• 22/01/2020 11:35 38

Episode 59: Ryan yakiriwe nk’ umukwe kwa Sabine

Mukecuru-“Ahubwo reka mworosore urebe uko yabaye”

Numvise ubwoba muri njye, mukecuru aca bugufi apfukama impande ye akimukuraho ikiringiti cyari kimuriho…”

Njyewe-“Ntibishoboka! Oya ntibishoboka! Oya weee!”

Mukecuru-“Ibi niki se kandi?”

Njyewe-“Zamu? Ni Zamu! Niwe ndamubonye ndamumenya, umujura mubi, reka nze ahubwo nkwereke….”

Nabatuye ikibando cyari aho hafi, ndakizamura ngiye kukimukubita numvise umuntu umfashe, mu guhindukira yari umugabo usa naho yari avuye mu murima

Njyewe-“Ndekura! Ndekura se…”

We-“Nyabuneka reka! Shyira hasi! Shyira hasi icyo kibando! Urashaka gukubita indembe koko?”

Njyewe-“Ndeka! Ndekura nkubite umujura hano”

Mukecuru-“Bakobwa bakowe ndabigira nte? Nyabuna mwana wanjye tuza umbwire impamvu ushaka gukubita indembe”

Wa mugabo yanyatse ikibando, ndatuza ariko numvaga ndibwaribwa, kubona Zamu mu maso yanjye byanteye guhinduka, umujinya ntari narigeze ngira uranganza, mbonye uwantwaye ibyo nari ntunze byose nyamara nari namwizeye.

Mukecuru-“Oya tubwire mwana wa, rwose tubwire niba yaranaguhemukiye tubicoce nk’ umuryango”

Njyewe-“Iyo mureka nkamudiha bikarangiriramo, n’ ubundi ntateze kunyishyura ibyanjye”

Mukecuru-“Ayiga Mana! Nawe se yarakwibye mwana wa?”

Njyewe-“Kunyiba gusa se ko yanshucuye ahubwo? Hmm! Dore ubusanzwe uyu yari umuzamu aho nabaga, hanyuma nza gushaka kwimuka, ambwira ko yamfasha akanshakira inzu ndetse akazantwaza ibikoresho, ndamwizera, ngitarabuka aranshucura ntiyansigira na busa”

Mukecuru-“Ariko Mana koko ibi niki?”

Njyewe-“Zamu! Hmm! Nako reka nigendere ntavaho nkora ibara”

Wa mugabo wari utabaye yahise amfata ukuboko,

We-“Oya buretse kugenda ubanze utubwire neza?”

Njyewe-“Ntimumureba se si nguyu, nababwire niba mubeshyera?”

Zamu yarinyagambuye, aregama asohora umwuka gacye atangira kuvuga bimugoye cyane,

Zamu-“Arambeshyera, arambeshyera uyu musore ntabwo muzi, ntabwo muzi ahubwo mumufate mumubaze impamvu ashaka kumpohotera”

Njyewe-“Uti?”

Noneho numvise umujinya wikubye ngize ngo mwereke wa mugabo arongera aramfata, ntabwo nari nzi ko Zamu yatinyuka agashira ubukaka akavuga ko atanzi ndetse ko mubeshyera

Navuye aho ngo hato ntakora ibara, manuka nihuta, feri ya mbere nayifatiye aho mama yakoreraga, umujinya ari wose, akimbona,

Mama-“Ryan! Bigenze bite?”

Njyewe-“Mama! Ni gute ushobora kunyohereza kugemurira umujura wanyibye akansiga iheruheru, akantwara ibyo naruhiye byose?”

Mama-“Ngo? Ryan! Ibyo uvuga ni ibiki?”

Njyewe-“Icyakubwira ko ngeze kwa mukecuru ngasanga ikigoryi kiryamye nako kirambaraye mu mbuga”

Umujinya watumye mvuga byinshi gusa Mama arawuturisha, yongeye kumbwira ko ibyabaye kuri Zamu ari ingaruka zo guhemuka, ko burya mu buzima nta mahoro y’ umuhemu, ambwira kandi ko haguma amagara ibintu ari ibishakwa.

Naramukundiye ndatuza ndabyakira  nsubira aho nakoreraga, nkomeza akazi ariko nkanyuzamo ngatekereza byinshi gusa shenge nagera kuru Sabine ngakubita agatwenge.

Iminsi yakomeje kwicuma, burya umunyarwanda yabivuze neza ko ifuni ibagara ubucuti ari akarenge, urukumbuzi rwaranze nkumbura guhuza imboni na Sabine, napanze kumusura ntitaye kuri Ntwari.

Kuwa gatandatu ku gicamunsi nariteguye mama na bashiki banjye baramperekeza tujya ku muhanda, bantegera imodoka mfata urugendo rurerure, numvaga navamo nkiruka kubwo gusiganirwa gusanga umukunzi.

Nageze nyabugogo, nkiva mu modoka mu gihe ntangiye gushaka inzira ngo njye gutega imodoka zijya i Remera, numvise umuntu umpamagaye ndikanga aho guhindukira ndunama, ntangira kugenda nihisha mu bantu.

