• 13/12/2019 7:25 27

Episode 10: Ganza ahuye na Papa Kevine amwuka inabi bikomeye

Duherukana…

Ari mu mu saa mbiri za nijoro ndi munzu njyenyine nibwo numvise umuntu ukomanze ku muryango cyane gusa nahise menya ko atari Ntwari mu kuru wanjye kuko uko yakomangaga twari tukuzi njye na Annie.

Muri ako kanya numvise igisa n’ ubwoba bwinshi mva mu cyumba cyanjye ngeze muri salon sinacana itara ndarunguruka mu kureba neza narikanze cyane mbonye……

Nabaye nkirunguruka mba mbonye umuntu wambaye imyenda y’ abashinzwe umutekano ndikanga cyane, nibajije icyo yaba aje gukora mu rugo biranyobera, ako kanya mu kubura icyo nkora numvise ijwi rya Ntwari wari utashye ntega amatwi,

Ntwari-“Muraho neza Afande?”

Afande-“Bite musore? Ko aya masaha agenda imbwa n’ ibisambo wowe uri iki muri ibyo?”

Ntwari-“Eeeh! Afande ntacyo ndicyo muri ibyo, nari ntashye hano muhagaze niho nkodesha”

Afande-“Hono? Hano ndi nkomanga niho utashye?”

Ntwari-“Yego”

Afande-“Uuh, nari ndimo nibaza kwa sababu gani umugore wanjye atankingurira? Ahubwo se upfana iki n’ umugore wanjye ko ntakuzi?”

Ntwari-“Yewe nta mugore uba muri uyu muryango pe, niho mba na barumuna banjye ntabwo nakubeshya”

Afande-“Ngo? Ntibishoboka…umugore wanjye nasize aha nkajya muri mission y’ akazi yagiye he?”

Ntwari-“Iyi nzu twayisanze ikodeshwa ishaka umukiriya, uwo mugore ntawe nzi mba nkuroga”

Afande-“Oya nawe kiroge!  Wibeshya, kingura ndebe sha, nasanga waranyinjiye umugore ko…….”

Ntwari yarakomanze ndijijisha nshana itara ndaza ndakingura, wa mugabo wari wambaye imyenda y’ abashinzwe umutekano ahita yinjira nkomeza kwinanura nkuwari uryamye yasinziriye utumvaga ibyo bavuga.

Akimara kunsuhuza,

Afande-“Uyu niwe wambwiraga mubana?”

Ntwari-“Yego niwe, ahubwo hari nundi mushiki wacu tubana ariko yasigaye ku ishuri, ari gukora ibizamini bisoza ay’ isumbuye”

Afande-“Ayayaya! Ubu se umugore wanjye nasize muri iyi nzu yagiye hehe kweli? Nako reka nze mbaze nyir’ ubukode, ibyo ari byo byose ndamenya aho yagiye”

Afande yahise asohoka amaze kugenda twegekaho ndiruhutsa,

Njyewe-“Ahwiiiii! Ubwoba bwari bwanyuzuye wese no mu mano, Eeeh! Burya ntinya abashinzwe umutekano gutya? Nari ngize ngo katubayeho neza neza, iyo ntumva ibyo muvuga ntabwo nari gukingura ndagatora!”

Ntwari-“Hhhh! Burya bwose se wumvaga ibyo tuvuga?”

Njyewe-“Cyane rwose nabyumvaga, nabanje nza guhengereza mbonye iriya myenda ngira ubwoba nanga gukingura”

Ntwari-“Hhhhhh! Ntukazajye ugira ubwoba uri umugabo, uziko wagira ngo hari icyaha wakoze? Ubwo se nugera mu rugo rwawe uzajya wumva igikomye ubwire umugore abe ari we usohoka Ganza?”

Njyewe-“Hhhhhhh! Nawe urabyumva nzihagararaho ariko  nyine nuko nzaba nitwa umugabo nawe akitwa umugore”

Ntwari-“Hhhhhh! Ahubwo wanyibagije inkuru nziza nari nkuzaniye”

Njyewe-“Yeee? Inkuru nziza?”

Ntwari-“Yego rwose nkuzaniye inkuru nziza, uziko nakuboneye cya kiraka wifuzaga?”

Njyewe-“Ngo? ikiraka?”

Ntwari-“Hhhhhh! Burya wa muntu nakubwiraga  ndaza kukubariza ikiraka  yakinyemereye da!”

