• 26/01/2020 6:44 08

Episode 19: Kevine amenyereye ubuzima bwo mu cyaro kubera Ganza

Duherukana…

Ubwo umwanzuro wafashwe  ngasezera Annie na Ntwari ngahina akagongo nkerekeza aho nitaga iwanjye, nagerayo ngakingura nkambara imyenda y’ ijoro nkirambika ku buriri, gahunda ikaba iy’ ejo tukerekeza mu cyaro urukundo rugahunga abaruhiga ngo barusenye……

 

Mu gitondo mu bunyoni narakangutse nibuka byose… ntabwo niriwe njya ku kazi, muri make nari nagasezeye, nako nari niyirukanye kuko nari nzi neza ko Papa Kevine yahansanga ibintu bikaba ibindi, nigumiye mu rugo ndetse mu nzu sinasohoka.

Telephone yanjye yasonaga buri kanya birumvikana Boss yari yambuze kuko atazi impamvu ya byose, nta nubwo yari kuyimenya kuko amagara yari yaterewe hejuru, ariko se koko nari kugira nte?

Nakomeje kuguma mu nzu nako kwihisha, bigeze nka saa sita narebye ya nimero Kevine yanshakagaho ndayihamagara, yitabwa na wa mukobwa wamucumbikiye ambwira ko batari kumwe ariko agiye kumumpa.

Ntiyatinze Kevine yaritabye,

Kevine-“Karame Ganza! Ndakumva, meze neza…nako urabizi, ese maama wowe waramutse ute?”

Njyewe-“Kevi! Naramutse neza nanjye, nagumye mu nzu sindasohoka nako nawe urabyumva ubwoba ni bwose ndatinya ko nsohotse aho ndi bashobora kumfata nkakuzira kuko ngukunda”

Kevine-“Yoooh, ihangane bambe kuba wiriwe mu nzu, erega muri uyu mugi ntabwo Papa yadushaka ngo atubure, niyo mpamvu dukwiye kujya kure aho atazambona kugeza ubwo azanyifuza agaha agaciro icyatumye muhunga”

Njyewe-“Humura Kevi! Umwanzuro narangije kuwufata, njye nawe turafata urugendo mu mugoroba kugira ngo hatagire utubona, maze twerekeze iwacu ku ivuko, abe ariho tujya kwibera”

Kevine-“Ganza! None se ubu njye nawe tugiye kubana?”

Njyewe-“Oya ntabwo nakwishima  umwari w’ uburanga nkawe atashye mu rwanjye adatambirije agatimba, humura turajyana na mushiki wanjye Annie, ntabwo tugiye gushinga urwacu imburagihe”

Kevine-“Urakoze cyane Ganza! Nzishima ni ukuri intego yawe ibaye iyo kunserukana mu bandi nk’ abandi bakobwa besheje umuhigo, mu nzozi zanjye nzishima koko ntambirije agatimba, ikamba ry’ umukobwa nyuma y’ urugamba rukomeye gusa biri kure nk’ ukwezi…nako ni inzozi kandi zirabeshya”

Njye na Kevine twumvikanye kuza guhaguruka mu masaha ya nimugoroba tukerekeza mu cyaro.

Ni nako byagenze nimugoroba nazinze utwangushye nerekeza nyabugogo aho nari ngiye gutegerereza Kevine.

Mu nzira nagiye nkebaguza ndeba impande n’ impande, si njye wabonye ngezeyo nicara ahantu mu nguni nari navuganye nawe ndetse na Annie.

Annie niwe waje mbere Kevine arahadusanga twinjira mu modoka dufata umuhanda muremure.

Mu nzira tugenda Kevine yahise asinzira ndamwiyegamiza, njye nagiye ntekereza byinshi ngera kure cyane, nibazaga umwana wa Afande ntereranye imisozi nkamujya iyo nkibaza aho nakuye izo mbaraga nkahabura bitinze cyane tugera ku ga centre k’ iwacu Annie arakomanga imodoka irahagarara,

Nanjye nakomanze kuri Kevine,

Njyewe-“Kevi! Kevi! Kanguka twagezeyo”

Kevine-“Ahwiiii! Ayiwe! Koko se twahageze?”

