• 21/01/2020 2:24 18

Episode 58: Cedro atakambiye Ryan biba iby’ ubusa arara nzira

Ryan wa Bina  nari nzi gupima ibishyimbo ku munzani, nkamenya gutura abakiriya no kubashimira bagiye, ibyo Sabine yishimiraga ko mbimuganiriza umunsi wose, ngo amenye uko mbayeho, namubereye umubarankuru arabikunda, akajya anyibutsa aho twagarukiye, Sabine ambera Bina bambi yanjye, urukundo rushora mu gitaka cy’ ibyishimo, rushibukaho ihundo ryashibutse rishishe.

Nyuma y’ amezi atatu ubucuruzi bwaragutse nanjye ngira aho nkorera, kurangura imyaka byari akazi nari nsigaye nkunda kuko inyungu yazaga ifatika, igeno ry’ umunsi ryarutaga iryo Cedro yampaga.

Ibyo byatumye nibuka cya gihe ubwo natekerezaga kwerekeza mu cyaro nibaza uko nzabaho ariko kuri uwo munsi numvaga ahubwo nari naratinze.

Ibya Ntwari narabyirengagije kuko mama yambwiraga ko imbaraga zo guhangana nawe zaba zipfa ubusa, ahubwo kuba dufite amahoro ariyo nsinzi.

Hari umunsi umwe nari nicaye aho nakoreraga, ngiye kubona mbona umukecuru yinjiye ashoreye akana k’ agakobwa kikoreye umufuka, ndagatura ndafungura nsanga ni urimo ibishyimbo,

Mukecuru-“Reba utwo dushyimbo upime, maze umpe udufaranga mwana wa, wintindira dore tumusize mu kirago”

Njyewe-“Mukecu! Ko ari ducye se wararumbije? Cyangwa urashaka ayo kugura akunyu gusa?”

Mukecuru-“Ahaaa! Wahora niki mwana wa, nyabuna pima twandare tudasanga yabuguyemo!”

Nakomeje kugira amatsiko, burya hari ubwo witegereza umuntu bikaba ngombwa ko wumva ushaka kumenya ibirenze kubyo ubona n’amaso yawe, uwo mukecuru yari afite amaganya menshi, byatumye ntarenzaho nkomeza kumubaza,

Njyewe-“Uti mudasanga yabuguyemo mukecu? Mufite umurwayi urembye mu rugo se?”

Mukecuru-“Umurwayi gusa se ko ari indembe ahubwo? Dore ni umuhungu wanjye wabaga iyoo…aho ntazi, yagiye cyera mu mabyiruka, yaragiye arahera none yagarutse ari intere”

Njyewe-“Ooohlala, None se yaba yarazize iki? Ni urugomo cyangwa yarahohotewe? Nizere ko mwabimenyesheje ubuyobozi?”

Mukecuru-“Ahaaa! Mwana wa, mpa ubwo busa bw’ ibikoroto njye kugura agafu, naho nagorwa nshaje”

Nasutse utwo dushyimbo ndamwishyura aragenda, gusa nk’ umuntu nasigaye ntekereza byinshi gusa numvaga hari icyo nari nkwiye gukora ariko nanone numva ijwi rimbwira ko ibyago ntaho bitaba, ko abaganya ari benshi ntawabafasha bose ngo abivemo, nikomereza akazi.

Uwo munsi nimugoroba amasaha yo gutaha, natembereye mu ga centre dore ko ariwo mwanya nabaga mbonye, ndi gushaka aho niyogoshesha ngera kuri salon imwe mpasanga umusore w’ imisatsi myinshi wogoshaga,

We-“Eeeh! Kalibu kalibu kiliya! Tambuka turakogosha neza nk’ umusilimu ku giciro kiza, ndi mukundabantu ntabwo mpenda ndahendahenda”

Njyewe-“Hhhh! Ni angahe se wangu?”

We-“Wowe icara nkogoshe ayo umpa yose nta kibazo Boss,

Nkimara kwicara,

We-“Ahubwo se Boss ndakogosha, penke, igisunzu cyangwa….

Akivuga ako kanya narebye mu kirahuri cyari mbere yanjye, nakubwiswe n’ inkuba mbonye….nabonye Cedro.

Nahise niyambura ibitambaro bari banyambitse ndahaguruka,

Cedro-“Ryan! Please! Tuza, tuza tuvugane….”

