Byahinduye isura! Covid-19 yishe abantu 12 handura 898 umunsi umwe - UMUSEKE

Byahinduye isura! Covid-19 yishe abantu 12 handura 898 umunsi umwe

Minisiteri y’Ubuzima yatangaje ko kuri uyu wa Gatandatu, COVID-19 yahitanye abantu 12 mu Rwanda bituma abamaze guhitanwa n’iki cyorezo bose baba 465.

                                                           Covid-19 imaze guhitana 465 mu Rwanda

Abapfuye ni abagore 8 b’imyaka 87, 57, 54, 45, 23 (i Kigali), 55 (i Nyamagabe), 37 (i Kamonyi) na 36 (i Rubavu) n’abagabo bane b’imyaka 61 na 51 (i Kigali), 87 (i Nyaruguru) na 72 (i Karongi).

Uyu munsi kandi habonetse abarwayi bashya 898 barimo 424 muri Kigali bituma abamaze kwandura bose baba 41 696. Abakirwaye bari kwitabwaho bageze ku 13 625 barimo 47 barembye.

Uyu munsi hakize abantu 334 bituma abamaze gukira bose bagera ku 27 606. Abantu 251 461 bamaze guhabwa doze ya kabiri y’urukingo rwa COVID19 (AstraZeneca) barimo 111 bayihawe uyu munsi.

Guverinoma y’u Rwanda yafashe ingamba nshya zigamije guhosha umuvuduko w’ubwandu bw’iki cyorezo, aho ingendo zihuza Umujyi wa Kigali n’izindi Ntara ndetse n’izihuza Uturere zabaye zihagaritswe, n’amasaha yo kuba abantu bakiri mu ngendo zitandukanye akarangirana na saa kumi n’ebyiri z’umugoroba (18:00).

Abaturarwanda barasabwa kutirara kuko icyorezo cyakajije umurego ndetse hakomeje gufatwa ingamba nshya zigamije gukumira ikwirakwizwa ryacyo, harimo no kwirinda ingendo zitari ngombwa no kwirinda guhurira ahantu hahurira abantu benshi kandi hafunganye.

Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n’isabune cyangwa alukolo yabugenewe.

Ku Isi, abamaze kwandura COVID-19 muri rusange bararenga miliyoni 183 barimo abasaga miliyoni 168 bakize ndetse na miliyoni 3.9 z’abantu bamaze kubura ubuzima kubera icyo cyorezo.

 

Uko Uturere dukurikirana mu bipimo byafashwe ku wa 03 Nyakanga 2021 

 

REBA YouTube Channel UMUSEKE TV video nziza nk’iyi. UKORA LIKE SHARE na COMMENT 

NDEKEZI JOHNSON / UMUSEKE.RW

Subiza

Your email address will not be published. Required fields are marked *