• 07/12/2019 11:54 25

Episode 86: Ntwari na Ryan mu nzu imwe kwa Samantha

Twari tugihagaze twitegereza ya shusho, ndahindukira sinakora kuri Samantha gusa, ndamwiyegereza, mureba mu maso maze ndamubwira…

Njyewe-“Sama! Ndeba mu maso, Ntega amatwi, kandi wakire amagambo ngiye kukubwira”

Samantha-“Nguteze yombi Ryan…ese koko ijoro rishobora gucya umunsi ukaza ukanga kwira?”

Njyewe-“Yego rwose, warimbaza narariraye, ariko birakwiye ko ricya kuko ibyabaye byose bisa n’ inzozi kuri ubu”

Samantha-“Yego disi”

Njyewe-“Sama! Ni ukuri burya kwizera umuntu ukamubwira ibyawe ni impano benshi bakira, ariko kuri bamwe ikaba nk’ ururabo benshi bakirana ibyishimo, bikarangira barujugunye muri pubele rukumagara ariko burya rurashibuka, rukarenga rugashisha”

Samantha-“Oooh! Mbega! Uzi ko koko ari byo, njyewe ngize amahirwe aho kurujugunya ngo ruzimeze narutera nkajya ndwuhira kuko rwaba ari ikimenyetso cy’ ibyishimo, nuko ayo mahirwe atankwiye”

Njyewe-“Aragukwiye kandi ayo umpaye ndayakiye, ndagusezeranya ko nzakuba hafi igihe cyose uzankenera, igihe uzaba ushaka kuntura agahinda n’ ibyishimo nzaba mpari, kandi nkuko wansezeraniye kuzamfasha kwibohora Ntwari nanjye nzakwitura icyo numva wakwiberamo ubuzima bwawe bwose….ndavuga ibyishimo”

Samantha-“Yoooh! Urakoze disi, kalibu rero”

Naricaye ndatuza nkomeza kwitegereza hose, ntabwo namenye ko Samantha yanyitegerezaga nawe, duhuje amaso aramwenyura,

Samantha-“None se nkwakirize iki cyo kunywa?”

Njyewe-“Ntukizi se? Cyangwa hari ikindi ushaka kunzanira kitari icyo usanzwe uzi nywa?”

Samantha-“Nagiraga ngo numve ko utahinduye da! Ikonje cyangwa ishyushye?”

Njyewe-“Iyo ubona hafi”

Samantha yazanye Fanta ebyiri yicara iruhande rwanjye anyegama ku rutugu dutangira gusangira, tuganira, nakunze uko yanyerekaga ko turi kumwe koko, ibyo naherukaga cyeraa….ndi kumwe na Sabine.

Njyewe-“Sama! None se gahunda uyigeze he?”

Samantha-“Hmmm! Umva! Umusaza Ntwari ndamufite, Ntwari ubu ninjye nawe! Hhhh! Maze ubu turi mu rukundo”

Njyewe-“Oya se kandi?”

Samantha-“Ahubwo ndabona yatinze kumpamagara, ijoro n’ amanywa ntakuraho, uyu munsi dufitanye na gahunda”

Njyewe-“Gahunda? Iyihe gahunda?”

Samantha-“Burya namaze kugusezeranira ko nzagufasha ntangira inshingano wampaye, natangiye kwiyegereza Ntwari cyane, ndetse musaba imbabazi ko twashwanye kuko yifuzaga ko turyamana, mubwira ko nahubutse!Hhhhhh!”

Njyewe-“Hhhh! Nuko se?”

Samantha-“Nuko nyine arishima cyane, mubwira ko nshaka ko tubonana, ambajije aho ndi mubwira ko ndi hano”

Njyewe-“Eeeh! Sama! Wamubwiye aho uba kandi uzi ko nkunda kuhagenda? Byongeye kandi ari mu nzira igana iwacu? Wiyibagije ko Mama yagiye kure kubwo kumuhunga?”

Samantha-“Wija kure Ryan! Wikumva ko kuba yaza aha yamenya ko ukunda kuhaza cyangwa ari munzira zijya iwanyu, mukanya araje”

Narikanze cyane, namenye neza ko nta kwizera Samantha wantunguye nanone akambwira ko Ntwari agiye kuza aho ndi.

