• 26/01/2020 7:00 50

Episode 13: Ntwari arahiriwe, Ganza na we yereka Gaelle ko ari mu maboko meza

Duherukana….

Kuri telephone nongera kumva ijwi rya Kevine, mu gihe ngize ngo mvuge numva Kevine aratabaje cyane ndikanga telephone iranshika yikubita hasi nyitora vuba ngo numve icyo abaye kubw’ amahirwe make ngasanga batiri yavuyemo, nkayisubizamo  vuba nkatsa ndeba nimero ye vuba ariko nayihamagara bakambwira ngo Sorry nimero ntibashije kuboneka….

Gutuza byarananiye nongera guhamagara nimero ya Kevine ariko ikomeza kwanga gucamo, nta kundi nari kubigenza niikije umutima, ndeba agakaramu n’ agapapuru nandikaho nimero ye, ubundi nsubira muri salon mpereza telephone Bwiza ndicara ndatuza.

Nakomeje gutekereza Kevine nari nongeye kumva ijwi rye rikanyibutsa akahise, nibajije niba akibuka Ganza….Bwiza muri ako kanya yabonye ko nagiye kure mu bitekerezo maze ankoraho ndikanga,

Bwiza-“Garukira aho Ganza! Wijya kure, basi se muravuganye?”

Nacecetse gato, nitsa umutima ndimyoza maze mbwira Bwiza,

Njyewe-“Wahora n’ iki ko tuvuganye amagambo nkabiri gusa nkajya kumva nkumva aratabaje nkikanga telephone ikanshika ikitura hasi nakongera kumuhamagara nkasanga nta yiriho”

Bwiza-“Hhhhhhhhh!”

Njyewe-“Isekere sha, Hmmm!”

Bwiza-“Ihangane Ganza! Akabi gasekwa nk’ akeza, ndumva iyo film yari iryoshye, uwari kuyinyereka, ariko reka nyikomerezeho, ndumva ari Papa we wumvirije ibyo yavugaga agahita aza akamwaka telephone n’ inshyi nyinshi”

Bwiza yavuze atyo nongera kubabara gusa ntabwo yabivugaga agamije kunkina ku mubyimba ahubwo yari umukobwa uzi kuganira asetsa, nanjye koko natangiye kubona Kevine akubitwa na Se nkuko Bwiza yari abimbwiye,

Njyewe-“Bwi! Reka nkuve iruhande naho ubundi amaherezo watuma niheba kubera kubura icyo nkora”

Bwiza-“Sha pole nyine nta kundi, hari ubwo ababyeyi bivanga mu rukundo bakatubabaza ubuzima bwacu bwose bibwira ko bari kuduhitiramo ubuzima bwiza”

Njye na Bwiza twakomeje kuganira, Annie azana ibyo kurya ariko Bwiza ahita yibuka gutaha, agize ngo asezere agende,

Annie-“Umva yewe? Icara ushikame di! Ubwo se waba ushaka kugaragaza iki?”

Bwiza-“Ni ukuri mumbabarire ntagera mu rugo bikananira bakambaza aho nariye”

Njyewe-“Hari ikibazo se kibirimo? Uhababwire, niba baranakubujije kurya mu gasozi humura hano ni mu mu rugo si mugasozi”

Bwiza yaremeye turasangira dusoje aradusezera turamuherekeza, mu kugaruka naje mbwira mushiki wanjye Annie ukuntu umusore yivumbuye akava mu kazi ngahita ngasinzira arishima cyane, nawe ambwira uko ari kwitegura gutangira kaminuza.

Twageze mu rugo dukomeza kuganira dutegereje ko Ntwari ataha ariko amasaha akomeza kwicuma, bigeze nka saa sita z’ ijoro dufata umwanzuro wo kujya kuryama yazakomanga Annie utaragiraga ibitotsi byinshi akaza kumukingurira.

Nakangutse numvise umuntu unkozeho ndashiguka…yari Annie wari umeze nkaho afite ubwoba,

Annie-“Ganza Ganza! Turabigira dute? Uzi ko Ntwari atatashye?”

Njyewe-“Ngo? Byamugendekeye bite se? Oya…oya nizere ko atagize impanuka nanone”

Annie-“Ahwiiiii! Mana yanjye weee! Ndumva mfite ubwoba, uzi ko na telephone ye itari gucamo?”

