• 14/12/2019 10:07 59

Episode07: Ryan wiswe umurwayi wo mu mutwe, arashyize agera kuri Sabine watawe

Duherukana ubwo Cedro antega amatwi, ngatangira kumubwira byose ntaho mukinze, nkamubwira kabitera watumye  niruka nk’ ukurikiwe, kubera akahise k’ibyanganje mu ntekerezo ubwo nari ngeze mu icumbi rya kure….

Cedro-“Eeh! Komeza ndakumva Ryan! Uwo mukobwa ngo yashakaga ko mupanga deal?”

Nakomeje kumubwira,

Njyewe-“Hmmm! Uwo mukobwa amaze kumbwira ibya deal nongeye kumva ubwoba bwinshi muri njye, maze ahita ambwira ngo:

“Dore kandi? Ko mbona utangiye gutitira se? ubundi iyo bavuga deal wumva amafaranga, niyo mpamvu ntagusabye ubufasha cyangwa umuganda, cyeretse niba udashaka amafaranga?”

Nacecetse akanya gato hashize akanya ndamubwira nti:

“Oya, oya nta kibazo rwose yaba ubufasha, yaba deal byose ntacyo ntakwemera ari wowe ubimbwiye, ahubwo se ni ukujya nkogereza imodoka cyangwa ni ukujya…..”

Yansubije aseka cyane ati:

“Oya si ibyo, ahubwo akira nimero yanjye uzampamagare umbwire ko ari wowe gusa, ibindi tuzabivugana”

Nakiriye agapapuro yinjira mu modoka ndamuyobora aragenda, amaze kurenga nahise nihuta no kuri Bouncer wa musore wacungaga umutekano twakundaga kuganira,

Njyewe-“Hahahaha! Ewana Noneho umva ko utemera, uyu munsi uraza kwemera”

Bouncer-“Ndaza kwemera? Aguhaye iki se wangu? Ni tipu y’ angahe se?”

Njyewe-“Hhhh! Ngo iki? Birenze tipu wangu”

Bouncer-“Noneho si ngukira, ariko se njyewe nzira iki ko mu bakiriya bose baza hano ntawe ujya untera akantu? Cyakora urampa nka bibiri nanjye nze kugura akaro k’ inyama njye gushyushya mu mazi”

Namweretse nishimye cyane….

Njyewe-“Hhhhh! Do!”

Namweretse ka ka gapapuro kari kariho nimero ze nibwo nasomye ko wa mukobwa yitwa Mariam, Bouncer aho gutangara araseka ajya hasi,

Bouncer-“Hahahahaa! Urupapuro kweli nirwo rwagusajije? Uru no mu nzira bararutoragura kabisa, erega wapfumbatije wagira ngo ni cheque?”

Njyewe-“Wangu urareba ugasanga ndi injiji kweli? Buretse mu minsi micye uraje undebe unyoberwe”

Bouncer-“Ahaaa! Uri kwiyemera rero ngo yagukunze? Uriya se yakwiteza man ko ari umugore wa Manager?”

Njyewe-“Manager?”

Bouncer-“Uriya ni umugore wa Manager wangu, hari igihe bajya bava gusohoka bwije bakanyurana hano, nako wowe ntabyo uzi uba watashye”

Njyewe-“Hhhh! Ibyo se hari icyo bimbwiye, ni ubundi ndabizi ko amaboko atareshya kuramukanya biba biri kure, icyo nishimiye wowe ntukizi, Bouncer…..njye nuriya mukobwa….deal”

Bouncer yakomeje kunseka nanjye koko ntangira kwigaya numva ko bidashoboka, bwije cyane ndataha”

Cedro-“Komeza umbwire ndakumva Ryan, ndakumva rwose”

Njyewe-“Nyuma y’ umunsi umwe gusa narebye ka gapapuro nandika za nimero muri telephone nshyira ku gutwi, ako kanya yahise anyitaba vuba,

Mariam-“Hello!”

Njyewe-“Allo! Ni njyewe wa musore mwita Karani, ariko ubundi nitwa Ryan!”

Mariam-“Oooh! Nakumenye, burya bwose witwa utyo? Ntabwo nari mbizi”

Njyewe-“Niko nitwa rwose, nari nguhamagaye nkuko wabinsabye…..deal nyine ndacyeka utarabyibagiwe?…..”

