• 09/12/2019 7:43 11

Episode09: Ryan atunguwe no kwisanga mu biganza bya Mariam na Manager

Duherukana ubwo nari nsohotse aho nabaga, nagera ku muryango ngatangirwa numwe mu basore bari baje gutwara imyanda, akampereza agafoto, mu kureba neza…….

Ako kanya nahise njugunya iyo photo niruka nk’ uhunze, nongeye gutuza moto impagaritse ku kazi, aho gukomeza ninjira aho twakoreraga ahubwo nkata inyuma y’ inzu, ndabanza ntuza umutima,

Njyewe-“Ahwiiii! Mana yanjye koko ibi ni iki? Mariam aranze ansanze naho mba? Mbigire nte se? Babivuze ukuri! Ugenda mu ishyamba utazi ukahaca inkoni utazi! Mariam? Hmmm!”

Nkiri aho nagiye kumva umuntu utambuka aho hafi ndikanga mfata telephone nshyira ku gutwi ntawe umpamagaye, ndatambuka mpura n’ umugabo wakoraga muri Jardin munyuraho nkomeza kugenda nivugisha, nkomeza imbere ninjira aho twakoreraga mbona kuyikura ku gutwi.

Nakomeje imbere mpinguka aho Shakila yari yicaye yakira abantu, muhereza ikiganza gusa akomeza kurangarira muri telephone ye.

Hashize akanya,

Njyewe-“Shaki! Nubwo atari itegeko ariko unsuhuje ntacyo waba?”

Shakila yahise akora mu ntoki hafi ya ntabyo, kubyihanganira birananira mpita mubwira,

Njyewe-“Ariko se Shaki! Dupfa iki koko gituma uhora unshiha unshiha? Basi se nakoze iki kuva wamenya cyatumye unyereka utampisha ko utanyishimira?”

Shakila-“Ryan! Nshimye ko wabibonye cyera, urambaza iki?”

Njyewe-“Ariko se Shaki! Ko ntigeze nguhutaza n’ umunsi numwe, ko nkubaha ndetse nkaca bugufi imbere yawe ngo ukunde ubone ko ari amahoro nta mutima mubi, unziza iki koko?”

Shakila-“Umva yewe ngo arigira intama? Hmmm! Ibyo se nibyo bikuzinduye?”

Shakila yahise ahaguruka arikubita arasohoka nsigara aho, nta kundi nakomeje imbere nkomanga kwa Cedro, ndakingura nisanga nkuko byahoze,

Cedro-“Aaaa! Ryan! Bite wana?”

Njyewe-“Ni byiza, ndaho ndakomeye”

Cedro-“Kalibu kabisa”

Njyewe-“Urakoze!”

Cedro-“Ndabona umeze neza, wasubije agatima impembero?”

Njyewe-“Yewe, nta gutuza ntako, Cedro! Nta kumera neza rwose pe, nubu nje mpunga ifoto”

Cedro-“Ifoto?”

Njyewe-“Ahaaaa! Ifoto ya Mariam yanteye mu rugo”

Cedro-“Ngo? Ibyo se birashoboka?”

Natekerereje Cedro uko byangendekeye aratangara gusa arampumuriza, dutangira kuganira, iby’ ifoto turabyirengagiza ahubwo mubwira ibya Sabine, nongeye kubona ko ari mu bagize inkuru zanjye z’ umunsi nifuza kubaria bose.

Cedro-“Sabine rwose! Ndumva yaragutwaye wese, uwari kukunyereka uri guhoza igikoma ibyunzwe byakurenze!”

Njyewe-“Urabivuga urabizi!”

Cedro-“Gira urikocore rero!, Hhhh!”

Njyewe-“Cedro! Kurikocora se? Oya, Icyo nifuza kuri Sabine ni kumuba hafi nka musaza we, nkamenya uko yaramutse ndetse nuko yiriwe, nkamenya agahinda n’ ibyishimo bye, akabona neza ko mpari kubwe, kuri njye ibyo birampagije”

Cedro-“Eeeh! Ntusanzwe! Imana izabigufashemo, Ryan! Uzi igitumye nguhamagaye se?”

Njyewe-“Oya ntacyo nzi gusa nagitekereje, nta kundi nyine ugiye kunsezerera”

Cedro-“Oya Ryan! Kuki wumva ko ari cyo naba nguhamagariye?”

