• 14/12/2019 7:03 31

Buravan ashimira itangazamakuru ati “Ni bwo bigeze ahakomeye ndacyabakeneye”

Umuhanzi Burabyo Yvan uzwi nka Yvan Buravan yaraye akoze ibirori yahurijemo ibitangazamakuru bitandukanye abishimira kuba byaramufashije kuzamuka kugeza aho yegukanye igihembo mpuzamahanga kizwi nka Prix découvertes 2018 gitangwa na Radio Mpuzamahanga y’Abafaransa (RFI). Agaragaza uburyo azirikana akamaro k’itangazamakuru yagize ati “ubu ni bwo bigeze ahakomeye ndacyabakeneye.”

Buravan ashyikiriza umunyamakuru w’Umuseke Certificate

Kuva yava mu Bufaransa gushyikirizwa kiriya gihembo, ni bwo yari akerekanye mu Rwanda.

Uyu muhanzi yifuje kwerekana icyo gihembo mu Rwanda bwa mbere imbere y’abanyamakuru n’abayobozi b’ibitangazamakuru byamufashije mu rugendo rwe.

Yashimiye ibinyamakuru binyuranye byo mu Rwanda byamufashije kuva agitangira umuziki kugeza kuri uyu munsi mu myaka ine ishize atanga ishimwe ‘Certificate’.

Yashimye ibinyamakuru bitandukanye birimo Radio, Televiziyo, ibinyamakuru byandika kuri murandasi birimo n’Umuseke.

Mu ijambo rye yashimiye abamufashije bose muri rusange ababwira ko yateguye icyo gikorwa kugira ngo bishimane banasangire ku bw’ibyo bamugejejeho.

Ati “Iki gihembo natsindiye ni intsinzi yacu twese nk’Abanyarwanda ari na yo mpamvu igihembo nakizanye hano kugira ngo mukibone…Ndabashimira ku byo mwamfashije ariko ubu ni bwo bigeze ahakomeye ndacyabakeneye muri uru rugendo.”

Buravan yabaye umuhanze wa mbere mu Rwanda wegukanye kuriya gihembo cya prix découvertes gitangwa na Radio Mpuzamahanga y’Abafaransa (RFI).

Kwegukana iki gihembo byamufashije kumenyekana mu ruhando mpuzamahanga kuko yagiye aririmba mu bihugu bitandukanye by’Afurika no ku mugabane w’Iburayi.

Bonaventure KUBWIMANA
UMUSEKE.RW

Subiza

Your email address will not be published. Required fields are marked *