• 12/12/2019 3:23 12

Episode02: Sabine mu rugendo ruzahindura ubuzima bwa benshi, ahahuriye na Ryan

Duherukana ubwo mu gitondo Johnson yakubitaga urugi rw’ icyumba cye, akaza nk’ iya gatera agatangira gutongana cyane, yita Sabine indaya ndetse amushinja ko yamwibiye ikofi………

Disi Sabine yatangiye kurira, Johnson yagira ngo amufate nkitambika, mu kureba neza abona aho nari narambitse ikofi ye, agwa mu kantu aratambuka arayifata, atangira kureba amafaranga yewe akuramo na ya Facture akubitwa n’ inkuba, yicara mu ntebe akinga ibiganza mu maso.

Hashize akanya gato, Sabine wari ufite ubwoba bwinshi yanyongoreye buhoro ati,

Sabine-“Ndatashye, wakoze cyane Imana iguhe umugisha”

Njye nahise mvuga cyane ntamwongorera,

Njyewe-“Oya wigira ubwoba buretse kugenda….”

Yakomeje kunyinginga ndetse akuramo rya kote ararimpereza ndaryanga arirambika mu ntebe arasohoka, ako kanya nihuse njya mu cyumba cyanjye mfata agapira nkinga mu gatuza nsohoka niruka mfungura igipangu mubona hirya arenga, jugujugu mba mugezeho mufata ukuboko arahindukira duhagararaga gato turebana mu maso, disi areba hasi yongera kugenda nanjye ndakurikira,

Njyewe-“Sabi! Nubwo waje ntabikekaga ariko ugiye ntabishakaga, nifuzaga kukubwira ko nakwishimiye kandi iyaba byashobokaga uyu munsi ntube uwa nyuma tuvugana, ndashaka….nako ndifuza kuba hafi yawe, ndifuza guturana nawe nkaba umuturanyi uzajya urahuraho, nkaba igiti uzajya wugamamo agacucu”

Sabine yarahagaze  aceceka gato hashize akanya arambwira,

Sabine-“Oya….Oya maama reka ndabizi ntibyakunda, ayo mahirwe se nayakura hehe?”

Njyewe-“Sabi! Muri iri joro rya cyeye amarira menshi warize, yanyeretse ko ushobora kuba warabayeho ubuzima bwa wenyine, ukagira inshuti mbi nkizagutaye mu ijoro, ukabaho  ubura uwo utura umutima, ukiberaho mu buzima bw’ agahinda ndetse ukamenyera ako kabi, Sabi! Ndagusabye”

Sabine yongeye guceceka gato, yubura amaso maze ambwira atuje ati,

Sabine-“Urakoze gusa umutima ntiwabyakira byoroshye nako ntibyashoboka, reka ngende imvura itaragwa ndabona ikubye, itamfatira mu nzira”

Njyewe-“Uuuh? None se uragenda n’ amaguru?”

Sabine-“Yego, ni hafi nta kibazo, ni ukumanuka…..nkazamuka….nagera kuri…..nkamanuka, nkongera nkazamuka….”

Yandangiye ahantu agiye kugenda hose nibaza niba ariho yitaga hafi biranyobera, maze ndamubwira,

Njyewe-“Sabi! Aho hantu ni kure, sinzi niba wagerayo n’ amaguru”

Sabine-“Oya nta kibazo ndabimenyereye, niyo naba mfite ticket nayibika nkazayikoresha ikindi, ahubwo bye! Reka ngende”

Sabine yagiye atyo mukurikiza amaso, nasigaranye ikiniga ntazi aho cyaturutse, mpindukiza ibirenge nsindagira isi nsubira aho nabaga, nkinjira naciye kuri Johnson nkutamubonye, ngiye kwinjira mu cyumba…

Johnson-“Ko utambwira se musaza? Iriya ndaya se ibikora neza?”

Narahindukiye ndamwitegereza nsheceka gato, nashatse icyo musubiza ndakibura  ninjira mu cyumba ndakinga.

Nirambitse ku buriri nkomeza gutekereza byinshi, Sabine yangarutse mu ntekerezo araziganza, nongeye gushiguka ndebye ku isaha mbona ni saa kumi n’ ebyiri za nimugoroba.

Narabyutse mva mu cyumba ngeze muri salon nkomeza mu cyuma cya Johnson nsanga  nta wurimo ako kanya telephone yanjye iba irasonnye, ndebye nsanga niwe umpamagaye,

Njyewe-“Yes Johnson! Bite se?”

