• 29/01/2020 3:56 52

Episode06: Ryan amenye impamvu ikomeye Sabine yirukanwe mu bandi, ata byose akiza amagara

Duherukana ubwo navuga mu modoka muri ako kagoroba ngakomeza ngana aho twari ducumbitse, mu nzira numvise ihoni ndetse imodoka yari irivugije irahagarara, mu kureba neza yari yayindi ya Bravo.

Nasubiye inyuma nyigezeho mfungura umuryango,

Bravo-“Aaaah! Ryan! Bite se?”

Njyewe-“Ni sawa kabisa, buriya umbonye ute muri aka kabwibwi ra?”

Bravo-“Hhhhh! Buriya iyi modoka yanjye igira amaso meza nako amatara mazima, ngucanyeho ndakumenya, n’ ingendo yawe irihariye buriya ntabwo nagucaho kabisa”

Njyewe-“Eeeh! Hanyuma se uragana he?”

Bravo-“Nari ngiye hirya gato ngo ndebe aho mfatira ako kunywa nanatembera ndeba uko ino biba byifashe, ahubwo ngize amahirwe mbonye umfasha, wareka se tugasubukura gahunda tukajyana tukaganira?”

Njyewe-“Ok! Nta kibazo, nta kibazo rwose”

Bravo yakije imodoka nanone dufata umuhanda, twageze ahantu hamwe araparika tuvamo dutangira kugenda n’ amaguru,tugera ahantu hari handitse ngo Ribe Rimwe Ndisomere Aha tubanza guseka twinjiramo.

Twicaye mu kumba batweretse, umukobwa aza kutwakira, amaze kutuzanira icyo kunywa asubirayo,

Njyewe-“Burya bwose winywera Fanta Boss?”

Bravo-“Eeeeh! Cyane kabisa, iyo nyweye nka bino binini cyangwa bitatu aba ari sawa, humura ariko wowe utanyigana ufate icyo ushaka”

Njyewe-“Oya oya nta kibazo nanjye ni ka Fanta ninywera”

Bravo-“Hanyuma se ku itabaro byagenze bite?”

Njyewe-“Kwitabaro se…..ku itabaro nasanze nako nyine nawe urabyumva aba ari amarira n’ agahinda”

Bravo-“Birumvikana! Hanyuma rero uribuka ko nigeze kugusaba kuganira nawe kuri uriya mukobwa Sabine nirukanye, ariko ubu ntibikiri ngombwa twiganirire ibindi.”

Njyewe-“Oya Boss! Nta mpamvu yo kuganira ibindi, ahubwo tubiganire n’ ubundi byose ni kimwe waramwirukanye”

Bravo-“Ariko wa mugani”

Bravo yikije umutima gato maze yubika umutwe yongera kuwubura arandeba maze atangira kumbwira,

Bravo-“Ryan! Burya mu buzima guhemuka si ikintu, nicyo kintu kiguherekeza mu buzima, kikagutera kwicuza iminsi yawe, aho ukomanze ugakingurirwa nacyo, waseruka aho gususuruka ugasuhererwa, rimwe ukabibona mu nzozi ugashiguka wiruka bamwe bakagirango wasaze cyangwa wahanzweho.…”

Njyewe-“Uuuh? Boss! Ushatse kuvuga ko Sabine umuzi mu buhemu? Cyangwa wamuhemukiye?”

Bravo-“Ryan! Kuva nakubona nabonye uri umuntu uzi gutega amatwi, nifuza ko wazaba umuntu watwaza umutwaro uvunnye umuntu mu gihe nyacyo, nanjye rero niyo mpamvu nabyifuje”

Njyewe-“EEeh! Ntabwo nari nzi ko ari uko bimeze, kugutwaza umutwaro byo najyamo tugasunika iminsi nta wamenya ejo yaba ari njye, ariko se uwo mutwaro nawushyigura ra?”

Bravo-“Ryan! Kuntega amatwi ni byo byonyine nifuza, kuko umunsi ngusanga wicaranye na Sabine ku meza nagize ubwoba, ko yaba yarakubwiye uwo ndi we?”

Njyewe-“Oya, oya rwose ntabwo yakumbwiye”

Bravo-“Narabiketse, niyo mpamvu namwirukanye”

Njyewe-“Yebaba wee, ubu koko Sabine yazize njyewe? Boss! ko namwegeye nkamuganiriza bisanzwe rwose ntiyigeze aguhinguza do! Ndarahiye…..”