Mariam-“Okey! Noneho niba ufite umwanya nakubwira aho unsanga kuko ntacyo twavuganira kuri telephone”

Kuko yari amasaha y’ akazi namubwiye igihe ndakarangiriza arabyemera, uwo munsi nakoranye courage nyinshi nshyugumbwa kujya kumureba, natekerezaga icyo anshakira muri byose nkakibura ngakomeza kugira amatsiko”

Cedro-“Birumvikana”

Njyewe-“Ubwo amasaha yakomeje kwicuma saa mbiri z’ ijoro zageze nkuramo imyenda y’ akazi  moto ndayurira, jugu jugu yampagaritse ku kiraro yari yambwiye, mu kureba neza imbere gato nabonye imodoka iparitse imbere yanjye ako kanya telephone yanjye ihita isona, nitabye nari Miriam ambwira gukomeza imbere gato.

Nayigezeho ndakingura ndamusuhuza ako kanya ahita ahaguruka, mu nzira twagiye musetsa nk’ ibisanzwe, tugera mu muhanda w’ ibitaka ahantu hatabonaga neza, aparika hafi aho azimya amatara, maze mpita mubaza,

Njyewe-“Uuh? Ko uparitse aha se?”

Mariam-“Yego aha niho heza, njye sinkunda kuvugira ibintu bikomeye ahandi hatari mu modoka yanjye, mba ntekereza ko na za nyiramubande zose zibyumva”

Njyewe-“Uuuh? None se deal wambwiraga ni ibanga rikomeye?”

Mariam-“Ni ibanga rikomeye cyane kandi tayali warangije kwinjira mu mukino”

Nakomeje guceceka ari nako ubwoba buba bwinshi, hashize akanya Miriam arambwira,

Mariam-“Kara! Ngira ngo ukunda kumbona kenshi hariya, ubusanzwe ndi umukunzi wa Manager wawe, tumaranye imyaka itatu dukundana, none ndashaka ko unkorera akazi, ukabona ubuzima bwiza!”

Njyewe-“Ngo ngo akazi? Ushaka ko mva hariya se kandi….”

Mariam-“Ese ko mbona usa n’ ufite ubwoba? Humura, tinyuka”

Njyewe-“Eeh! Eeh! Ok ok Nta kibazo ndakumva”

Mariam-“Umva ! Navutse ndi umwana umwe w’ ikinege, navutse ku buryo bukomeye cyane, nisanze dutunze birenze ibya mirenge ujya wumva, gusa hari icyo nifuza ko umfashamo kandi ntumpakanire nimara kukikubwira”

Cedro-“Uuuh? Ko unteye ubwoba Ryan?”

Njyewe-“Hmm! Uko yakomezaga kumbwira niko byasumbaga ubwenge bwanjye, ntangira kugira ubwoba, ako kanya Mariam yacomoye umukandara, uyu w’ imodoka urinda impanuka ubwoba bukomeza kuba bwinshi umutima utera insigane, ngiye kubona mbona  arahindukiye akoze mu ntebe y’ inyuma, ntabwo nari nabonye ko hari isakoshi ye nini,

Yarayifunguye  acana itara ryo mu modoka akuramo umuba w’ inoti, akuramo n’ undi, ubwoba noneho bwarushijeho kwiyongera nkanura amaso, natangiye kwibaza mu by’ ukuri Mariam uwo ari we.

Mariam-“Kara! Nako harya izina ryawe risanzwe ni….ndaryibagiweee….”

Njyewe-“Ni Ryan Mabu….nako Sist….”

Natangiye gucurikiranya amagambo nawe urabyumva, ubwoba no gushyugumbwa iyo byivanze aho waba uzi uko bigenda?”

Mariam yahise yongera kumbwira,

Mariam-“Itegereze neza! Aya ni amafaranga ntabwo ari ibipapuro, nkuko nabikubwiye, amafaranga kuri njye ni menshi ndetse cyane, ayo nsigaje gutunga nayo gutera inyoni, icyo ngusaba nucyemera nzaguha ayo ushaka yose, wowe nsezeranya kumfasha muri deal uhite uhindura ubuzima mu minsi micye bakuyoberwe”

Nk’ umusore utari uzi ubuzima buri imbere buhora buteye amatsiko nasamiye hejuru ayo mahirwe adasanzwe, nanze kuzicuza gupfa ntakize, nako namwe amafaranga  murayazi kuyava imbere wayateye imboni, ntibyari gushoboka nahise mubwira,

