• 28/01/2020 9:31 20

Episode 18: Kevine ahunze iwabo kubera se udashaka Ganza

Duherukana….

Ubwo nari mvuye kwa Kevine ntorokeshejwe na mukuru wanjye Ntwari nagera mu rugo nkahasanga mushiki wanjye Annie, mu gihe twaganiraga amburira kureka Kevine, tukiri aho tukumva umuntu ukomanze n’ ubwoba bwinshi nkihuta njya mu cyumba cyanjye Annie akansangayo nkamusaba ko ajya gukingura, akabeshya ko ntahari….

Annie yakomeje kubaza wa muntu uwo ari we ariko ntamusubize, aho nari ndi mu cyumba natekerezaga ko nta wundi ari uwo Papa Kevine yohereje, nagiye kumva numva Annie ariyamiye,

Annie-“Eeeh! Ntwari ni wowe? Ese ubwo kuki wari wanze kuvuga koko? Uuuh? Ko warakaye cyane se kandi?”

Naratunguwe cyane ndasohoka mpinguka muri salon nkubitana amaso na Ntwari wari warakaye cyane byo,

Ntwari-“Ganza! Ni wowe unzanye hano, icara hariya mbanze nkubaze”

Annie-“Ariko se ibi niki mwo kabyara mwe? Ntwari uricaza umusore nka Ganza nk’ umwana w’ igitambambuga?”

Ntwari-“Umva mbese, ntamwicaza se? Ntamwicaza ra, nshatse nanamubwira agasutarara cyangwa akarambarara, nta soni”

Annie-“Oya se kandi Ntwari, ubwo se yakoze iki cyatuma ubisha ntuhe n’ agaciro ko yakuze akaba anitunze?”

Ntwari-“Ceceka! Nawe ahubwo icara hariya mbanze mbabaze ukuntu mugiye kwigira nabi muzi uko nakoze ibishoboka byose nkabitangira, nkanga kwiga nkabarihira ngakora impanuka umugore wanjye agakomeza kwitanga…”

Kubera uburakari bwa Ntwari nuburyo twamwubahaga tukazirikana nuko yatwitangiye njye na Annie koko twaricaye turatuza, atangira kuzenguruka hose avugana uburakari,

Ntwari-“Niko Ganza! Ubu kuba wagiye aho utazi, ugashogoshera ngo witabye Kevine mwiganye, ukirukankana amakayi akoze mu biti, uwo Boss yemereye guha umwana we ukamusebereza imbere y’ ababyeyi be warangiza ugafata micro ukaryongora? Ubwo wari uzi ko uri kwijugunya mu rwobo?”

Njyewe-“Ntwari ni ukuri mbabarira….”

Ntwari-“Nkubabarira nkubabarira iki? Niko, ubwo uzi ibyakurikiyeho umaze kugenda?”

Njyewe-“Yeee? Hakurikiyeho iki?”

Ntwari-“Hmm! Ubu uzi ko bashatse aho wanyuze bakahabura, abakozi bose bakaduhinda bakadusaba kwishakamo uwagucikishije?”

Njyewe-“Ayiweee! Barabe batakumenye!”

Ntwari-“Iyaba wari uzi ko ibanga ryabaye ibanga, Papa Kevine agasaba kugushaka ahantu hose, Kevine nawe akaba ibamba akabwira se imbere y’ abandi bantu bose ko aho kugira ngo Papa we aguhore we, agiye kuruvamo”

Njyewe-“Ngo…ngo….agiye kuva iwabo? Oya…oya wee!”

Annie-“Mana yanjye koko ibi ni ibiki?”

Ntwari-“Ganza! Uziko Papa Kevine yagize umujinya akamukubita, Kevine akava iwabo nta n’ ikintu na kimwe ajyanye, akomongana kubera wowe?”

Njyewe-“Oya…oya Ntwari, wimbwira ko Kevine yavuye iwabo? Ubu se…yebaba ndagira nte wee?”