Bravo yahise ansha mu ijambo maze atangira kumbwira,

Bravo-“Ryan! Uko undeba uku ndi umugabo uhamye, mfite imyaka mirongo itanu n’ itanu, , ubwo nari ndangije kwiga amashuri yisumbuye naje gupagasa I Kigali, muri quartier nabagamo hari hari umugore wankundaga cyane, yari afite umugabo wakoraga ijoro kuko yari umuganga, sinajyaga nteka, ntabwo nigeze mburara ahari, mbega byose yarabinkoreraga cyane ko nanjye nari mbikeneye, byari uguhirwa kuri njye”

Njyewe-“Ndakumva”

Bravo-“Urwo rugwiro rwaje kubyara urundi, buhoro buhoro naje…..naje gutumirwa nawe umunsi umwe, anyinjiza iwe mu nzu, turasangira turizihirwa nkuko bisanzwe, hanyuma…..hanyuma nyine tuza guhuza urugwiro tugwira ubushagarira butworosa ubusaswa dukora bya bindi”

Njyewe-“Eeeh!”

Bravo-“Ryan! Twakangutse mu gitondo twumva umuntu ukubita urugi, nihisha munsi y’ igitanda, nahamaze umunsi wose kuko umugabo we yiriwe aryamye, cyakora shitani…nako Imana yarandinze sinakorora cyangwa ngo nitsamure, nimugoroba nibwo nasohotse”

Njyewe-“Mbega??”

Bravo-“Nawe urabyumva nahise nsohoka ninjira iwanjye ndikingirana, buracya nkomeza ubuzima, nyuma y’ ukwezi umugore ati ndatwite”

Njyewe-“Inda yawe se?”

Bravo-“Kuraho akabazo, ushyireho akadomo”

Njyewe-“Eeeh!”

Bravo-“Ubwo nyine igikuba cyaracitse, kuko umugabo we yari abizi neza ko atabyara, wibuke ko yari umuganga, byaraducanze bindenze ndatoroka njya kure ngo nzaramire ubuzima nyuma y’ imyaka irindwi ngaruka mu mugi, nkomeza gushaka ubuzima, Hmmm! Uzi mu nzira? Nagendaga ndangaguzwa nk’ umujura”

Njyewe-“Yebaba weee”

Bravo-“Umva cyakora Imana ni nziza, iyo wihebye ukayitakira irakumva, naje kubona akazi keza, ndetse nkomeza na iniverisiti, umunsi nayirangirijeho twagiye kwishimisha nabo twiganaga ahantu hamwe maze kwa kundi umuntu yizihirwa mba ngwiriye umuntu mu kureba neza….nasanze ari umugore ntangira gusaba imbabazi gusa mu kwitegereza neza yari wa wundi, uwo natorotse mpunga….uwo ubu twabyaranye kobwa itanzi…..
Njyewe-“Oya, oya Boss, utambwira ko Sabine ari umwana wawe”

Bravo yikije umutima, nanjye nkomeza kumwotsa igitutu mubaza koko niba Sabine ari umwana we, ibyo ntumvaga bidashoboka na gato, nyuma y’ akanya katari gato yubura amaso, mbona isura ye yahindutse, amaso yatukuye mbega ni bya bindi bya kigabo bisimbura amarira,

Bravo-“Ndacyakubwira Ryan! Ubwo nkimara kugwira uwo mugore aho kumpunga yaransanze arampobera mu gihe numvaga ngiye gushaka aho ndigitira”

Njyewe-“Yoooh”

Bravo-“Ndabyibuka amaze kunyitegereza neza yambwiranye agahinda ngo

“Ni wowe Bravo?” Nanjye musubizanye ubwoba nti “ni njyewe” Yarongeye arambwira ati “Imana ishimwe ko nongeye kukubona, ni ukuri sinzi uko nakubwira ibyishimo ngize mpuje amaso nawe, Bravo! Nkeneye kuganira nawe, kandi wumve utuje nyuma y’ igihe amateka abitse byinshi”

Njyewe-“Nguteze yombi Boss”

