• 15/12/2019 7:43 40

Birababaje kuba umuntu yarashimiraga undi kuko atamwishe – Gen Kabarebe

  • Ati “RPA yahanganye n’ikigugu cyamaze imyaka 34 kiyubaka mu ngengabitekerezo”
  • Ati “Twakuze twumva ko kutagira igihugu ari iby’Abatutsi”

Umujyanama wa Perezida wa Repubulika mu by’umutekano, Gen James Kabarebe avuga ko Jenoside yakorewe Abatutsi mu 1994 yagiye kuba abo muri ubu bwoko barapfuye mu mitekerereze kubera ibikorwa bibi nk’itotezwa n’ihezwa bakorewe igihe kinini ku buryo iyo babonaga barokotse bashimiraga uwari ugiye kubagirira nabi nk’aho byari mu burenganzira bwe.

Gen Kabarebe avuga ko ikibi cyabibwe mu banyarwanda igihe kinini

Yabivuze mu kiganiro yatanze mu gikorwa cyo kwibuka abari abakozi b’icyahoze ari Minisiteri y’Imirimo ya Leta n’Ingufu (MINITRAPE) cyahurije hamwe abakozi ba Minisiteri y’Ibikorwa Remezo n’ibigo biyishamikiyeho.

Gen Kabarebe avuga ko ubutegetsi bwateguye bukanashyira mu bikorwa umugambi wa Jenoside, bwageze aho bukumva ko gukorera ibikorwa bibi Abatutsi ari uburenganzira bwabo ndetse n’abandi baturage batahigwaga bakumva ko ari ibisanzwe.

Ati “…Bakumva ko ari byo akwiye, akavuga ati ‘uyu bagiriye kuriya, ah! Ni Umututsi, ni byo akwiye’, niba apfuye, ‘ah! N’ubundi basanzwe bapfa’ cyangwa se ‘ibyabo ni ko bimera’.”

Avuga ko kugirira nabi Abatutsi byagiye bigafatwa nk’ihame kubera igihe kinini byakozwe.

Ati “Abicwa, abatotezwa, bakabyemera bakumva ko ari ko bigomba kumera kuko biragenda bikabajyamo.

Mbere yo gupfa, mbere y’uko abantu babatema 1994 buriya baba barapfuye kera mu mitwe baremeye ko bagomba gupfa, atapfa agashima, agashima n’uwagombaga kumwica ati ‘urakoze ntunyishe’, nk’aho uwagombaga kumwica afite uburenganzira bwo kumwica.”

Gen Kabarebe wagarutse cyane ku itotezwa Abatutsi bakorewe ryanatumye mu 1959 hari abahunga igihugu cyabo kubera kubagirira nabi, avuga ko abari mu buhunzi na bo hari igihe bageze bagasa nk’abihebye kubera akarengane bakorerwaga mu gihugu cyababyaye.

Ati “Twese iyo wabaga uri hariya, wumvaga ko kutagira igihugu ari iby’Abatutsi, nyine uri Umututsi ugomba kuba impunzi, ugomba kutagira igihugu kandi ukabyemera.”

 

Igihugu cyacu cyagize umwaku mubi cyane

Gen Kabarebe anenga ubutegetsi bubi bwatumye ubwoko bumwe bubonwa muri iriya ndorerwamo bikagera n’aho banoza umugambi wo kuburimbura kandi ari bwo bwari bufite inshingano zo kurinda abanyagiguhu.

Ati “Ntabwo byumvikana ko umuntu muzima yananirwa kumenya icyo igihugu gikeneye, icyo abagituye bakeneye, n’uburyo bukenewe bwo kuyobora abantu basangiye igihugu kandi bumva ko basangiye uburenganzira kuri iki gihugu.

Uwo mwaku rero wo kugira abantu b’imyumvire imeze gutyo, bakabifashwamo n’ababafashije kujya ku butegetsi, ni umwaku ukomeye cyane.”