Johnson-“Ewana sorry kabisa nagiye nk’idage wangu, mu rugo bampamagaye bambwira ko banshaka cyane mpita nshaho ntakubwiye”

Njyewe-“Uuuh? Ni amahoro se?”

Johnson-“Wahora niki ko Papa yarembye?”

Njyewe-“Yeee?”

Johnson-“Ewana byabaye ibya hatali  umusaza yarembye kabisa, guhumeka biri kwanga, ngira ngo urabizi ko arwaye ibihaha”

Njyewe-“Ooohlala! Ndabyibuka warabimbwiye, Pole sana Johnson”

Johnson-“Nta kundi, ubu nibwo tugeze kwa muganga, gusa ibizunga ni danger naraye nsinze kabisa”

Njyewe-“Gusinda gusa se ahubwo? Ahaa! Nizere ko urakomeza kuba hafi ya Mama wawe?  Birumvikana aragukeneye muri ibi bihe”

Johnson-“Ryan! Kabisa nakubwiye ko kuba mu rugo rwose byananiye….”

Njyewe-“Johnson! Kugeza na nubu ntabwo ndumva impamvu wanga kuba mu rugo, byongeye kandi Papa wawe arembye? Ubu koko urabona Mama wawe abyishoboza?”

Johnson-“Byihorere ibyo n’ iby’ umuryango nzaba nkubwira, ahubwo se ko utambwiye ya ndaya…”

Njyewe-“Nyumvira kweli? Ariko Johnso wabaye ute? Papa wawe amagara ari ku mucika nawe ukazana ibyo?”

Johnson-“Hhhhhh! Man reka mbe nkuretse turasubira”

Nakupye telephone nicara gato, hashize akanya nambara ecouteur nshana gaz ntangira gushaka ibyo kurya.

Nshugusa isafuriya niririmbira indirimbo numvise umuntu unkozeho ndikanga cyane, mpindukiye vuba, nasanze ari mabuja, umugore wa nyir’ amazu twabagamo bamwe bita nyir’ ibyondo, uyu twese twubaha.

Nakuye ecouteur mu matwi,si uguseka yari yagiye hasi, amaze gutuza….

Njyewe-“Eeeh! Mabuja, ese ni mwebwe?”

Mabuja-“Mbega Ryan! Ese ntabwo wumvaga ko wateruye igipangu cyose koko? Ugira ngo wanaririmbaga se ahubwo ko wavugaga ibintu utamenya ibyaribyo, yewe cyakora si ukunsetsa byo uransekeje”

Njyewe-“Eeeh! Mabuja….Mumbabarire ntabwo nzongera rwose”

Mabuja-“Oya nta kibazo, ahubwo binyeretse ko ushobora kuba wamenya no kuririmba, ni kalibu se cyangwa no kalibu?”

Nibajije ikizanye Mabuja mu nzu kandi ubusanzwe yarakomangaga ngasohoka tukavuganira hanze, ntangira gutekereza ko ahari yenda yaba yabonye umukiriya mushya akaba aje kunyirukana mu nzu, nicisha bugufi,

Njyewe-“Ni kalibu mabuja, rwose ni kalibu iwacu nako iwanyu”

Mabuja-“Eeeh! Asanti”

Yaricaye nkomeza gucugusa nkanyuzamo nkaza tukaganira, bihiye ndarura dutangira gusangira dusoje dukomeza kuganira, nka saa yine z’ ijoro….

Njyewe-“Ko bwije se Boss atari yataha ni amahoro?”

Mabuja-“Ni amahoro da, uyu munsi ntabwo ari butahe ndetse nejo n’ ejo bundi, hari mwene wabo yagiye gusura I Bugande, ariko se niyo yahaba…..ngo aba ahuze Maama ngo ari mu kazi kenshi ntamenye ko….”

Njyewe-“Eeeeh”

Mabuja-“Niyo mpamvu naje ngo tube tuganira”

Njyewe-“Ese? Rero njyewe amasaha yo kuruhuka yari ageze, kuko ejo ari akazi ngomba kuryama hakiri kare”

Mabuja-“Umva ra? Maze nari nzi ko turakomezanya nawe ukaza ukansura ukankurira irungu mu nzu”

Njyewe-“Ariko byo mwaragowe? Inzu itagira n’ umwana koko?”

