni wowe? Niba ari wowe ibyo naba ngukoze byose!”

Gaelle-“Hhhhhh! Basi tuve hano aya duhunge aya maso dore yose nitwe ahanzeho”

Njyewe-“Ngaho ngwino twigire hahandi h’ amateka yanjye nawe”

Gaelle-“Oya, ahubwo ngwino tuve mu kigo nkwereke aho tujya”

Nta cyari kumbuza gusohoka dore ko nari nabyambariye, njye na Gaelle twasohotse mu kigo ntangira kwibaza aho anjyanye, mu nzira nagiye mwitegereza nawe akandeba akamwenyuna nkisigaza inyuma nkareba uko yari yambaye, ikimero n’ ingendo y’ abenza yagendaga yambona tukabishwanira byo gukina kubera isoni…byari byiza cyane.

Bidatinze twageze mu kabari keza abanyenyeshuri twatinyaga, niho abarimu n’ abayobozi bakundaga kwiyakirira, twicara ahagara mu gikari aho twari twitegeye ishyamba ku meza yacu turebana,

Gaelle-“Ahwiiiii! Ganza! Amakuru?”

Njyewe-“Nyahere hehe se sha Gae, ko wantaye nkabura byose ngasigarana urwibutso rwawe gusa, nibajije impamvu wagiye burundu ntuhindukire ngo umbaze uko merewe, nategereje ko mukuru wanjye ambwira ko hari uwanshatse ariko ndaheba gusa aho uziye usanze nkigufitiye ubwuzu”

Gaelle-“Yoooh! Umbabarire maama nanjye si njye, nabuze ka gapapuro wanyandikiyeho nimero, nagerageje gushaka uko naza kukureba ariko ntibinkundire ariko uyu munsi byakunze, ni ukuri ntabwo nakwibagiwe narakuzirikanaga”

Nikije umutima gato maze mpita nongera kubwira Gaelle nti;

Njyewe-“Gae! Ndishimye kubwawe, umunsi umbwira ko bidashoboka ntabwo numvaga ko nyuma watera intambwe nkiyi ukava iyo ukagenda urugendo rungana rutya ukaza kundeba, Imana iguhe umugisha kandi unteye imbaraga ku rugamba ngiye gutangira”

Gaelle-“Urisanga Ganza! Gusa tegereza ikindi uru rugendo ruhatse”

Njyewe-“Ngo? Ni amahoro se?”

Ako kanya umusore wakoraga aho yahise aza kutwakira, Gaelle ansaba gutumiza icyo kunywa, natunguwe atumije nibyo kurya byiza nari ngiye kurya bwa mbere, yatumije ka gatungo kagendera ku tuguru tubiri, wa musore amaze kugenza aba aranjijishije twiganirira ibindi anyibagiza kumubaza icyo urugendo ruhatse.

Ibiganiro byacu byari byuje ubwuzu, nongeye gusetsa Gaelle ya nseko nziza izira imbereka, nongeye kubona ya menyo meza yera, amaso manini y’ abatesi numva umutima wanjye unkomangiye kwinginga.

Umunsi waciye ikibu maze Gaelle ambwira atuje ati,

Gaelle-“Ganza! Amasaha arakuze kandi urabizi mfite urugendo rurerure, reka ngende ngire igihe ngererayo”

Byabihe bitera bamwe kwiheba byaraje ntangira kubabazwa nuko tugiye gutandukana,

Njyewe-“Gae! Umutima wanjye wuzuye byinshi ariko hari amagambo abiri nakubwira avuze byinshi, urakoze cyane kandi ndagukunda”

Gaelle acyumva ayo magambo yabaye nkugize ikiniga maze arunama yongeye kubura ya maso ye yatangiye gutukura ndabimenya ndamwegera,

Njyewe-“Gae! Oya ni amagambo amvuye ku mutima, ni ukuri narahirira”

Hashize akanya gato Gaelle aba ararize ntangira kumuhoza mubaza ikimuririje hashize akanya aratuza maze arambwira,

Gaelle-“Ganza! Nanjye Ndagukunda”

Akimbwira atyo narikanze cyane, nagize ngo ndarota ntangira kwikoraho ngo numve ko mpari, umutima wateye insigane mbura uko nifata, Gaelle ahita yongera arambwira,

Gaelle-“Ganza! Ibyo nkubwira ni ukuri ndagukunda uyu munsi mbyemere kandi wumve ko ari umutima utumye umunwa ngo ubikubwire, igihe niki ngo nguhamirize icyo nihereranye iki gihe cyose”

Ibyishimo byinshi byanzamutsemo, umubiri wanjye uzongwa n’ umunezero ndahaguruka Gaelle amenya icyo gukora nawe aransanganira ndamuhobera mugumisha mu gituza, icyo nari ntegereje mu buzima bwanjye nari nkibonye, Gaelle yanyemereye urukundo uwo munsi.

Mu gihe nkimuhobeye mu ntekerezo zanjye by’ akanya gato nabonye Kevine arira umutima usa n’ unsimbutse ndigarura, Gaelle avuye mu gituza cyanjye turarebana yihanagura amarira yibyishimo bikurikirwa no kumwenyura,

Tukiri aho ako kanya twagiye kubona tubona Directeur ahingutse aho twari turi ari kumwe nundi mugabo ubyibushye, ako kanya Gaelle arikanga cyane atangira kunyihishaho, numva avuze buhoro ngo: “Mana yanjye wee! noneho Papa simukira…………………………

 

Ntuzacikwe na Episode 12 yiyi nkuru ejo mu gitondo

5 Ibitekerezo

  • Iyi nkuru ishika kunyota

  • Ndashimira umuseke ndetse numwanditsi kuko byatumye mva mubwigunge mbifashijwemo nabantu twahuriye hano nkaba narababuze ngo mbashimire kuko banyibye phone mbura contact zabo ubu nkoresha +260974701768

  • Igitekerezombega weeeeee, sinari niteze uru rukundo rwose kuko ganza yatangiye gukoza imitwe yintoki kuri Kevine ubuse kweri ise wa gaelle ntagiye kwangiza byinshi hano, ariko njya nibaza ababyeyi icyo bapfa ninkundo zabato

  • Imana ifashe Ganza Directeur ntamwirukane weeeee kubera yatorotse ikigo nta ruhusa

  • MURAKOZE UMUSEKE NANJYE REKA NTANGE IGITEKEREZO
    ABASOMYI NTIDUKWIYE GUTEGEREZA GUTANGA YINKURU ARUKO IGEZE KU MUSOZO. DUKWIYE KUYITANGA BURI UKO TUNYUZWE NIGICE RUNAKA MURAKOZE

Subiza

Your email address will not be published. Required fields are marked *