Cecile Kayirebwa ntakitabiriye igitaramo cya Iwacu Muzika Festival

Mu bahanzi bari bitezwe ko bazaririmba mu gitaramo cya Iwacu Muzika Festival muri iki cyumweru mu karere ka Huye hamaze kuvamo Cecile Kayirebwa watangaje ko afite umunaniro utamwemerera gukora urugendo rurerure.

Cecile Kayirebwa ngo ntabwo yemerewe gukora ingendo ndende

Kumenyesha ibi byanyuze mu itangazo ryatanzwe na East African Promoters (EAP) itegura ibitaramo bya Iwacu Muzika Festival ku bufatanye n’uruganda rwenga inzoga rwa Bralirwa.

EAP yavugaga ko baganiriye n’abakurikiranira hafi inyungu za Cecile Kayirebwa babamenyesha ko umuhanzi wabo atazaboneka mu gitaramo bamutumiyemo nubwo hari hashize igihe byaratangajwe.

Ku mpande zombi babanje kwihanganisha abakunzi b’uyu muhanzi byumwihariko abatuye mu ntara y’Amajyepfo ahari kuzabera igitaramo.

Muri iryo tangazo bavuze ko uyu muhanzi atakitabiriye iki gitaramo bitewe n’umunaniro kuko atemerewe gukora ingendo ndende.

Ubuyobozi bwa EAP bwatangaje ko uyu muhanzi agomba gusimbuzwa abandi bahanzi babiri barimo ‘Clarisse Karasira’ na ‘Orchestre Impala’ izaba yitabiriye bwa kabiri iki gitaramo cya Iwacu Muzika Festival.

Abandi bahanzi bazaririmba i Huye ni Bull Dogg, Urban Boys, Active, Rafiki, Victor Rukotana, na Nsengiyumva Francois uzwi nka ‘Igisupusupu’.

Igitaramo cya Iwacu Muzika Festival mu mujyi wa Butare kizaba taliki ya 13 Nyakanga 2019  kibere ku kibuga cya Kaminuza y’u Rwanda I Huye.

Itangazo rya EAP rimenyesha ko Kayirebwa atazaririmba
Cecile Kayirebwa yasimbujwe Impala na Clarisse Karasira

Bonaventure KUBWIMANA

UMUSEKE.RW

 

1 Igitekerezo

  • N’iza bukuru ziba zirimo erega
    akanga gukora ibidashoboka agaharira abana nka Karasira….
    “genda mpongo urashaje shenge”

Subiza

Your email address will not be published. Required fields are marked *