• 19/01/2020 9:54 32

Episode 49: Sabine mu manzaganya…abwiye Ryan ibibereye mu cyumba agatabaza

Nasohotse vuba nkanda yes nshyira ku gutwi, nakanzwe n’ urusaku rwinshi numvaga Sabine ari gutaka cyane, nibagiwe aho nari ndi nuwo twari kumwe nzamuka niruka ngeze ku muhanda hagati amaguru nyabangira ingata mpagarika moto mbonye yose n’ izitwaye n’ abagenzi ngo nsiganirwe kugera kwa Doctor ntabare Bina bambi yanjye.

Moto nayibonye ndenze nka kilometero,

Njyewe-“Mota! Mota! Hagarara!”

Motari-“Twagiye Boss!”

Njyewe-“Twagiye nyine ntabwo uri mu kazi? Cyangwa niba utari no mu kazi umbwire nkomeze niruke n’ amaguru ariko ngere kwa Sabine”

Motari-“Reka da? Twagiye!”

Nuriye moto afatiraho, nari namubereye umuyobozi, nibyo koko nagombaga kumuyobora aho numvaga mu matwi yanjye Sabine ari mu byago, tugera kwa Doctor nishyura motari musaba kugenda.

Amaze kugenda, ako kanya umuriro wahise ubura muri quartier amatara yo ku gipangu cyo kwa Doctor arazima, numva umuntu ukingura igipangu, ndomboka nikinga ku giti cy’ umukindo cyari aho hafi.

Nabonye amatara y’ imodoka isohoka, yari iya Doctor narayibonye ndayimenya, iragenda, ngiye kuyiruka inyuma umutima urambuza, bamaze gukinga ndomboka nanone, ngeze imbere gato nigira inama,

Nagoroye ikora ndatambuka ndakomanga umuzamu arakingura, yari umusaza wavuganaga ikizere cy’ akazi yasabye,

We-“Bite wowe ko ukomanga aha wayobye nkuyobore?”

Njyewe-“Aaaah! Ko uvuga nabi se Muze? Hari akarengane waba wakorewe ngo tukurenganure?”

We-“Eeeeh! Muri abayobozi? Kalibu! Kabibu rwose bayobozi, mufitanye gahunda na Boss se?”

Njyewe-“Yego! Nsanze agiye ariko arambwiye ngo araje mbe mutegereje”

We-“Kalibu rwose tambuka usugire usagambe, nitwa Cyapangona! Imfura yanjye yitwa Kokonati!”

Njyewe-“Kokonati?”

Cyapangona-“Yeee! Ni njye ushinzwe abanjira n’ abasohoka aha, ngira ngo urambona ko nshesha akanguhe! Aka kazi nkarambyemo! Nkamazemo imyaka iyo…makumyabiri nitanu! Nzi gufunga umuryango nako ni impano yanjye! Wabaza Boss ukuntu umukobwa we mukontorora”

Njyewe-“Ngo umukobwa? Sabine se?”

Cyapangona-“Uwo…! Uriya mukobwa wa Boss buriya atuma ngira akazi kenshi, uzi ukuntu ahora ashaka gusohoka aha ngo agende?”

Njyewe-“Uuh! Ajya hehe se?”

Cyapangona-“Yewe! Ubundi yajyaga ambwira ngo agiye kwiga, nyuma nza kumenya ko aba ambeshya,aza kumbwira ukuri,

Yambwiye ko ngo hari umusore akunda cyane ngo ariko Boss ntamushaka, ngo uwo musore aramukunda cyane kuko yamuremeye ibyishimo yabuze mu buzima, ugira uti se rimwe na rimwe ntantera agahinda?”

Njyewe-“Yooh? None se Mzee! Uriya mukobwa si uwa Boss? Kuki atisanzura mu rugo? Wowe uba aha ubona ari byo?”

Cyapangona-“Niyo mpamvu antera agahinda, reba nkubu mukanya gashize induru zari zivuze mu cyumba, kandi yambujije kwinjira mu nzu! Niba yari ari kumukubita, niba….ariko numvaga basa n’ abahanganye”

Njyewe-“Rahira? Sabine arimo  se cyangwa barajyanye?”

Cyapangona-“Oya arimo! Tambuka ukomange muyobozi,kuri mu bwatsi bwawe se!”

Natambutse ntacyo nikanga, yari amahirwe yiremye nakirwa neza ndakomanga, ako kanya nakinguriwe nuwo Sabine yitaga Tantine, mushiki wa Doctor,

Tantine-“Ni kalubu! Muraho neza?”

