• 24/01/2020 12:48 46

Dominic uko abona abahanzi bakwiye kwitwara mu bihangano byabo

Umuririmbyi ukora indirimbo zo kuramya no guhimbaza Imana Dominic Ashimwe yatanze ubutumwa bw’ikizere muri ibi bihe Abanyarwanda bari kwibuka avuga ko abahanzi bafite akazi gakomeye ko kwitwararika.

Dominic Ishimwe ari mu bahanzi bakunzwe cyane mu muziki uhimbaza Imana

Dominic Ashimwe uri mu bahanzi bakora indirimbo zo kuramya no guhimbaza Imana yatanze ubutumwa bw’ ikizere ku banyarwanda bose bari mubihe byo kwibuka abatutsi bishwe muri Jenoside 1994.

Muri ubwo butumwa bwe avuga ko abahanzi bafite akazi gakomeye kuko bakwiye guhora bitwararira cyane mu bihangano bakora n’ ubutumwa babinyuzamo.

Ngo ijwi ry’ umuhanzi aribonamo imbaraga zidasanzwe kimwe n’undi muntu wese wumva ukurikirwa n’abantu benshi.

 

UBUTUMWA KURI BAGENZI BE:

Abanyarwanda turashima Imana yatwemereye ikeyura umwijima wari utwunamiye ikaduha umucyo w’amahoro, ibi biraduha ikizere cyo kubaho neza no mu bihe bizaza.

Abahanzi bafite akazi gakomeye kuko bakwiye guhora bitwararika mu bihangano bahanga (umuziki, imivugo, ibishushanyo by’ubugeni, ikinamico n’ibindi).

Ubutumwa babinyuzamo bukera imbuto nziza ku muryango Nyarwanda n’abatuye Isi muri rusange mu buryo batuma baba umuyoboro mwiza ufasha abantu kubana neza.

Ijwi ry’umuhanzi ndibonamo imbaraga zidasanzwe kimwe n’undi wese wumva agakurikirwa n’abantu benshi bagendeye ku byo akora babona cyangwa bumva.

Niyo mpamvu ibyo umuhanzi akora n’ibyo avuga akwiye kwigengesera akabigenzurana ubushishozi ko ari ibyubaka umuryango Nyarwanda ndetse n’abatuye Isi.

Ububasha umuhanzi aba afite ku bamutega amatwi, iyo abukoresheje nabi bugira ingaruka mbi zikomeye, yabukoresha neza bugakiza benshi ndetse bukagira uruhare mu kubaka igihugu cye.

Umwijima w’icuraburindi Imana yeyuye ku gihugu cyacu, nta watekerezaga yuko byashoboka, ariko Imana yarabikoze.

Ibi nibiduhe ibyiringiro byuzuye twe abanyarwanda, biturememo ikizere gihamye ko Imana yakoze ibyo ibasha rwose no komora imitima yacu, igatanga ihumure n’ikizere cyo kubaho neza. Dukomere imbere ni heza.

Bonaventure KUBWIMANA
UM– USEKE.RW

1 Igitekerezo

  • Thank you Mr Dominic, ubutumwa bwawe ni ingirakamaro cyane ku babwumva bakabuha agaciro bukwiye. Abahanzi ntibatwarwe n’umudiho w’injyana zibyo baririmba, bibagirwe ubutumwa baririmba yuko ari bwo bwibanze. Twizere ko abahanzi bagenzi bawe bumvise umukoro bafite. Urakoze ku musanzu utanze. God bless you Dominic

Subiza

Your email address will not be published. Required fields are marked *