Njyewe-“Ubwo se nabica ku ruhande? Kuri njye rwose narangije kwisezerera, nawe se, ntabwo wazakomeza kwikorera ibibazo byanjye, cyane ko nabaye umurwayi wo mu mutwe simbimenye”

Cedro-“Ooohlala! Oya oya Ryan! Nakomeje kugutekerezaho, agahwa kakuriho ngerageza kugahandura ntakubabaza, ntabwo nkubeshya cya gihe umaze kumbwira byose ndetse na Bravo agasigara ambwira byinshi, hari icyo nabonye, niyo mpamvu nguhamagaye”

Njyewe-“Uuuh? Cedro? Wabonye iki?”

Cedro-“Ryan! Nkikumenya nakunze ibyo ukora, nakunze kwitanga kwawe, kubaha ndetse no kumvira. Navuye mu by’ akazi ngenda ndeba wowe wanyawe, nyuma yo kumbwira ibyakubayeho ugeze hariya mu kazi nari nakohereje haricyo nabonye, nabonye ko waremanywe umutima uterwa ubwoba no guhemuka, kugeza ubwo bikubungamo ukabura amahoro ugashiguka ndetse ukiruka wibutse ibyabaye mu kahise gusa humura”

Nakomeje gutuza no gutega amatwi, Cedro akomeza ambwira,

Cedro-“Ryan!

Ryan! Nkuko wabimbwiye, wakuze uri umusore ushishishoza ushaka ubuzima, usetsa abagusanze ngo ejo bazagaruke, umwe mubo wasekeye aragusanga akwitabaza mu nzira y’ amayobera umutima wawe uranangira ukuri kurawuganza Boss wawe umubwira ukuri umutima usigarana ubwoba bw’ uwagutumye,

Ryan! Muri ubu buzima tubamo ikintu gihenze kuruta ibindi kubona ni amahoro yo mu mutima, ariko kandi kuba wararemanywe uwo mutima ni amahirwe wagize, kuba byibuza ubura amahoro iyo wibutse uwo mukobwa Mariam bugaragaza ko wifuza kubohoka, ntabwo uwo mukobwa ari ishitani nkuko ubitekereza, ahubwo urasiganwa n’ akahise wasize, ndifuza kukuba hafi, ntabwo nshaka ko wigira inama yo gusara, nditeguye”

Cedro yambwiye ayo magambo numva umutima wanjye uraruhutse, nongeye gutuza ndamwitehereza, ngize ngo mvuge….

Ako kanya telephone ye yarasonnye ayitaba vuba nkomeza kumva avuga byinshi, hashize akanya katari gato mbona arashigutse cyane,

Cedro-“Nuko nuko rwose musubireyo nta mahwa?….sawa rwose ndaba mpari”

Yakupye telephone maze ahita ambwira,

Cedro-“Wihangane nari ndi kwitaba grand frere, ngo Imana yabahaye umugisha, umugore we yibarutse umwana, ahubwo se uyu munsi ufite iyihe gahunda?”

Njyewe-“Ugira ngo se hari gahunda nkigira? Ntayo da, nta gahunda mfite rwose uyu munsi”

Cedro-“Noneho tuze kujyanayo nta kibazo?”

Njyewe-“Naba ngize amahirwe yo kubona aho mpungira kwigunga”

Nagumanye aho na Cedro, agatima gasubira impembero, nabonye ko nyuma ya byose atigeze andekura, ndakomera mpa agaciro umutima yambwiye.

Nka saa cyenda twavuye aho dutega moto twerekeza mu busanza, tuvuye kuri moto twakomeje agahanda k’ amabuye tuganira,

Njyewe-“Burya bwose ugira mukuru wawe utuye muri izi quartier?”

Cedro-“Yego, yibera ino”

Njyewe-“Uuuh? Ariko ntabwo akunda kuboneka cyane, igihe gishize dukorana akaba atari yaza hariya dukorera ngo adusuhuze?”

Cedro-“Mukuru wanjye se ugira ngo…..ntabwo byo akunda kuboneka, akenshi aba yibereye mu rusengero, buriya uko undeba uku mfite mukuru wanjye w’ umu pasiteri!”