Numvaga ibyo ari byo byose ari umuntu unzi neza, ubwoba bwaranyishe, ntangira kwibona Ntwari ampagaze hejuru.

Ninjiye mu modoka yari yuzuye ihita ihaguruka ndiruhutsa, dufata urugendo tugeze mu cyapa aho nagombaga kuviramo mvamo.

Mu nzira manuka nihuta ngana kwa Doctor sinzi uko byaje ngabanya umuvuduko, ntangira kugenda nseta ibirenge,

Njyewe-“Harya ubu ngiye kwa Doctor? Nako ngiye kwa Sabine, ndinjira ngenda gute? Reba njye na Doctor twicaranye tuganira? Ariko se koko nibyo Doctor yarahindutse cyangwa Sabine yarambeshyaga ngo nkunde ntuze umutima? Ahaaa!”

Nakomeje kugenda nihuta ngera kuri ya butiki ya Bravo, numva urusaku rwinshi ngira amatsiko, ndakata ninjiramo.

Nkigeramo nasanzemo umugore wambaye imyenda migufi cyane ndetse yisize amabara ku munwa no ku maso, yari ari gusakuza…nako yari ari gutuka cyane wa musore wakoraga muri butiki, nahise nibwira ko ari umugore wa Bravo, uwo natinyaga kuko numvaga ari umurozi gica, wampekuye mabukwe.

We-“Nta soni! Ubundi wowe uri igicucu cyangwa uri ikigoryi? Uko areba gusa, isukari imeneka ureba hehe? Izi mbeba zose zinjira uri hehe? Dore uko akanura amaso gusa!”

Wa musore wakoraga muri butiki byamwanze mu nda aba arasohotse, nanjye musohokaho akata inyuma y’ inzu musangayo,

Njyewe-“Bro! Bite se?”

We-“Nawe se uje kunsonga? Urambaza ibyanjye usanze ntukwa? Ndabirambiwe, ndabirambiwe ndigendeye nzarya duke ndyame kare, ubu si ubuzima”

Njyewe-“Ihangane Bro! Uriya se ni umugore wa Bravo?”

We-“Ntumubona se? Ni umugore se ahubwo ko ari shitani? Iyaba wari uzi uko yagize Bravo”

Njyewe-“Eeeh! Yamugize ate?”

We-“Hmm! Bravo ntakiri wawundi yabaye bazanga, yirirwa mu rugo atetse mbega yabaye nk’ umukozi mu rugo, ntagisohoka, uziko yambara ibicocero? Umubonye agahinda kakwica”

Njyewe-“Reka ntibishoboka”

We-“None se koko nkubeshye? Abantu bavuga ko uriya mugore yamuroze, wumve ko yabaye ikigoryi neza neza, iyo umugore avuze ariruka, maze hari ubwo anamuraza hanze”

Njyewe-“Yebaba wee”

We-“Cyangwa niba ufite umwanya uze tujyaneyo utagira ngo ndabeshya”

Tukiri aho wa mugore yarahahingutse,

We-“Dore mbese? Igihe naguhamagariye ntabwo wumvaga? Umva wa musore we, nyura hano! Nyura hano ugende none aha niba uba waje kungomeshereza abakozi”

Natanze amahoro ndagenda gusa nagiye mpindukira, nagiye nibaza ibya Bravo papa Sabine, natangiye kubabara nibutse za ntekerezo zanjye zamporagamo mbona nambika ingofero y’ icyubahiro Bravo mushimira ko yambyariye utagereranwa, umuteramuneza Bina bambi.

Nabirenzeho ndakomeza, ngera ku gipangu cyo kwa Bina, ndakomanga hashize akanya rugi rurakinguka, nakubitanye na wa musaza w’umuzamu nigeze kubeshya umunsi umwe nubika amaso,

Muzehe-“Bite urashaka iki?”

Ako kanya Sabine yahise avugira kure ngo: “woooow!

Muzehe yarikanze atanga inzira munyuraho ninjira nihuta musanganira  ndamuhobera,

Sabine-“Ooh! Kalibu Cheri”

Njyewe-“Urakoze rukundo”

Sabine-“Ahwiiii! Noneho ndaruhutse, nari nabuze amahoro”

Yagiye imbere ngeze ku muryango ngo ninjire munzu umutima wongera kunsimbuka ndahagarara,

Sabine-“Cheri! Ko utinjira?”

Nariyumanganyije ndinjira,Sabine anyereka aho nicara ndicara, muri ako kanya sinzi aho yagiye, ngiye kubona mbona Doctor ahingutse aho nari ndi, yari afiye ibirahuri bibiri na Divayi

Doctor-“Aaaah! Bite Ryan!”

Narahagurutse ndambura ukuboko ngufatisha ukundi ndamusuhuza,

Njyewe-“Ni byiza Doctor!”

Yaransukiye arambereza dukomanya ibirahuri maze akomeza kumbwira,

Doctor-“Urahageze se bari bambwiye ko uraza, ni kalibu urisanga, nishimiye kwakira umukwe wanjye mu rugo rwanjye!”