Nabonye Annie akomeza kugira ubwoba cyane ndamukomeza mwizeza ko ibyo ari byo byose Ntwari ameze neza ko wenda ku kazi bamutegetse gukora ijoro, mubwira ko ndakomeza kugerageza kumuhamagara akatubwira uko byagenze, nditegura nerekeza ku kazi.

Nk’ ibisanzwe nagombaga gukora ntikoresheje ntagamije gushimisha Boss ahubwo kuko zari inshingano zanjye, bigeze nka saa… hari imodoka nshya yahingutse aho nari ndi, imanura ikirahuri, mu kureba uwari uyitwaye ngo mubaze essence nshyiramo….yari mukuru wanjye Ntwari,

Njyewe-“Yeeee? Koko se ibyo mbona nibyo?”

Ntwari yarasetse, wabonaga ko yuzuye ibyishimo,

Ntwari-“Ibyo ubona nibyo petit fre! Ngira ngo urabibone ko natangiye akazi gashya, nako icara mu modoka gato nkubwire”

Ako kanya ninjiye mu modoka, maze Ntwari ahita atangira kumbwira uko byose byagenze,

Ntwari-“Ganza! Ejo narahiriwe ubwo nari ndi ku kazi nkuko bisanzwe nabonye umugabo ukunda kuza guhahira iwacu, uwo mugabo ni inshuti yanjye cyane, akunda kunyita Kazungu, iyo yaje aba anyishimiye kuko ngo ndamusetsa cyane, yamara kunyishyura nkanamutwaza, mbese ankunda kubi”

Njyewe-“Ndakumva!”

Ntwari-“Uwo mugabo rero yaje ngira ngo aje gukoresha njya kumwakira ariko nasanze ataricyo kimuzanye ahubwo ahita ambwira ngo “Harya ugira permis sha Kazu?” Ndamusubiza nti yego ndayifite.

Ganza! Nakomeje gutegereza ko hari ikindi ambwira, ako kanya ahita ambwira ngo:“Waje se tukajyana Magerwa ukajya kuntwaza imodoka yanjye nshya iriyo?” twagiye numva ari ibisanzwe tugezeyo koko ndayisohora twerekeza iwe.

Njyewe-“Ndakumva, none se waje kurarayo cyangwa?”

Ntwari-“Ndacyakubwira Ganza! Nasanze biteguye kuyitaha, baranyakira nanjye icyo kirori ndagitaha, naje gutungurwa no kubwirwa ko ari njye mushoferi uzajya amutwarira umugore n’ abana”

Njyewe-“Yeee!! Hahahaaaa! Twongeye twatse kabisa”

Ntwari-“Ubwo rero ibirori byabaye ibirori, birangira ndayeyo ngo mu gitondo ntangire akazi”

Njyewe-“eeeh! Ndishimye cyane pe! Ubu noneho hehe no guhangayika, courage grand fre! Imana ishimwe rwose”

Ntwari-“Ariko  rero nubwo uwo mugabo njye nawe duseka arakaze! Yanyihanangirije ngo ku mukobwa we n’ umugore we ibyo kumusekaho nta birimo!”

Njyewe-“Eeeeh! Afite umukobwa mwiza noneho?”

Ntwari-“Hahaa! Ni mwiza gusa se ko abengerana uburanga! Ariko aracyari muto da, ngo nawe arangije uno mwaka”

Njyewe-“Ese? Ahaa! Courage kandi wa mugani uzitwararike buriya ntiyapfuye kubikubwira gutyo gusa”

Ntwari yahinduye amateka atyo, dushimira Imana yari iduteje indi ntambwe, aransezera aragenda.

Nakomeje akazi na morari nyinshi, nimugoroba ntashye inkuru nziza nayisanganije Annie, nijoro Ntwari atashye dukomeza kwishima, nongeye kwibuka akahise twibera ku kazu gato ko hanze nako twasaga nkabacumbitsemo kuko isaha ku isaha masenge Mutoni yari kuzadukuramo.

Iminsi yaricumye, Gaelle wambaga hafi cyane twavuganaga buri munsi iyo nabaga nabonye aho nkura telephone, Kevine we namwibagiwe bisa n’ ibyaburundu kuko kuva wa munsi nimero ye nanditse kuri ka gapapuro nageragezaga kuzihamagara bikanga ndetse nkabwira Mwiza ngo najya kuri facebook azamubwire ko namuhebye gusa ntasubize.

Ntibyatinze aya mbere bampembye nahise nishashuramo aga telephone gashya ndetse nguramo n’ imyenda.

