• 08/12/2019 3:38 27

DRC: Ebola yageze i Goma

Kuri iki Cyumweru taliki 14 Nyakanga, Minisiteri y’ubuzima muri Repubulika ya Demukarasi ya Kongo yatangaje ko mu mugi wa Goma hagaragaye umuntu urwaye Ebola. Uyu mugi uhana imbibi n’u Rwanda, usanzwe utuwe n’abaturage barenga miliyoni imwe bakunda guhahirana n’Abanyarwanda.

Ebola yageze i Goma mu mujyi uturanye cyane n’u Rwanda

Abanyarwanda bo mu karere ka Rubavu n’utundi duturanye n’ako bakunda kujya i Goma gukora ubucuruzi kandi n’abatuye Goma na bo baza mu Rwanda kenshi.

Minisiteri y’ubuzima muriDRC yasabye abaturage kudakuka umutima kuko ngo yafashe ingamba zo gukumira ko iriya ndwara iri muzandura vuba kandi ikica vuba idakwira mu bantu benshi.

Guhera ku italiki ya 01, Kanama, 2018 Ebola imaze kwica abantu 1 655 muri kiriya gihugu. Ebola kandi iherutse kugera mu kindi gihugu gituranye n’u Rwanda cya Uganda ikaba yarishe byibura abantu batatu batangajwe na Minisiteri y’ubuzima.

Umurwayi wa Ebola yabonetse ejo ari muri bus irimo abantu bantu 18 bavaga ahitwa Butembo, aha hakaba ari hamwe muhagaragaye iriya ndwara cyane guhera umwaka ushize.

Ngo yari yatangiye kugaragaraho bimwe mu bimenyetso bya Ebola guhera ku wa Gatanu w’Icyumweru gishize.

Minisiteri y’ubuzima ivuga ko nyuma yo gupima uriya murwayi basanze koko arwaye Ebola.

Kuba yari ari muri bus irimo abandi bagenzi byateye impungenge ko yaba yaranduje n’abandi.

Hari amakuru avuga ko uriya murwayi yari umupasiteri wari uvuye i Butembo kubwiriza Ijambo ry’Imana, bikaba bikekwa yaba yarandujwe na bamwe mu Bakirisitu bari baje kumva ibyo yigisha.

Abahanga bavuga ko iyi ndwara yishe abantu benshi muri DRC ku nshuro ya kabri kuva yamenyekana.

Ubwa mbere yica abantu benshi hari hagati ya 2013 na 2014 ubwo yari yagaragaye mu bihugu bya  Guinée, Liberia  na Sierra Leone. Imibare itangwa na OMS ivuga ko muri iriya mwaka Ebola yishe abantu ibihumbi 11.

Goma ni umujyi uturanye cyane n’u Rwanda

Le Monde

Jean Pierre NIZEYIMANA
UMUSEKE.RW

Subiza

Your email address will not be published. Required fields are marked *