Ntwari-“Ubu Kevine yaciwe iwabo, Papa we yavuze ko atazarugarukamo, Mama Kevine yatakambye ariko biba iby’ ubusa, ngo ntabwo yasuzugurwa n’ umwana we yubahwa n’ abakuru”

Ntwari yihanaguye ibyunzwe, umutima wanjye wari wahabye, Annie yari yumiwe, cyera kabaye Ntwari yaratuje agabanya umujinya, nyuma y’ akanya gato ducecetse,

Ntwari-“Ganza! Umbabarire kuba nkubwiranye umujinya, nanjye si njye, nuko ntifuje ko umwana wa maama azasenya umuryango udafite icyo ubuze”

Annie-“Yego disi”

Ntwari-“Ngaho rero bana ba Maama mumbwire, dukore iki?”

Annie-“Ntwari! Ganza wacu ni umwere, Ganza ntabwo yitumiye, Ganza ntabwo yari guhunga uje amusanga, yego wenda ntakwiye umwana w’ abandi nkuko Se abivuga ariko kandi Ganza nawe akunda Kevine ndabihamya nubwo atigeze abimubwira, urumva ko atari kwitesha ayo mahirwe”

Njyewe-“Mumbabarire kuba narahawe agaciro ntabikwiye, mumbabarire kuba nagiye aho ntakwiye gusa wa mugani wa Annie ntabwo nari kwitesha ayo mahirwe, Kevine wo mu buto sinzahina akarenge ngize amahirwe yo gutegerwa ikiganza nawe, ni ukuri icyo Papa we yise ikosa yewe akemera no kureka umwana we ngo agende nicyo cyateye Kevine kuntaka aho ntumvaga ko ntakwiye kurebwa, Kevine ndamukunda nubwo ntabimubwiye ariko niwe mwiza wo mu buto”

Nyuma y’ akandi kanya gato ducecetse…

Ntwari-“Ahaaa! Urukundo n’ impumyi iyo amenya aho agana, hanyuma se ngaho mumbwire dukore iki?”

Njyewe-“Basi se wamenya aho Kevine yerekeje Ntwari?”

Ntwari-“Nahabwirwa n’ iki se ko nta wari wemerewe kumukurikira?”

Annie-“Ubu se yaba yagiye kwiyahura?”

Njyewe-“Eeh! Oya…Annie, ibyo wibitekereza mbabarira”

Annie-“Iyaba twamubonaga basi akaza kwibera iwacu…”

Ntwari-“Reka reka reka! Ubwo se Boss aramutse abimenye? Maze ndigusenga Imana ngo atazamenya ko Ganza ari murumuna wanjye nawe….”

Njyewe-“Ahwiiiiii! Njye ndumva mpangayikiye aho Kevine yerekeje, Mana ndagusabye niba koko wararemye Ganza umufitiye umugambi, ukaba wari uzi uko ibi bizaba ndakwinginze uzakore ibikwiye bose babone ko ari wowe waremye urukundo”

Twikije imitima twese, iryo joro twabuze icyo dukora Ntwari na Annie bansiga mu rugo barataha.

Iryo joro naraye nkanuye buracya, mu gitondo nakangutse njya ku kazi gusa nari nacanganyikiwe kuburyo abantu bose bazaga bambaza icyo nabaye.

Nimugoroba ndangije akazi nakuyemo igisarubeti ngo ntahe, Boss aba ahingutse aho nari ndi,

Boss-“Eeeh! Ariko sha Ganza! Ko utajya umbwira ngo nguhembe? Amezi abaye angahe utambwira ngo nguhembe?”

Njyewe-“Eeh! Boss! Buriya mba ntekereza ko mubyibuka ngategereza ko mungenera igeno ryanjye”

Boss-“Hanyuma se utungwa n’ iki iyo ntaraguhemba sha?”

Njyewe-“Eeh! Buriya nyine kuko nibana, iyo nahembwe mpahira rimwe nkishyura n’ inzu kuburyo mara nk’ amezi angahe nta kibazo mfite”

Boss-“Nuko nuko sha, uri umuntu w’ umugabo, ngaho reka nyure kuri bank ngushyirireho amafaranga yawe yose, ubundi ukomeze akazi kawe nkuko bisanzwe utazagirango Kanani ntabwo nishyura”

Njyewe-“Oya ntabwo nabitekereza Boss! Ndabizi uri umuntu mwiza ahubwo Murakoze…murakoze rwose”

Nasezeye Boss mfata inzira ndataha, nagiye n’ amaguru ngo ngende nitekerezaho inzira yose, nkiri mu nzira numvise telephonnye isonera mu mufuka ndikanga nkoramo, mu kureba nimero yari impamagaye nsanga ntayizi nkanda yes nshyira ku gutwi,

Njyewe-“Hello!”

