• 12/12/2019 3:10 01

Episode 94: Bruno abonye kuri television Queen na Serge bafashwe

Tonzi yansezeye atyo aragenda, nagumye aho numva isi yambanye isi, icyo kunywa nari mfite ngita aho mpaguruka vuba ngize ngo nsohoke nibuka ko ntishyuye nsubira inyuma ndishyura ninjira mu modoka feri nazifatiye mu rugo ninjira ntawe nsuhuje nkomeza mu cyumba cyanjye mvuniramo urufunguzo.

Nararyamye ndiyorosa, nkomeza kwibuka ibyari bimbayeho ntekereza icyo gukora ndakibura.

Uzi gutekereza ugatekereza n’ ibidashoboka? Natangiye kwibaza aho nakura umugore ngo wa mugani mama anyurwe agire umwitaho, natangiye gutekereza iyaba mbaye ndi mu nzozi ibyo Queen yankoreye nkaba narabirotaga.

Ibitotsi narabibuze Mama atashye yaje kunkomangira ngo njye ku meza ariko ndanga nkomeza kwiryamira.
Natangiye kwikoraho ngo numve ko mpari, ndihindukiza karahava, ndihina ndihinura, numva ya majwi nangaga y’ imibu iduhira, guhumiriza biranga ndakanura.

Nka saa tanu z’ ijoro numvise mbirambiwe ndabyuka njya muri salon nshana television, nsuka icyayi mu gatasi manika amaguru ntangira kureba amakuru yo hirya no hino ku isi.

Muri uko kureba naguye kuri sheni imwe yari iriho amakuru yo mu cyongereza mba nirebera.

Umunyamakuru-“Amakuru yihutirwa! Nkuko mubireba aha duhagaze ni mu mugi rwagati, ku kabari kakekwagaho ibikorwa bitemewe n’ amategeko, hakekwagamo kubyinwamo n’ abakobwa bambaye ubusa, uburaya ndetse n’ ibiyobyabwenge n’ ibindi…”

Koko narebye neza aho umunyamakuru yari ahagaze muri iryo joro…hari ho, hari hahandi nabonye Queen, narahabonye ndahamenya.

Ako kanya nahise mpaguruka negera television ngo ndebe neza.

Umunyamakuru-“Hari hashize amezi atatu hakurikiranwa ibyavugwaga ko aka kabari duhagaze imbere gacyekwaho ibyaha twari tumaze kubabwira, muri aya masaha nibwo abashinzwe umutekano bafatiye mu cyuho abategura ndetse bakagurisha abakobwa babyina bambaye ubusa, ibi bikaba bitemewe n’ amategeko, muri abo bafashwe rero…”

Njyewe-“Niwe! Niwe ndamubonye! Ni Queen”

Nabonye Queen koko ndamumenya, yari yambaye imyenda miremire ndetse yitwikiye n’ igitambaro mu mutwe, yari ahagararanye na Serge ndetse na wa mukobwa Gasaro Tonzi yizeye akamugambanira.

Umunyamakuru-“Ikibabaje rero, aba mureba ni abanyamahanga, nibo bakoranaga na nyir’ aka kabari mu kuzana abo bakobwa….”

Ngihagaze ndeba Queen na Serge bubitse imitwe, Musada yahingutse aho maze ambonye,

Musada-“Boss! Bite ko aya masaha wabaga waryamye byagenze bite noneho?”

Nakomeje kwitegereza television na Musada biba ngombwa ko aguma aho, akibona Queen mu maso.

Musada-“Uuuh! Uriya…yampaye inka! Boss! Uriya si wa mukobwa wawe mbona yambaye amapingu?”
Njyewe-“Niwe Musa”
Musada-“None se…Boss! Ibi niki ra?”
Njyewe-“Byihorere Musa, ibyambayeho ni agahomamunwa, ahubwo reka ndeke kwitera agahinda nibuka akahise, reka nsubire kuryama nako kwigaragura dore ko ibitotsi byo ntabwo”.

Nasize Musada aho nsubira mu cyumba ndirambika, iryo joro nasinziriye amasaha macye mbyuka mu gitondo njya ku kazi nkuko bisanzwe.

Mu masaha ya saa sita nagize ngo nkinge njye kureba icyo nshyira mu nda natunguwe na Joel wansanze ku kazi aransuhuza.

