• 17/01/2020 11:23 29

Episode 60: Doctor asigiye byose Sabine, aha umugisha urukundo rwe na Ryan

Doctor yagizengo avuge ako kanya numvise umuntu umfutse mu maso ndikanga, ntangira kurwana no kwipfukura, amacupa n’ ibirahuri byari kumeza birahanuka byikubita hasi birameneka.

Uwari umfutse yarandekuje, mu guhindukira…yari Gaelle! Ahwiiiii! Nariruhukije mpita mubwira,

Njyewe-“Gae! Ni wowe kweli? Mbega mbega, uzi ko nari ngiye kwirwanaho ngira ngo ni umuntu utanshakira amahoro?”

Gaelle-“Hhhhhh! Ryan! Ni njyewe sha, ko udahaguruka ntabwo ushaka kumpobera se?”

Ako kanya narahagurutse mpobera Gaelle, wari wambaye neza cyane bigaragarira amaso.

Yasuhuje Sabine na Doctor nawe ahita akurura intebe atangira kunganiriza, mu guhindukira Sabine yari yahinduye isura asa n’ uwarakaye, Doctor we yari yahindukiye yirebera hakurya asa n’ utatwitayeho.

Umwe mu bakoraga aho yaje gutoragura ibyari bimenetse, no gukora isuku amaze kugenda nkomeza gutuza, Gaelle nawe yabonye ko ashobora kuba avangiye uwateguye ibyo byicaro nubwo atari amuzi,

Nahise mpaguruka mfata akaboko Gaelle twigira hirya gato maze ndamubwira,

Njyewe-Gae! Wihangane udusanze mu byicaro byari byateguwe, uriya ni Databukwe turi kumwe, Sabine we ngira ngo uramuzi!”

Gaelle-“Hhh! Sabine ndamuzi, bwiza bwawe, udusunba twese, ariko se ko mbona yarakaye, aragufuhira ku buryo yanarakara muri kumwe ngo nuko uhuye n’ umuntu muziranye?”

Njyewe-“Oya, ubusanzwe Sabine ntabwo ajya arakara turi kumwe, niyo mpamvu nanjye ngushyize ku ruhande ngo ngusabe uduhe umwanya, wihangane turaza kuvugana”

Gaelle-“Ariko Ryan! Kuki usumbisha abantu abandi? Ubwo se kuba nje nkagupfuka mu maso nkoze iki kidasanzwe? Kuza nkishimira kugutungura kuko twakubuze tugahangayika ni icyaha?”

Njyewe-“Oya ntabwo ari icyaha Gae! Rwose…”

Gaelle-“Ryan! Nta kibazo, ntacyo reka ngende, reka mbahe umwanya”

Gaelle yarakase ngo agende ariko ndamugarura, mu maso ye yari ababaye kandi byanzongaga kubi kubona umuntu ababaye ku bwanjye, natangiye ku mwinginga sinzi uko nahindukiye aho Sabine na Doctor bari bicaye…..

Nabonye bahagurutse basa n’ abagiye nsiga Gaelle ngenda nihuta mbasanga, ariko bari bafashe umwanzuro,

Njyewe-“Sabi! Sabi! None se muragiye?”

Doctor-“Nibyo turagiye Ryan, uyu mwanya wari uwawe gusa tuzashaka undi munsi ndabona gahunda zihuriranye”

Njyewe-“Doctor rwose ndahari, ndabasabye uyu mwanya nagenewe ukomeze ube uwanjye, nta yindi gahunda nari mfitanye nuriya mukobwa, n’ inshuti yanjye bisanzwe Sabine baraziranye”

Doctor-“Eeeh! Ok!”

Sabine-“Ibyo Ryan avuga nibyo, rwose ongera uduhe amahirwe yo kumva icyo waduteguriye kuri iki gicamunsi”

Doctor-“Ok! Noneho twakwicara”

Twaricaye nanone ndiruhutsa, hashize akanya gato,

Doctor-“Ngira ngo bibaye nkibabwira, uyu mwanya ni uwanyu nabateguriye, nifuzaga ko tuganira, kandi nifuzaga kubabwira amagambo azabakomeza mu minsi yanyu y’ ubuzima, ndabibabwira nka Doctor, uwo mwamenye, ufite icyubahiro kuko afite umwana, uwo yamenye akabura byose nyamara atari aziko abonye byose”

Njyewe-“Tuguteze yombi Doctor!”