Navuze ntyo mbona Mabuja arahindutse, nibuka ko Johnson yigeze kumbwira ko yumvise bavuga ko Mabuja n’ umugabo we babuze urubyaro, nabuze uko nifata ntangira gushaka uko namusetsa ngo agaruke muri mood,

Njyewe-“Naho ubundi se, irungu ubundi ryirukanwa na Radio, cyeretse niba ushaka ko duceza”

Mabuja-“Ooooh! Ntiwumva! Uri umusore mwiza ni ukuri, nakomeje kujya nkwitegereza kenshi nkumvaa….”

Mabuja yabivugaga anyegera nanjye nkegera hirya,

Mabuja-“Nizere ko ibyo uvuze ukomeje, ahubwo tugende, ngufitiye surprise…..buriya naje nako ngwino tugende”

Atari yakomeza,

Njyewe-“Uuuh? Mabuja, none se waje hano byose wabipanze?”

Mabuja-“Ooooh Cyane rwose nifuzaga kugutumira irijoro ngo utahe inzu yacu, nshaka kuganira nawe twenyine, nkakumenya neza nk’ umuntu uba mu mazu yacu, nishimiye ko ngiye no kubona umwarimu mwiza unyigisha guceza”

Njyewe-“Ooo oya, oya nakubeshyaga, ahubwo reka njye kuryama ejo ni akazi, ni akazi rwose kandi ndakubaha”

Mabuja-“Oya sha gisore kiza, iby’ Akazi bivemo, icyo uba ushaka si amafaranga se?  Amafaranga se yakurutira umuturanyi? Buriya ntagwira ariko inshuti ziragwira, ndemera ibyishimo iri joro ibindi uzabimbaze nyuma, sibyo! Ooohh!, ngwino gisore cyiza, uko kireba, incuiii.

Njyewe-“Mabuja! Rwose ndumva ibyo umbwira bidashoboka? Urumva nakwemera gute ko wari wateguye kuza kundeba hano ngo dusangire iri joro”

Mabuja-“Cyane rwose, wumve ko amata abyaye amavuta kuba nasanze uhari, ngaho ngwino humura,….ngwino sha”

Numvaga ari ibidashoboka ko Mabuja ku munsi wa mbere tuganiye cyane yampa kalibu iwe nako yanyingingira ku musura, natekereje nanze kujyayo akabifata nkaho musuzuguye naba nerekanye ishusho itari nziza mu maso ye dore ko kwiyorobeka atari ibintu byanjye.

Naremeye njya mu cyumba nambara agapira ka lacoste ndagaruka,

Mabuja-“Urakoze sha kuba wemeye kuza”

Njyewe-“Nta…nta kibazo tugende, gusa nubwo nje ntabwo ntinda, ejo ni akazi”

Mabuja-“Hhhhh! Ibyo by’ akazi byihorere, ushyire umutima kuwo uje kureba, ngira ngo urabizi ko amafaranga ataguranwa abantu”

Njyewe-“Ok! Nta kibazo twagenda”

Mabuja-“Oya ba uretse, urabizi abantu bagira amagambo, bashobora kubona dusohokanye mu nzu bagacyeka ibindi nyine bakazabibwira umugabo wanjye, reka mbanze ngende ntabwo ndakinga nihashira akanya nawe uze”

Njyewe-“En bon! Ntacyo bitwaye nako nibyo byiza”

Yarahindukiye ageze ku muryango aramwenyura, arampepera ndikiriza arasohoka mpita niruhutsa, muri ako kanya nibazaga niba koko ibibaye uwo munsi ari impamo cyangwa ndota, nari mfite ubwoba kubera kumutinya no kumva ko ntaho duhuriye…..umugore wa Nyiribyondo! Eeh!  sorry nako nyir’ukubahwa  Nyir’ isima n’ amabati meza y’ inzu nakodeshaga.

Hashize akanya nakuye urufunguzo mu iserire ngira ngo nsohoke nkinge numva ihoni ndikanga, ryongeye kuvuga mpita ndimenya, ryari iry’ imodoka ya Boss umugabo wa Mabuja, kuko iyo yatahaga yakundaga kurivuza nari nararimenye.

Numvise urugi rukingutse, nsohoka gato ngo numve niba ari we koko….yari we! Nasubiye mu nzu ndakinga, ibyo ari byo byose nahise menya ko gahunda zahindutse akaba agarutse.

Nta kundi nagiye mu buriri ndaryama gusa nakomeje gutekereza byinshi, sinamenye igihe nasinziriye, nongeye gukanguka nshigutse, ndebye ku isaha mbona ni saa moya n’ igice njugunya amashuka niruka njya muri douche kuko haburaga iminota mirongo itatu yonyine ngo saa mbiri zigere, amasaha y’ akazi.