Yagarutse ku bikorwa byifashishwaga mu kubiba uru rwango Abahutu bagiriye Abatutsi, nk’ibiganiro byatambutswaga kuri Radio n’umunyamakuru Kantano wahamagariraga abantu kujya mu bwicanyi n’ibihangano byaBikindi. Avuga ko abakoraga ibi bari abahanga cyane.

Ati “RPA yahanganye n’ikigugu cyari kimaze imyaka 34 irenga kiyubaka mu ngengabitekerezo.”

Gen Kabarebe avuga ko kuva mu 1990 ubwo RPA yari iriho yiyubaka, yashyize imbere uburyo bwo gushyikirana ariko ubutegetsi bwariho butegura Jenoside bukinangira.

Nyuma y’iki gihe, RPA yageze aho ishobora gufata igihugu ariko ntiyabikora ahubwo ikomeza gusaba imishyikirano, mu 1993 Ubutegetsi bwariho buyemera bya nyirarushwa kuko bwatangiye gukora Jenoside.

Ingabo zari iza RPA ziyobowe n’umugaba mukuru wazo, Paul Kagame zabonye ko ntayandi mahitamo atari ukuza gutabara abatutsi bariho bicwa.

 

Iyo hatabaho RPF nta gihugu cyari kuba gihari- Min Gatete

Minisitiri w’Ibikorwa Remezo, Amb. Claver Gatete avuga ko ingabo za RPF-Inkotanyi zahagaritse Jenoside ndetse ubuyobozi bw’uyu muryango bukimakaza ubumwe mu banyarwanda.

Ati “Umuntu aribaza iyo hatabaho RPF, byajyaga kugenda bite? noneho ntabwo twaba tukivuga amoko, ntabwo twaba tukivuga kwicana, n’igihugu ntabwo cyakabaye kikiriho nta Rwanda rwaba rugisigaye.”

Amb. Gatete avuga ko Umuryango RPF-Inkotanyi waje ufite intego yo kubaka igihugu, washyize imbere imiyoborere idaheza kandi itanga amahirwe angana kuri buri munyarwanda, nyuma y’imyaka 25 ubu igihugu kikaba kigeze ku rwego rushimwa n’abagituye n’abanyamahanga.

Avuga ko intego ‘ibyabaye ntibizongere kuba’ ivugwa na benshi ariko ko ireba buri munyarwanda ukwiye gukomeza kubona mugenzi we mu ishusho ye kugira ngo abanyarwanda bose bakomeze gukorera hamwe bagamije ikerekezo kimwe.

Jenoside yakorewe Abatutsi igahitana abasaga miliyoni imwe, yanatwaye abantu 165 bakoraga mu cyahoze ari MINITRAPE [ubu ni MININFRA]. Gusa ngo uyu mubare ni uw’ababonetse.

Abo mu miryango y’aba bahoze ari abakozi ba MINITRAPE bihurije hamwe mu muryango Hope Family, bakorana bya hafi na MININFRA inaba hafi abo muri uyu muryango batishoboye ikabagenera ubufasha butandukanye nk’amacumbi no kubishyurira amashuri.

Babanje gufata umunota wo kuzirikana inzirakarengane zishwe muri Jenoside
Abo mu miryango y’abahoze bakorera MINITRAPE baje kwifatanya muri iki gikorwa
N’abakozi ba MININFRA
Bacanye urumuri rw’ikizere
Na Gen Kabarebe
N’abandi bayobozi b’ibigo bishamikiye kuri MININFRA
Urumuri w’ikizere rwashyizwe imbere y’urwibutso rw’abishwe bahoze bakora muri MINITRAPE
Gen Kabarebe avuga ko RPA yaje ishaka ko u Rwanda ruba urwa buri wese
Bibutse ibihe bigoye abantu banyuzemo
Aya mateka yagarutseho yongeye gukora ku bantu bari baje muri iki gikorwa
Bashyize indabo ku rwibutso ruri kuri MININFRA
Min Gatete aha icyubahiro abishwe
Senderi wifatanyije n’aba muri iki gikorwa yaririmbye indirimbo zirimo amateka yacu n’Intimba y’Intore
Min Gatete avuga ko ubu kubaka igihugu bireba buri wese
Urwibutso rw’abazize Jenoside bahoze ari abakozi ba MINITRAPE