Doctor-“Hashize igihe kirekire umutima wanjye warakomeretse, nakomerekejwe n’ urukundo, urukundo nticuza ahubwo ntifuzaga kubura, gusa nkarubura kubwo kunanirwa kwihangana,

Ryan! Sabine twaraganiye bihagije, nabashije kumubwira byose ndetse musaba imbabazi z’ ibyabaye, agahinda nagize katumye mba undi, ingaruka zabaye zose ziragenda zingira undi wundi mba umutindi ku mutima, gusa muri aka kanya ndi hagati yanyu mwumve ko ndi kumwe namwe ngo nsabe imbabazi ndetse nice ikiru”

Doctor yavugaga atyo tumuteze amatwi, numvise mu mutima wanjye hatamye umutuzo amatwi yanjye afungukira kumva ayo magambo, ndahindukira mpuza amaso na Sabine, oooh!

Doctor-“Ryan! Nasubije amaso inyuma ndeba urukundo ukunda Sabine, urwatumye umwitaho ukaza kwa muganga usiganwa, urwatumye untangira mu kazu yiberamo ngo umwiharire, urwatumye urwana na mugenzi wawe kubera kumva akubuza kumukunda, aho nagayitse nkicuza, nkiruka amasigamana, nkikuramo umwambaro w’ akazi kuko natandukiye aho gutanga ubuzima ngashaka kubukwambura”

Koko nikije umutima, ayo magambo numvaga yakomeje kunkora ku mutima, koko nabonye Doctor mushya, umwe nabonaga nkiruka ngamije kumutanga kwa Sabine ngo mbe ibamba atavaho ahinjira kuri uwo munota n’ isegonda noneho numvaga mukinguriye umuryango mugari nindi yose igana ku musozi w’ ibyihsimo.

Doctor yakomeje avuga,

Doctor-“Biragoye nako ntibishoboka gusubiza ibihe inyuma, biragoye gusiba amakosa wakoze kuko igitambaro cy’ umweru kitapfa gukeshwa n’ amazi masa, gusa ndi hano ngo nkomeze mfure mumpagarikiye kugeza igihe icyo gitambaro kizacya nkakibatwikiriza”

Muri ako kanya noneho numvise ibyishimo byinshi binsabye ndahaguruka mfatanya ibiganza maze mbwira Doctor ntategwa,

Njyewe-“Doctor! Urakoze cyane! Ntabwo nabona icyo nkubwira muri aka kanya, gusa nyemerera wakire ishimwe ry’ ibyishimo uduteye, ni ukuri ntushobora kumva ukuntu nishimye kubwawe”

Nahobeye Doctor ako kanya numva udushyi twirangira twaryoheye amatwi yanjye mu kanya nkakongako, mpindukiye mpuza imboni na Sabine aramwenyura ngenda musanga, ndamuhobera mutura ibyo byishimo.

Twongeye guhana cheers turagotomera, turamwenyura  tugihagaze,

Doctor-“Sabi! Ni muri aka kanya mboneyeho kubabwira ikiruta ibindi,…munyemerere nkivuge mpagaze namwe muhagaze, kuko ari umwanzuro nafashe mpagaze ahirengeye”

Sabine-“Yego tuguteze amatwi rwose pe”

Doctor-“Sabi! Ryan! Uyu niwo mwanya ngo mbasezere”

Njyewe-“Udusezere?”

Doctor-“Yego! Ndagira ngo mbasezere, ndagiye, ngiye kure kandi ntabwo ntegenya kugaruka”

Sabine-“Ngo? Aho ni hehe ugiye udashobora kuzagaruka?”

Njyewe-“Doctor! Aho hantu ushaka kujya nahamenye, ndagusabye atabe ari mu nda yisi, ndakwinginze”

Doctor-“Sabi! Ryan! Ngiye hanze, ngiye muri afurika yepfo aho nateguye mu minsi yanjye ngo nzahasazire,

Sabine! Uri umwana wanjye ngusigiye byose, ibyo ntunze, ibyo mberewemo ndetse n’ ibindi gusa ikiruta byose nuko ngusize heza, nawe uzabeho neza, nzi neza ko wabayeho neza muri bike ari nayo mpamvu ngusigiye byinshi ngo uzabeho neza birenze uko nifuzaga ko mama wawe azabaho neza, isezerano namuhaye cyera angana nawe”

Njyewe-“Doctor! None se koko ibyo uvuga ni ukuri uragiye?”