Namaze kwitegura vuba ndasohoka ndakinga, jugujugu no ku muhanda ako kanya moto iza yidegembya mba ndayuriye, feri ya mbere nayifatiye aho twakoreraga nishyura motari nkigenda,

Motari-“Eeeeh! Boss! Ko untwariye casque se? Cyangwa wagize ngo ni ingofero waje wambaye”

Narikanze koko nari ngiye nambaye casque ntabizi, naragarutse ndayimuha, ari nako abantu bari aho hafi kuri station ya essence bansekaga cyane, narasebye ariko ndijijisha mbacaho ndakomeza ninjira aho twakoreraga mba nkubitanye na Shakila umukobwa twakoranaga wari ushinzwe kwakira abakiriya,

Njyewe-“Shaki! Bite se?”

Shakila umukobwa mwiza utarajyaga ampa agaciro yanshiyeho arigendera, ndahindukira ndamwitegereza ndahindukira nanone ndakomeza, ngeze imbere gato mpura na Cedro, niwe wari nyiri studio ifotora nakoragamo, muri macye nari gafotozi nako cameraman wabigize umwuga.

Cedro-“Aaah! Ryan! Comment?”

Njyewe-“Ca va bien merci!”

Cedro-“Hhhh! Igifaransa cyawe rwose! Week end yari imeze ite se?”

Njyewe-“Eeeh! Yari sawa kabisa, nawe ndabona nta shida umeze neza”

Cedro-“Hhhhhh! Ewana, asanti kabisa, usanze nari ngiye kuguhamagara, hari akazi twabonye, hari company ishaka gukora film, batwiyambaje nk’ abantu dusanzwe tuzobereye muri uyu mwuga, badusabye umu cameraman twizeye ngo azunganire ababo, birumvikana ni wowe ugomba kujyayo”

Njyewe-“En bon! Wagira ngo nari nabimenye, naje niruka kibuno mpa maguru ahubwo nari ntwaye na casque ya motari”

Cedro-“Hhhhhhh! Ryan we! So, mukanya gato rero baraza kugufata waba utunganya ibikoresho, nurangiza ubwire Shakira aguhe amafaranga ahagije uritwaza muri iyo minsi uzamara twabivuganye”

Njyewe-“Eeeh! Ko nta myenda nzanye se ubu….”

Telephone ya  Cedro yarasonnye ahita yigira ku ruhande gato, hashize akanya aragaruka,

Cedro-“Giravuba baje kugufata naho ibikoresho n’ imyenda uzagura ibindi nta kibazo turaguha impamba”

Ako kanya nahise ngira vuba nkusanya ibikoresho byose mbega nambarira akazi, ngisoza nahise njya kureba Shakila ngo ampe amafaranga nkuko Cedro yari yabimbwiye. Ngezeyo,

Njyewe-“Ndangije gutunganya ibikoresho ndajyana, wampa amafaranga yo kwitwaza mu rugendo?”

Shakila-“Ko numva ubimbwira nkaho Cedro atabimbwiye se?”

Njyewe-“Ariko Shaki! Kuki buri gihe uhorana umushiha kweli?”

Shakila-“Namaze, wowe se wagiye uwugira? Fata, amafaranga ibindi ntabwo bikureba”

Yanagiye amafaranga ndetse amwe agwa hasi ndatoragura, mpina umugondo ndasohoka ngeze hanze, nongeye kwibaza ikintu gituma Shakila iteka ryose anyuka inabi, burya nubona urebwa ikijisho cyangwa ubwirwa nabi uzace bugufi ubanze utuze urebe niba byose bitava kuri wowe, nubona umutima utagucira urubanza wikomereze ubuzima.

Nageze aho nari nashyize ibikoresho nterura igikapu ako kanya Cedro ahita ansanga aho nari ndi ari kumwe nundi mugabo ungana Data, amaze kunsuhuza,

Cedro-“Uyu yitwa Ryan! Niwe mugiye kujyana”

We-“Ok! Nizere ko mumwizeye?”

Cedro-“Eeeh! Cyane rwose! Turamwizeye ni umuhanga, ibyo akora yarabyigiye, kuba mwaratumenye ni ukubera we”

We-“Good! Ndumva twagenda noneho niba yarangije gutunganya  ibikoresho”

Njyewe-“Nta kibazo Boss!”

Nasezeye Cedro umusore wari uzi kubana, nubwo yari Boss wanjye ariko twari twibaniye nk’ abavandimwe.