Njyewe-“Eeeh! Sister! Aya yose se…..nako nta kibazo rwose ndi tayali, wowe mbwira akazi ngomba gukora ndi tayali”

Mariam-“Okey! Good! Umva uko bimeze rero, nkuko nabikubwiye, maze imyaka itatu nkundana na Manager wanyu hariya ukora, yambwiye ko ari wowe ujya ukunda kujya  kumufurira muri week end”

Njyewe-“Cyane rwose ni njyewe, akunda kumpamagara nkajya kumufurira kandi ntabwo njya nyipfubya, uzi amafaranga njya nsanga yaribagiriwe mu myenda? Icyo mukundira aba ari wo munsi wanjye nawe wo kurya no kunywa, ewana inyama turazivovora zikadusema, Sister! Wowe mbwira gusa icyo nsabwa ibindi uzaba ubimbwira, nzagabanye umunyu cyangwa nongere urusenda?”

Mariam-“Umva nyine icyo nshaka gutuma, nkaguha icyo ushaka cyose”

Njyewe-“Nizere ko atari ukwiba ariko?”

Mariam-“Oya ariko se yaba ari ukwiba ukabaho neza se hari icyo? Aba bose ubona bagenda uzi barakijijwe n’ iki? Humura icyo ngusaba nta kindi…..”

Mariam yongeye gukora mu isakoshi akuramo agacupa kameze nk’ aka parfum,

Mariam-“Ryan! Hano harimo umuti, ndashaka ko uzanterera uyu muti mu myenda ye yose ndetse no mu mashuka”

Njyewe-“Ibyo byonyine?”

Mariam-Utagira ngo ni parfait isanzwe, uyu ni umuti….”

Njyewe-“Eeeh! Mabu….nako sist, ngo umuti?  Cyangwa ni uburozi? Oya nako…nibwo iyaba atari bwo nawe wari kubyikorera…”

Mariam-“Suuu! Mbwira niba uzabishobora cyangwa utazabishobora, nako byarangiye kuva nabikubwiye”

Umutima wakomeje gutera insigane, ubwoba sinakubwira, nabuze icyo nkora, ndeba kuva mu modoka ariko biranga…

Njyewe-“Maria! Ntabwo nzakuvamo, niba ari ugutera umuti byonyine ariko se….”

Mariam ntacyo yansubije ahubwo yampereje uwo muti  ndetse na ya miba y’ inoti yatsa vuba tugenda twihuta.

Yansize hafi ya hahandi nakoraga ambwira ko agiye kureba Manager, mfata inzira ndataha.

Nageze mu rugo mfite ubwoba bwinshi, nasanze nk’ ibisanzwe mu rugo baryamye ndakingura, ntambukaga nomboka nk’ umujura, ninjira mu cyumba ntangira kubara nasanze ari ibihumbi magana atanu yose.

Cedro-“Eeeh! Ibihumbi magana atanu?”

Njyewe-“Hmmm! , mu gitondo nabyutse nabuze amahoro, birumvikana nari mbitse ibanga n’ amafaranga menshi byanteye ubwoba bwinshi, nayasize munsi ya matera njya ku kazi, uwo munsi nahageze nakerewe.

Nakomeje gushyugumbwa kugisha inama Bouncer ariko ndaruca ndarumira, bidatinze week end iragera, nagombaga kujya gufura kwa Manager.

Naragiye ndafura ndanika, Ndateka dore ko we yabaga yazindutse ajya gukina mu ikipe y’ abishimisha, imyenda yarumye ndazinga njyana mu cyumba cye, nakomeje kureba wa muti najya gutera mumyenda bikanga bikananira.

Nakomeje kwibuka isezerano nagiranye na Mariam, nkomeza kugira ubwoba nkiri aho numvise Boss ampamagaye ndikanga, mpisha wa muti munsi y’ igitanda ndasohoka dutangira kuganira.

Nyuma y’ akanya katari gato yarambwiye,

Manager-“Ndumva naniwe saana, nshaka kujya mu cyumba ngakora douche nkaryama nkageza nk’ejo”

Akibivuga natangiye kwibaza uko nsubira mu cyumba cye biranshanga, yahise anahaguruka nshaka kumutanga imbere ariko biranga yinjira mbere arakinga, nkibyibaza yahise akingura umuryango, afite rya cupa mu ntoki,

Manager-“Ryan! Hari umuntu wundi wageze mu cyumba cyajye?”