Njyewe-“Eeh? Koko se?”

Cedro-“Cyane rwose, yasizwe amavuta da!”

Njyewe-“Hhhhh! nari ngiye kukubaza….nako wowe ko ntajya numva umbwiriza nta gasigisigi k’ ijambo ry’ Imana yagusaguriye?”

Cedro-“Hhhhh! Buriya umuntu ni ikimurimo, ibanga aba ari irye ntiwamenya aho ahurira n’ Imana, ese wowe ujya usenga?”

Cedro yambwiye atyo mbura icyo mvuga, nibyo koko yari ambajije icyo ntajya nkora kenshi, byaranshanze,

Cedro-“Dore ngaha turahageze”

Yarakomanze ako kanya urugi ruhita rukinguka, akana keza k’ agakobwa gahita gahobera cyane Cedro aragaterura….kamwitaga Tonto.

Yagiye imbere nanjye ndamukurikira, duhinguka muri salon, hari hari abandi bantu bari baje guterura umuvaburayi nako kurya ubunnyano.

Twarabasuhuje turicara, hashize akanya natunguwe no kubona….nabonye usa nuwo nzi, uwo nameseraga ngateka tugasangira, uwanyizeye nkabikunda…. Manager waho nakoraga nereka imodoka aho ziparika, Manager! Boss!

Eheee! Nahagurutse vuba numva umuntu unkuruye….. yari Cedro,

Cedro-“Bro! Ko ushiguka? Ugiye hehe? None se bya bindi nanone biraje?”

Njyewe-“Oya oya niwe niwe!”

Cedro-“Inde? Inde? Grand frere se?”

Njyewe-“Niwe, Ni Boss, Manager……

Nagiye musanga mugeze imbere mbona bya bihe biraje, nibutse igihe dutandukana akambwira kujya kwiga ngo duhunge Mariam, uwo munsi nibwo twari twongeye guhura.

Ese koko niwe? Yarampobeye cyane aratambuka maze afata umwanya

Manager-“Imana ishimwe! Imana ihabwe icyubahiro, dore mbonye umwana wanjye, mbonye uwo nabuze, intama igarutse mu bitugu by’ umushumba, Karani nako Ryan angeze mu maboko”

Cedro yarishimye ndetse nanjye birandenga, nibwo nongeye kwemera ko mpuye na Manager, Boss, uwo nagiriwe amahirwe mu kahise akanyizera, kuri iyo saha Cedro byaramurenze mbona afite byinshi byo kuvuga, gusa yaratuje arahaguruka arasohoka ngenda musanga, nasanze ahagaze inyuma y’ inzu,

Njyewe-“Cedro Muvandimwe! Kuki utambwiye cyera ko Manager, Boss ari mukuru wawe??”

Cedro yahise ambwira atuje ati,

Cedro-” Ryan! Mukuru wanjye niwe wari Boss wawe, wa wundi wafuriraga, Mariam akakwitabaza ngo ukore ibiki n’ ibiki”

Njyewe-“Oooh My God!”

Muri ako kanya Natunguwe n’ umuntu wavuze cyane ati: ” Ayiwee, Ngo Ryan Karani??”

Mu guhindukira nahuje amaso na Mariam….nongeye kwisanga ndi mu maboko ya Cedro, ibyo ntashoboraga kwakira muri ako kanya

Njyewe-“Mabuja! Sist…Mariam!

Yari Mariam wa wundi duherukana ampa umuti wo gutera mu nzu, bikarangira byanze, nkavugisha ukuri, uwanyijeje ubuzima bwiza mu gihe gito, ariko se niwe?