Njyewe-“aaah! Afande bite se?”
Joel-“Ni sawa Bruno!”
Njyewe-“Waragiye urahera wanga no kuza kumbwira uko byagenze?”
Joel-“Oya ntabwo nanze kuza, ahubwo burya navuye hariya noherezwa mu kandi kazi, no kunyuriza mu ntera byabaye ejo”
Njyewe-“Felecitation kabisa, uzi ukuntu numvise ngayitse menye ko wari mu bankurikiranaga?”
Joel-“Ahubwo se ko mbona wari ukinze wari ugiye hehe?”
Njyewe-“Eeeh! Nari ngiye kureba aho mfata icyo kurya nkagaruka mu kazi, ariko niba wari uje kundeba twageranayo tukaganira da”
Joel-“Nta kibazo rwose”
Njye na Joel twamanutse gato tuganira tugera kuri restaurant nakundaga kuriramo akawunga turicara dutangira kuganira.

Njyewe-“Joel! Buriya ntabwo nakubwiye ukuntu nisanze muri ruriya rwobo…”
Joel-“Wikwigora, ugira uti sinabimenye? Ntabwo nari kugukurikirana ntabizi neza, ubundi banyitabaje kuko bari bazi ko tuziranye, kandi bakaba baracyekaga uriya mugore Deliah ariko nta bimenyetso, mu kumucyeka rero nanjye nakomeje kugenda isataburenge mu bantu binjirayo nuko nza kumenya ko nawe ujyayo”
Njyewe-“Ese burya bwose nagendaga undi inyuma?”
Joel-“Cyane rwose, buriya biriya byaha ni bibi cyane, uzi ko uriya mugore ariwe wagutanze yigize intwari? Gusa ntabwo yari azi ko dufite amakuru, namwe kugira ngo tubone ko muri abanyakuri twarijijishije ngo mwerekane ukuri kwanyu, gusa kwarangiye mutsinze kandi nizeye ko bitazasubira”
Njyewe-“Ibaze nibeshye? Naba ntagira ubwoba, ariko uziko hariya nahahombeye umukunzi nari nizeye ko tuzabana ubuzima bwanjye bwose?”
Joel-“Queen se?”
Njyewe-“Iyaba wari uzi ko namubonye nijoro kuri television yafashwe”
Joel-“Eeeh! Koko se?”
Njyewe-“Yego rwose”
Joel-“Ayo ni amakuru mashya, iby’ ari byo byose ariko ubwo bafashwe bagomba guhita bagarurwa mu ino”
Njyewe-“Iyaba bagumaga iyo, mfite impungenge ko bashobora kuzaza nkagira ibyago nkazahuza amaso na Queen”
Joel-“Ngo ibyago? Cyangwa amahirwe?”
Njyewe-“Ndavuga ibyago byo guhura nuriya mukobwa w’ umuhemu, wigize inshuti mu basa n’ inshuti, azahere iyo niwe wambujije amahoro n’ amahwemo akambeshya ibyishimo bishira, ubu nkaba ndyama ngakanura bugacya, nahura namama nkabura icyo mvuga imiryango igakingwa nkabura umwizerwa”
Joel-“Uuuh? Ariko rero Bruno, ushatse watuza umutima buriya hari impamvu yabiteye”
Njyewe-“Hmmm! Wowe ntacyo uzi,…”

Ako kanya natangiye kubwira Joel inzira yanjye na Queen, burya iyo ubabaye ntawe udatura agahinda, nongeye kwisanga umunsi uciye ikibu nibuka ko nasize nkinze, nsezera Joel.

Njyewe-“Joel! Nakomeje kwivugira nibagirwa ko ntawe ucuruza afunze”
Joel-“Yewe! Ibyawe ni birebire ariko buriya hari ukuntu wapumuzika, ugategereza, wagira amahirwe bakabazana ino ukamusanga ukamubaza icyamuteye kubikora”
Njyewe-“Joel! Umva ko bagira ngo iki icyo n’ ikidashoboka ndakurahiye, aho kugira ngo mpure na Queen….”

Njye na Joel twasezeranyeho akomeza gahunda ye nanjye nsubira mu kazi, ubucuruzi bwarakomeje buriyongera dore ko nta kindi nari mpugiyeho, nyuma y’ igihe gito nari mfite office ntakijya gucuruza ndetse ibyo natumaga hanze byariyongereye.