Nahise numva ijwi ndarimenya mbagarara mu muhanda aho nari ndi kwabuka imodoka zivuza amahoni menshi…yari Kevine,

Njyewe-“Kevi! Kevi! Uri hehe Kevi?”

Kevine-“Ganza!…”

Njyewe-“Nda…ndakumva Kevi! Namenye ibyabaye byose, ahubwo mbwira aho uri nze nkurebe none aha”

Kevine-“Sha ndi kumwana w’ inshuti yanjye I nyanza ya kicukiro…”

Kevine yambwiye ko yagiye gucumbika ku mwana w’ inshuti ye, yandangiye ahariho nurira moto vuba, nerekeza I nyanza ya kicukiro kureba umwana wanze byose agaha agaciro umutima, akemera kuva iwabo kubera Ganza utari uzi ko abikwiye.

Nagezeyo bidatinze aho bari bandangiye, hari ku muhanda utambika ku ishyamba, mu kuhagera nagize ngo mpamagare ya nimero muri ako kabwibwi ako kanya numva,

Kevine-“Ganza! Humura ndi hano”

Narahindukiye vuba ntera intambwe nihuta mpobera Kevine wari wihishe inyuma y’ igiti ngo amatara y’ imodoka na moto byanyuraga aho bitamumurika,

Njyewe-“Kevi! Mbere na mbere mbabarira…”

Kevine yahise anshyira urutoki ku munwa ndaceceka nkomeza kumwitegereza hashize akanya arambwira,

Kevine-“Ganza! Mbabarira unyumve kandi wakire amahitamo yanjye, ibyabaye byose ni kubwawe, ibyabaye byose nibyo bihamya uwo uri we kuri njye nkuko nabikubwiye, ndashaka kujya kure y’ abatagushaka, ndashaka kujya kure aho nzatuza nziko ntuzanye amahitamo yanjye”

Njyewe-“Kevi! Koko amahitamo yawe ni njyewe?”

Kevine-“Yego Ganza! Ntabwo nibagiwe bya bihe, ntabwo nibagiwe uko umutima wanjye wakwakiye, ndagusabye nyumva, ndagusaba ngo umbwire niba narayobye cyangwa narahisemo igikwiye, ndi nde kuri wowe uba uguha agaciro akava iwabo akihisha urumuri?”

Nikije umutima, ikiniga ntazi aho cyavuye kiramfata maze ntangira kuvugana agahinda,

Njyewe-“Kevi! Kubona uwo uri we kuri njye byangora kubivuga gusa uyu mwanya reka nguhamirize ko ari wowe namenye bwa mbere mu buzima nkagira umutima utera utekereza ikiwukwiye,

Iminsi yicumye amatwi yanjye, amaso yanjye ndetse n’ umunwa wanjye bigukumbura, yewe hari nubwo amaso yarangaraga bakantwara utwanjye, ndeba hose ngo ndebe ko nakubona,

Kevi! Uri umukobwa nabonye ngakunda ntabizi, nkisuzugura nkumva ko ntabikwiye gusa umunsi utera intambwe ukaza iwacu narebye mu mutima wawe mbonamo impuhwe n’ ubwuzu wantuye, Kevi! Naragukunze sinabimenya, gusa uyu munsi reka nguhamirize ko Ngukunda…Kevi! Ndagukunda”

Narangije kuvuga ayo magambo akomeye amarira atemba ajya mu nda, Kevine wari unyegamye mu gituza we amarira yari yatoheje agapira nari nambaye, nari maze kumuhamiriza icyo benshi babuze, igituma imitima ihaba indi igahumeka ituje.