Njyewe-“Murakoze! Muraho namwe?”

Naratambutse ndicara, hashize akanya,

Njyewe-“Nimwe mururimo mwenyine se?”

Tantine-“Oya hari undi nuko ari mu cyumba”

Njyewe-“Nari nje kureba Sabine, ndamubona se?”

Tantine-“Reka nze mubwire ariko sinzi….”

Tantine yaragiye nguma muri salon, nyuma y’ umwanya utari muto Sabine yarahingute , ndahaguruka mu kumwitegereza, amaso ye yari yatukuye byaragaragaraga ko yarize, ntiyampobeye ahubwo yampereje ikiganza.

Naracyakiye turicara nkomeza kumwitegereza, nashimiye Imana ukuntu yaremye umutima wanjye ugatuza nkaza ntagwirirana ndwana iwabo nahejwe.

Sabine yahise ambwira,

Sabine-“Ryan! Bite? Winjiye aha ute?”

Njyewe-“Hmm! Ibyo tubyihorere Sabi! ndakwinginze, ndagusabye nyumva nje nsiganirwa kukugeraho, mbaye nkikwitaba numva utabaza, kandi mu maso yawe ndabibona warize, mbwira? Byagenze bite?”

Sabine yaratuje arandeba hashize akanya katari gato yitsa umutima maze arambwira,

Sabine-“Ryan! Nari ndi mu cyumba ubwo nari mvuye muri douche, ngiye kubona mbona urugi rurakingutse, Doctor yinjira yambaye essui main…”

Njyewe-“Ngo?”

Sabine-“Nabuze icyo nkora ubwoba buranyica agize ngo anyegere nibwo natangiye gutabaza mfata telephone nkanda nimero yawe Doctor arayinyaka atangira…. ibyabaye nyuma…”

Njyewe-“Sabi! Utambwira ikindi, utambwira ko Doctor yagufashe ku ngufu?”

Sabine-“Humura ntabwo yabigezeho ariko niho byaganaga, Tantine niwe watabaye”

Njyewe-“Ntibishoboka? Mana yanjye koko ibi ni iki? Sabi! Ngwino, zinga byose tugende,

Sabine-“Ryan! Si ubwa mbere, si ubwa kabiri bibaye, nuko numvaga kubikubwira ntacyo wabikoraho byatuma ubabara ugahangayika, ubu bibaye ngombwa kuko ngiriye kwigaba kwawe ngo untabare”

Njyewe-“Sabi! Ibyo umbwira byose singusiga aha, ngwino tugende”

Sabine-“Ryan! Erega tuza, ese ubwo wari uzi ko ndi umugaragu hano?”

Njyewe-“Umugaragu?”

Sabine-“Hmm! Ryan umutima wanjye ubitse byinshi, ariko humura igihe kizagera, ku munsi w’ insinzi umenye byose utazi, gusa urakoze kuza unsanga, kandi utuze ukomeze uzirike umutima wawe kuwo wahinduye mushya, ni urugamba ntashobora gutsinda njyenyine ntagufite wowe muganga w’ umutima wanjye, umvura agahinda”

Ooh my God! Sabine amaze kumbwira ayo magambo yatangiye gutemba ajya mu nda, ngize ngo nongere kuvuga biranga, muri ako kanya nagiye kumva numva ihoni riravuze ndikanga cyane, ndahaguruka,

Sabine-“Ryan! Ryan!”

Nta kundi nagombaga gusohoka ngo hato Doctor ataba agarutse akansanga iwe, ku bw’ amahirwe nageze hanze nsanga umuzamu yunamye akingurira imodoka ngo yinjire, mbona hepfo gato ahantu igipangu cyaguye, manuka nomboka ndasimbuka nitura mu muhanda ntera intambwe ndende, mpava ntyo.

Nageze mu rugo ibitekerezo ari uruhuri, ni ukuri byarandenze, ntabwo nashoboraga kumva ko Doctor yashaka gufata Sabine ku ngufu, nibutse ya magambo…..kuba umusimbura wa nyina.

Ariko se koko byari byo? nicyo cyandaje ijoro, nongeye guhamagara nimero ye ariko yanga gucamo, atemba ajya munda, bwacyeye muhamagaye inshuro zirenga makumyabiri, saa kumi nimwe nari mbyutse.