Aho nari ndi kugurira nabonye ikanzu nziza cyane nanga kuyicaho, nabonye yakwira Annie maze mbaza igiciro mva aho nyijyanye, nyigejeje mu rugo yarishimye cyane nanjye mbona ntako bisa.

Umunsi umwe ari kuwa gatanu nimugoroba natekereje gusohokana Gaelle dore ko nari mukumbuye cyane bitavugwa, narebye nimero ye ndamuhamagara anyitaba vuba,

Gaelle-“Karame ndakumva honey!”

Njyewe-“Wooow! Mbega ukuntu unyitabye neza! Ahwiiiii! Mbega umutima wanjye ngo uragwa mu gitereko nkumva neza uwo ndiwe kuri wowe, ooooh! Karamizwe amata shenge buto butoshye mpora ndata”

Gaelle-“Urakoze mukunzi”

Njyewe-“Hanyuma se amakuru yawe?”

Gaelle-“Amakuru sha nayo kugukumbura! Hmmm! Uzi inkumbu ngufitiye?”

Njyewe-“Wabimenye, niyo mpamvu nguhamagaye, ndumva nshaka….nako ufite iyihe gahunda kuri uyu mugoroba?”

Gaelle-“Sha urebye ntayo mfite”

Njyewe-“Ok! Ntiwumva se!… Reka nyiguhe basi”

Gaelle-“Aaaah! Wimbeshya! Koko se uravugisha ukuri?”

Njyewe-“Cyane rwose, ahubwo saa kumi n’ ebyiri n’ igice ndaba nkugezeho”

Gaelle-“Oooh! Nta kibazo rwose ndagutegereje”

Nakupye telephone ndamwenyura, ni ukuri burya niba hari ibintu bibaho bishimisha ni ukugira uwo uhamagara akakwitabana ubwuzu, wamubwira ko umukeneye akirengagiza ibindi, ikiganza cye kigahora gitegereje icyawe.

Maze kwitegura nahamagaye Annie maze ndamubwira,

Njyewe-“Annie! Rusigareho ndagiye kandi ntabwo nzi igihe ndagarukira”

Annie-“Hmmm! None se nagira nte? Nsiga nyine wigendere”

Annie yahinduye isura kuko nari musize, yifuzaga ko tujyana ariko ntibyari gukunda kuko uwo mwanya nari nawuhariye Gaelle umutarutwa, bigoranye yongeye kumwenyura mubwira ko nawe umunsi umwe azagira umusohokana ndagenda.

Feri ya mbere nazifatiye kwa Gaelle, biberaga mu nzu isanzwe iciritse, nasanze ku irembo hakinze ngikuramo telephone ngo muhamagare aho hahingutse umukobwa mukuru wari wambaye neza, afite n’ isakoshi bigaragara ko yari avuye mu kazi maze aransuhuza, nacyetse ko ari mukuru wa Gaelle

We-“Bite byawe?”

Njyewe-“Ni byiza rwose nta kibazo”

We-“Ko uhagaze ku muryango se wabuze ugukingurira?”

Njyewe-“Nari ntegereje…nakomanze ariko mbura umuntu, nari ngiye guhamagara kuri telephone”

We-“Eeeh! Uziranye na Gaelle se?”

Njyewe-“Cyane rwose!  Gaelle buriya…”

Nkivuga ka karyango karakingutse…yari Gaelle wari wambaye neza cyane, agisanga mpagararanye na wa mukobwa yahise atangara,

Gaelle-“Yeee? Ganza! Ni wowe wakomangaga?”

Njyewe-“Yego mukunzi! Uzi umwanya maze hano?”

Wa mukobwa yahise yikanga maze asubira mu magambo nari mvuze yibaza cyane….,

We-“Ati yego mukunzi! Hahaa! Gae! None se uyu niwe wambwiraga?”

Gaelle-“Yiiii! Nuyu nkesha ibyishimo byanjye bya buri munsi, umusore utuje utagira byacitse, uyu niwe nakubwiraga nifuzaga kukwereka”

We-“Ese maama!”