Numvise muri njye mpindutse, kwihangana byaranze numva ibyo ari byo byose ngomba kuva aho hantu nkagenda, ngitera intambwe ngo ngende Cedro ahita amfata ukuboko,

Cedro-“Bro! Mbabarira unyumve kabisa, nyumva nkubwire nje ino ari wowe nje gushaka, Ryan! Sabine niwe undangiye hano, nagenze urugendo rurerure ngeze ino mbaza abantu bose kwa Ryan ariko mbura numwe ukuzi, none kubw’ amahirwe ndakubonye”

Njyewe-“Cedro! Umbabarire ntacyo navugana nawe, ndeka ngende utanyibutsa akahise”

Naramwiyatse ndasohoka akomeza kungenda inyuma ngeze imbere ndahagarara ndahindukira,

Njyewe-“Cedro! Ntiwagakwiye kuza ino unshaka, ntiwagakwiye kunza inyuma kuko wansunitse umbwira ko utakinkeneye, nkayoboka inzira yanjye, niba hari icyo unyishyuza umbwire nkishyure ariko undekere amahoro yanjye”

Cedro-“Bro! Mbabarira narahubutse, rwose kuva wagenda wagira ngo ni wowe umugisha wari uziritseho, Shakila nawe yahise ansezera, wa musore nawe namuburiye irengero n’ ibikoresho byanjye,

Ryan! Provy, Gaelle ndetse na Gentil inshuti zanjye nananiwe kuzisobanurira aho wagiye, kugeza aho nazitumiye nkazibwira ko wansezeye ariko ikinyoma kikanga kikantamaza, ngasanga Shakila yarashyize hanze ukuri,

Ryan! Mbabarira narakosheje, ndagusabye ngwino dusubire mu mugi, nzakora ibishoboka byose nsibe amakosa nakoze, kunyubaha kwawe kwatumye uca bugufi nkagushinja n’ amakosa ntazi, hafi yo kugutanga ngo bagutanike, ukanga ukigendera amahoro bituma nigaya, ntacyo nashobora gukora ntarigorora nawe”

Maze kumva amagambo Cedro yari amaze kumbwira naratuje, ntekereza kabiri, maze ndamubwira,

Njyewe-“Cedro! Ndabizi buri gihe umenya ko wakoze amakosa iyo ubona usigaye wenyine gusa sinatatira umutima ngo ntumwe wibagirwa ko wambereye umugabuzi, ukampa igeno ryantungiye ubuzima igihe kirekire,

Cedro! Ntabwo nakwibagirwa ko wishimiye kunyerekana mu nshuti zawe nk’ umuvandimwe nubwo nari umukozi wawe, ntabwo kandi nakwanga kugaruka mu birindiro cyane ko ikizere gihenda….”

Cedro-“Eeeh! Ryan! Urakoze cyane kabisa! Uranyemereye se turajyanye?”

Njyewe-“Oya Cedro umbabarire ntabwo bikunze kuko nyuma yo kuva mu mugi nabonye ibindi nkora, ubu ndi umucuruzi maze kumenyera ubuzima bushya”

Cedro-“Ngo? Ryan! Ndagukubira kabiri ayo naguhembaga, mbabarira rwose uze tujyane”

Njyewe-“Urihangana Cedro! Ntabwo byashoboka, urabizi nawe ko Ntwari anshakisha, nubwo wanze ko ngusobanurira ariko nabyo biri mu mpamvu ndi hano, kabisa urihangana ntibikunze”

Cedro-“Yebaba wee! Ubu se nzakurahe undi muntu wo kwizerwa? Ikizere kirahenda koko! Iyo mbimenya!”

Hashize akanya gato,

Cedro-“Ryan! Reka nikubure nta kundi ariko se iri joro…”

Hari mu masaha akuze y’ ijoro, imodoka zari zashize mu muhanda, Cedro yansabye ko twajyana akarara mu rugo bugacya azinduka agenda.

Narabyemeye ariko mugeza mu rugo ndamwakira, mu gitondo azinduka njye kumutegera, gusa yagiye ababaye cyane, tugeze ku muhanda,

Cedro-“Ryan! Wakoze cyane, gusa ubu ngiye ntacyo gukora mfite? Ese ugira ngo ni njyewe gusa? Itaba wari uzi ibyabaye kuri Tom”

Njyewe-“Tom?”