Njyewe-“Yeeeee?”

Ntwari-“Guhera ejo uzatangira ugakore, ariko rero karaciriritse, nako kuyobora imodoka aho ziparika, urumva nawe umuntu ugitangira ntabwo yahita akwizera ngo agushinge akazi gakomeye”

Njyewe-“Nta kibazo! Ntakibazo rwose kwereka aho imodoka ziparika? Ibyo nabyo? Niyo yaba ari no kuzoza njye nagakora”

Ntwari-“Ok! Ubwo rero kare kare mu gitondo turavana hano, ubundi nkujyane, yambwiye ko azajya aguhemba ibihumbi makumyabiri”

Njyewe-“Nta kibazo rwose, ubundi se hano nabaga nicaye nayabonaga?”

Njye na Ntwari twarasangiye, numvaga nishimye cyane, gahunda yari mu museso wa kare nkajya gutangira akazi k’ ibiruhuko.

Mu gitondo nabyutse kare abagize amahirwe yo kubona akazi murabizi nari naraye ntasinziye, natanze Ntwari kubyuka, yabyutse namaze kwitegura kare maze dufata urugendo.

Twageze kuri station turategereza ako kanya haje umugabo Ntwari ahita ambwira vuba,

Ntwari-“Nguriya Boss araje, ngwino tumusange”

Nakurikiye mukuru wanjye tugenda dusanga wa mugabo tumugezeho ahita amusuhuza,

Boss-“Bite Ntwari? Wazindutse kabisa, uwo se ni wa murumuna wawe wambwiraga ushaka akazi k’ ibiruhuko?”

Ntwari-“Yego nuyu nakubwiraga, yanze kuguma yicaye mu rugo, nabatoje gukora buriya nta mpamvu”

Boss-“Oya nibyo, wumvise se azagashobora?”

Ntwari-“Cyane rwose ndamwizeye, ahari wenda yanabikwibwirira”

Njyewe-“Akazi! Hmmm! Akazi rwose nzagashobora mungirire ikizere ibindi muzabyibonera mu gihe gito, ahubwo se iriya modoka ije iparike he?”

Ako kanya sinzi uko byaje ntangira kuyiyobora iparika neza, aho Ntwari na Boss bari bahagaze batangiye guseka, sinari mbyitayeho niba yari iparitse nabi ntabwo mbizi gusa nerekanye ubushake.

Nyuma nibwo banyeretse neza aho imodoka ziparika, yaba izije kunywa essence cyangwa gushyirishamo umwuka, izije kunywa amavuta no kozwa dore ko byose byahakorerwaga, ubundi Ntwari aransezera aragenda.

Abandi bakozi bakoraga aho baranyakiye, bampa isarubeti y’ akazi ndambuka ngatangira ubwo.

Iminsi yaricumye ndetse n’ icyumweru kirashira, Annie atahana ikizere cyo gutsinda ikizamini cya leta, ukwezi kurahita kurarenga bisatira umunsi wo gutangira njya guhembesha.

Nasanze Boss aho yabaga yicaye abara uko umutungo winjira, ndamusuhuza maze nsha bugufi nkuko nari mbisanganywe,

Njyewe-“Boss! Mbere na mbere ndabashimira ko mwampaye amahirwe ubusore bwanjye nkabubyaza umusaruro ngatanga imbaraga zanjye mu kazi, igihe kiregereje ngo nsubire ku ishuri”

Boss-“Eeeh! Nabyumvise uje guhembesha, harya wahisemo ko tuzayaguhera rimwe sha?”

Njyewe-“Yego”

Boss-” Ubwo n’ amezi abiri n’ iminsi….nako reka nguhe ibihumbi mirongo itanu sha”

Njyewe-“Eeeh ayo yose?”

Boss-“Akira rwose nawe uzirarire ku bandi bana dore warakoze, yeee ugomba kubirataho kabisa”

Njyewe-“Oya Boss, iri geno ryanjye ntabwo ari iryo kwiratana ahubwo nzafasha mukuru wanjye najye nigurire udukoresho, buriya urugamba rwa wenyine ruragora, iyo ufite ugutera ingabo mu bitugu uranesha”

Boss-“Uuuuh? Ko numva uzi ubwenge sha? Uti uzaguramo ibikoresho?”