Njyewe-“Nta…ntawe ntawe rwose nta numwe, ntawe ndagatora….”

Manager-“Uuuh? Ko mbona urahira cyane se bite? Iyi parfum se yageze mu cyumba cyanjye gute?”

Njyewe-“Eeeh! Hari….hari envelope imwe….nyine ndi gukora isuku, nayisanze muri enverope yari mu kabati, wasanga ari nk’ impano umukunzi wawe yaguhishiye ngo uzatungurwe, ahubwo reka nyitere muri ya myenda nafuze no mu cyumba hose twumve ko ihumura?”

Manager-“Ngo impano bampishiye? Oya oya kabisa ntabwo mbyumva, kuva nakwimukira hano, nta mukobwa numwe wari winjira mu cyumba cyanjye”

Njyewe-“Uuh? Boss Koko se?”

Manager-“Ahubwo reka nze nyijugunye muri toilette sinakwitera ibyo ntazi”

Njyewe-“Oya Boss! Basi yinyihere nzajye….”

Manager-“Reka reka….”

Manager yagiye ndeba yinjira muri toilette ajugunya wa muti aragaruka, nahinze umushyitsi mbura aho nkwirwa, akomeza mu cyumba cye, arakinga hashize akanya arakingura ampereza inote y’ ibihumbi bitanu,

Manager-“Akira jya kureba akantu ufata, ubu ngiye kuryama kabisa sinzi igihe mbyukira, ntiwantegereza”

Nta kundi byari kugenda, deal y’ abandi yapfuye ityo, ngira ubwoba bwo kubibwira Mariam ahubwo nkomeza kwihishahisha, nagera ku kazi namubonera kure nkanyonyomba.

Amahoro yaranze, umugoroba  umwe nsanga Manager iwe mutunguye, mutekerereza byose, yaratangaye cyane agira ubwoba bwinshi, gusa yitsa umutima anshimira ko mubwije ukuri nanjye ntangira kumutakambira mubaza icyo nakora.

Yaratuje maze arambwira ati,

“Ryan! Nubwo habuze gato ukangambanira ariko nawe si wowe, aho wisanze muntu wese yahisanga, gusa Imana ishimwe ko iki gikombe kindenze”

Njyewe-“None se Boss! Nkore iki ko Miriam yambujije akambwira ko nzagira ibyago ninkinisha kumuvamo?”

Manager-“Humura! Ibyanjye nuriya mukobwa  birarangiye, tugiye gutandukana ndetse mve hariya kuburyo atazongera kumbona”

Njyewe-“Hanyuma se njyewe? Ubu se koko nzerekeza hehe wee? Amafaranga ye se?”

Boss yambwiye atuje ati,

“Njyewe ndabona…., ndacyeka nawe urebye icyo wahugiraho nk’ ishuri, ukagenda ukamara imyaka wibera ku ishuri, ukava hariya kuri super market ntaho yazakubonera, namara kunyibagirwa azarekuza birangire, abone ko Imana isumba byose”

Umwanzuro twawufashe ubwo nibwo nagiye kwiga ibijyanye no gufotora ndetse no gufata amashusho, ndangije nibwiraga ko byarangiye gusa nabonye neza ko aho waciye inzira mbi utununga duhora dukura, amahwa akuma ashibuka ubwo twari tugeze ku kibuye aho mwari mwanyohereje……maze umugoroba umwe twibwira ngo ngiye gutembera, nakubitanye na Mariam yiyambitse indi shusho y’ umukobwa utabaho, nkavayo mpunze”

Cedro-“Ngo….ngo…ntibishoboka? Ryan! Ibyo byose ni ubwoba bwa Mariam cyangwa usanzwe ugira ikibazo mu mutwe?”

Nabwiye Cedro ibyo intekerezo zanjye zanyeretse nacyekaga ko bitazambaho, arumirwa,

Cedro-“ Ryan! Ibyo byose ni ubwoba bwa Mariam gusa, koko waramubonaga cyangwa usanzwe ugira ikibazo mu mutwe?”

Mu gihe nari ngicecetse nabuze icyo mvuga….Hari uwakomanze Cedro arahaguruka arakingura, yari Bravo.

Naratunguwe cyane…..

Bravo-“Eeh! Ryan! Cedro? Yampaye inka? Uyu ni Ryan se?

