• 24/01/2020 12:18 24

Episode 23: Ganza aririmbiye Kevine bwa mbere ku rubyiniro amuhamiriza urukundo ku munsi w’abakundana

Duherukana….

Nsanze mukuru wanjye Ntwari mu rugo anzaniye agafuka k’ akawunga, akambwirana umujinya ambwira ko uburisho nzabwishakira, nanjye ngatuza ahubwo nkamusaba kunjyanira ubutumwa, agaha Kevine CD yari iriho impano  yari inyihishemo, yari indirimbo yanjye ya mbere namuhimbiye….

Maze kwiruhutsa narahagurutse ntangira gushaka ibyo ndarira, maze kurya ndaryama ndasinzira, mu gitondo nabyutse nkora isuku nkiri muri ibyo aga telephone kanjye gato karasonnye, ndebye mbona ni wa mugabo wo kuri studio, hamwe nageze nkaba ibuye ryanzwe nkabwirwa ko nshobora gukomeza imfuruka.

Nitabye vuba,

Njyewe-“Hello!

We-“Bite Ganza!”

Njyewe-“Ni byiza rwose”

We-“Ko ngushaka none aha anakubona cyangwa ubwo wabaye umu star ntabwo ugiye kujya ubonekera igihe cyose wabonekeraga?”

Njyewe-“Ngo umu star? Oya nta kibazo ndahari rwose”

We-“Ok! Wagera kuri studio se ko nshaka ko tuvugana?”

Njyewe-“Nta kibazo rwose”

We-“Sawa…sawa ndagutegereje”

Ako kanya nahise nitegura mva mu rugo nerekeza kuri studio, mu nzira nagiye ntekereza ukuntu ubuzima bwanjye buhindutse, ibyo ntatekerezaga binsanze mbikeneye, nagezeyo ntungurwa no gusanga ntegerejwe.

Wa mugabo nyir’ ukumfasha yahise ansanganira aransuhuza atera intambwe abwira umusore n’ umukobwa bari bari aho,

We-“Uyu niwe Ganza, waririmbye iriya ndirimbo Umwiza wo mu buto”

Ako kanya baratangaye cyane bansuhuzanya urugwiro, ndetse batangira no kunyifotorezaho bohereza amafoto …bwari ubwa mbere mu buzima ibyo bimbayeho.

Hashize akanya nyir’ ugutora impano yanjye n’ ibinezaneza byinshi yahise ambwira atuje ati,

We-“Ganza! Aba ureba rero ni abanyamakuru, nibo nashyiriye indirimbo yawe bwa mbere batangazwa n’ impano yawe yo kuririmba, barifuza kuganira nawe, ngo barebe uko bagufasha impano yawe ikagera kuri benshi”

Njyewe-“eeh! Ok ok! Nta kibazo, nta kibazo nubwo ari ubwa mbere ngiye kuganira n’ abanyamakuru”

Ako kanya batangiye kumbaza amavo n’ amavuko byanjye, nanjye ntangira kubabwira ngeze ku nkuru yanjye na Kevine mbima amakuru kuko ryari izingiro ry’ indirimbo yanjye bikaba inkuru mpamo nari kuvuga izagera kure umunsi byose byagiye hanze.

Namaze kubabwira iby’ ingenzi bnayaka nimero yanjye ya telephone ndayibaha, baransezera baragenda, nasigaye aho na wa mugabo w’ amateka dutangira kuganira,

We-“Urumva umeze ute se nyuma yuko utangiye kumenyekana ndetse n’ abanyamakuru bakaba batangiye kuza kugushaka?”

Njyewe-“Eeeh! Ndumva atari njye, byandenze kabisa”

We-“Wari waba umu star se? Iyi ni imirabyo, inkuba ntabwo zari zakubita”

Njyewe-“Koko se?”

We-“Hmm! Ubundi njyewe ndi bucura mu muryango w’ iwacu, nabayeho nikundira ibintu by’ umuziki bakuru banjye bose ni abantu bakomeye, bumvaga ko kujya mu bintu nkibi ari ukubasebya, ariko ubu nibyo bintunze njye n’ umuryango wanjye”

Njyewe-“Ese?”

We-“Mba numva ntabihemukira kuko nkunda impano, ntabwo nari kugera kuyawe ngo nyisimbuke, icyo ngusaba uzitware neza, ntuzagire imyumvire nk’ iyabandi ba star batangira kubona bamenywe na benshi bakishora mu biyobyabwenge bakisanga barasigaye”

Njyewe-“Ndakumva kandi nanjye maze kumenya agaciro k’ impano ntari nziko indimo”

Nakomeje kuganira nawe ndetse dutangira imyitozo nkuko nari narabimenyereye, bwije ndataha, ubwo nari nkigera mu rugo nagiye kumva numva telephone irasonnye nyitaba vuba….yari Kevine.

