• 15/12/2019 10:16 21

Bugesera/Mugorore: Amashanyarazi y’Imirasire y’izuba yabahinduriye ubuzima

Ikigo k’Igihugu gishinzwe gukwirakwiza amashanyarazi kiri mu bukangurambaga bwo ku Banyarwanda bose, kigaragaza ibyiza byo gukoresha amashanyarazi ava ku mirasire y’Izuba, kuri uyu wa kabiri tariki 23 Nyakanga bari mu Karere ka Bugesera.

Muri Santire ya Muhororo bamwe batangiye kugura imirasire y’izuba bari kubona impinduka

Mu Kagari ka Mugorore mu Murenge wa Juru abaturage baho bavuga ko umuriro w’amashanyarazi akomoka ku misire y’izuba wabakuye mu bwigunge.

Mbarushimana Pierre ucuruza muri Santire y’Ubucuruzi ya Mugorore avuga ko aho amaze gutangira gukoresha amashanyarazi y’umurasire ngo byamufashije gutera imbere kuko asigaye acuruza nta bujura yikanga.

Yagize ati “Ubundi twaracuruzaga byagera nka saa kumi n’ebyiri z’umugoroba umuntu agahita ataha kandi niyo masaha meza yo gucuruza, ariko kubera gutinya ko bakwiba bitewe n’umwijima uhari ugahitamo gutaha. Ubu ndacuruza nkageza na saa sita z’ijoro ntacyo nikanga kuko haba habona.”

Akomeza avuga ko byamufashije kwagura ubucuruzi bwe ndetse n’ubuzima mu rugo iwe burahinduka.

Ati “Iyo ngeze mu rugo nkabona ukuntu abana basigaye babona umwanya wo gusubira mu masomo biranezeza kuko mbere ntaragura umurasire ntabwo nari kujya mbona amafaranga yo kugura buji buri munsi kugira ngo basubire mu masomo yabo.”

Hakizimana Felesiyani ufite inzu yo gosheramo abantu bakamuha amafaranga avuga ko aho yaboneye umurasire ubucuruzi bwe abukora neza kuko ngo mbere yakoreshaga batiri yo ku modoka yashiramo umuriro bikamusaba gukora urugendo rw’isaha agiye kongeramo umuriro.

Ati “Umurasire naguze waje ufite imashine ebyiri zogosha, inzu yange ifite imiryango ibiri iriho amatara ahantu hose ku buryo nta kibazo nkigira cyo kuba nahura n’umwijima. Mu kazi kange ko kogosha naho sinkigahagarika ngo batiri yashizemo umuriro kuko umurasire igihe cyose uba waka.”

Akomeza avuga ko inyungu yiyongereye ngo kuko anasharija amaterefone kubantu batarafata imirasire bakamuha amafaranga akabasha kuyizigamira.

REG isaba abatuye hariya kwijukira kugura imirasire y’izuba igihe Leta itarabagezaho amashanyarazi yo ku muyoboro mugari

Hakizimana avuga ko nubwo amashanyarazi yo ku muyoboro mugari yabageraho atabura gukomeza gukoresha umurasire.

Mukamana Anonciata na we ukoresha umurasire iwe mu rugo avuga ko ubu babayeho neza ahantu hari urumuri nta kintu bikanga.

Agira ati “Mbere wabaga wicaye nko mu gikoni ukabona inzoka ikugezeho kuko hatabona cyangwa ukumva umwana ugiye mu nzu akubise umutwe ku rukuta, ibintu bikameneka bitewe n’uko mu nzu hatabona.

Kubera ko twacanaga buje cyangwa amatoroshi abana bacu ntibabonaga umwanya wo gusubira mu masomo kuko umwana ntiyakwigira ku itoroshi ayo mafaranga y’amabuye ntitwari kuyabona.”

Musabende Alphonsine na we waguze umurasire avuga ko iyo ukoresha umurasire bigufasha gutera imbere kuko hari amafaranga wizigamira. Avuga ko mu minsi ibiri yakoreshaga amafaranga 100 yo kugura buje ariko ubu aho yaguriye umurasire byamurinze guhora atanga ayo mafaranga kandi atura ahantu hari umucyo.

Abatuye mu Kagari ka Mugorore bavuga ko mu gacentere kabo abacuruzi bataragura imirasire itanga amashanyarazi akomoka ku ngufu z’izuba bakoraga urugendo rw’isaha bagiye gushaka umuriro wa telephone, kwiyogoshesha na byo bikaba uko, ubu ngo byose byarabegereye.

Rurangirwa Fred ni Umunyamabanga Nshingwabikorwa w’Umurenge wa Juru avuga ko bamaze kugerwaho n’amashanyarazi  ku kigero cya 32%, bakaba basaba abo atarageraho gukorana na za kompanyi zicuruza imirasire  y’izuba.

Ati “Aka Kagari twajemo nta mashanyarazi aturuka ku muyoboro mu gari twari twagezamo tubasaba gufata imirasire ikibafasha kubona amashanyarazi no kwiteza imbere mu mirimo itandukanye.”

Akomeza avuga ko mu Murenge wa Juru bafite utugari tubiri tutaragezwamo amashanyarazi. Uyu muyobozi yabwiye abaturage ko bagomba gukangukira kugura ibikoresho by’imirasire ngo kuko nibyo bidahenze.

Muri gahunda ya Guverinoma y’imyaka 7 muri 2024 abantu 48% bazaba bakoresha amashanyarazi akomoka ku mirasire y’izuba, aho ubu biri ku kigero cya 14%  naho 52% bakoresha akomoka ku muyoboro mugari, bivuze ko Abanyarwanda bose 100% bazaba bafite amashanyarazi.

Bamwe batangiye gukora ubucuruzi bushingira ku mashanyarazi burimo gufungura inzu zo kwiyogoshesherezamo
Abaturage bamwe muri aba bamaze kugura imirasire y’amashanyarazi kugira ngo mu ngo zabo habone
Guverinoma y’u Rwanda ivuga ko mu myaka 7 imbere buri rugo rw’Umunyarwanda ruzaba rufite amashanyarazi

Josiane UWANYIRIGIRA
UMUSEKE.RW

Subiza

Your email address will not be published. Required fields are marked *