Doctor-“Ryan! Uzahagarare nk’ umugabo, ngira ngo wabibonye ko nakwakiye nk’ umukwe, birahagije ahasigaye nta nkwano nzakwaka kuko wayitanze cyera ukimenyana na Sabine, ukamuha igisumba ibindi yari yarabuze nkuko yabimbwiye”

Njyewe-“Ooh! Murakoze cyane Doctor! Gusa Sabine sinamutwarira Ubuntu, niyo mutansha inkwano muzemere impano nzabaha izitwe inkwano”

Doctor-“En bon! Nta kibazo Ryan! Ku buzima bwacu!”

Twongeye kwishima cyane, dukomeza kuryoherwa biratinda, twaganiriye byinshi, Doctor natinyaga nari namutinyutse, sinari nzi ko azi gusetsa burya bwose, gusa yari agiye kugenda.

Byageze nka saa kumi n’ imwe nibuka ko ndataha nongorera Sabine,

Njyewe-“Bina! Uzi ko nakomeje gutwarwa nkibagirwa ko ndataha?”

Sabine-“Yesu wee! Urataha? Nari nzi ko urarara, ubu se aya masaha koko wafata umuhanda ugataha?”

Njyewe-“Ahubwo nkundira nsezere Doctor ngende, iminota idakomeza kudusiga nkaza kubura imodoka”

Sabine-“Oya Cheri! Ihangane wigenda, ubu se wowe urumva urukumbuzi rwaba rushize? Ihangane ngusabe urare”

Njyewe-“Bina! Urabizi ntabwo nakwanga ugushaka kwawe ariko….”

Doctor-“So! Reka mbasige rero ngende, hari abandi ngomba kubonana nabo, tukaganira nkababwira iby’ urugendo rwanjye, musigare muganira, nabibiye umwanya ariko byari ngombwa, Ryan! Nsigaje icyumweru kimwe gusa, nzakubwira itariki yo kugenda uzaze nawe unsezere”

Twahagurutse aho duherekeza Doctor tumugeza hasi muri parking aho yari yasize imodoka, aragenda mu gihe nari ndangariye imodoka irenga narahindukiye mbura Sabine, ntangira kurangaguzwa hirya no hino.

Naramubuze, ntangira kumushakisha hose, ndazamuka ngera hahandi hejuru twari twicaye ndamubura, nkimanuka ako kanya nabonye nguwo Sabine na Gaelle, baza bansanga, Gaelle yavugiraga kuri telephone,

Gaelle-“Yego sha….turi kumwe maze? Bwiza bwe wa mukobwa uduhiga bari kumwe kandi yabyemeye….none aha turaje, ndabizi ntabwo abyanga….sawa turaje none aha, iminota itanu yonyine”

Nahise mbyumva ko Gaelle afite gahunda yo kutujyana ahantu akaba yitabaje Sabine, yavuye kuri telephone ngize ngo muvugishe aranyishitura, ahubwo akurura Sabine, Sabine nawe arankurura, nta kundi nk’ imbata y’ urukundo ndakurikira.

Twageze ku muhanda,

Njyewe-“Sabi! None se tugiye hehe?”

Sabine-“Hhhh! Ihangane tujyane, ndabizi wari ufite gahunda yo gutaha ariko nanjye nagusabye kuyihindura, mpakanira rero?”

Njyewe-“Bina! Kuki wafata umwanzuro utambwiye?”

Sabine-“Oya se sha wirakara? Urabizi ko mpora ngushakira ibyishimo, mpa andi mahirwe ndebe ko nkwiye umwanya wanyicajemo”

Muri ako kanya naratuje, Sabine atangira guhuga we na Gaelle, nanjye mfata telephone ngo mpamagare Nyandwi muteguze, mubwire ko gahunda yahindutse ndaza kujya kurara iwe.

Message maze kuyohereza, numvise ijwi rya Sabine rimpamamagara, nkebutse mbona taxi voiture ihagaze aho hafi ninjiramo, dufata umuhanda.

Mu modoka tuganira,

Gaelle-“Mbega Ryan! Hmm! Wowe icyo nzi cyo!”

Njyewe-“Gae! Mbabarira kabisa, ndabizi dufite byinshi byo kuganira”

Gaelle-“Gira uti mfite amande menshi yo kuguca, hmm!”