Kevine amaze gutuza, namuhanaguye amarira mu ijwi rito arambwira,

Kevine-“Ganza! Urakoze cyane, urampumurije, byibura mbonye ko urwo ngukunda rutisanga ahubwo rwasanganiwe kuva cyera, ndagukunda cyane kandi ibi byabiguhamiriza”

Njyewe-“Humura ntacyo ntabona, urankunda kandi birenze ubwenge bwanjye, nzagukunda kandi nzakwitangira”

Nyuma y’ akandi kanya gato twitsa imitima,

Njyewe-“Hanyuma se ubu hakurikiyeho iki Bae?”

Nkivuga ntyo ako kanya telephone yanjye yarasonnye ndebye mbona ni Boss ndikanga,

Njyewe-“Boss se? Boss aranshakira iki koko? Kevi! Ihangane gato numve icyo Boss ashakira”

Ntabwo nashyize ku gutwi nkuko bisanzwe ahubwo nashyizemo volume nyinshi ngo na Kevine yumve,

Njyewe-“Hello!”

Boss-“Bite sha Ganza!”

Njyewe-“Ni byiza Boss! Ko mumpamagaye aya masaha se ni amahoro?”

Boss-“Niko sha Ganza! Hari umukiriya wanjye wigeze wakira nabi?”

Njyewe-“Oya.…oya rwose”

Boss-“Uuuh? None se umugabo umpamagaye, akambaza niba narigeze mpindura abakozi nkamubwira ko hagiye umwe, yambaza uwitwa Ganza nkamubwira ko ugihari akansaba kumusanga kuri station igitaraganya aya amasaha”

Nkimara kumva ibyo nahise menya ntashidikanya ko ari Papa Kevine wari warigeze kunsanga kuri station ariwe unshaka,

Njyewe-“Boss! Uwo se ubwo…Boss! Rwose ubwo sinzi icyo anshakira, ariko ndumva…aya masaha se ubwo urumva ashakira amahoro Boss?”

Boss-“Eeeh! Ko numva ufite ubwoba sha?”

Ako kanya nahushye muri telephone nkajya mvuga za allo nyinshi kugira ngo Boss agire ngo ni network yabuze arinda akupa.

Hashize akanya ducecetse,

Kevine-“Ganza! Erega ntabwo byoroshye, Papa ndamwiyiziye, turi hafi ye ntabwo yatubura, niyo mpamvu tugomba kugenda tukajya kure aho atazatubona”

Muri ako kanya nongeye gutekereza cyane nibaza aho twajya Kevine yavugaga biranshanga, akazi ko nari nkavuyeho namwe murabyumva, namusezeranyije ko ndi kumwe nawe, nongera kumuhobera mubwira ko mukunda, ko ndaza kumureba bucyeye bwaho nkamubwira umwanzuro, ndamuherekeza mugeza iwabo wa wa mwana w’ inshuti ye yari yahungiye ho ubundi mfata inzira ndataha.

Feri ya mbere yari kwa Ntwari na Annie, nubwo nasanze bari bagiye kuryama ariko barihanganye mbatekerereza uko byagenze maze bamaze kuntega amatwi Ntwari arambwira,

Ntwari-“Ganza! Ndumva uhuye n’ ibibazo bigoye mwana wa ma, ahubwo se muramenya mwerekeza hehe? Ahubwo se mugiye kubana cyangwa?”

Annie-“Oya shahu, ubwo se mwabana urukundo rwanyu rukarangirira aho? Oya,ndumva ahubwo mwagenda mukabaho bisanzwe, mukirinda kugeza ubwo mukoze ubukwe abatari bazi ko byakunda bakabona imbaraga ziva mu rukundo rw’ ukuri”

Ntwari-“Umva Annie nawe? Ubwo se ubwo urumva ibyo bishoboka? Umubiri ni umubiri ntimwwabana ngo mwihangane”

Annie-“Nta kidashoboka Ntwari, byose ni mu mutwe, ubu se bangahe babana batagira icyo bapfana kubera ubuzima?”

Ntwari- “Ariko wa mugani bariho benshi, ahubwo se muramenya mujya he ko icya mbere ari ukuramira amagara?”