Nikije umutima menya neza ko Kevine yumvise ubutumwa bwanjye, akamenya ko burya bwose navukanye impano, nagoroye umuhogo maze nitsa umutima aho kuvuga Hello nkuko bisanzwe nahise ntangira kuririmba,

 

“Wari umunsi umwe utazibagiranaa! Ubwo amaso yanjye yahumutse nkabona urumuri rudasanzwe, umutima ugatuza, ubwiza nkabwiyegereza,

Akazuba karavaga akayaga gahuhaaa, wari umunsi usanzwe gusa wabaye uw’amatekaa ni nayo mpamvu nkuririmbaa! Nibuka ibihe byacu byo mu buto, mbona ka kacu kacumbikiye amahirwe yacu,

Sinari nziko nshobora gukundaa! Ariko byanyeretse byinshi bitazamva ku mutima ngo bizime nubwo nava mu buzima,

Oooh! Hindukira undebe ni njyewe wahisemo! Sinzigera mpinduka! Uyu niwe mwanya ngo umenye ko nahisemo ubuzira kwisuriho, niyo mpamvu impano yaguhingukiyeho, nkaririmba umwiza wo mu buto,

Oya si undi ni njyewe! Ni Ganza wawe! Ooh umwiza ntazasiga ansanga, uhatse byinshi ntazigera nibagirwa, uwemera kubeshya ko atankunda ngo angaragarize urukundo bene kurusenya bagahera mu manzaganya,

Ooh ndagukunda! Ndagukundaa! Ma Dona my Every Thing I need tambuka! Unyegere nshire agahinda, ushimangire urwo wankunze kuko nsa neza kubera wowe.

Oooh! My Boo! Ngaho nsanga nshyire akaraso ku mubiri! Ni ukuri ntawundi nshaka ni wowe, wowe nabonye bugicya nkaguhamagara ukanyikiriza, ukantegera amaboko nkibagirwa byose umwijima ukimukira urumuri mu mutima wanjye hagatama impumu yandinze umwuma,

Kevine izina ry’ umutako nahamagaye ngapfukwa umunwa, umunsi uzanyumva nkuririmba nizeye ko uhatse byinshi ntazigera nibagirwa ngihumeka, ubwo ni yose kuko nzahora nkuririmba,

Nkigeza aho Kevine byaramurenze yararize n’ amarira nyumva muri telephone, nanjyenaratuje kubera ibyishimo byari byinshi mu mutima wanjye igipimo cyabyo kirarenga kiraturika.

Nasoje mpogoza ngira nti,

Oooh! Ibuka igihe nagusanganiye!

Ngatega ikiganza ukagisanganira, ibuka ko nagukunze wenyineee! Nkakwiharira kuko ari wowe nifuza ko uzanderera

Uyu mwanya niwo mbonye ngo nguhe iyi mpano nakubikiye ngo wemere ko ari njye wavukiye, ukaba umwiza wo mu buto.

Umukobwa udasanzwe, umwambaro wambereye, inkingi yankingiye agahinda Cyo ngaho iyizire ube urumuri rwanjye

Humura ntawe uzagukura mu gituza nagutujemo, Ni ukuriii! Ni impamo, iyi ni impamba y’ impano nkesha wowe. Uyu ni Ganza wawe.

Natuje gato ako kanya numva umuntu ijwi rya Mama Kevine nari naramenye kuko yazaga kudusura kenshi mu cyaro,

Mama Kevine-“Kevi! Kevi! Ubaye iki?”

Telephone yarikupye, koko nari nashimishije uwo nkunda, amagambo benshi bari bamaze kumva niwe nari narayaririmbiye, byabaye igitangaza kuri we, biba ibyishimo bikomeye kuri njye.

Nagiye kuryama nsinzira ntuje ntegereje umunsi nzahuza imboni nawe, umunsi wakurikiyeho Kevine yampamagaye bisanzwe, turaganira ariko ntegereza ko ambaza iby’ indirimbo ndabibura nanjye nkomeza gutuza ngo ntidumbukiza nkamubaza akambwira ko yabihiwe ngaseba.

Hashize iminsi tuvugana ataranabigarura, ku mutima nkeka ko yabihiwe cyangwa yanyanze kuko burya hari abakobwa badakunda abahanzi, babona ko batagira urukundo kuko bakundwa na benshi,  uwo munsi nimugoroba nitabye telephone ya producer,

Producer-“Hello Ganza! Haha! Umu star kweli!”

Njyewe-“Ndakumva patron!”

We-“Hhhhhh! Ariko se ntabwo wari wakira ko uri umu star? Jya unyitaba bisanzwe nk’ abandi basani, we uti yooh Papa!”

Njyewe-“Hhhhhh! Bizagenda biza buhoro buhoro”

We-“Sasa rero nakuboneye ikiraka”

Njyewe-“Yeee? Ikiraka?”