Ako kanya haje bus batangira kuvuga abajya I kigali, Cedro agenda ato atambwiye ibya Tom.

Nakomeje ubuzima nari menyereye, umunsi umwe mu gitondo kare ngiye aho naranguriraga imyaka nk’ ibisanzwe, natunguwe no gusanga wa mukecuru n’ umwuzukuru we nanone ku muryango bazanye akandi gafuka, narabasuhuje, amaganya yari yayandi,

Njyewe-“Mukecu! Muragarutse? Ni kalibu”

Mukecuru-“Ahaaa! Mwana wanjye se twabuzwa niki kugaruka,ko amaherezo ahubwo tuzacika hano ibyo twejeje bidushizeho”

Njyewe-“Ariko uwo murwayi wanyu koko banza arembye mukecu, aho ntiwasanga mutaramujyanye kwa muganga?”

Mukecuru-“Mwana wa, ntacyo navuga, ubushobozi se buve he? Ikimbabaje nuko ari we wizize”

Njyewe-“Uuh? Yizize ate se kandi?”

Mukecuru-“Atari we se? Dore umusore babana iyo yari yaragiye kurindagirira niwe wamuzanye erega, ngo yakubiswe na begenzi be nyuma yo kutumvikana ubwo bagabanaga ibyo bibye”

Njyewe-“Yeeee?Umuhungu wawe yakoraga ubujura mukecu?”

Mukecuru-“Ahaaa! Uwo musore wamuzanye ari intere yambwiye ko ubundi ngo yakoraga akazi k’ ubuzamu, nyuma gashyiga iramushyigura ngo yiba aho yakoraga, hanyuma we nabo bafatanije bananirwa kumvikana baherako bashwana bimuviramo gukubitwa agirwa intere”

Njyewe-‘Ooohlala! Ihangane mukecu, ariko rero ndumva uwo musore ari we wizize”

Mukecuru-“Sibyo nza nkubwira se? Wahora niki!”

Muri ako kanya numvise umutima wongeye kunkomanga, nishyura mukecuru aransezera aragenda.

Hashize akanya byanyanze mu nda ndasohoka ngo ndebe aho barengera, nahagaze ku muryango mu kureba neza, we naka kana gato bakomeje bagana aho mama yakoreraga, kuko nari mpitegeye narabarebaga.

Nahise mfunga nihuta nerekezayo, nkinjira Mama ahita avuga,

Mama-“Eeh! Ryan! Ngize Imana ndakubonye suhuza nyogokuru”

Njyewe-“Ngo nyogokuru?”

Mama-“Yiiii! Uyu mukecuru ni nyogokuru”

Njyewe-“Mu buhe buryo se kandi?”

Mama-“Banza umusuhuze ariko ndakubwira’

Njyewe-“Ariko rero twahoranye, njye nawe rwose twahoranye ni umukiriya wanjye”

Mama-“Uuuh? Mukecu?”

Mukecuru-“Ahaaa! Erega natinye kuza aha mwana wanjye nigira ahandi….”

Mama-“Eeh! Mukecu! Dore uyu ni umuhungu wanjye”

Mukecuru-“Ayiga Data! Uyu se ni umwuzukuru wanjye?”

Mama-“Yego rwose”

Mukecuru-“Anda mwana wa, anda  ngwino umpobere, yuuuu!”

Nahobera mukecuru nagira, ntabwo numvaga ukuntu ashobora kuba ari nyogokuru, gusa nakomeje kubyibaza ariko sinabaza.

Mukecuru yatangiye kubarira mama nanone ibye, nongera kubyumva bwa kabiri, ariko umutima nanone ukomeza kunkomanga,

Mama-‘Mana yanjye wee?Ryan umva nkubwire gato”

Twigiye ku ruhande gato, ntangira kumubaza cyane iby’ uwo mukecuru w’ umunyabibazo,

Njyewe-“Mama! uriya mukecuru aba nyogokuru ate? Igihe nabereye ko utamumbwiye ukambeshya ko nta wundi muntu wo mu muryango tugira?”

Mama-“Oya ntabwo ari nyogokuru wawe mu maraso, ahubwo dore uriya niwe wabaga hariya tuba, twamuguriye inzu yabagamo turamwimura, nyuma akomeza kwisanga, buriya na barumuna bawe bamwita nyogokuru”

Njyewe-“Ese?”