Twakomeje kugenda tuganira, Gaelle wari uzi gutera story yaradusekeje dushiguka imodoka yahagaze kare, tuvamo dukurikira Gaelle twahingutse aho ibirori byari birimbanije, nabonye Gentil wahagurutse aza yihuta arampobera, iruhande rwe hari Sandrine mushiki wa Cedro ndetse na Cedro wasaga nuwigunze.

Narabasuhuje banyakiriza icyo kunywa,

Gaelle-“Hhhhh! Ryan! None se nanone uransaba kuguha umwanya? Uyu mwanya ni uwacu natwe! Ku buzima bwacu!”

Gentil-“Giti mu jisho yibwirize andi indi round niye, wiha gusiga inshuti kandi azagaruka akazisanga”

Byari byiza koko, nongeye kwisanga mu nshuti, abo nasize nkagenda nkabibagirwa, nibutse ko Cedro yambwiye ko kuva nagenda bamuheje, kandi koko narabyiboneye, yari yicaye ku ruhande n’ ipfunwe ryinshi.

Narahindutse nkomeza gusangira nabo tuganira ariko nitegereza Cedro, muri ako kanya nagiye kubona mbona Gaelle aritakumye, mu guhindukira yari Provy wari uje,

Gaelle-“Oooh! Kalibu Chouchu!”

Yangezeho,

Provy-“Yeeee? Ryan!”

Yarampobeye cyane, nabonye neza ko burya iyo utageze mu bandi utamenya ibyishimo biremwa n’ inshuti, kukubona byonyine, kubasanga, nugira amahirwe yo gushobozwa ibyo, uzaharanire ko nundi biba bityo kuko ntawe ibyishimo bitabera.

Provy yahereje ukuboko Cedro, ibyo Sandrine yabonye akubika amaso, hashize akanya katari gato Cedro yahagurutse vuba, ahagarara hagati yacu, atangira kuvugana agahinda kenshi,

Cedro-“Provy! Gentil! Gaelle! Ryan!…

Twese yatuvuze mu mazina ashize amanga, umuziki wari uraho uba urazimye, maze atangira kuvuga,

Cedro-“Nacumuye iki cyatuma mumpeza? Nakoze ikosa ringana iki kuburyo ntababarirwa? Kuki njye ntakwishima ndi kumwe namwe? Provy wankundiye iki natatiye ngo uveho unkora imbagara warigeze kunyambira? Ubu ukaba useka ureba hirya ngo ntabona ya nseko yawe?

Ryan! Ko nakwituye imbere nkagusaba imbabazi, nkakwinginga , nkemera ko ntari niyizi, ko nabwiwe ko nta mutima wa kimuntu ngira ariko nzakora ibishoboka nkawugira,ko nabwiwe ko uwo ndiwe atatuma nsikamira uwo ntegeka ko wemeye ukanyumva ukambabarira ariko ukambwira ko bidakunze ko ugaruka, muri aka kanya wabaye umuhamya ugahamiriza abishima mbabaye ko nanjye nkumbuye bya byishimo?”

Muri ako kanya twakomeje guceceka, ntawabumbuye umunwa ngo agire icyo avuga gusa nagoroye umuhogo ngo ngire icyo mvuga, Cedro yongera kutuvuga twese mu mazina maze arakomeza,

Cedro-“Ni ukuri dore ndaje ndambiwe kwiheza, ndabinginze mwibuke ko ndi umuntu, narabibonye neza ko guhubuka ari icyasha, kudakaraga ururimi bikarusha intwara uburozi, kutizera bigasenya inzu wugamagamo igicucu, mu ndebe ndi Cedro wanyu mwishimiye, uwo mushiki wanjye yazanye aha ahatiriza, ndabasabye,…

Amarira ya Provy yari yageze ku birenge, yasanganiye Cedro aramuhobera uwari uri aho wese yagize ikiniga cy’ ibyishimo, wooow!……………………………….

Umwanditsi w’ inkuru ndende abifuruje weekend nziza! Ntimuzacikwe na Episode ya 61 kuwa mbere mu gitondo

 

3 Ibitekerezo

  • Mwaramutse ese episode y’uyu munsi ko ntayibona byagenze bite?

  • MWABUZE BAVANDIMWE TURATEGEREJE

  • Arikose iki kinyamakuru ko kidashyiraho inkuru nshya byagenze bite noneho?

Subiza

Your email address will not be published. Required fields are marked *