Nahise mpaguruka vuba ngo ngende, mu by’ ukuri ntabwo nari ndi umusore utashobora guhangana cyangwa ngo nitabaze abashinzwe umutekano ahubwo ibyahise byatumye ntinya Ntwari birenze, ndetse ibimenyetso bikaba ingorabahizi, mumyaka myinshi yari ishize, byasabaga kunyura indi nzira…iyo nashakaga kunyura nitabaje Samantha.

Samantha-“Tuza Ryan! Ntwari ndamufite, arajya kugera hano nabimenye kare, kandi ndashaka ko uza kumva ibyo tuganira”

Njyewe-“Ntibishoboka! Ahubwo wangambaniye, Sama!”

Nagize ngo nsohoke Samantha antanga imbere yegama ku rugi,

Samantha-“Ryan! Byose ni ukugira ngo unyizere, utagira ngo yenda kuko twabonanye udahari hari ibyo nzaguhisha nkaguhinduka, guma aha nshaka ko wumva byose”

Njyewe-“Sama! Urumva koko ibyo byaduhira? Ntwari si uwejo, yahemutse cyera nkiri uruhinja, ntiwakwizera ko wamurusha gutekereza, uzi neza ute ko we akwizera kuburyo yapfa kuza gutyo gusa?

Ntwari nta rukundo agufitiye, icyo agushakaho urakizi, wikwishyiramo ko umufite utazashiduka yanageze kubyo ashaka kubera kudatekereza kabiri”

Samantha-“Hmmm! Tuza ariko Ryan! Wowe nyizera, wasanga murusha gutekereza, cyane ko ntekereza neza ngamije ibyiza, we atekereza nabi agamije ikibi”

Koko naremeye ariko impungenge zikomeza kuba nyinshi ariko nkaza umutsi nkomeza urugamba natangiye,

Njyewe-“Noneho reka nze mbwire uriya musore wanjye ko turatinda hano ndaje”

Muri uwo mugoroba narasohotse ngenda nihuta ngana ku mudoka, ngezeyo nikinga ku ruhande rwo ruguru, mfata telephone ndeba nimero za mama, nkanda yes..hashize akanya gato yitaba vuba,

Mama-“Hello!”

Njyewe-“Mama bite?”

Mama-“Ni byiza, ko umpamagaye se kandi ntabwo ukije? Wagize ikihe kibazo?”

Njyewe-“Mama! Nta kibazo mfite ahubwo nashakaga kukubwira ko mukanya Ntwari agiye kuza ahantu ndi”

Mama-“Ngo? Ryan! Ugize ngo iki?”

Njyewe-“Ndi ahantu kandi Ntwari agiye kuhaza….”

Mama-“Yebaba Mana weee! Ryan! Ngo…ngo.….ibi niki Mana y’ i Rwanda? Ryan mbabarira utahe none aha”

Njyewe-“Mama! Humura, Humura ndi imfura yawe kandi nkunda ubuzima bwanjye, ndirinda ngirira ikizere”

Mama-“Ryan mwana wanjye wanyumviye ko ndi nyoko? Ubu koko witegeje umwanzi, umwishyize mu maboko?”

Njyewe-“Oya Mama, ntabwo nitegeje umwanzi ahubwo  kuba ndi ahantu aje biramfasha kumenya aho twamuhera tumutsinda, ntabwo erega nakomeza kwihanganira ibyo yadukoreye, nyizera ndabikora neza”

Mama-“Ubu se koko ubimbwiriye iki Ryan, niyo unabimpisha, dore amabere yikoze ntonsa, Mana yanjye wee!”

Njyewe-“Mama! Iyo mbishaka nari kubiguhisha ariko kuba mbikubwiye nuko nzi neza ko ari amahoro nta gikuba kiracika”

Nkivuga telephone yarikupye, amafaranga yari ashizemo, natangiye kwibaza mu mutima wa mugani niba ntabaye wawundi wanze kumvira nyina na Se akumvira ijeri, ntangira kubunza imitima.

Nafashe umwanzuro wo kumvira mama, mva kubya Samantha utarigeze ambwira mbere ko uwo munsi arazana Ntwari iwe, ngize ngo ninjire mu modoka nakoze ku muryango numva urafunze, sinamenye muri ako kanya aho Kokonati yazerereye.