Nariteguye  ngiye gusohoka mu gipangu mba mbonye nguwo Ntwari ari kwinjira mu modoka, akimbona,

Ntwari-“Bite sha mwene….harya ni mwene nde?”

Njyewe-“Eeeh Muze! Mwaramutse neza? Muragiye se mumpe lift?”

Ntwari-“Ngwino tugende nta kibazo sha”

Naratambutse ninjira mu modoka dufata umuhanda, byari byahindutse ntibyari nk’ ibisanzwe, twageze ku kazi tuvuganye amagambo wabara.

Ntiwakumva ubwoba n’ umujinya nari mfite, ariko umutima waratuje nkuko Mama  yabinsabye ngeze ku kazi mva mu modoka ye arakomeza arinda arenga nanjye nkomeza inzira yanjye.

Nakomeje gutekereza ibya Ntwari, ibya Sabine byo reka byari bigiye kuzansaza gusa nkarenga nkiyumanganya ngakomeza kwita ku kazi kari kantunze ngo wa musore Cedro yari yarazanye atazansimbura nkabura intama n’ ibyuma.

Iyo natahaga umutima waransimbukaga, nakwinjira nkikingirana, Sabine nkamuhamagara bucece hakaba ubwo aho kuvuga antuye amarira, ngakomeza kumusaba kuva kwa Doctor akaza tukibanira ariko akanga akambwira ko aho gusubira inyuma yakwicara aho ageze

Ubwo hari kuwa gatanu nka saa kenda, nagiye kubona mbona telephone yanjye irasonnye mu kureba neza, yari nimero ntazi, nakanze yes nditaba, natunguwe nijwi numvise ngahita menya, yari Johnson.

Johnson-“Bite Ryan!”

Njyewe-“Eeeh! Amakuru Johnson?”

Johnson-“Amakuru ni meza, ewana meze neza kabisa, ese waragiye ntiwamenya amaherezo yacu?”

Njyewe-“Bro! Mbabarira ni ukuri ndagusabye, naratsikiye ngarukira mu nzira abandi baratsiga ariko nizere ko abansize basiganiwe kuba iruhande rwawe mu cyimbo cyanjye”

Johnson-“Ryan! Burya ntuhinduka, uracyari wawundi, rwose tumeze neza, ndi koroherwa ndetse bashiki banjye na Mama bameze neza, cyeretse uje ukadusura wabona ko iby’ Imana ikora bihambaye”

Njyewe-“Wooow! Imana ishimwe, ibyo birampagije, ntabwo wakumva ukuntu mbyishimiye, vuba cyane nzabageraho kandi wumve ko ntari kure yanyu”

Johnson-“Ni kalibu Ryan! Iyi niyo nimero nsigaye nkoresha, tuzavugana”

Johnson yaransezeye maze gukupa telephone numvise nishimye cyane ko ari mu maboko meza, hashize akanya gato ntuje, numvise umuntu ukomanze nkingura umuryango, natunguwe no kubona Cedro, yinjiranye na Elysie ndikanga cyane

Njyewe-“Eeh! Cedro! Elysie umukuye hehe?”

Elysie-“Hhhh! Wari uzi ko wantaye se tutazongera kubonana?”

Njyewe-“Yooh? Umbabarire ni ukuri ubu nibwo nibutse disi ko nagusize nkagenda ntakubwiye”

Elysie-“Humura Cedro yahise aza turaganira, turagutegereza turakubura, gusa twaramenyanye niwe ukungejejeho”

Njyewe-“Oooh mbabarira Elysie, nanjye si njye, nari numvise icyo ntari kubasha kwihanganira….”

Elysie-“Humura garukira aho hafi, ahubwo birabe ari amahoro”

Njyewe-“Ahaaa….”

Cedro-“Ryan! Reka mbareke ibyo nari nasabwe nibi”

Njyewe-“Urakoze Cedro!”

Cedro yaragiye adusigana na Elysie, maze ako kanya muha agatebe dutangira kuganira,

Njyewe-“Elysie urantunguye cyane, utekereje ute kuza kundeba?”

Elysie-“Hhhh! Ni byiza niba utunguwe wishima”

Njyewe-“Cyane! Hano se usanzwe uhagenda?”

Elysie-“Oya nuko nari mvuye gufata ubutumire bwacu kuri company imwe dukorana, nibuka ko Cedro yambwiye ko mukorera aha hafi”

Njyewe-“Ese? Ubwo butumire se nubwiki ra niba atari ibanga? Nanjye se nabutaha?”