Mama-“Ahubwo numvise ibyo avuze binkora ku mutima, numvise hari icyo twakora Ryan”

Njyewe-“None dukore iki?”

Mama-“Buriya se ntareba icyo tubagenera ukabatwaza ukagenda ukareba uwo murwayi urembye? Erega ntugire ngo adutakiye atababaye?”

Njyewe-“Yeee? Nkajya gusura umusore wahondaguwe yibye? Mama! Oya rwose, si nka Zamu wanshucuye! Nako aho nzamusanga hose nzamusonga”

Mama-“Oya Ryan! Bikorere ko ari njye ngutumye, erega kuba ngufite bivuze umugisha, ugomba kujya umvuna amaguru ukajya aho ntabashije kujya mu izina ryanjye, buriya erega uriya mukecuru wemeye kutwimukira ngo tubone aho twikinga dushire impumu nkwiye kumwitura mu bihe nkibi”

Njyewe-“Ok! Sawa ntaho nahera ngusuzugura mama, nta kibazo ndajyayo”

Nemeye kujya gusura uwo musore kubwa mama, yarahashye ndetse na bya bishyimbo arabyongera, abaha n’ ayakunyu ndabatwaza.

Nti hari kure cyane hari ruguru mu kabande, twahingutse ku nzu nto ikijwe n’ urugo rw’ ibikenyeri, duhingutse mu mbuga nabonye umuntu uryamye ku kirago hanze, iruhande rwe hari ikibando cyo kwicumba.

Yari yitwikiriye mu maso, kuburyo ntari kubasha kumenya neza uwo ari we, mukecuru anyereka aho ntereka ibyo nari nzanye, maze kubitereka nsohora ahatebe ngatera impande y’ umurwayi,

Mukecuru-“Naho ubundi se ugira ngo areguka? Dore nuko yirirwa aramye aha, iyo imvura igiye kugwa turamwanura, izuba ryaba rivuye nuko…”

Njyewe-“Yoooh mwihangane mukecu”

Mukecuru-“Ahubwo reka mworosore urebe uko yabaye”

Numvise ubwoba muri njye, mukecuru aca bugufi apfukama impande ye akimukuraho ikiringiti cyari kimuriho…”

Njyewe-“Ntibishoboka! Oya ntibishoboka! Oya weee!”………………………………….

Ntuzacikwe na Episode 59 y’ inkuru ndende “Sabine” ejo mu gitondo

 

8 Ibitekerezo

  • Uwo musore yari zamu kwa Ntwari ndetse niwe wacucuye Ryan.Cedro nawe yabonye ingaruka z’uko yirukanye Ryan amurenganyije.Tom mawe yabonye ingaruka zo kugambanira Ryan.

  • Nguwo zamu Ryan amuguyeho! Ubuse arabyifatamo ate?

  • Ayayayaaaa!Uyu ni ZAMU wacucuye Ryan!Ubuhemu sibwiza ibaze ariwe!

  • Bavandimwe, tugire neza twigendere ineza tuzayisanga imbere, naho nitugira nabi inabi izadukurikirana kugeza iturambitse munsi yikirago tukakegurwamo nabo twahemukiye!Uwo muntu rwose ni zamu wacuncuye Ryan! Urakoze cyane mwanditsi mwiza.

  • Narabivuze ko Cédro azacucurwa nuwo ya Simbuje Ryan ndetse bikaba ikibazo kuri Provy none dore ngibyo birabaye.@ Ryan wabonye ko uzaguhemukira wese bitazamugwa amahoro ndakeka ko na Tom bamwirukanye bakamwambura ni ibyo yahawe byose no gufungwa bigeretse. Zamu wakwibye dore uramwifatiye gusa ntuzagire nabi. Mbega isomo! Hazakurikiraho Ntwali

  • Ryan uramenye ntakosa narimwe wemerewe gukora

  • Urakoze cyane umwanditsi iinkuru iragenda iryoha ndetse ni amasomo dukuramo aba ayi ingenzi mubuzima bwa buri munsi.

  • Uko nakabitekereje byo niko bibaye kbs ahubwo ntwari niwe usigaye kwicuza ahubwo icyingenzi umuntu yagira neza akigendera pe kuko umuntu ayisanga imbere

Subiza

Your email address will not be published. Required fields are marked *