Njyewe-“Yego twahageze”

Twasohotse mu modoka iragenda, nkuko bamwe mubizi mu cyaro hari ukuntu imodoka ihagarara abasore bagahurura bakaza kureba ko nta kiraka babona cyo kwikorera imizigo n’ ibindi.

Natwe rero abasore baraje bakibona ko ari njye na Annie batangira kuduhobera…

Umwe-“Eeeh! Ni Ganza ndakubwiye, uzi ko ari we wana? Yabaye umusirimu ntabonana”

Undi-“Ganza yabaye umunyakigari! Naze atugurire cungumuntu niyo isigaye igezweho  hano iwacu”

Njyewe-“Mwebwe mutagira ikibazo, naje kandi njye na mushiki wanjye Annie turabibuka, wowe mukuru akira iyi note ntibivamo se?”

We-“Eeeh! Bibiri byose! Umuhungu wa Rwagataraka yarakize pe!”

Iryo joro natwe ntabwo twabitaje baguze ibyo bagura baraduherekeza twerekeza mu rugo, basoma bahererekanya, batubwira amateka ya Data na Mama, twageze mu rugo bamwe batangiye kwikubita hasi kubera gusinda kugera tugeze mu rugo, baradusezera barataha.

Bamaze kugenda twinjiye mu nzu nshana itoroshi ya telephone, dushyira ibyo twari dufite ku kameza turicara,

Annie-“Ahwiiiii! Kevi! Urumva umeze ute?”

Kevine-“Sha noneho ndumva ntuje kuko ndi kure ya Papa udashaka ko nishima mu buzima, nkaba ndi kumwe na Ganza waganje mu mutima wanjye”

Annie-“Yoooh! Mbega urukundo!”

Njyewe-“Kevi! Nubwo nkuzanye ariko ndahangayitse? Aho umunsi byasubiwemo koko?”

Kevine-“Oya humura Ganza! Nzaba ndi kumwe nawe, nihagira ukuvuga nzitambika imbere yawe, hatazagira icumu rigucumita kandi ari njye nyirabayazana wo guhigwa kwawe”

Njyewe-“Oya ahubwo ni njyewe nzitambika imbere yawe”

Twakomeje kuganira ndeba umugati n’ amata nari naguze ngo tutaza kurara mu nda hahungabana turarya turanywa, ubundi Annie na Kevine bajya kuryama mu cyumba cyabo nanjye njya mu cyanjye.

Nageze ku buriri nkomeza gutuma ubwenge kure, muri ako kanya mpamagara mukuru wacu Ntwari ngo mubwire ko twagezeyo anyitaba avuga buhoro cyane nkaho hari icyo yikanga,

Ntwari-“Allo! Ganza”

Njyewe-“Ndakumva Ntwari, nagira ngo nkubwire ko twagezeyo”

Ntwari-“Eeh! Ganza! Warwikengeye, iyo uguma inaha kari kakubayeho, ubwo uzi ko Boss yamenye naho wabaga?”

Njyewe-“Eeeh! Koko se? Ubwo se yahabwiwe nande?”

Ntwari-“Hmm! Nyine Boss wawe yakomeje guhamagara nimero yawe yanga gucamo, baba baramutambikanye da! Ngo umukozi we yakoze ibyaha, agomba kubazwa impamvu akoresha abanyabyaha”

Njyewe-“Ngo…none se Boss nawe yazize njyewe?”

Ntwari-“Cyane rwose, ubwo bakomeje kumubaza aho uri nawe akomeza guhakana ko atahazi, gusa aza kwibuka ko hari umusore umwe mwakoranaga ushobora kuba ahazi, niwe waje kuherekana, Boss wawe akira atyo”

Njyewe-“Eeeh! Bya bintu ntibyoroshye, ariko se Ntwari ubu koko bizarangira dutsinze cyangwa ndi kwihiga?”

Ntwari-“Mwana wa maama se, ahaaa”

Ntwari nta kizere yari afite ko tuzatsinda, nongeye gutekereza ko bidashoboka umuseke watambitse ngikanuye.

Twarabyutse Annie atangira gukora isuku, Kevine yiyambuye icyubahiro cyose yari afite iwabo natwe twamuhaga, nawe aramufasha, njye natangiye guharura ku irembo ngo haze umucyo urugo rube nyabagendwa.

