• 23/01/2020 7:38 36

Burera: Mu mezi abiri REG iraba imaze guha amashanyarazi imiryango isaga 2300

Ubuyobozi bwa REG ishami rya Burera butangaza ko mu gihe cy’amezi abiri gusa imiryango igera ku 2332 izaba imaze kugezwaho umuriro w’amashanyarazi. Abawuhawe ku ikubitiro bo mu Mirenge ya Rusarabuye na Rwerere bavuga ko bagiye kwiteza imbere.

REG ngo mu mezi abiri gusa iraba ihaye amashanyarazi ingo 2300 zo muri Burera

Ingo zizahabwa amashanyarazi mu Karere ka Burera ni iziherereye mu Mirenge ya Rwerere, Rusarabuye, Rugarama, Cyeru na Kinoni.

Abatuye muri iyi Mirenge bavuga ko utu duce twaranzwe no kutagira amashanyarazi igihe kirekire uretse kubona insinga zibanyura hejuru.

Uwihoreye Jean Bosco wo mu Murenge wa Rusarabuye ari mu kigero k’imyaka 53, yagize ati: “Kuba twabonye umuriro w’amashanyarazi mu nzu zacu ni isozwa ry’isezerano Kagame Paul yadusezeranyije aza kwiyamamaza.”

Avuga ko yabonaga itara rikoresha amashanyarazi ari uko agiye mu Bitaro cyangwa ahandi hatari iwabo.

Ati “Tumaze ukwezi tubonye umuriro w’amashanyarazi ariko ni ibintu byatumye dutekereza kwiteza imbere twifashishije uyu muriro.”

Uwihoreye akomeza avuga ko bagiye gushinga za salon zitunganya imisatsi, bakagura imashini zikoresha amashanyarazi zaba izitunganya umusaruro w’ibinyampeke dore ko muri Burera hera ingano n’izindi zakwifashishwa mu mirimo itandukanye.

Bamwe mu banyeshuri bavuga ko umuriro w’amashanyarazi uzatuma biga neza kandi bakajyana n’ikoranabuhanga.

Kamikazi Marie Jeanne ni umunyeshuri, yagize ati: “Nizera ko noneho ku manota nabonaga mu ishuri aziyongera cyane kandi mbibonera mu mikoro, nigira ku itara ry’amashanyarazi agatadowa twaragasezereye kaduteraga ibicurane. Mudasobwa zari zihunitse mu mashuri tugiye kuziga.”

Mu bindi ngo amashanyarazi azabafasha ni ukubasha gucaginga telefone ku babyeyi bazifite.

Mariya Abigomwa ni ijigisha, afite imyaka 73, we avuga ko ngo n’iyo yapfa yaba asize abana be ahantu heza hari urumuri.

Ati: “Mbonye u Rwanda rwiza nshaje. Kagame igihugu agiteje imbere. Twajyaga turira hanze tugapfa kumiragura imibu n’amasazi twacunganye n’uko ukwezi kwaka, bamwe tugacuranwa, ubundi tugacana ibishishimuzo, inzu zacu zigashya, ubu rero amatara ararabagirana.”

Mbarushimana Emmanuel ni Umunyamabanga Nshingwabikorwa w’Umurenge wa Rusarabuye, avuga ko uyu muriro uje gutuma batanga serivisi nziza.

Yagize ati: “Umuturage yazaga gusaba serivisi kubera ko amadosiye avangitiranye, bigatuma umubwira ngo azagaruke undi munsi kuko aribwo uzaba umaze gukusanya izo dosiye, kuri ubu rero tugiye kujya tuzishyira muri mudasobwa, umuturage ajye aza tumukorere byihuse.”

Umuyobozi w’ishami rya REG mu Karere Burera, Celestin Muhayimana, avuga ko ubu ingo zifite amashanyarazi mu Karere zigera kuri 35% kandi ko hari ikizere ko intego yo kugeza amashanyarazi ku ngo zose bitarenze umwaka wa 2024 izagerwaho.

Yagize ati: “Aba baturage bahawe amashanyarazi binyuze mu mushinga watangiye kera ariko rwiyemezamirimo ari we SPENCON aza kunanirwa, REG ihitamo kwiyubakira imiyoboro. Turateganya ko imiryango igera ku 2 332 izahabwa amashanyarazi ifatiye kuri iyi miyoboro.”

Muhayimana avuga ko batangiye gucanira ingo ziri mu mirenge ya Rusarabuye na Rwerere, izindi na zo ngo mu minsi iri imbere zizacanirwa.

Ati “Ndasaba abaturage bahabwa umuriro kutareba amatara gusa ahubwo ubafashe guhanga umurimo, kandi birinde ko wabakururira impanuka, birinde kurira amapoto kimwe no kuyacokoza.”

Muri Burera habarurwa ingo zisaga 23 863 zifite amashanyarazi afatiye ku muyoboro mugari n’ingo zisaga  5425 zifite amashanyarazi akomoka ku mirasire y’izuba.

Abahawe amashanyarazi ku ikubitiro ni abo mu Mirenge ya Rusarabuye na Rwerere
Santire zo muri iriya Mirenge ya Rusarabuye na Rwerere zirashyushye ngo biteguye kubyaza umusaruro amashanyarazi bahawe
Muri aka gace ngo amashanyarazi yabacaga hejuru akajya ahandi, ubu bishimiye ko yabagezeho na bo
Umunyamabanga Nshingwabikorwa w’uyu Murenge avuga ko amashanyarazi azabafasha gukoresha mudasobwa, na serivise baha umuturage ikihuta
Amashanyarazi azafasha mu byiciro byinshi harimo no mu Bigo Nderabuzima

NGABOYABAHIZI Protais
UMUSEKE.R

Subiza

Your email address will not be published. Required fields are marked *