• 11/12/2019 11:37 50

Dj Adams yagarutse kuvangavanga imiziki nyuma y’imyaka 13

Umunyamakuru uzwi ku mazina ya Dj Adams agarutse mu mwuga wo kuvangavanga imiziki (Deejay) yaherukaga gukora muri 2006.

Dj Adams wari umaze imyaka 13 adakora ubuDeejay yabigarutsemo

Dj Adams yamenyekanye cyane mu itangazamakuru ubwo yakundaga gutunga agatoki abahanzi nyarwanda bigana indirimbo z’abandi mu mvugo yise ‘gushishura’.

Mbere yo kuza mu itangazamakuru yabanje gukora akazi ko kuvangavanga imiziki (bizwi nka Deejay) mu tubyiniro dutandukanye two mu Mujyi wa Kigali ndetse na Nairobi muri Kenya.

Adams yatangiye kwiga ibijyanye n’ubu Dj mu 1993 ubwo yari asoje kwiga amashuri yisumbuye. Icyo gihe yagiye muri Kenya abyiga igihe cy’amezi atatu. Nyuma yaho atangira kuvanga imiziki mu tubyiniro tunyuranye twaho.

Mu 1997 yagarutse mu Rwanda atangira gukora ako kazi mu tubyiniro twari tugezweho muri Kigali.

Akabyiniro yahereyeho ngo yakoranaga na Se w’umunyarwenya Rutura uzwi nka Mazimpaka Kennedy wari ugezweho. Yakoze henshi hanyuranye ariko ngo by’umwihariko ni we watangiranye n’akabyiniro ka KBC.

Uyu mwuga wo kuvanga imiziki yaje kuwuhagarika muri 2006 yinjira mu itangazamakuru. Aba Djs bakoranye muri iyo myaka abasigayemo ngo yubaha ni Dj Khadir na Dj Bissosso.

Ati “Ntabwo mbubaha kubera amafaranga menshi cyangwa imyaka bafite mbubahira icyo bashoboye gukora ubabwiye ngo bagikora.”

Abagezweho uyu munsi kuri we ngo ntabwo baramwemeza cyane. Impamvu abivuga gutyo ni uko bafite imbaraga kandi bakaba bagezweho ariko ngo ntiwabasaba icyo wifuza ko bakora ngo bakibashe.

Adams wagarutse muri uyu mwuga nk’uko yabitangarije Umuseke yavuze ko azajya akina indirimbo zo mu myaka icumi ishize ‘Old School’.

Ati “Ubu nanjye ngarutse mu mwuga wange nubwo hari hashize igihe nta bikora ariko ntabwo nzakora kimwe nk’abandi kuko nzajya nkina indirimbo zasohotse mu myaka icumi ishize gusa.”

Uyu mwuga yari yaryamishije aratangira kuwukora kuri uyu munsi ahere mu karere ka Kicukiro mu kabari gashya gahari.

Bonaventure KUBWIMANA
UMUSEKE.RW

Subiza

Your email address will not be published. Required fields are marked *