Ka kamodoka Serge yasize azi ko ampenze ubwenge nagahaye Musada ngo ajye mu muhanda ajye akishyura macye nkuko Adam yabayeho hanze, ya yindi nagabiwe na Delilah ndayigurisha ngura indi nshyashya nifuzaga kuzagura nkayigendamo bwa mbere nasezeranya na Queen, ibitari bigishobotse.

Umunsi umwe nicaye nako ngaramye mu ntebe nibaza ukuntu mfite byose ariko nabuze uwo tubisangira nashigutse hari unkozeho ndikanga nshigukira hejuru, nasanze ari umukobwa mukuru wari wambaye neza cyane, mu kumwitegereza mu maso yasaga ndetse angana na Queen.

Nihumuye mu maso ngira ngo ahari wenda ni ukubera mpora mutekereza cyane ndabyirengagiza, yari yambaye ijipo ndende ndetse n’ umupira ufite ingofero yayitwikiye mu mutwe.

Naramwitegereje mbona afite ubwoba bwinshi, imyenda ye wabonaga isa niy’ umuntu ufite ikibazo kuko yari yuzuye akavumbi, ndetse n’ ibirenge yasaga nkaho ashaka kubihisha ngo ntabibona.

Njyewe-“Bite byawe?”
We-“Ni byiza”
Njyewe-“Urava he ukajya he?”
We-“Na…nari nje…nari nje kubaza niba nta kazi mutanga”
Njyewe-“Uuuh? Wari uje uturutse hehe se?”
We-“Hari ahantu nakoraga isuku muri salon none ejo naje gukora nsanga nyir’ inzu yasohoye ibintu byose ngo banze kumwishyura, ubwo rero buri wese yahise aca inzira ye nta kundi byari kugenda”
Njyewe-“Uuuh? Ubwo ntubeshya? Umukobwa mukuru nkawe utagira isuku…”

Muri ako kanya nahise nibuka ibyabaye kuri Papa ubwo Mugeni yamusangaga akamutura amarira akagira ngo arababaye kandi ari ikinamico yo kumuhuma amaso mpita mpaguruka.

Njyewe-“Urabeshya! Nakubonye urabeshya ahubwo uri umutekamutwe nakuvumbuye”
We-“Oya, oya ni ukuri ntabwo ndi umutekamitwe”
Njyewe-“None se bishoboka bite ko usa utyo uri umukobwa mukuru? Aho wakoraga ntabwo baguhembaga ngo ube wagura isabune? Ubwo uje gutera impuhwe rero…”
We-“Oya ni ukuri wenda aho kunyita umutekamutwe mureke ngende ariko mutambeshyeye”.

Ako kanya yarahagurutse mbona amarira amushotse kwitama, mu isura ye nongeye kubonamo ishusho ya Queen umutima wongera kunsimbuka, yarasohotse ageze ku muryago urukweto rwa kama mbiri yari yahambirijeho umushumi ruracika arunama ararutora mpita muhamagara aragaruka.

Njyewe-“Koko uranyemerera ko utari umutekamutwe?”
We-“Ni ukuri kose ntabwo mbabeshya kuba nsa ntya nanjye sinjye, muri ubu buzima ntawe utifuza kugaragara neza mu bandi, nk’ umukobwa ntabwo naremanywe kutiyitaho nkuko mwabiketse ahubwo…”

Ikiniga cyongeye kumufata nk’ umuntu ntuza umutima maze ndamubwira.

Njyewe-“Icara…icara utuze, icara utuze koko ushobora kuba ufite agahinda kagusabye”
Hashize akanya gato,
Njyewe-“Harya ngo urashaka akahe kazi?”
We-“Ako ariko kose nakemera ariko mugapfa kuzatazanyambura nk’ ibyo aho mvuye bankoreye”
Njyewe-“Yoooh? Ihangane, none se ufite aho kuba?”
We-“Nyine…nkiza inaha, hari umukobwa aho nakoraga wanshumbikiye, ubwo rero yahise ambwira ko birangiye ubuzima bwanze ngo njye gushaka ahandi mba”
Njyewe-“Ooohlala!”

Natekereje gato koko mbona ko nubwo bucya bukira isi yuzuye ibibazo ndetse hari benshi bakeneye ikiganza cyacu.