Njyewe-“Hhhh! Murakoze cyane”
Muri ako kanya nongeye kumva ibyishimo byinshi muri njye, nibutse uko nazaga nikandagira, nibuka uko numvaga Doctor ngahinda umushyitsi, ntabwo nari narigeze ntekereza ko umunsi umwe nzahabwa kalibu.

Doctor yaricaye dutangira kuganira gusa murabyumva hari ubwo naburaga icyo mvuga, hashize akanya mbona Sabine ahingutse muri salon yambaye neza cyane, nibaza ibyo ari byo,

Sabine-“Cheri! Urambona ute?”

Njyewe-“Wooow! Wambaye neza cyane rwose pe! Urasa n’ isimbi ntawe nagutura uretse njye”

Sabine-“Urakoze cyane sha”

Doctor-“Reka nanjye nze nitegure tugende”

Doctor amaze kugenda nashyugumbwe kubaza Sabine aho tugiye, ariko akomeza kumpisha.

Doctor ntiyatinze, hashize akanya gato araza, Sabine ahaguruka amfata ukuboko turasohoka, twinjira mu modoka, dufata urugendo aho ntari nzi.

Bidatinze twahingutse ahantu, nasomye neza hari handitse murakaza neza, sinamenye icyo habera gusa naje kubyibwira mbona amaparato agaramyeho inkoko acaracara aho hafi.

Twicaye ahantu hejuru kuri etaje, baratwakira tumanura akavumbi, maze hashize akanya,

Doctor-“Ryan! Nahisemo kubazana hantu nkaha ngo tuganire twitonze, hari icyo nshaka kukubwira uri kumwe na Sabine”

Njyewe-“Ntako bisa Doctor! Izi nzozi ntabwo nari narigeze nzirota”

Sabine-“Cheri! Humura narazikuroteye kandi uyu munsi turazikabije, Doctor tuguteze amatwi”

Doctor yagizengo avuge ako kanya numvise umuntu umfutse mu maso ndikanga, ntangira kurwana no kwipfukura, amacupa n’ ibirahuri byari kumeza birahanuka byikubita hasi binameneka……………………………………

Ntuzacikwe na Episode 60 y’ inkuru ndende “Sabine” ejo mu gitondo

8 Ibitekerezo

  • Dore ubwo uwo muntu ntashaka kubishya ibirori byanyu gusa nibyiza kuba docter yarisubiyeho ark mfite akabazo [bina bambi bisobanuye iki?] courage knd mwanditsi wacu dukunda

  • Sha ko uduhaye gato noneho?Cyangwa nuko itangiye kuryoha!Ryan ko bamupfutse bagiye kumutungura cg n’ibibazo?

  • Ubu uyu si Ntwali uje kuzambya ibirori se kandi ra?
    Cyangwa Docteur yamugambaniye ashushanya Bina ya Ryan?

    Umwanditsi turagushimiye kandi turagukunda Rwibutso wacu

  • Ryam ashobora kuba aguye mu mutego wa doctor ndetse mfite n’impungenge ko na Sabine yaba abiziho!Umuntu wahamagaye Ryan Nyabugogo yari yatumwe na doctor gutanga signal ko yaje(Ryan).Doctor ati:…”nishimiye kwakira umukwe wange mu rugo rwange.Izo wpuhwe ra!Amarozi(inzaratsi) nayo koko abaho ngo Bravo asigaye yirirwa mu rugo atetse yambaye ubucocero.

  • UMWANDITSI BROVOO IYI NKURU IRARYOSHYE CYANE.
    NIZERE KO ARI SURPRISE RYAN YATEGURIWE. BAGIYE KUMUPFUKA MU MASO BAKUMORERE ISABUKURU KUKO URABONA KO DOCTOR NA SABINE BARI BABITEGUYE
    BASOMYI BAGENZI NSHUTI DUHURIRA AHA. DUKOMEZE DUTERE INKUNGA UYU MWANDITSI WACU. KU GITI CYANJYE NGIYE GUTANGA INKUNGA YANJYE BITAZAGERA NYUMA NKABURA IYI NKURU. IMANA IGUHE UMUGISHA

  • umuseke muri aba mbere courage mwanditsi uri umuhanga turagukuikiye cyane

  • UMWANDITSI BROVOO IYI NKURU IRARYOSHYE CYANE.
    NIZERE KO ARI SURPRISE RYAN YATEGURIWE. BAGIYE KUMUPFUKA MU MASO BAKUMORERE ISABUKURU KUKO URABONA KO DOCTOR NA SABINE BARI BABITEGUYE
    BASOMYI BAGENZI NSHUTI DUHURIRA AHA. DUKOMEZE DUTERE INKUNGA UYU MWANDITSI WACU. KU GITI CYANJYE CAKA GUTANGA INKUNGA YANJYE BITAZAGERA NYUMA NKABURA IYI NKURU. MWADUHA NIMERO YA MOMO (TIGO CASH) YUMWANDITSI IMANA IBAHE UMUGISHA

  • Inkuru ni nziza ariko twabuze Episode ya 60!?!?!🤔🤔🤔🤔

Subiza

Your email address will not be published. Required fields are marked *