We-“Cyane rwose, nakuboneye ikiraka cyo kuririmba mu birori by’ abambaye imyenda y’ umutuku gusa, ku munsi w’ abakundanye, baguhisemo kubera indirimbo yawe”

Numvise atari njyewe ahari, ntuza umutima ntangira kumubaza cyane iby’ ibyo ambwira ko banyemereye amafaranga ibihumbi ijana, ariko nkazaba mpari”

Nagurukiye mu bicu birumvikana yari nari ntangiye kubona agaciro k’ impano, naramushimiye cyane gahunda yari iyejo bwa mbere ngahagarara imbere y’ abantu, nabo kakanshagara.

Bwaracyeye ntangira kwitegura, muri twa dufaranga nabikaga kuri ticket nahabwaga buri munsi nagiye kuguramo agakweto n’ utwenda byose bitukura, mu masaha ya saa kumi n’ ebyiri ndambara ubundi nitsa umutima nk’ ugiye mu rubanza.

Nkiri aho nikanze urugi rukingutse, natunguwe no kubona Kevine ahingutse yambaye agakanzu keza k’ umutuku, inkweto z’ umutuku ndetse n’ isakoshi y’ umutuku, nawe akimbona byaramutunguye cyane maze ndamusanga ndamuhobera, nishimye mbona twambaye ibisa.

Kevine-“Yeee? Ganza? Twambaye ibisa?”

Njyewe-“Nanjye birantunguye, birantunguye rwose, ubu se ibi bibaho ra? Cyangwa ndarota?”

Kevine-“Mbwira, utambeshya ugiye hehe?”

Njyewe-“Ngiye….nako ngiye…hari ahantu njyanye n’ umusore twiganye….”

Kevine yahise abona ko ndi gushaka ibyo mubeshya, mu by’ ukuri  iyo nagiraga aho njya ntamubwiye byaramubabazaga cyane, nanjye nagize isoni,

Kevine-“Nabimenye ugiye mu gitaramo cy’ abambaye umutuku, kandi najye niho nari ngiye, nari nziko ngutunguye ariko ni byiza, kuko mfite umukunzi usigaye amenya ibigezweho”

Njyewe-“Umbabarire nari mbuze uko mbikubwira, gusa niho ngiye”

Kevine-“None se ujyanye nande ko hariya hajyayo abakunzi”

Njyewe-“Ntawe, ntawe da”

Kevine-“Ok! Nari nziko ngutunguye, nawe nari nakuguriye imyenda itukura”

Nongeye kwikanga cyane umutima wanjye ukomeza kwigaya, nawe byakubaho ubona uhora wakira impano ariko wowe ntayo utanga, byagera k’ umuhungu noneho….namwe murabyumva

Njyewe-“Kevi! Koko ubu ntiwigora?”

Kevine-“Oya…oya mfa kuba mbikorera uwo nkunda, yari surprise ari irapfuye nta kundi”

Kevine yakoze mu isakoshi, akuramo imyenda ntungurwa n’ ukuntu yari myiza, kari agapira gatukura, ipantaro y’ ikoboyi nziza itukura n’ inkweto nziza cyane ndetse n’ agakoti.

Nahise nkuramo imyenda nari naguze mu isoko nambara iyo Kevine yari anzaniye ndetse n’ inkweto, ntangira gutambuka nikoze mu mufuka nireba, nawe yahise akoma mu mashyi,

Kevine-“Wooooow! Waberewe Ganza!”

Tugiye gusohoka yahize ampindukiza asa nugiye kunyongorera ahubwo ahita ampa kiss ku itama anyambika ingofero nayo itukura birandenga tubona gusohoka.

Nagendaga nkuwambaye rasoro kubera ukuntu nari nambaye neza, abo tubana mu gipangu barahuruye, tugeze ku muhanda dufata moto tugeze aho ibirori byari bubere turicara ndetse bazana n’ icyo kunywa.

Kuko bwari ubwa mbere sinamenye ko hari aho abahanzi batumiwe bajya nigumiye aho, ibirori biratangira umuhanzi wambere ajyaho, uwa kabiri , uwa gatatu ndetse n’ uwa kane, natangiye kwibaza impamvu Kevine atambaza iby’ indirimbo yanjye ariko ndiyakira, ubwo nyine numvise ko ya marira ari ay’ uko naririmbye nk’ ikiyongoyongo.

Natangiye kwiheba ndetse numva twataha, nta nubwo numvaga ko ndi buhamagarwe ngo ndirimbe, ibirori bihyushye numva uwari ubiyobewe aravuze,

MC-“Hey Hey Gyz! Nizereko mumeze neza, abazanye nabakunzi babongorere ko babakunda, abaje bonyine bongorere icupa ko baryemera, muri aka kanya mwese muhaguruke, tugiye kwakira umuhanzi benshi batazi bari bategereje, uwo nta wundi ni Ganzaaaa!!!”