Njyewe-“Yego, Aya niyo azamfasha kandi naharaniye kenshi gufasha mukuru wanjye ngo twibesheho”

Boss-“Ok! Ndumva ufite umutima n’ ubwenge bushaka gutera imbere, ntaho uhuriye n’ abana banjye bazindukira mu ma film gusa, bajya gutangira bakanyaka ibihenze ngo bazemeze abandi bana, nujya uza mu kiruhuko uzajye uruhukira hano, nzajya nguhembera ayo wakoreye nta kibazo”

Njyewe-“Oooh! Murakoze cyane Boss! Ni ukuri kubashimira ntibihagije, Imana ibahe umugisha”

Ngaho genda wakire iriya modoka ije ubwo guhera ejo ntabwo uzaza, uzajye kwitegura gutangira ishuri”

Njyewe-“Murakoze cyane”

Nihuse njya kwakira imodoka yari ije, imaze guparika aho bashyiriramo imyuka yamanuye ikirahuri mpuza amaso n’ umugabo ayangumishaho, nibajije impamvu andeba cyane ariko sinabyitaho ako kanya ahita ampamagara,

We-“Umva sha! Umva hano nkubwire”

Nagiye musanga nkimugeraho yahise ambwira n’ ijwi rinini,

We-“Ntaho naba narakubonye?”

Njyewe-“Njyewe se? Buriya nta handi hatari hano, iyo ndi hano mpura n’ abantu benshi ariko mumbabarire ntabwo nabibutse nko mbibutse”

We-“Oya, oya ntabwo ari hano nakubonye winjijisha , hano nibwo bwa mbere mpaparitse, ahubwo wowe usa n’ agasore umukobwa wanjye yigeze kubona akantesha agaciro aho twari turi, nibyo nari muguriye akanga kubirya”

Akivuga atyo narikanze, ndebye hejuru mu modoka hamwe haba akaroranyuma mbona agafoto k’ umutako, mu kwitegereza neza nabonye ifoto ya Kevine mbura uko nifata, nashatse guhunga ariko biranga mpagarara nk’ ipoto ricanira ibinyabiziga n’ abanyamaguru,

We-“Ko utansubiza? Ni wowe cyangwa? Ntaho uziranye n’ umukobwa wanjye Kevine?”

Njyewe-“Kevine…Kevine…?

Muri ako kanya nariye indimi mbura icyo nsubiza, amahitamo yari uguhakana bitewe n’ uburakari yambwiranaga birarenga ahita ava mu modoka,

We-“Ndakubaza, ni wowe cyangwa?”

Njyewe-“Ni ukuri kose naba mbabeshye, ntabwo muzi pe, uwo mukobwa ntawe nzi, ko nirirwa aha se twaba twarahuriye hehe? Ntawe nzi rwose… Kevine?

We-“Iyo nsanga ari wowe sha ngo nkwereke, urugo rwanjye n’ urubyaro rwanjye ntabwo ruvogerwa n’ imitimbwe”

Ako kanya abashyiragamo umwuka twakoranaga bahise bazana ibikoresho batangira gushyiramo umwuka, nkomeza gusubira inyuma ngera aho atambonaga, ndihisha nongeye kugaruka yagiye, ndiruhutsa binyanga mu nda njya gutanga imyenda y’ akazi nsezera abandi bakozi ndataha, akazi kibyo biruhuko  karangirira aho.

Nageze mu rugo nsanga Annie yasuwe, yari yasuwe n’ abakobwa beza batatu ndabasuhuza,

Annie-“Uyu niwe musaza wanjye nababwiraga”

Bose-“Ese Maama! Murasa”

Annie-“Yitwa Ganza! Niwe unkurikira ariko andusha imbaraga nkopfoye yandunda”

Bose-“Hhhhhhh!”

Umwe muri abo bakobwa yahise avuga,

We-“Ubwo se iyo ureka akivuga tukumva nijwi rye koko?”

Njyewe-“Hhhhh! Mushaka kumva ijwi ryanjye se? Ijwi niri tu! Nitwa Ganza nkuko Annie mushiki wanjye abivuze”

Bose-“Woooow”

Nakomeje kwitegereza umwe muri bo wasaga nkaho atuje amaso yanjye amuguma ho, hashize akanya gato,

Annie-“Mwebwe se ko mutivuga? Mbega mwebwe?”