 

Nyuma y’ akanya gato ducecetse,

Njyewe-“Ndumva twakwerekeza iwacu mu cyaro, akaba ariho tujya kwibera muri iriya nzu masenge mutoni yari yaraduhuguje, nari nagize amahirwe bampembye amezi atatu bari bandimo, azaba atubeshaho”

Annie-“Yego wa! Ndagushyigikiye Ganza! Ahubwo umwanzuro nuwo, nanjye nzabaherekeza twigire ku ivuko, njye nkwibutsa inshingano n’ intego, mbabe hafi mbatere ingabo mu bitugu maze nzarebe”

Umwanzuro wafashwe ubwo nsezera Annie na Ntwari mpina akagongo nerekeza aho nitaga iwanjye, ndakingura nambara imyenda y’ ijoro nirambika ku buriri, gahunda yari iy’ ejo urukundo rwo mu buto rugahunga abaruhiga ngo barusenye…………………

 

Ntuzacikwe na Episode ya 19 yiyi nkuru izakugeraho ku munsi wejo

 

14 Ibitekerezo

  • Aha abanyamafaranga barakimara.Bigere naho batanga abana babo nk’amatungo.Nimwigire mucyaro cy,amateka Levine yahateguye mbere .Kwicisha bugufi ntako bisa (Inama y’umunsi kubo dusangiye ishuri mwese).Kandi umunsi mwiza kuri mwese

    • Asante sana KD

  • Ubundi urukundo rutera(rutanga) ibyishimo ariko hari igihe ndetse kenshi rutera kubabara no guhangayika.Ganza na Kevine barahangaritse.

  • ooh Mana we ni hatari gusa urukundo tjrs ruratsinda pe!courage mwanditsi dukunda

  • Mana weeee!Ababyeyi nk’aba batanga abana babo nkaho ari inka bagaba sibo twifuza muri societe nyarwanda.Imana irengere aba Nana.

  • Nubwo muhangayitse ariko muzabaho bana banjye, Rwose abantu bamenyeko ntawe ugurisha urukundo. bariya bana bazabaho kandi neza hanyuma Papa Kevine nawe azumva ko yakosheje kdi at the end nziko azabasaba imbabazi. Big up kumwanditsi!!!!!!

  • ahubwo umuntu witwa Ntwali mukuruwa Ganza nawe arye ari menge kuko boss we natahura ko bavukana ashobora kuzihimura. inama namuha nuko yashaka andi mahitamo y’akazi ke acunge neza azagende Papa Kevine ataramutahura kuko byamugwa nabi.

  • Ariko se ntakuntu Ganza yabwira boss wiwe muri make uwo muntu umushakisha kugira ngo akomeze abe uwo kwizerwa imbere ye?

  • Nta bukwe butaha butagezwe intorezo AHHHA gusa ndumiwe umuntu arakira mumutungo afite akagabamo nu mwana weeee isi irashaje GANZA nimwisubirire kuri gakondo wenda muzahirwa ndabyizeye peee .

  • Mwaramutse, Ariko se bariya bana bazacika Afande? Ndumva mfite ubwoba.

  • Burya abakomeye barubahana ,boss waganza ashobora kumubwira akumva ,kuko we ubona adakomeza umutwe nka boss wa Ntwali

  • Mana we inkuru y’uyu munsi ni isomo rikomeye pe, gusa hari ibitekerezo natanga ku mwanditsi akaba mwarimu wacu, icya mbere Ganza nashake uko abwira uwari Boss we icyo umukiriya amsushakira kugira ngo agende nta cyasha, icya kabir Ntwari nashake uko ava kwa Boss we bataramuvumbura ahubwo byaba byiza agiye gusimbura Ganza aho yakoraga, icya gatatu nubwo Kevine na Ganza bajyanye bazamenye ubwenge bazirinde muri byose kandi Kevine ndabona azahita abona akazi keza ubundi ubuzima bukagenda neza. Murakoze

  • Ganza arakomerewe ariko na Kevine ntiyorohewe! Inama natanga njyewe ni uko batajya mu cyaro kuko byoroshye kubavumbura ahubwo bacungire hafi.

  • Igice gikurikiyeho kitwicishije amatsiko cyane!

Subiza

Your email address will not be published. Required fields are marked *