Bravo-“Ubwo twagiye hepfo gato maze atangira kumbwira ati “ Bravo! Ibyabaye byo sinabisubiramo kuko nzi neza ko nawe wari mukuru ubizi, burya umaze gutoroka nanjye nahururijwe umuryango nitwa indaya ndasendwa,

Umugabo wanjye yampambirije nta n’ impamba, iwacu ho si nari kuhajya kuko bamfashe nk’ ishyano mu rugo, nitabaje ubuyobozi ariko mbura ijambo kuko twasezeranye kutavanga umutungo,

Gusa kurundi ruhande numvaga nkomeye kuko nari mfite umwana wanjye mu nda, mu gihe nari narihebye ko ntazabyara kubera umugabo wanjye atabyaraga, Bravo! Nanyuze muri byinshi ntakubwira gusa nabayeho njye n’ umwana wanjye, ubu yarakuze n’ inkumi nziza yiga mu mashuri yisumbuye”

Njyewe-“Ariko se Boss! Mbabarira rwose umare amatsiko, wenda ibindi ubimbwire nyuma, uwo mukobwa yaba ari Sabine?”

Bravo-“Tuza nkubwire Ryan! Icyambabaje kuruta ibindi nuko nasanze uwo mugore akora nisuku aho twari twaje kwidagadurira, yewe yari acyambaye itaburiya n’ ingofero by’akazi”

Njyewe-“Yeweee?”

Bravo-“Nabuze icyo nkora mbura ayo nshira nayo mira, amaze guhanagura amarira yongera kumbwira ati “Ubwo ukiriho n’ amahirwe, ndagusabye uzaze nkwereke umwana wacu, yahoraga akumbaza nkabura icyo musubiza, tuza rwose sinkurenganya kuba waransize ukagenda kwari ukuramira amagara yawe byongeye kandi nta nicyo wari gukora,

Umbabarire nakubereye umushukanyi, nkugwisha mu mutego gusa nirengeye ingaruka, niyo mbamvu unsanze aha nkirwana urugamba ngo njye n’umwana wajye dukomeze kubaho”

Njyewe-“Yoooh”

Bravo-“Ryan! Ntakubeshye nataye amarira nd’ umuntu w’ umugabo, tukiri aho umukobwa twakundanaga ndetse twari twarambikanye impeta akanyemerera ko tuzabana, twari tunafitanye ubukwe vuba, twari twaje kwishimana  yaturutse hirya nk’ iya gatera aba amukubise urushyi ibintu birakomera, antwara shishi itabona tugenda ubwo, abo twari twazanye nibo bishyuye ibyo twari twanyweye”

Njyewe-“Yayayayaya! Mbega?”

Bravo-“Kwisobanura byarananiye, nkomeza kumuhisha ukuri, nagiye kureba wa mugore rwihishwa kuri ka kabari, anjyana aho we n’ umwana wacu babaga, natunguwe no kubona umukobwa mwiza w’ imibiri yombi uteye ubwuzu ikiniga kiramfata, kuhava birananira, birandenga ndapfukama…………Ryan! Uwo mwana nta wundi ni Sabine”

Njyewe-“Yeee?”

Narashigutse nkoma ameza ibyari ku meza birahanuka no hasi ngo piii!  mpaguruka ntazi naho njya, ngeze imbere ndagagaruka ndicara,

Njyewe-“Bravo! Koko? Sabine ni umwana wawe?”

Bravo-“Yego! Sabine ni umwana wajye, ayo ni amateka y’ impamo”

Twamaze umwanya munini ducecetse ntawe uvuga, nyuma nibwo nagoroye umuhogo maze ndamubwira,

Njyewe-“None se Boss! Niki cyatumye udaha agaciro umwana wawe? Umukobwa mwiza kuriya, umwana utuje wicishije agahinda, iyaba wari uzi ubuzima yabayeho nabo yahuye nabo, ariko agakomeza kuba intwari”

Bravo-“Eeh! Ryan! Wari usanzwe uzi Sabine mbere yuko aza hano?”