Natekereje uko nari ndyamye mu ntebe nibaza uwamfasha kurya ibyo ntunze, nyamara hari uwabuze naho atanga imbaraga ze ngo abikorere, byankoze ku mutima cyane nk’ umuntu maze ako kanya ndamubwira.

Njyewe-“None se ubu urakomeza kuzenguruka ahantu hose nibwira bigende bite?”
We-“Nta kundi nyine ndajya gucumbika”
Nkiri aho Mama yinjiye aho nakoraga ari kumwe na murumuna wanjye Rukundo, kari kamaze gukura,
Mama-“Bite Bruno?”
Njyewe-“Ni sawa Mama, ko munsuye se ku kazi ni amahoro?”
Mama-“Ni amahoro, ntabwo nari guca hano ntagusuhuje kandi yari yo nzira”
Njyewe-“Uvuye hehe se?”
Mama-“Uuh? Ese ntiwamenye ibyabaye? Nina yibarutse imfura!”
Njyewe-“Ooooh! Ntiwumva se! Ni yonkwe rwose, nabonye Marc yampamagaye nijoro inshuro eshatu biranshanga nibagirwa kongera kumuhamagara”
Mama-“Yibarutse da! Inkumi rwose nziza nziza isa na se”
Njyewe-“Hhhhh! byiza cyane tubahaye ibyivugo n’ ibisigo”

Muri uko kuganira ka Rukundo karumuna kanjye kakomezaga kwiyaka Mama gashaka gusanga wa mukobwa, birangira kamusanze nawe si ukugakinisha baraseka biratinda, aho nari ndi na Mama twarabitegerezaga, atangira kumbaza uwo ari we, twigira hirya gato ntangira kumubwira byose.

Yamaze kumva byose dusubira mu nzu, ni ukuri karumuna kanjya kari kamukunze cyane yewe nanagakoraho kakanyanga kandi ari njye kakundaga cyane.

Mama-“Umukobwa, witwa nde se?”
We-“Nitwa Aria”
Njyewe-“Aria??…………………………………..

Ntuzacikwe na Episode ya 95

0 Igitekerezo

  • Queen yaje pe ,umukazana arabonetse .Araba queen se cg ya mpanga ye baburanye

  • Aria impanga ya Queen, Bruno hita umwishumbusha hahahahahah

  • Aria impanga ya queen disi Bruno wasanga ariwo mugish Imana ikuzaniye Aria ngo asimbure queen akwibagize agahinda kose yaguteye

  • Mana we Aria impanga ya Queen disi agiye kuba ikiraro hagati ya Bruno na Queen mu bigaragara nkuko Joel yabivuze Queen afite impamvu yabimuteye kandi nifuza ko Bruno yasubirana na Queen. Big up ku mwanditsi

  • Waouwww, ntubona ko impanga ya Queen igiye kuziba icyuho. Imana ishimwe. Gusa Bruno usabwe kugenda gake no kugira amakenga ataba ari Queen wijijishije cg aka gukora ibya Mutoni na papa wawe. Wirinde kumubwira ko uziranye na Queen ahubwo umubaze ubuzima bwe niba ntanabandi bavandimwe agira cg umuryango.

  • ni byiza ko Aria abonetse,gusa Queen naza gufungirwa mu Rwanda Bruno azajyane na Aria kumusura bamutege amatwi kuko nubwo queen yibonye mu bucuruzi bw’abantu we yagiye azi ko agiye mu mahugurwa.ndasaba bruno ku zamutega amatwi akumva inzira y’umusaraba yanyuzemo n’uburyo yabyitwayemo.

  • Queen na Serge baragarutse nibaze bafatanye na Nyirabuja kuryozwa ubuhemu bwabo bagurisha abana b’abandi ngo bakunde baronke ibya mirenge. Bruno nawe ndumva abonye igisubizo burya hubaka urukundo ntihubaka ubwiza cyanwa ubutunzi. Iyegereze Aria umufate neza musangire ibyo waruhiye, kandi Queen naza akarooka ibyaha yakoze muzamubabarire. Bravo ku mwanditsi, dutegereje izindi nyigisho.