Kevine niwe wa mbere wakomye mu mashyi, aho nari ndi nabaye nkukubiswe n’ umuriro w’ amashanyarazi, ntambuka mu bantu bamwe bamfata, ba basore b’ ibigango baramfasha ngera ku rubyiniro.

Naberetse ko ishimye cyane, nabo urusaku ruba rwinshi ndirimba ya ndirimbo naririmbiye Kevine mu maso ye, natunguwe no kubona abantu barayikunze bihambaye ndetse batangira kujugunya amafaranga ku rubyiniro.

Mu gihe nari nyisoje natunguwe no kubona Kevine ansanze ku rubyiniro arampobera cyane , MC yahise abyivangamo,

MC-“Eeeeh! Abacuranzi muzinge ibyuma mutahe, hari icyo nshaka kumenya hano, uyu muntu ko mbona ari umwiza wo mu buto ra?”

Abari aho bose barasakuje cyane, maze MC ntiyatuza arongera,

Mc-“Ganza! Nkubaze”

Njyewe-“yego ndakumva”

MC-“Uyu…uyu ni umwiza wo mu buto waririmbye?”

Njyewe-“Cyane rwose”

Abantu bose bakomye amashyi menshi, ako kanya  MC arakomeza,

MC-“Murabyiyumvira rero umwiza wo mu buto nuyu ariko ntabwo yanshika Foux Ndagira ngo mbere yuko Ganza amanuka hano ahindukire imbere y’ iyi mbaga y’ abantu maze ubwire amubwire amagambo amukwiye atari ya yandi abayobozi n’ abanyamadini bahimbye basezeranya abakunye, narangiza kandi Umwiza wo mu buto  nawe agire uko yagenje kuko uyu ari umunsi w’ abakundanye”

Muri ako kanya ntibyangoye kuko amagambo nari kubwira Kevie ntabwo nari kuyabura kuko yamporagamo, MC yamfashiye micro ndahindukira dufatana ibiganza duhuza imboni mbona amarira atangiye kumubunga mu maso, rwari urukundo shenge!

Njyewe-“Mukundwa unkwiye, nsabwe kugira icyo nkubwira imbere y’ abadushagaye kuko uri ishema ryanjye, ukaba umutako nishimiye kumurikira abambona, ukaba umukazana mwiza mama yari gushima iyaba akiriho,

Mwamikazi ukwiye ikamba, kuri uyu munsi ndifuza kuguhamiriza ko ari wowe mutembatuze, wansanganije umutima umenetse ariko unzaniye ihumure, wowe wansanze ntagira ibyishimo natewe no kwizera uwanze urwanjye.

Kirezi cyeje imbuto z’ ibyishimo, humura ndagukunda kandi waje ngukeneye, kwemera kwibanira nanjye n’ impano urukundo wankunze rwangabiye, humura nayakiranye ibiganza byombi kandi nzajya mpora nzirikana iyi nzira mbikubahire nk’ umwiza wo mu buto.

Mvuze nakubwira byinshi ariko uyu mwanya ikiruta byose nuko uruta bose, ndabyizeye, mbituye abatugaragiye baje kwishimira ibirori by’ urukundo…Kevi! Ndagukunda”

Nkirangiza kubwira umukunzi akari ku mutima amarira yamushotse ku matama amashyi yabaye urwunge muri iyo salle, tukiraho twabonye umuntu ubyigana asunika abantu Kevine arikanga cyane………………………………………

Ntuzacikwe na Episode ya 24 ku munsi wejo mu gitondo

6 Ibitekerezo

  • kocooo
    ark Ganza kuki akomeza kwishyira mubyago kok!??
    ururwo ntarusimbuka kbs!

    • Ganza ugiye ku karunda????? Barakwica mwana wa ma bivemo

  • Andi makuru sinyasoma nsoma inkuru ndende mujye muyibanza narinayibuze

  • ehhhhhh Ganza genda gake ubanza amakuru papa kevine yaya menye bikaba ngombwa ko hohereza bamwee mubakozi biwe GANZA witonde peeeeee

  • Uwo c kandi aje ate ahaaa abo kwica ubuzima bwabanu nibabura gusa Ganza witonde kuko Kevine agukunda byukuri utaba umustar ukamera nkaho ubonye ijuru bibaho kunda umwana, Gusa uririmba nk’umuhanzi navuze kuko muvuze naba mwamamaje kbs kandi nago yishyuru boss W’UMUSEKE Dukunda turi benshi kbs. Mwanditsi kuraje turikumwe 5/5.

  • Mana weeeeee Ganza birabe ibyuya!!!

Subiza

Your email address will not be published. Required fields are marked *