Yarampobeye ati tambuka, Cedro yabaye nkaho agiye kuba nkanjye ngo yiruke ariko ntiyabibashije twinjiye muri salon nk’ abaca igikuba,

Mariam-” Mana wee! Ntabwo mbyumva! Ni ukuri dore Ryan! Wa musore nahaye impano y’ impumuro yawe nakunze umunsi wa mbere mpura nawe, ugakomeza kumbuza kubikwibutsa kuko wankunze utitaye uko uhumura, gusa nanjye shenge nkibuka ko impumuro yawe ariyo yatumye ndushaho kukwiyegereza”

Mana wee! Uwo munsi nari hagati ya Manager na Managerkazi izina ryasekeje abari aho bose,

Manager nako Boss yahise afata umwanya mu rugo rwe, maze araterura agira ati…

Manager-“Ni ukuri Imana ni nziza, muyikomere mu mashyi”

Nanjye narayakomye ariko nkubwiye ngo nari ndi aho hafi naba nkubeshye, yarakomeje aravugaa…

Manager-“Nkunda gushima Imana kuva nkivuka kuko ariyo yatumye ndi uyu ndiwe uyu munsi, Ryan uratunguwe ariko wagombaga kubohoka, dore nguyu umugore wanjye Mariam!”

Nongeye kwikanga ubwenge burahunga, nibajije niba Mariam nzi koko yarabanye na Manager akaba Managerkazi izina namwise ntabizi.

Manager-“Uyu musore Ryan! Uje ku munsi twakiyeho impano Imana yari yatugeneye, Ni ukuri Imana ihabwe icyubahiro ko nongeye kumubona!”

Ntababeshye nabuze uko nifata, ngishaka aho mfata Mariam yateye intambwe asanga Manager amufata neza yungamo ati,

Mariam-” Ryan! Koko wavuze ukuri uburira uwo nakunze utitaye ko ari ibanga nakubikije, wemeye kugenda kure ngo ibyabaye bitazagukoraho kuko ushaka amahoro yo mu mutima, ariko byaranze, birangiye twongeye guhura,

Ryan! Gira amahoro, wa muhumuro niwe dutama muri ibi byishimo byo kubona umugisha wacu ari wo waguhuruje!”

Mariam nirukaga mpunga mu bitekerezo, Ntiwakumva ibyambayeho ambwiye atyo, natunguwe gitumo mu byishimo, ko Manager na Mamagerkazi bubatse urwabo, amashyi aba urwunge, fanta turagotomera ibyo kuvuga biba byinshi turatarama dore ko aribwo nari nisanze mu bandi, ibyo Johnson yahoraga ansekera ati wabona ibitotsi ute utanyweye kamwe, tubiri cyangwa dutandatu….

Mu masaha akuze hamwe abajya kure bataha mbere mukisanga mwasigaye, mugasiganirwa gusezera, nibwo Manager yansukiye jus mu kirahuri ajyana hanze, maze atangira kunbwira….

Manager-“Aaah! Ryan! Yesu ashimwe! Twongeye guhura koko?”

Njyewe-“Rwose ntabwo mbyumva, Nanubu ndibaza niba ndi kurota cyangwa niba nararwaye mu mutwe wa mugani w’ abanzi ku Kibuye!”

Manager-“Ku kibuye? Ndibuka umunsi ngusaba kuzingira hamwe amafaranga Mariam yari yaguhaye ngo ukunde utere mu mu myenda, yakundaga kumbwira ko iyo mpumuro ariyo ituma yumva turi kumwe, ukawufata nk’ umuti ariko utazi ko umuvura, nanjye nkabifata nko kwanga icyo ntahawe ariko ukambwira uti wasanga ari surprise y’ umukunzi.

Yego koko yari surprise y’ umukunzi ari nayo mpamvu ubu imigisha urukundo rugaba ukuzanye, ukamenya ko utangiye ubuzima bushya, bwa bundi Mariam umugore wanjye yakwifurizaga”

Ako kanya Mariam yaje yihuta asoma Manager, aramwongorera yinjira mu nzu, dusigara hanze, Mariam ahita ambwira,

Mariam-“Ryan? Karani? Mbegaa…. sha ndishimye cyane ko nongeye kukubona, njye na Cheri twarakubuze, ngo wagiye disi uhunze urukundo rwaguheje , kuko rwashakaga gutungura ruserutse ukaba umwambaro warwo, , irya yari Surprise y’ umukunzi, ntiwari umuti nkuko watinye ukawuhisha, bikarangira umutima wawe uganjwe ukavuga ukuri,

Urabohotse, Ntabwo uzongera kwikanga, ntuzongera kwiruka umbona umpunga, gumana umutima waremanywe, uzahora utungurwa n’ ibyiza”

Iryo joro ryo kubohoka amata yabyaye amavuta, ibyishimo biraganza duhimbaza iyaduhanze, njye na Cedro twatashe twahinduye ibiganiro ibintu byamutunguye cyane agatangira kumbaza niba koko nsanzwe nganira?