Twakomeje guceceka, hashize akandi kanya gato,

Bravo-“Uyu ni Ryan wavuye ku Kibuye yiruka yasaze?”

Cedro-“Eeh! Kalibu Boss! Kalibu kandi wihangane….”

Bravo-“Oya nta kwihangana, abantu mukoresha abarwayi bo mumutwe se….erega umusore umwe mubo bakoranaga yarabimbwiye, ngo bigeze kujyana gutembera, amujyana mu gihuru agenda yivugisha ngo ari kumwe n’ umukobwa bavayo imvura ibari ku mutwe, si we gusa, n’ umukobwa ukora muri hotel twabagamo yambwiye ko yajyaga amubona agasakuza, nanjye yaturumbutse yiruka mureba ndetse aranansiga, ngiye kureba icyo ahunze ndakibura”

Cedro-“Yeee?”

Bravo-“Ibyo simbitindaho, ahubwo  turasesa amasezerano da, gusa ibikoresho byanyu yataye byo nari mbikuzaniye, n’ amayoga yatse ambeshya ngo yagize ibyago ari kwiyibagiza ibibazo nayamwishyuriye”

Cedro-“Ngo? Umva Ryan! Ushatse waba witahiye, ukagenda ukaruhuka neza, ibindi tuzavugana umaze gutuza”

Narahagurutse ndakingura,

Bravo-“Ukuntu nari naramubonyemo umusore wakwizerwa naho bijya bijagura?”

Ibyo nabyumva ndenga, Mva aho nerekeza mu rugo, nagezeyo numva meze nabi, kwa kundi wumva wihebye, kumva Bravo anyita umurwayi wo mu mutwe byanyemeje ko ntacyo nshoboye, numvaga igikomye umutima ugashiguka, kubera gutinya Mariam, aho niho nicujije impamvu ntakibana na Johnson byibura ngo ambe hafi muri ibyo bihe.

Hashize iminsi nk’ itatu, ku mugoroba umwe navuye mu rugo ngo mbe ntembera niyibagize ibitekerezo byamporaga mu mutwe, naratembereye ndatembera sinzi uko numvise telephone yanjye isonnye nkora mu mufuka vuba mu kureba neza yari Chento uwo Sabine yampaye nimero ze ngo nzamushakeho.

Nitabye vuba,

Njyewe-“Hello!”

Chento-“Ryan Bite?”

Njyewe-“Ni byiza!”

Chento-“Se ko wanyanze  cyane Cheri? Habe no kongera kumvugisha koko?”

Njyewe-“Urihangana nanjye sinjye…”

Chento-“Aaaah! Genda wowe wananze ko duhura ngo tubonane amaso ku maso unshime cyangwa ungaye, Hmmm?”

Njyewe-“Oya aho urihuse ariko nari kuzakureba muri iyi minsi?”

Chento-“Kandi ubu mvuze ko ndi kumwe na Sabine wahita uza”

Njyewe-“Eeeh eeh! Ngo ngo Sabine? Sabine muri kumwe?”

Chento-“Haahaa! Umva, hari icyo nguhamagariye  ariko nako  kereka uguze naho ubundi nta kintu nagutangariza”

Njyewe-“Che! Mbabarira umbwire niba koko uri kumwe na Sabine ndakwinginze ni ukuri”

Chento- “Hhhhh! Mbwira ahubwo uri he?”

Njyewe-“Sabine wee!”

Chento-“Hhhhhh! Sabine turi kumwe rwose ahubwo se mbe nshyirishijeho ifi urayishyura?”

Njyewe-“Ok! ok!……

Chento namwemereye kuza kurya ibyo ashitse kuko yari ambwiye icyo kuva nabwirwa ko Sabine bambuze nifuzaga kumva.

Ako kanya nuriye moto, motari ampereza casque ngiye kumva numva irazimye, essence yari ishizemo.

Yagiye mubyo guhengeka mba nuriye indi ntanamwishyuye, twageze aho Chento yari yandangiye ko ari ninjiramo, muri restaurant.

Narebye hirya no hino, ndongera ndasohoka, mfata telephone ngiye kumuhamagara mbona umukobwa wazaga, sinzi uko byagenze nahise numva kari Chento nawe acyeka ko ari njyewe…..koko byari byo yahise ampobera nanjye mbikora uko.

Twinjiyemo imbere nkabona asuhuza abakozi n’ abandi bantu batandukanye mpita menya ko ibyo ari byo byose asanzwe ahaza.