Aho nahamaze akanya nibaza icyo gukora, ngiye kubona mbona Samantha aje yihuta menya ibyo ari byo, dutera intambwe ndende twihuta tugana hahandi yabaga,

Tukinjira,

Samantha-“Ryan! Injira mu cyumba….”

Njyewe-“None se….”

Samantha-“Injira mu cyumba wowe utuze ibindi ubimparire”

Ninjiye mu cyumba ariko umutima wakomezaga kunkomanga unyibutsa impamvu ntumviye mama, nkomeza gutegereza, hashize nk’ iminota icumi, numvise ijwi rya Ntwari ndarimenya, uwo nakodeshaga iwe, aho nagiriye amahirwe make ngacucurwa twose uwo namenye nyuma y’ ibihe,

Ntwari-“Hhhhhh! Yayayaay! Aka kazu niko ubamo?”

Samantha-“Yiiii! Niho nibera, ni kalibu mumbabarire kuhabazana niba mbagoye, mukaba mudashakaga kwicara…..”

Yahise amuca mu ijambo,

Ntwari-“Oya sha igiskyo, aho nagusanga hose, ntuzi ko umugabo wihaye asiga inzu ye, aparika imodoka ya miliyoni icumi hanze, agakodesha icyumba cy’ ibihumbi bitanu, agakuramo inkweto z’ ibihumbi mirongo n’ imyenda y’ ibihumbi mirongo agasigara yambaye uko yavutse kubera umukobwa mwiza nkawe disi we? Uko kireba neza gusa, ubu nakigurira imodoka njyewe niko nabaye”

Samantha-“Oya urambeshya”

Ntwari-“Komeza unkore mu misaya di, gutyo…ntiwumva”

Natangiye kugira impungenge ko Samantha aribagirwa ibanga, akisanga yabaye undi, natangiye kurunguruka mu mwenge w’ urugi rw’ icyumba nari ndimo mbona koko ni Ntwari, wari wicaye yegamye, Samantha amwicayeho,

Ntwari-“Oooh! Uzi ko kuva cya gihe wanga kumpa ibyishimo ntigeze ntuza narimwe? Nahoraga kwibukaaa….numvaga amaherezo nzakubona, naba ngiye kuryama nakwibuka ukuntu watambukaga nkumva ubushagarira buraje…oooh!”

Samantha-“Koko se?”

Ntwari-“ Cyane rwose, ahubwo se…”

Samantha-‘Oya se kandi, aka kanya se utangiye gukuramo ishati?”

Ntwari-“Hhhhh! Erega buriya…..”

Samantha-“Oya ariko buretse tubanze tuganire, ahubwo se nkuzanire iki cyo kunywa?”

Ntwari-“Waretse se ko ari wowe kinyobwa nje nshaka nkakugotomera….”

Samantha-“Oya ahubwo reka nze nguhitiremo”

Samantha yarahagurutse nkomeza kumurebera muri ka kenge mbonye aje mu cyumba nari ndimo negera kuruhande arakingura ahita afunga, mpita mutongaya buhoro cyane

Njyewe-“Nta soni Sama! Nta soni kwemera cya Ntwari kigagukorakora nawe ugatangira…..”

Samantha-“Ryan! Ni ukuri nabuze aho mpera, nabuze aho mpera pe! Ni ukuri, ubu se koko ko binaniye?”

Njyewe-“Nabikubwiye ko wahubutse kumubwira ngo aze utambwiye, ubu se nyine urumva wamubaza iki?”

Samantha yarongeye arasohoka arakinga,

Ntwari-“Ereba byihorere, icyo kunywa ubundi gihari ni wowe, ko mbona urakaye se bigenze bite?”

Samantha-“Si wowe se?”

Ntwari-“Njyewe iki se? Niba ari amafaranga….

Samantha-“Oya si ibyo, ni wowe wanze kumbwira umusore witwa Ryan ushakisha cyane we na nyina?”