Njyewe-“Hmmm! Boss! Nubwo uri Boss ariko warakosheje cyane sinabura kukugaya, ntabwo wari gutererana umwana n’ umubyeyi, yego wenda mama we yari akuze akuruta ariko wari kugirira ko mwabyaranye ukamufasha kubaho mu buzima yisanzemo”

Bravo-“Erega nanjye si njyewe, Ryan! Mu gahinda kenshi ka Sabine na Mama we nahavuye mbasezeranyije kubafasha, kubwanjye numvaga twakwibanira ariko kubera njye na fiancé twari twarasezeranye mu mategeko ndetse twaratanze ubutumire mama Sabine yarambohoye ntahana agahinda,

Ryan! Natangiye kubafasha njyena wa mukobwa dukora ubukwe, dutangira kubana, gusa umutima ukomeza kwanga, nkarara amajoro ntasinzira umugore wanjye akambaza nkamubeshya, gusa umunsi umwe niyemeza kubimubwira”

Njyewe-“Boss! Koko wamubwije ukuri cyangwa uri kwirengera ngo umbeshye unyereke ko nawe atari wowe?”

Bravo-“Ryan! Nyumva uku ni ukuri, wibuke ko ndi kwivura”

Njyewe-“En bon! Komeza umbwire ndakumva”

Bravo-“Umunsi umwe nibwo nateguye urugendo njye n’ umugore wanjye turasohoka, ndamushimisha maze mfata umwanya ntangira kumubwira byose, Ryan! Ibyabaye uwo munsi byari amateka, umwe yatashye ukwe nundi ukwe”

Njyewe-“Ooohlala!”

Bravo-“Ryan! Hmm! Nyuma y’ ukwezi tutavugana, inkuru y’ inshamugongo yantashyeho, koko Mama Sabine na Sabine barwaye bikomeye, mu gutabara nageze aho babaga nsanga  wa mugore wanjye yantanzeyo, ambwira amagambo atazamva mu matwi, ko ari we wabaroze kandi badateze gukira”

Njyewe-“Jesus?”

Bravo-“Urugo rwanjye nararuhunze ntandukana n’ umugore wanjye gutyo, ngerageza uko nshoboye ngo mbavuze gusa Mama Sabine biranga…..yitaba Imana”

Njyewe-“Mana weee?”

Bravo-“Ubwo murumuna wa Mama Sabine yatwaye Sabine ngo ajye kumuvuza, kuva ubwo nongeye kumubona umunsi mpura n’ abatowe bafite amateka yahindura ubuzima bw’ imbaga nyamwinshi bazakina iyi film nsanga nawe arimo”

Njyewe-“Yebaba weee! Boss! Mbuze icyo mvuga ni ukuri”

Twikije imitima dukomeza guceceka, hashize akanya katari gato,

Bravo-“Ashyiiiii!, ngayo nguko, kuva nakongera kumubona nabuze amahoro, nagerageje kumusanga ariko mbura aho mpera, noneho kumva ngo ibyabaye agiye kubibwira isi yose…..nicyo cyatumye mwirukana”

Njyewe-“Boss! Biragoye kandi koko biragoye, sinzi uko…..

Nabuze icyo ndenzaho, gusa burya iyo abantu bamaze kwitsa umutima babona inzira,

Njyewe-“Boss! Sabine namumenye umunsi….

Natangiye kubwira Papa we byose ntacyo mukinze, niyo mahirwe nawe yagombaga kugira muri uwo mwanya akamenya umwana we, namubwiye byose kugeza mu kumubwira ko kuva yakwirukanwa aho twari turi yatawe nabo babanaga, Bravo yongeye guhangayika, arigaya, uzi amarira y’ umugabo?

Nta kundi nakomeje kumwihanganisha cyane, musezeranya kuzamufasha uko nshoboye tukamubona.

Twavuye aho bwije cyane, dusubira kuri hotel, dusezeranaho umwe ajya mu cyumba cye nundi ajya mu cye.

Nageze mu cyumba ninjira mu mashuka ndaryama, nongeye gutekereza byinshi kuri Sabine, mu by’ ukuri kumutekereza cyane nta kindi byari bihatse, nta gahunda y’ urukundo rwihariye rwa babiri nari mfite, gusa impamvu namutekerejeho nkimubona naramwitegerezaga nkabona koko abitse byinshi muri we nkumva nasiganirwa kumwegera kuko nangaga nabona umuntu utuye ku gasozi ka wenyine aho atabona naho arahura.