Nakomeje kumukurikira, muri njye numvaga niteguye guhinguka aho Sabine yicaye ariko siko byagenze, ahubwo twahingutse mu gikari ahari izindi ntebe, turicara.

Chento-“Ryan! Eeeh! ni wowe Ryan mbega?”

Njyewe-“Yego ni njyewe, nawe noneho ndakubonye…..nako mbwira Sabine ari he ko wari umbwiye.

Chento-“Hhhhh! Wowe tuza ariko? Nta n’ ikintu twari twafata wana? Wowe tuza….wumve ngo ni surprise……”

Byanteye gutangira kwibaza iyo surprise igiye kuba iranyobera, cyane ko icyo gihe  njye na Sabine nta mubano wihariye twari dufitanye ngo Chento na bagenzi be babe babizi, nyuma yo kumbwira ko yabuze nkababara badukorere surprise twongeye kubonana.

Nagarukiye hafi bazana icyo kunywa dutangira kuganira, nyuma y’ akanya gato ntungurwa no kubona ifi ku meza, umusore wari uyizanye yaganiriye byinshi na Chento nongera kubona ko baziranye cyane, amaze kugenda,

Njyewe-“Koko se wari ukomeje, ifi wahise uyishyirishaho?”

Chento-“Cyane rwose? Wankinishaga? Nahise mpamagara bayishyiraho gusa mbwira niba utarayishyura hakiri kare?”

Nta kundi nk’ umusore nubwo ntayo waba ufite ntiwatuma bayisubizayo wakwemera ukanaguza cyangwa ugasiga ibyangombwa narikirije,

Nakomeje kwibaza byinshi, nkibaza impamvu niyo yaba ari surprise Chento ariye ifi wenyine ntategereze abandi?”

Twakomeje kuganira gusa biranga ntangira kumuhatiriza cyane, mubaza Sabine ndetse ntangira guhindura isura ndarakara, abibonye agira ubwoba aratuza,

Chento-“Basi ndabona urakaye…..

Njyewe-“Ndarakaye nyine, Njyewe naje umpamagaye umbwira ko uri kumwe na Sabine, naje nziko niteguye kumubona, kwanza wowe niba ari n’ igihembo ushaka umbwire nkiguhe unyereke Sabine umpamagariye, ninsanga umbeshya kandi…..”

Chento-“Oya sha mbabarira….Sabine….nako nyine”

Njyewe-“Chento! Ndasanga umbeshya…..

Chento-“Oya oya basi ihangane unyumve nkubwire, Sabine arahari ndetse naho ari ndahazi, ariko igituma nguhamagaye nagira ngo tuganire kuri we, niba koko mukundana ndabona waba warayobye”

Akimbwira atyo nongeye kwibuka umunsi wa mbere tuvugana akambwira byinshi kuri Sabine, akamugira undi, akamugira indaya nyamara ukuri narakumenye igihe arara mu rugo yazanye na Johnson, natuje umutima maze ntega amatwi, burya uzatege amatwi igihe uzaba wagize amahirwe yo kubwirwa, maze wihitiremo ukuri kabone niyo wayoberwa ukuri, ko kuzaca mu ziko ntigushye, kugusange ukumenye

Chento-“Ryan! Ntega amatwi nkubwire byose, Nkuko nabikubwiye, Sabine twahuye ari umukobwa uje gutangira university…..”

Njyewe-“Ibyo nta mpamvu yo kubisubiramo warabimbwiye”

Chento-“Nyine! Sabine twabanye ubwo, gusa uko bucya nuko bwira twakomeje kumwigaho ariko aranga aratuyobera, ni wa mukobwa utaravugaga, akenshi yabaga acetse cyane, twamuvugisha akadusibiza amagambo abaze, twamusetsa akamwenyura, kenshi twamusaba gutemberana natwe akanga akigumira mu rugo,

Sabine twakomeje kwibaza ikibimutera, kenshi tukumva ko ashobora kuba atatwiyumvamo, abashyitsi badusura bikamubangamira cyane, tukabona aba atabishaka,

Twagerageje kumuganiriza isi y’ ubu, ko akwiye kuvana ubuturage aho agasirimuka, akamenya ko iyi si ariyo kwishimamo atari iyo kurakarira,twamwiciyeho niba adashobora kubaho nkatwe buhoro buhoro atangira guhinduka, yemera kudukurikira, tukamutiza imyenda dore ko atiguriraga n’ agapantaro, tumwereka ko hari abamuha ibirenze ibyo yifuza”