Twaramanutse tugera hasi ku modoka ya Rava amfungurira umuryango w’ inyuma nshyiramo ibikoresho, ubundi nicara imbere, mbere yo guhaguruka,

We-“Nitwa Bravo, nkora muri company ifite umushinga witwa Save the memories,tugiye gukorana film y’ abantu batandukanye bazava hirya no hino, bazadutekerereza urugendo rwabo rw’ ubuzima, iyo film igomba gukoranwa ubuhanga kuko izasigira benshi ubutumwa bwahindura ubuzima bwabo, nizere ko tuzakorana neza”

Njyewe-“Nta kibazo rwose ndi tayali, none se iyo film tuzayifatira hehe?”

Bravo-“Ni ku kibuye, ubu niho twerekeje, ahubwo ndumva twagenda”

Muri ako kanya yakije imodoka dufata umuhanda muremure, mu nzira twagiye tuganira bisanzwe twagera mu nzira dukavamo tugatamira tukanagotomera tugamomeza urugendo, twagezeyo umunsi uciye ikibu.

Tugezeyo banyeretse icyumba nzajya ndaramo nshyiramo ibikoresho ubundi njya mu mugi kugura ibindi byangombwa dore ko nari naje ntiteguye, navuyeyo bwije nditunganya ngisoza Telephhone yanjye irasona, ndebye mbona ni Bravo,

Njyewe-“Hello!”

Bravo-“yes Ryan! Wabashije kuruhuka se?”

Njyewe-“Nta kibazo rwose”

Bravo-“Noneho waza muri salle aho twese duteraniye tukakumurikira abandi”

Njyewe-“Oooh! Nta kibazo rwose”

Telephone yarikupye ako kanya mpita nsohoka, aho hafi mba mbonye umukobwa wari wambaye imyenda yabakora aho akimbona ahita aza ansanga,

We-“Muraho”

Njyewe-“Muraho neza?”

We-“Murakaza neza, twabafasha?”

Njyewe-“Oooh! Kabisa ndemeye akazi kawe ugakora neza, nari ntangiye kureba hirya no hino ngo ndebe ko nabona uwo mbaza aho salle y’ inama iri”

We-“Oooh! Ngwino tujyane mpakugeze”

Uwo mukobwa mwiza yagiye imbere ndamukurikira, nk’ umusore nako abasore bakiri bato barabizi, nagiye ndeba intambuko, twagiye kugerayo nashimye…

We-“Ni aha, kuri uyu muryango”

Njyewe-“Okey! Urakoze cyane, nizere ko turasubira”

Yaramwenyuye yikiriza azunguza umutwe, arahindukira aragenda, ako kanya urugi ruba rurafungutse,

Bravo-“Aaah! Ryan! Kalibu”

Ninjiye muri salle nsanga harimo abantu nka mirongo itatu, tugihagaze Bravo yahise avuga,

Bravo-“Yes! Aaah! Ndabona ahise ahagera, uyu yitwa Ryan! Niwe ukuriye abazafata amashusho yiyi film, Ryan! Aba ureba nibo uzafata amashusho”

Narikirije nicara aho hafi bakomeza bababwira amabwiriza, amasaha akuze tujya gufata ifunguro rya nimugoroba.

Buri wese yaragendaga akiyarurira akareba aho yicara, nanjye nagiye mu banyuma ndarura mvuyeyo ntangira gushaka aho nicara, muri ako kanya narebye hirya kure nabonye umukobwa wicaye wenyine, nashatse kwicara ahanyegereye ariko agatima karanga, numvaga ngomba kwinjira muri ambiance yuwo mwiherero.

Naratambutse ndokomeza ndagenda, nkurura agatebe ntamureba nijijisha  ngo atamenya ko ari we nje nshaka, ako kanya nubuye amaso turayahuza,

Njyewe-“Yeeee?”

Nakubiswe n’ inkuba itagira amazi, nkanura nka Johnson mu gitondo yaraye asinze, natunguwe no gusanga uwo mwari ari Sabine…………………………………

 

Ntuzacikwe na #Episode ya 03 y’ Inkuru ndende “Sabine” kuwa mbere mu gitondo

3 Ibitekerezo

  • Inkuru itangiye neza.
    Ni uburyohe

  • Sabine and Ryan.
    Best couple..
    Urukundo nirwogere

  • mwampaye gatatu ngasinzira koko saa kumi zingereyeho,hhhhh,Eddy we uzatumq bankubita nukuri na dimanche ndibagirwa nkarara nicaye nyitegereje,courage kdi Imana igukomeze,ndagukunda

Subiza

Your email address will not be published. Required fields are marked *