Twatangiye kubaho muri ubwo buzima, iminsi iricuma muri ya mafaranga Boss yampembeye rimwe nashatse icyo nakoramo cyunguka ngo tutazayakoresha agashira tukabura ikidutunga, nibwo nicaye munsi y’ urugo njye na Annie ubwo Kevine yari asinziriye,

Njyewe-“Annie! None se ubu buzima twisanzemo turabubamo dute? Koko?”

Annie-“Nta kundi nyine ni ugutwaza ibizaba bikazaba”

Njye na Annie twaganiye byinshi ambwira uburyo Kevine amubwira kenshi ko ankunda ndishima, uwo munsi naguze aga Fanta maze twisanga twasabanye, nongeye  kwishima nyuma yo guhangayika.

Ibo byari bibaye ngo umunezero utahe umutima wanjye, narabyakiriye ubuzima burakomeza, nibwo natangiye gukora akazi ko kurangura inkoko nkaziranguza n’ abanyakigali ku ga centre,

Birumvikana abandi baransetse kuko banyitaga umunyakili gusa ariko nagombaga gushaka ikizatunga umwana w’ abandi na Annie mushiki wanjye.

Ukwezi kwashize Kevine umwana wa Afande amaze kumenya gukura ibijumba, yari yarabaye kimwe n’ abandi, iyo nabaga ndi mu nkoko kuga centre nanyuzagamo nkaza kumureba mu murima aho yari yaramenye gutera isuka, iyo yambonaga yaramwenyuraga nkabona neza ko ibyabaye ari amashira kinyoma, yari  yiteguye byose.

Umunsi umwe ntashye mvuye muga centre, nasanze Annie afite telephone nasigiraga Kevine kuko iye Papa we yari yarayimennye umunsi amwirukana murugo maze arambwira,

Annie-“Ganza! Ko bagushatse bakubuze?”

Njyewe-“Banshatse hehe?”

Annie-“ Kuri telephone, hari nimero ntazi yahamaye cyane ariko nanze kuyitaba pe! Ndabizi ntabwo ari mukuru wacu Ntwari, ahubwo nanjye ubwoba bwanyishe, akira urebe niba waba uyizi”

Nakiriye telephone ndeba nimero nsanga ntayizi ngira ubwoba bwinshi, ako kanya Kevine yahingutse aho, muri twa dukino twanjye nawe yanshikuje telephone yari irimo isona, akibona nimero yahamagaraga,

Kevine-“Mana yanjye wee! Iyi nimero ayimenye ate? Ganza! Ni Papa! Iyi nimero ni iya Papa”

Narikanze cyane, ubwo Kevine ahita akupa iyo nimero twicara imbere y’ umuryango, muri ako kanya twumva umuntu ukubise urugi rwo ku irembo duhaguruka tubyigana tujya mu nzu……………………………

 

Ntuzacikwe na Episode ya 20 yiyi nkuru, izakugeraho ku munsi wejo

6 Ibitekerezo

  • Mbese Annie aretse kwiga kaminuza. Na kevine urangij kaminuuza yirirwa ahinga birasekeje. Hhhhh

  • Papa Kevine aranze akomeje guhiga urukundo rwa bana koko uwo we c kandi ukubise urugi we nigatiki Ganza wakabaye warahinduye nimero kuberako ikorana buhanga ryagakemuye niwaketse bashobora gukurura nimero yawee.

  • Ganza hindura numero kandi uyibaruze kuri mushiki wawe Annie kuko urumva ko abanzi batagohetse. Urukundo runyura mu bigeragezo ariko amaherezo ruratsinda.
    Kevine uti courage humura papa wawe azakugarukira yumve imbaraga z’urukundo

  • Ngirango Annie kaminuza yarayirangije. Guhinga se,shahu abazirangije bahinga bo ni benshi guhinga ibyo kurya bimwaye he??

  • Reka Rwibutso aba atebya, ibi yandika ntibya, ahubwo aradusaba kuzabikora. Usibye ko byose bishoboka, nonese ko umuntu aba Ari umunyacyaro yagera mumugi akitwara nk’abanyamugi?! Guhindura ubuzima, bijyana no kwiyakira.

  • Ese uyuunsi mwabaye amahoro ko twahebye episode 20!!?

Subiza

Your email address will not be published. Required fields are marked *