Nashigutse nasinziye mu gitondo cya kare nakangutse nshiguka cyane numva umuntu ukomanga ku rugi cyane, mpaguruka vuba, mu gukingura nasanze ari Kokonati wa musore wakoraga  isuku,

Yatangiye gukoropa, hashize akanya sinzi uko intekerezo zagiye kure mba nibutse umunsi umwe mu mateka……ntangira kwahagira cyane, ibyunzwe birandenga, ubwoba bwinshi bunzamukamo,umusatsi umva ku mutwe, numva nsa nuhagaze mu kirere, niko kumva amajwi menshi yikirizwa na  nyiramubande mu matwi yanjye,

Numvaga ijwi rivuga ngo “Hahahaha! Ndiwo utazi utamenye, ndi umunyaburanga buhenze butabonwa ahandi, urashaka kumpunga? Hahahaaaa! uracyeka wampungira he?”

Njyewe-“Mana yanjye! Mana yanjye ibi ni ibiki mbona, koko Mana wantabaye ko nzakwitura?”

Nongeye kumva “Umva Ryan! Uranzi, uranzi ndetse cyane gusa amaso yawe ntiyapfa guhereza ubwenge bwawe ngo ubashe kunyibuka, uribuka  amasezerano twagiranye ukayica? Haaa!”

Ako kanya mu maso yanjye nahise mbona bya bihe, nabonye mu maso yanjye umukobwa nibuka mu mateka ariwe umpagaze imbere ndashiguka ako kanya mba ndamubuze.

Ubwenge bwaragarutse, ako kanya nsunika Kokonati, nibagiwe ibikapu nsohoka mbyigana, nkubitana na Bravo hanze,

Njyewe-“Ndagiye! Boss! Ndagiye ibisigaye byose muzabyikorere”

Bravo-“Ibi ni iki ra? Ryan! Wabaye iki?”

Ibyo ntabwo nabyumvaga ahubwo nagiye niruka Bravo arankurikira ariko murusha intambwe, musiga ntyo.

Ninjiye mu modoka mfata urugendo, ariko rimwe numvaga navamo nkiruka n’ amaguru, nageze I Kigali mfata moto yihuse, no mu rugo ndikingirana, nicara hasi ntangira kwibuka byose.

Nagaruye ubwenge mu ijoro hagati, ndirambika ibitotsi ndabibura mu rukerera nibwo nabonye ibitotsi, nongera gukangurwa na Telephone yasonaga, ndebye…..yari Cedro, uwo nakoreraga, wanyizeraga cyane bikarenga tukaba inshuti.

Telephone yarasonnye ivaho, irongera irasona ivaho, nanze kuyitaba kuko icyo yari agiye kumbwira nari nkizi, kwari ukumbaza uko nikuye ku kazi ndetse ngasiga n’ibikoresho bye.

Nta kundi nafashe iya mbere ndigaba ngo njye kumureba, ngera aho twakoreraga nkigerayo Shakira yankubise amaso,

Shakila-“Ehehehe! Mufate umujura, nguyu arigemuye, yubububuu! Yatwaye ibikoresho byacu arabigurisha, atoroka akazi none amenye ko tumushaka arizana”

Ntacyo nari gukora naratuje, nari naramenyereye ko yanziraga cyane kuburyo kumva ko navuye aho banyohereje gutyo gusa atari kubyumva

Shakila yaratabaje abari aho bose barahurura ndetse n’abakoreraga hirya no hino yahoo twakoreraga barahurura, atangira kubabwira ko ndi umujura…..byose ntacyo nari kurenzaho.

Tukiri aho Cedro yaraje atungurwa no kumbona, Shakila amwitambika imbere ariko amwigizayo, anshyira imbere no mu biro bye arakinga.

Cedro-“Ryan! Ni wowe?”

Nakomeje guceceka hashize akanya arongera,

Cedro-“Ryan! Byagenze bite? Tuza umbwire, hari icyabaye, uwo ndeba ntabwo ari Ryan nzi, tuza umbwire nanjye ndi umuntu, nkeka ko utafashwe kuko sinigeze ntanga itangazo ngo ufatwe, ahubwo wizanye, mbwira, byagenze bite?”

Cedro yakomeje kunyitegereza hashize akanya nitsa umutima,

Njyewe-“Cedro! Mbanje kugushimira cyane ko unkuye mu menyo y’ abatsekaga ukanzana hano, ni igitambaro ukinze mu isura yasebaga”

Cedro-“Nta kibazo Ryan! Nawe uri umusore nkanjye erega, ubwo se wowe usanze biri kumbaho?”