  • Ariko hari umuntu numwe mu basoma iyi nkuru ugishyigikira Queen koko? Ngo hari impamvu yabimuteye? Ariko ye? Umuntu wangaga ko Bruno ajya kumusura akemererera William, iyo agerayo agasanga ari ibikorwa bibi nawe yari kwirwanaho agacika, ninde wabonye wakira ibyo yisanzemo bibi akabikora yishimye, basomyi mujye mumenya ko izi ari inyigisho kandi zibaho, nta muntu uhora ari mwiza ngo nuko yakoze byiza, umuntu arahinduka niyo mpamvu umwanditsi wacu mwiza yanditse ngo inshuti mu basa n’ inshuti, Bravoo Rwibutso Eddy

    • NANJYE NKURINYUMA RATA UMUSOMYI WACU NIKO BIMEZE. QUEEN NTA RUKUNDO AGIRA KUKO IYO AZA KURUGIRA NKUMUNTU UFITE INSHUTI YARI KUBIMUBYIZA KUKO YARI NO MURI GAHUNDA YO KUZABANA NA BRUNO

      • William yijyanyeyo ntago yamwemereye ngo amusure. Ikindi niba mwarakurikiranye iterabwoba ry’uriya mugore, mushiki wacu Queen asangiye n’abandi nka we intege nkeya, bitapfaga kumworohera kwemerera Bruno ko amusura kwa Delillah. Ntimumutere amabuye rwose. Wasanga no kugenda atari azi ko ajyanye na Serge. Gusa icyo mugaya mbere yuko ajyenda mu gihe yasezeraga Bruno yagakwiriye kuba yaramubwiye ukuri kwose.

  • Ndemeranywa nawe Umusomyi, Queen yabeshyaga Bruno kuko ntiwambwira ukuntu atigeze amwereka aho aba cg se nuwo mugiraneza ngo ni tante wari kuzamubera nyirabukwe, ikindi ibuka Bruno amubwiye ko ajyanye ninshuti ye yitwa Serge, Queen yaramuzi ariko arirengagiza, Bruno amusabye kumuherekeza ku kibuga ati oya, tante azamperekeza, Queen yahuje amaso na Bruno I Nairobi ntiyagira reaction ahubwo Bruno we yibaza niba arimo arota mugihe undi yari azobereye mukazi. Oya yahisemo amafranga nta justifications ze dukeneye, ni umugambanyi w’indyarya

  • niyompamvu mama vava yamuziraga sha yari yaramenye ubucakurabwe n’ubugegera bwe!
    ujye ucyenga icyo rubanda bavuze kabisa !mama vava wabanye nakwine kiriya gihe yari yararushye .
    naho tante yamutera ubwoba ate ntiyarikubura ukwabwira bruno umutego yaguyemo, ko bruno yabibwiye tonzi ijoro rimwe kandi ntanagahunda ikomeye
    baribafitanye nka bruno na queen! va kungegera bruno

  • nibyo rwose ndemeranya namwe queen nta rukundo atifiye bruno kuko yamubereye inryarya ikomeye, niyicuza azamubabarire ariko azamurekere serge aria azamuhoza amarira

  • Woooooww !!!finally impanga ya twin turayibonye.ubu se disi Queen na Bruno bazongera guhuza namaso byibuza?gusa njye ndumva Bruno yazatega amatwi akumva Queen nubwo atamubabarira ariko akunda Basi icyabimuteye.
    Umwanditsi urakoze cyane
    Nukuri iyi nkuru ni isomo kuri twe pe

  • BASOMYI NAMWE RWOSE MWIBUKE KO BASI QUEEN LILY YAGURIYE UDUKWETO KWA STELLA UMUNSI BRUNO ATUMWAMBIKA APFUKAMYE, MWIBUKE MAMA VAVA AMUKUBITA URUSHYI BAGIYE KWA SOGOKURU MU CYARO, BRUNO GIRA IMPUWE WO KABYARA WE

  • Natekereje gato koko mbona ko nubwo bucya bukira isi yuzuye ibibazo ndetse hari benshi bakeneye ikiganza cyacu.
    Natekereje uko nari ndyamye mu ntebe nibaza uwamfasha kurya ibyo ntunze, nyamara hari uwabuze naho atanga imbaraga ze ngo abikorere, byankoze ku mutima cyane nk’ umuntu maze ako kanya ndamubwira.
    (Urakoze mwanditsi mwiza!!!!!!!!

Subiza

Your email address will not be published. Required fields are marked *