Nakomeje gutega ammatwi ibyazaga byinjira mu matwi yanjye…

Chento-“Sha inshuro zose twajyanye yadutaga aho twabaga twajyanye twabonye abaterankunga batugurira akitahira bikaturya ahantu, rimwe tumusigira umu Djama tumucitse baratahana aramurarana mu gitondo arataha, maze si ukudutuka aratwandagaza, ngo ntabwo yari azi ko twamugurisha mu buraya, ibaze ngo abitubwire  nkaho hari ikiziriko twamushyizemk cyangwa tumurusha ubwenge ra?

Hmmm! Nta kindi twakoze, umunsi ngo yagiye mu byo gukina film twahise tuyimutamo, reka shwi! turigendera birumvikana niwe wahombye kuko ari twe twari tumutunze? Twamutaye mu nzu da!”

Njyewe-“Yeeee?”

Chento-“None? Ka Sabine ni agacucu, ntabwo ari umukobwa wazaguha ibyishimo ngo ubeho mu njyana ihezweho, nako nawe uri umusilimu urabyumva, ahubwo ndumva wanyisanzuraho, igihe cyose wampamagarira wajya umbona, kandi n’ abana tugendana….n’ aba slay bazi kuryoshya sana! Sibyo Ryan?”

Chento yabivugaga amwenyura ubona ko ari kumbwirana amarangamutima nkaho amfitiye impuhwe, hashize akanya mwitegeteza….

Njyewe-“Che! Wampamagaye umbeshya ko uri kumwe na Sabine ntabwo wampamagaye ngo umbwire ibyo byose niyo mpamvu ntashobora kwemera ibyo umbwiye, mfite ukuri nzi Sabine wa nyawe uwo uhimba ntabaho ahubwo urambwira neza icyo mwahoye undi mwana kandi nakomeza kubura byose urabyirengera”

Chento-“Ngo ngo ndabyirengera? Oya oya….

Nakomeje gutera ubwoba Chento ndetse mwemeza ko ngiye guhamagara abashinzwe umutekano bakamufata, bakamuryoza Sabine.

Yagize ubwoba bwinshi….

Chento-“None se….ko nyine ko twamusize aho twabaga….

Njyewe-“Che! Urumva ufite ishema ryuko mwataye Sabine, kuko mwamutaye ntuzi ko ari ibyago mwiteye, ubu tuvugana, ugomba kunjyana aho mwabaga, kandi nubyanga, urahura n’ ibibazo”

Chento-“Ubu se…..Mana yanjye wee! Ubu se nitugerayo tukamubura?”

Njyewe-“Nawe nyine byumve….ahubwo ntabwo tugenda twenyine, reka mpamagare abashinzwe umutekano”

Chento-“Oya oya tugende, ni ukuri wibahamagara”

Ako kanya nahise mpaguruka ndishyura nshyira Chento imbere, nta kindi twongeye kuvugana twuriye moto iyo nari ndiho ikurikira iyo yari ariho,

Twafashe umuhanda, aho twacaga nabonaga mpazi, ariko motari akata mu muhanda w’ ibitaka nari mbonye bwa mbere, nyuma y’ iminota nk’ itanu mbona araparitse.

Twamanutse mu kayira gafunganye duhinguka mu wundi mu handa, turawurenga twinjira mu muryango w’ igipangu cy’ amatafari mabisi, kidafite umuryango, hari harimo inzu nto zikodeshwa.

Chento yakomanze ku muryango, muri ako kanya urugi rurafunguka, nakubise amaso Sabine wari ukenyereye igitenge hejuru, yipfutse igitambaro mu mutwe mbese wabonaga ameze nk’ ubyutse, akibona ko ari twe!.

Yarikanze cyane, ashaka gusubira mu nzu ariko mpita muhamagara cyane arahindukira agiye gusubira mu nzu,

Njyewe-“Sabi!”

