• 04/12/2020 12:31 52

DRC: Inyeshyamba za ADF zatorokesheje imfungwa zirenga 900

Imfungwa zirenga 900 zatorotse gereza yo mu Burasirazuba bwa Repubulika Iharanira Demokarasi ya Congo mu karere ka Beni, birakekwa ko zabohojwe n’inyeshyamba za ADF zirwanya ubutegetsi bwa Uganda zifite ibiririndiro mu mashyamba ya DRC.

Izi mfungwa zatorotse gereza bikekwa ko zatorokeshejwe na ADF

Modeste Bakwanamaha uyobora Akarere ka Beni gaherereyemo gereza ya Kangbayi ifungiyemo ziriya mfungwa zatorotse, yavuze ko uyu mutwe watorokesheje izi mfungwa zirimo abasanzwe aru abarwanyi bawo.

Umuyobozi yabwiye ibiro ntaramakuru by’Abongereza Reuters ko abo bagabye igitero, baje ari benshi bakamenya umuryango wa gereza bakoresheje ibikoresho by’amashanyarazi.

Radio Okapi yatangaje ko mu bantu 1 455 bari bafungiwe muri iriya Gereza, 122 gusa ari bo bayisigayemo.

Polisi ivuga ko yashoboye gufata abantu 14 mu batorotse, ikanavuga ko abagororwa babiri barashwe mu gitero cyagabwe kuri iyi gereza mu masaha ya saa kumi n’igice za mu gitondo.

Muri 2017, imfungwa zirenga amagana zatorotse gereza imwe, irimo ingabo zitandukanye harimo n’abarwanyi ba ADF.

ADF ni umwe mu mitwe myinshi y’inyeshyamba ikorera mu burasirazuba bwa DRC, agace gakungahaye ku mabuye y’agaciro aho guverinoma n’ingabo z’umuryango w’abibumbye zimaze igihe kinini zirwanira kuzana umutekano.

UMUSEKE.RW

Subiza

Your email address will not be published. Required fields are marked *