Elysie-“Hhhh! Ubusanzwe buriya ndi umucuruzi, ndanguza ibinyobwa bitandukanye, nicyo kidutunze mu rugo”

Njyewe-“Eeeh? Ndumva mucuruza ibintu byiza, ariko ni imitobe kuko….”

Elysie-“Hhhhh! Oya ni byose, ahubwo ubutumire mvuye gufata nubwo kuza kwitabira ibirori by’ ikinyobwa gishya, urumva nyine ko ndaba ngiye kurambagiza ko iryoshye mbe uwa mbere mu bayiranguza”

Njyewe-“Ese? Ndumva ari sawa, uzi business kabisa, urajyana nande se muri ibyo birori?”

Elysie-“Hhhhh! Kiri mu binzanye aha, bampaye invitation ebyiri ubishatse wamperekeza!”

Njyewe-“Ayo mahirwe nayitesha se? Ntabwo nakwanga kujyana nawe mbitorewe”

Elysie-“Ok! Great! Witegure noneho ndaza kuguhamagara ku mugoroba kandi ntuntenguhe, hari ikiri bugutungure uyu mugoroba”

Njyewe-“Oooh ndahari cyane rwose, kandi mfite amatsiko”

Elysie yarahagurutse nanjye nisanga nahagurutse turasohoka tugera hanze, ndamusezera ngaruka mu kazi.

Nakomeje akazi ariko agatima kari kuri Sabine, naratekerezaga nkagera kure nkagaruka ntacyo nzanye, Sabine uwo natoye uwo mbara uyu munsi nk’ inkuru yabaye ejo.

Nkiri aho numvise telephone isonnye nanone, mu kureba neza yari Ntwari.

Nongeye kwikanga cyane ngiye kwitaba umutima uransimbuka mfunga umwuka nkanda yes nshyira ku gutwi,

Njyewe-“Hello!”

Ntwari-“Umva sha Ryan! Uri hehe?”

Njyewe-“Ndi ku kazi, ni amahoro se ko mumpamahaye?”

Ntwari-“Banguka mu rugo urakenewe byihutirwa”

Njyewe-“Uuuh? Mzee! Habaye iki?”

Ntwari-“Banguka sha, ibindi urabimenya uhageze, mpagaze aha imbere y’ umuryango”

Njyewe-“Imbere y’ umuryango w’ iwanjye?……………………………………

Ntuzacikwe na episode 50 y’ inkuru ndende “Sabine” ejo mu gitondo

9 Ibitekerezo

  • Ryan reka Sabine wikundire Elysie bice aho byagaciye nta mpamvu yo gusazwa n’ umukobwa, ibitari ibyawe ntibiba ari ibyawe, ubwo sabine yanze kuva ku izima ngo ave kwa Doctor babiziranyeho. ntwari yakuvumbuye ihute agute hanze

  • Ryan uramenye wicika intege urugamba rugeze mumahina kdi rugeze aho riryoshye. Aha niho rero ubonera intwari, Sabina yaba akubeshya yaba atakubeshya wiva kwizima.

  • njyewe ryani namwumva Igitekerezo cyanjye kuriyi nkuru nuko ryani yava ku izima kuko sabine abaye ashyira mu gaciro yava kwa dogiter urukundo rwose ruruhanyije rurababaza kandi nta muntu uba kampara warasaze bihagije kugeza ubwo wagiye ubeshya ko uri umuyobozi ukavayo usimbutse igipangu ntwari we yakuvumbuye shaka ahandi ujya.

  • SABINE NAGUME KWA DOCTOR ARWANE INTAMBARA AZAHAVE AMWANDIKISHIJE NKUMWANA WE AHASIGAYE WE NA RYAN BAZABE MURI IYO MITUNGO

  • Njye uko mbibona Ryan wakwikundanira na Elyzie kuko nubundi mbona amaherezo uzasanga Sabine ari mushiki wawe
    Gusa wafasha Sabine akzava kwa Doctor Agize icyo ahavanye ark rwose si uwawe uzamureke.

  • Salut! mwamfasha mukambwira uburyo narebamo episode yatambutse mbere narinagarukiye kuri 35 nyure muyihe nzira ngo ndebe izikurikiyeho? Murakoze

  • Oya Ryan ntampamvu yo kuteka sabine cyane ko nawe aru kurugamba ba intwali rero wimutererana

  • Ryan urafashwe tu!

  • Ryan weeee itonde rwose.

Subiza

Your email address will not be published. Required fields are marked *