Muri ako kanya yahise ahindukira vuba, ntera intambwe musanga, tumaze akanya gato duhuje imboni areba hasi, ndambura ukuboko mfata ikinza cye ndamusuhuza nubwo we yasaga n’ utabishaka gusa andinda guseba aransuhuza,

Njyewe-“Sabi! Humura wikwikanga, tuza umutima utuze tuje aha ku bwawe, Imana ishimwe ko nkugezeho, narabiharaniye kandi byari bikwiye”

Sabine yakomeje kureba ku ruhande, mu guhindukira Chento naramubuze, yari yagiye cyera!, nibajije igitumye agenda atyo biranyobera ariko sinabitindaho cyane kuko nari mbonye Sabine nifuzaga kongera kubona,

Njyewe-“Sabi! Niba atari na kalibu nkundira dushyike kuri kano gatebe mbona hano hanze tuganire, ni icyo umutima wanjye wifuza muri aka kanya”

Sabine-“Oya, oya ni kalibu, ntabwo natinyuma kuguheza hanze kandi waranyakiye muri rya joro ukanyumva ukamfubika bwacya tukaganira ukamperekeza ngataha”

Sabine yakinguye urugi cyane arinjira arantegereza nanjye ndinjira abona kwegekaho, maze ahita ambwira,

Sabine-“Urisanga, nako nyine urihangana nta ntebe ihari…..”

Njyewe-“Oya nta kibazo Sabi! Humura rwose, ahubwo reka nicare…..”

Nahise nicara kuri matera yari ishashe hasi ku itapi, maze nawe yicara impande yanjye, nkomeza kumwitegereza, muri njye numvaga sinzi uko meze, umutima wari wirekuye nkaho ubonye icyo wifuzaga, mu magambo atari macye nifuzaga kuvuga, umunwa washyugumbwaga kuyamubwirira icyarimwe gusa ndatuza

Sabine umwari mwiza wari utuje muri ako kanya yakomeje kuubika umutwe, natunguwe no kubona yikije umutima gusa arahaguruka ntacyo ambwiye, agana hirya gato nibaza aho agiye, yongeye kugaruka afite isahani iriho ibiryo ndatungurwa.

Yabinshyize imbere yanjye maze nawe aricara, maze ahita ambwira,

Sabine-“Nari nkuzaniye ibiryo, ariko wihangane bishobora kuba byakonje”

Njyewe-“Sabi! Urigoye pe! Urigoye rwose ndahaze, naje ndiye nta kibazo”

Sabine-“Ahaaa! N’ ubundi mbizanye niganyira, nari mbizi ko utabirya, ntacyo reka mbisubizeyo nta kundi, gusa ntabwo nabura kukugaburira mu nzu hari ibiryo, nicyo nari mfite cyo kukwakiriza”

Njyewe-“Ooh…oya Sabi! Oya wibisubizayo…….”

Muri ako kanya nicujije impamvu nari mbyanze, maze mbisingira ubwo ntangira kurya n’ apetit nyinshi, nawe aramfasha aransangiza, ndetse azana n’ igikoma….hmmm! Bya bindi by’ abasore byo kwijena? nabishyize ku ruhande, mpuha igikoma ndacugusa ibintu biba ibindi, hahandi n’ ibyunzwe byashotse.

Tumaze gusangira Sabine yangaragarije guhinduka muri we, twinjira mu yindi mood, yatangiye kumwenyura ari nako agira udusonisoni, nanjye nkomeza gukora iyo bwa baga ngo agume muri ibyo bihe byiza, isura ye nyitake………………………………………

 

Ntuzacikwe na #Episode ya 08 y’ Inkuru ndende “Sabine” Ejo mu gitondo

 

3 Ibitekerezo

  • mbaye number one

  • bravoo Mbega inkuru nziza! Ryan icyamuteye biriya ni amafaranga y’ abandi, ibyo yabonaga ntibyari ukuri, yabonaga managerkazi akibuka miriam, bigaragare ko ari imwana mwiza utinya guhemuka. uti gucugusa igikoma ibyunzwe bigashoka, hahahaha Eddy we, week end nziza ku basomyi n’ umuseke

  • Inkuru itangiye kuryoha sana. Abantu nka Chento babaho cyane kandi ba Mariam nabo ni uko basebanya, bagambaniraba, batanyurwa n’ibitambo nka manager Imana ikinga ukuboko barahari cyane kandi ishuri ry’ubuzima ntirisoza amasomo buri munsi aba ari bishya. Bravo nawe ipfunwe afite rituma yita Ryan umurwayi wo mu mutwe kandi ntawe utinya ishyamba atinya icyo yarihurimo, ibyo yamubwiye byose bimurwaniramo aziko azabivuga. Courage umwanditsi, merci Umuseke Limited

Subiza

Your email address will not be published. Required fields are marked *