Basekeye icyarimwe maze,

Uwambere-“Nitwa Cynthia, Annie mushiki wawe twiganaga, yajyaga ambwira ko afite basaza be tukifuza kubamenya niyo mpamvu twaje kubasura”

Uwa Kabiri-“Njyewe banyita Bwiza”

Uwa Gatatu-“Urabona ukuntu Bwiza yirya di? Mbega gutereka amaso, ariko maana!”

Twese-“Hhhhhhh!”

We-“Rata nanjye nitwa Gatesi, twese twiganaga na Annie, ubu nyine turi aba finalist”

Njyewe-“Ni byiza cyane, murisanga hano iwacu”

Nahise nkomeza njya mu cyumba ako kanya Annie ahita ansangayo,

Annie-“Eeeeh! Sinkuzaniye abana bacyeye se? Uwo ushima wowe umbwire gusa”

Njyewe-“Hhhhhh! None se nicyo wabikoreye?”

Annie-“Oya, ariko nyine nawe ntube umwana”

Njyewe-“Hmmm! Byihorere sha, bariya bana byo ni beza pe, gusa nabonye ko ntakwiriye gukundwa, ntabwo nshaka guterwa indi ndobo”

Annie-“Oya shahu ntukavuge gutyo?”

Njyewe-“Hmmm! Iyaba wari uzi ko niyamwe na Papa Kevine wo mu buto?”

Annie-“Ngo? Papa Kevine? Papa Kevine se mwahuriye hehe?”

Natangiye kubwira mushiki wanjye Annie  byose anteze amatwi, arangije kumva byose maze arambwira,

Annie-“Ariko rero narabikubwiye mwana wa Mama, amaboko atareshya ntaramukanya, humura Imana izaguha uzakwakira ukuri nkuko Ange yakiye mukuru wacu Ntwari”

Hashize akanya nitsa umutima nkora mu mufuka nkuramo inote imwe y’ ibihumbi 2 nyihereza Annie maze ndamubwira,

Njyewe-“Akira genda uzane fata wakirize abashyitsi nahembwe”

Annie aho kugira ngo abike ibanga yahise yihuta ajya muri salon avuga cyane,

Annie-“Eheee! Twongeye twariye, musaza wanjye yahembwe, aratuguriye buri wese avuge icyo ashaka”

Bose basakurije rimwe aho nari ndi mu cyumba ndambika ibiganza mu maso, hashize akanya ndasohoka nsanga batuje batangira kumvuga imyato ariko byari ugushyenga.

Annie yazanye Fanta baranywa tuganira, nongeye kwisanga nsigaye njyenyine muri salon, nsohotse hanze mbura umuntu numwe,

Njyewe-“Inka yanjye! Ibi ni ibiki ra?……………………………..

 

Ntuzacikwe na Episode 11yiyi nkuru ejo mu gitondo

 

8 Ibitekerezo

  • Reka irangiye ntabishaka umwanditsi uyu munsi arampamije🙆🙆🙆🙆🙆

  • Ese ubwo abo bakobwa bagiye Ganza byamugendekeye gute?Ese ubwo yari yasinziriye cyangwa yari yatwawe n’ibitekerezo?

  • Abo bakobwa c na Annie bagiyehehe cyangwa bashaka kumutungura ku munsi wa mavuko

  • Ndumva mushiki wa Ganza amuzaniye abagore 3, iyo abantu bamaze guhaga ntibabura imikino y’umurengwe. Nizo anniversaire batakoze bari mubukene bazikora. Ese Ntwari we akora akahe kazi?

    • Muvandimwe Niyongira ko mbona ufite umushiha ni nde mwavuganye nabi koko? niba nawe ubasha gusoma iyi nkuru ndumva uri ku rugero rw’abarenzwe ariko batiyakiriye cg bafite ibindi bibazo cg ibikomere by’ubuzima! Muvandi ihangane niba warababaye cg niba ubabaye…..kwizihiza anniversaire cg kwishima mu buzima nta cyaha kirimo….nta n’amategeko abihana igihe ubikoze ntawe ubangamiye! Abanyarwanda rwose ubanza tubihiwe kabisa…..hahahahahaha

  • ewana imana ifashe ganza azongere abone kevine yakunze kuva mubuto peuuhhhhh

  • more appreciate

  • It’s amazing story kbs kuraje 2 komeza wandike kandi uko wandika ari nako utera imbere. natwe nk’abasomyi turi kumwe muri byose.

Subiza

Your email address will not be published. Required fields are marked *