Photos ©M. Niyonkuru

Martin NIYONKURU
UM– USEKE.RW

9 Ibitekerezo

  • Arakoze cyane Jenerali Kabarebe. Ni urugero rwiza rwo kurengera inzirakarengane no kutamena amaraso yazo ahubwo ukazirengera Ni imwe mu ntwari zacu zigihumeka. Ajye amanuka mu byaro byacu tumwereke urukundo tumufitiye.

    • Kuronda amoko ni ubujiji.Yaba umututsi,umuhutu,umuzungu,umushinwa,etc…twese dukomoka kuli ADAMU nkuko Ibyakozwe 17:26 havuga.Umuntu ufite agaciro mu maso y’Imana,si umuhutu cyangwa umututsi,si umutegetsi,si ukomeye,si umukire,etc…ahubwo ni “ukora ibyo Imana ishaka kandi ntiyibere mu byisi gusa,ahubwo akabifatanya no gushaka Imana”.Uwo niwe wenyine uzaba mu isi nshya cyangwa ijuru rishya dusoma muli 2 Petero 3:13.It is a matter of time only.

  • Abasirikare birakwiye ko bava muri politiki bakibanda ku bikorwa by’umutekano. Byafasha abaturage nabo bikabafasha.

  • Tumara kumva ibyo abayobozi bakuru bacu baba bavuze mu mbwirwaruhame mu bihe nk’ibi, tukajya no kuri social medias kureba comments zatambutse kubyo bavuze, cyane cyane izitangwa n’abo bakoranye bya hafi. Beware!!

  • Nimwivugire ayo mushatse ijoro ribara uwariraye, umututsi nyine wabonaga atishwe yagombaga gushimira kugirango abone avuye aho. Mbabazwa n’abigize ba experts b’agahinda k’abarokotse genoside kandi batazi nibyababayeho, namwe iyo mubona umwicanyi aretse kubica mwarikumushimira ngo murebeko bwacya kabiri. Harya abafumbira n’abanyoro bamenye ryari ibyatubayeho?

    • Njyewe narumiwe gusa.Mwagiye muha ijambo abatutsi barokotse jenoside akaba aribo bavuga abari bibereye Uganda, Burundi, USA, EU, Uza gusobanura akababaro k’abandi kandi bahibereye gute kwaribo bazi ibyo babayemo kurusha abandi?

  • Abahutu bari baratugize iyo ifundi igira ibivuzo.mbere nka za 92 nabonaga ababyeyi bacu barabaye ibikange simenye ibyo aribyo kugera naho bahinduraga amayira kubera gutinya umuhutu runaka wabaga warigize ishyano muri quartier.Ngo hari nutubari batatinyuka kwicaramo kubera izo mpamvu.94 yo rwose abatutsi bari bararangije gupfa bahagaze.ibaze gutanga amafrw ngo bakurase ntibaguteme.ukagura urupfu!!!!sha Nyagasani azabibabaza nikuzimu nduziko ijuru ryo mutarikandagiramo.

  • Ariko uyu mugabo nawe ashobora… ntacyo mvuze rwose. None se udashimiye utakugiriye nabi washimira nde? Ndabona dufite abarwayi benshi. Ryabara uwariraye!

  • Iyi nkuru ntabwo amafoto agaragara, mwarakoze kuyandika ariko mudufashije n’amafoto yaboneka.

Subiza

Your email address will not be published. Required fields are marked *