Njyewe-“Burya mu buzima hari amateka akomeye muntu abika, akamuherekeza mu, akakubamo iminsi yawe, aho ukomanze ugakingurirwa nacyo, waseruka aho gususuruka ugasuhererwa, waryama akibasira inzozi zawe,ugashiguka ukiruka bati arasaze, dore yahanzweho

Cedro! Kuki ntakigira iherezo, kuki ntacyo ubwenge n’ umutima byibagirwa ahubwo ikibi kikatugira abasazi? Oya nako nuko ari kibi, ubu se nziruka ngeze hehe ko nasaze inzozi mbi kumanwa na nijoro akaba ari zo mbona, bikaba binteye guta byose?”

Cedro-“Uuuh? Ryan! Nako komeza…ndakumva Ryan!

Njyewe-“Hashize igihe kirekire ariko ndabyibuka byose, nari ndangije amashuri yisumbuye ngira amahirwe mbona akazi ko kujya nyobora imodoka zaparikaga kuri super market,  ndetse nkabifatanya no gutwaza abakiriya ibyo babaga baguze nkabibagereza mu modoka.

Ako kazi naragakundaga cyane kuko nagiraga amahirwe yo kumenyana n’ abantu batandukanye kandi bandenze ubushobozi, rimwe na rimwe nkabasetsa bakankubita akantu ngataha nishimye,hari ubwo nabonaga amafaranga arenze ayo nakoreraga ku kwezi.

Hari umukobwa umwe mwiza  cyane wakundaga kuza guhahira aho hantu nakoraga, Uwo munsi nabonye imodoka yagendagamo ije ndayimenya, ntangira kumwereka uko aparika, yavuyemo yambaye neza cyane abantu bose nk’ ibisanzwe bararangara, amaze kwinjira Bouncer wabaga ahagaze ku muryango, niwe kenshi twaganiraga kuko twahoranaga, yaje yihuta ansanga,

Bouncer-“Yebaba wee! Hiiihiiii! Kara! Ewana Eeh!….wamubonye?.”

Njyewe-“Umva yewe! Ubwo se wowe wapfuka amaso? Maze n’ impumyi ayiciyeho yahumuka, ahubwo reka asohoke maze…..”

Twatangiye kumutaka turamushimagiza biratinda, gusa  numvise ihoni niruka njya gushakira indi modoka yari ije aho iparika.

Ntibyatinze wa mukobwa yarasohotse arandembuza nterura ibyo yari amaze kwishyura tugenda tugana ku modoka,

Njyewe-“Sister! Mu bantu bahahira hano, uri mu bantu ntwaza nkumva ndi proud yabyo kabisa”

We-“Hhhhh! Gute se Kara?”

Njyewe-“No kumpamagara Karani buriya mba numva ari byiza, uburyo ubivuga mbese numva….. Uzi ko ubivuga mu gifaransa!”

We-“Hhhhh!

Muri ako kanya twari tugeze ku modoka ye nziza, ankingurira inyuma nshyiramo ibyo nari mfite arakinga ayegamaho asobekeranya amaboko akomeza kuzunguza kontaki,

We-“Hhhhhh! Karani rwose, ariko nanjye buriya nkunda ukuntu usetsa”

Njyewe-“Nibyo se koko?”

We-“Yiiiii! Hari igihe ngira ngo harimo n’ ubugoryi, Ariko ubundi ubu ujye uba serieux ra? Cyangwa uhora wimereye utyo gusa?”

Njyewe-“Eeeh! Serieux gusa se ahubwo? Iyo nageze mu bintu biri serieux nanjye mba serieux nk’ imbwa irya uruhu”

We-“Sure?”

Njyewe-“Yes Very sure kabisa”

We-“Ok! None se nshatse ko dupanga deal wakwemera?”

Njyewe-“Ngo…ngo Deal? Deal imeze ite?……………………..

 

Ntuzacikwe na #Episode ya 07 y’ Inkuru ndende “Sabine” Ejo mu gitondo

2 Ibitekerezo

  • Bandandanya turahabaye mugenzi ur’umuntu w’umugabo

  • uyu muhungu ko ari mubibazo. reka turebe amaherezo kuko ndabona yarahuye nibigeragezo by’abakobwa

Subiza

Your email address will not be published. Required fields are marked *