Ntwari-“Ngo…ngo…”

Samantha-“Ko mbona utungurwa se kandi waraye ubinyibwiriye? Ushatse kuvuga ko utabimbiwiye, nakomeza kukubaza ugaceka kugeza ubwo telephone yizimije? Ndekura nandetse”

Ntwari-“Oya igiskyo cyanjye, umva ngusobanurire, nahise nsinzira nari naniwe kabisa”

Samantha-“None se iyo wasinze wibagirwa ibyo wavuze? Cyangwa niba udashaka kubimbwira nabyo….”

Ntwari-“Oya garuka igiskyo! Wita umutwe kuri iyo mbwa ngo ni Ryan na nyina, mpora nyirota impagaze hejuru imanitse inkota, ariko ni inzozi byihorere wiyizire”

Samantha-“None se uwo musore na nyina babaho?”

Ntwari-“Barapfuye, niyo mpamvu ari inzozi”

Samantha-“Yari umwana wawe se nyina akaba umugore wawe?”

Ntwari-“Ibyo byihorere igiskyo! Iyigirire hino….”

Samantha-“Nduwawe erega hari handi nagiye se? Ndahari wigira ikibazo, ahubwo nyibwirira”

Ntwari-“Buriya nakize nkiri umusore, kera nari ndi umusore ndetse mbaye n’ umugabo nakundaga kuryoshya n’ abandi twakoranaga, bose twari inshuti ariko hari mugenzi wanjye twakundaga kuba turi kumwe kenshi, naramwangaga, naramwangaga kabisa ariko we akanyizera akambwira byose”

Samantha-“Uuuh! Wamwangiraga iki se kandi ukagendana nawe?”

Ntwari-“Umva ra, nagiraga ngo njye muneka nyine…, yateraga imbere buri munsi bikambabaza, yakundaga umuryango we cyane, rimwe na rimwe akansuzugura namutumiye, yakundaga kumbwira ukuntu akunda umugore wari mwiza cyane nareba uwanjye nkabona wapi kabisa”

Samantha-“Hhhhhh! Nuko se byaje kugenda bite?”

Ntwari-“Reka nzakubwire ubutaha ubu ndumva naniwe, ahubwo se ugira ngo ndataha? Ndarara hano”

Samantha-“Oya ntibishoboka”

Aho nahengerezaga mu rugi nabonye Ntwari wari wambaye isengeri gusa ahaguruka, numva aravuze,

Ntwari-“Ibiki se bidashoboka? Ahubwo reka nze mbe ngiyeyo, nabonye kare aho winjiye nta kabuza buriya niho icyumba cyawe kiri………………………………………….

Ntuzacikwe na Episode ya 87 y’ inkuru “Sabine” ejo mu gitondo

 

7 Ibitekerezo

  • Ooooh ??? Ryan we !!!Ntwari aragusanze mucumba ntakabuza !!!
    Arko Samantha yaratanguye kubikora neza,nabandanye amuyzngayenga amurinde kwinjira mucumba mpaka avuge vyose !!!
    Ryan nawe nizere ko uri gufata record,kandi Samantha yatekereje neza mukuzana Ntwari Ryan ahari,si non yari kuba yishize mubyago !
    Murakoze caaaane Muragahezagirwa na Rutungaboro.

  • Imana igufashe ntiyinjire kbs kuko byaba ibindi bindi

  • Ryan niba ushaka ko tuba inshuti nizereko ufite record hafi cg Samatha akaba ayifite

  • Ryan,ndabona igihe kigeze ngo wigaragaze.

  • Yeweeeeeeeh, birabe ibyuya ntibibe amaraso nukuri. ubuse koko niyinjira mu cyumba Ryan aritwara ate? icyakora ubwo kiriya gisaza gitangiye kurota kiri hasi ya Ryan kwa heli birarangiye umusaza baramufite.

    • Ryan jyewe rwose byanshimisha asubiranye na Sabine , urukundo nyarukundo ntiruhera but yo gutyo

  • Plan ya Ryan ifite gahunda.
    Ntugire ubwoba,ndetse uhamagare abashinzwe umutekano.
    ubasobanurire byose ndetse na Tom n’umugorewe(umukobwa was Ntwari)bazaba abatangabuhamya.
    gusa wakoze ikosa kuko utahamagaye Bina ngo wumve icyo yashakaga

Subiza

Your email address will not be published. Required fields are marked *