Gaelle-“Ganza! Uyu niwe mukuru wanjye nakubwiraga twibanira, yitwa Mignone! Wa wundiiii, watumye mbona lift igihe mva ku gusura ku ishuri”

Nahise nongera muhereza ikiganza maze ndamubwira,

Njyewe-“Nishimiye kubamenya! Koko murasa pe! Inda yababyaye yari ihatse umugisha, ubwiza bwanyu koko mwarabuvukanye ntambaraga za mukorogo kuri ubu bari guca”

Bose basekeye rimwe, nashimishijwe n’ ukuntu mukuru we yanyakiye, Gaelle ahita asobeka ukuboko kwe mu kwanjye,

Gaelle-“Sisi! Ngira ngo nawe urabibona ko amaguru atagarukira aha hafi, njye na Ganza twari dufitanye gahunda”

Mignone-“Incuii! Ndabibona murasohotse!”

Njyewe-“Niko nabyifuje! Nifuzaga kumwiharira muri uyu mugoroba nkamwongorera akajambo gahora ari ibanga mu mutima wanjye”

Mignone-“Ariko Maana! Ngaho mugende ariko wibuke gutaha kare Gae! Sibyo?”

Gaelle-“Yego Sisi! Bye nawe kwigunga kwizaa!”

Twasekeye rimwe twese maze turahindukira dufata umuhanda twerekeza aho umusore dukorana yari yandangiye ngo hari hagezweho muri iyo minsi, tugezeyo koko hari ahantu hatuje cyane, hari udutara twaka amabara, hari akaziki gatuje, hari higanje amatsinda y’ abahungu n’ abakobwa, babiri babiri.

Baratuyoboye twicara ahantu ha twenyine, nicaye ndebana na Gaelle twongera guhuza imboni, yamwenyuye ya nseko nziza ndatwarwa, arambura ibiganza ku meza ndabyakira,

Njyewe-“Gae! Nyuma y’ igihe mbyifuza, uyu munsi nishimiye kwicarana nawe ahantu nkaha ngo nkwereke ko noneho ndi mu biganza byiza bikugabira ibyishimo, ntiwiyime ndabizi ibyo tugiye gusangira biraba biryohejwe n’ ikirungo cy’ urukundo”

Gaelle yangaragarije ibyishimo mu kiniga cyinshi maze ndambura ibiganza nari nshigatiye ndabisoma.

Mu gihe umunwa wanjye wari uri ku ntoki nziza za Gaelle muhamiriza ko mukunda cyane kandi kuva namumenya namwizeye kubw’ ineza n’ umutima w’ impuwe bye, ako kanya hari uwakomye amashyi gatatu hejuru yacu twese turikanga cyane, mu kubura amaso……………………………………….

 

Ntuzacikwe na Episode ya 14 yiyi nkuru ku munsi wejo

12 Ibitekerezo

  • ndabatanze pe. ababana imana ibafashe ntihazagire ikibavangira

  • Nyuma ya mahwa menshi ibisubizo birabagaragiye rwose mbega byiza Imana igende imbere Gaelle na Ganza

  • Reka nizereko Ganza atagitekereza Kevine wabona ariwe ubahingutseho Ganza ndamuzi yahita ata Gaelle aho kuko arahubuka

  • Uwo ukomye amashyi ni wamutype wateretaga Gaëlle tu

  • Mwiriwe.Nifuzaga kumenya umutwe w’iyi nkuru(Titre) uwaba abizi yambwira.Murakoze

    • Yitwa ” Umwiza wo buto”

  • Ngaho da! oya ahubwo ni Ntwari wasohokanye na Ange. Yishimiye murumuna we. naho wa mutype wateretaga Gael ubwo nawe yaba yazanye uwe ntiyaba akimutekereza. Ariko abaye ari we nababara, Gael yasohokanye Ganza, Directeur na Papa we barabatenguha, none naha babavangire? Wapi mwanditsi, kuramo ibibazo ushyiremo ibisubizo.

  • Icyo nzi cyo ndabona Ntwali abonye akazi kwa Kevine pe!Nzaba nirebera final

  • Hababaje Kevin uzababara amenye ko Ganza arikumwe na nundi yamwikuyemo

  • wao byiza cyane nukuri kwa Ganza ibyishimo nibyose , Ariko c ubwo Ntwari ntiyabonye akazi iwabo wa kevine reka ntegereze amaherezo pe gusa amatsiko.,………..

  • Igitekerezo
    murakoz inkuru zanyu ziratwubaka d’Iran à du hindi tira ubuzima bwa burimusi

  • murakoze kandi inkuru zanyu ziradufasha zikaduhindura mubuzima bwaburimusi

Subiza

Your email address will not be published. Required fields are marked *