Nageze mu rugo ninjira nishimye, iryo joro naraye nkanuye, umutima wari wirekuye, nari nabohotse, mu gusinzira niyibukiye Sabine, nibuka musetsa mubwira ibyo kunywa igikoma ku ishuri, yoooh narifumbase numva ko turi kumwe, ndasinzira………………………..

 

Ntuzacikwe na #Episode ya 10 y’ inkuru ndende #Sabine ejo mu gitondo

10 Ibitekerezo

  • Mbega amahirwe, Ryan burya yarwanaga n’ umutima? nabihoke rwose yari amaze kuturwaza imitima,

    • Ahuiiiiii Imana ishimwe numvaga nange umutima Wenda kuzamvamo nka Ryan ndumva nduhutse nange

  • umuseke murakoze, iyi nkuru irimo amasimo menshi. cedro ni umusore mwiza, Mariam yamenya kugerageza, Manager yamenya kwizera dore ko asenga cyane. ahasigaye duhanze amaso ryan na sabine. abakunzi ‘ inkuru ndenfe dukomeze gukomera muri ibi bihe

  • mbega inkuru irimo ubugoryi kuva nabaho ni ubwa mbere mbonye inkuru iri nonsense kabisa ubwo c iyo niba yari parfum niyo mariam yatangiye 500milles ngo ayitere mu myenda ya boss ndumiwe mujye muduha inkuru ziri kuri gahunda ubona ko zishoboka mu buzima tubamo.ifoto yo ndabyumva yavuye mu bishingwe kuko mariam bishoboka ko ari umwana wa nyiramazu bakodesha ariko se gusanga ibintu biteraguye hejuru ikindi ku kibuye uwo mukobwa wamuteraga ubwoba yewe iyi nkuru nyirangirije aha.nta yindi episode nasoma.

  • ICYI GICE CYA 9 CYO NICYO GITUMYE MPUMUKA PE NANJYE NARI NKA RYANNEZA NEZA! SURPRISE ZIBAYE NYINSHI KBSA, AHUBWO MUSORE REBA UKO WAFASHA SABINE. KUKO UBU KUVA WABOHOTSE AKAZI KAGIYE GUKOMEZA NDETSE UZASOBANUKIRWA IMPAMVU ITUMA SHAKILA AKWANGA N’IMPAMVU JONHSON YITA IBYAGO IBYISHIMO, GUSA ARIKO WIRINDE UWOMUGORE UBERA MUNZU NAWE NDABONA ASHOBORA KUZITAMBIKA

  • Imana ishimwe rwose Ryan uraruhutse,njyewe birandenze numvaga ntakindi kigutegereje uretse urupfu kabisa none dore urazutse

  • Mariam na manager uriya mukino bakinnye ryan bari bawuzi, bashakaga ko abajya kure akajya kwiga ndetse bamuha na minerval mu ibanga (Ya 500k) bashobore kuba barabanye imiryango itabishaka, ari nayo mpavu mariam atagisubira iwabo, dukumbuye JONSHON njye mbona azakwiba kuko niwe watereye hejuru ibintu wa munsi,

  • iyinkuru itangiye kuryoha. Bravo umwanditsi wacu.

  • Songa#Aho uvuze nabi cyane kuko umutima ukunda ukora burikimwe gishoboka kubwibiwurimo ubwabo,Wenda kuba inkuru idahuye n’amarangamutima yibyo wifuza sicyimenyetso cyo kutagira ubumwuga,tumaze igihe kinini dukora urugendo rwiminsi ijana kunkuru zitandukanye kdi zubatse imitima yacu muburyo butandukanye,rero wiba umunyantege nkeya wibyiyumviro byo kwihugiraho nibyo ushaka( to be selfish) ngo ugaragaze ubibi bwinkuru twishinira……,umwanditsi urakora kdi turagushimiye,nange nishimiye kubohoka k’umutima wa Ryan reka noneho duhange amaso ibikurikira.

  • INKURU NDENDE KO TWAYIBUZE UM– USEKE MUTUBWIRE RWOSE

Subiza

Your email address will not be published. Required fields are marked *