• 08/12/2019 10:40 57

EA Got Talent: Umunyarwanda yarapye ahagurutsa imbaga…Yinjiye mu kindi kiciro

Umunyarwanda Taycun Degree yaraye arapye mu irushanwa East Africa’s Got Talent ashimisha abaryitabiriye barimo abagize akanama nkemurampaka banamuhaye amahirwe yo gutambuka mu kindi kiciro.

Taykun umunyarwanda uri muri EA Got Talent

Uyu musore w’Umunyarwanda winjiye ku rubyiniro akabwira abagize akanama nkemurampaka ko agiye kurapa, yahise yinjira mu mirongo yivuga akomeza agira ati “Say my name [musubiremo izina ryanjye].”

Abakemurampaka bahise batangira kugaragara nk’abatangaye kubera impano y’uyu muhungu, batangira kunyeganyega bakora ibimenyetso by’amaboko nk’ibyo abaraperi bakunze kugaragaza.

Ni indirimbo iri mu rurimi rw’Ikinyarwanda nubwo mu kanama nkemurampaka harimo umunyarwanda umwe, Makeda, n’abandi bose bagaragazaga ko bishimiye imiririmbire y’uyu munyarwanda.

Mu byicaro by’abafana na ho umwuka wari wazamutse kuko batangiye kuzamura akamo bagaragaza ko bamwishimiye bahita banahaguruka.

Uyu musore warangije kuririmba bakamukomera amashyi, Makeda na we asubira mu byo yagarutseho arapa, ati “Say his name [muvuge izina rye], abandi na bo barimo n’abagize akanama nkemurampaka bati “Staycool (ni izina rye).”

Makeda yamubwiye ko ari ibintu bigoye kuririmba  mu njyana ya LAP mu rurimi abantu benshi batumva ariko bakamwishimira kariya kageni.

Umukemurampaka Gaetano wo muri Uganda yamwizeje ko nakomeza gukuza impano ye bizamuzanira abafana benshi ndetse akazinjiza n’agatubutse.

Vanessa Mdee wo muri Kenya we wari watwawe ubwo Taykun yarapaga, yavuze ko n’ubwo atumvise ibyo yaririmbaga ariko yakunze impano ye ati “nakwifuje kumva indirimbo yawe kuri radio uyu munsi.”

Batatu bamuhaye ‘Yes’ mu gihe Jeff Koinange we yamuhaye ‘No’ ariko bamubwira ko akomeje mu kindi kiciro.

Iri rushanwa ryaraye rinyuze no kuri Television Rwanda, Tykun avuye ku rubyiniro yagaragaye ahamagara abakunzi be bo mu Rwanda ababwira ko yagerageje amahirwe atakeka ko yakwishimirwa nk’uko byaraye bimugendekeye, avuga ko yinjiye mu kindi kiciro.

Aline RANGIRA MWIHOREZE
UMUSEKE.RW

Subiza

Your email address will not be published. Required fields are marked *