• 17/01/2020 11:05 00

Bigirinka yihaye umwitozo wo kuzenguruka igihugu ashaka ahari amateka yihariye

Bigirinka Gasasira Innocent ni umusore w’imyaka 30, ukomoka mu Murenge wa Mukamira w’Akarere ka Nyabihu mu Intara y’Iburengerazuba, yatangiye umushinga ku bushakashatsi n’ikusanyamakuru ku mateka n’umuco nyarwanda, asaba abakuru kuyabwira abato batayazi.

Bigirinka G. Innocent afite imyaka 30 y’amavuko aha ari ni i Rubavu hafi y’inzu yubatswe na Musenyeri Aloys Bigirumwami, iyi nzu iracyahari ibamo Musenyeri Alex Habiyambere uri mu kiruhuko k’izabukuru

Uyu mushinga yatangiye uzakorerwa mu ngendo zinyuranye mu Mirenge yose y’u Rwanda uko ari 416, ibi ngo bikaba bizaviramo inyungu Abanyarwanda harimo n’imfashanyigisho ku mateka y’u Rwanda.

Gasasira asaba abakuru kujya basobanurira ababakomokaho n’abo barera amateka n’umuco nyarwanda.

Ingendo ze azazikora mu gihe cy’amezi atatu, asura ahantu nyaburanga harimo imisozi, ahahoze ingoro z’Abami bategetse u Rwanda.

Avuga ko ari umusanzu we ku gihugu mu kumenyekanisha amateka y’u Reanda. Aganira n’Umuseke yagize ati: “Mbikuye ku mutima niyemeje gukora ubushakashatsi ku mateka n’umuco by’Abanyarwanda ngera muro buri Karere ngamije kugera mu duce dutandukanye tw’u Rwanda, nkareba imbonankubone ubwiza nyaburanga, nsobanukirwa buri gace n’umuco wabarangaga, ibizavamo bizamfasha kwandika igitabo kizifashishwa mu burezi ndetse nzakora filime mbarankuru kuri byo.”

Bigirinka avuga ko hari bimwe mu bimubabaza ashingiye uko Abanyarwanda babanaga hambere, ibi rero ngo akaba ari byo bituma yifuza ko umuco ugaruka ku gicumbi cy’u Rwanda.

Ati: “Naganiriye n’abakuru bambwira ko nta mukobwa wishyingiraga, nta Munyarwanda wicaga undi, ariko ibyo byose byarabaye, kubera ko hari abateshuka ku ndangagaciro n’umuco nyarwanda, ndifuza ko bigaruka, ababyeyi bakwiye kubigiramo uruhare bagatoza abana umuco ushingiye ku mateka.”

Kuri Bigirinka ngo kubungabunga ahahoze ingoro z’Abami bategetse u Rwanda, aho batabarijwe, imigezi n’ibiti bifite amateka, ni bimwe mu byo asaba ko Abanyarwanda basigasira.

Bamwe mu bakuze bashimangira ko umuco kimwe n’amateka by’u Rwanda hari bimwe byahindutse, bitewe n’uko isi igenda itera imbere.

Nyiramukamisha Patricie w’imyaka 75, wo mu Karere ka Musanze waganiriye n’Umuseke yagize ati: “Kuva aho ubukoloni bwagereye mu Rwanda ni bwo byinshi byagiye bihinduka, ibitaramo bivaho, umugoroba w’abakobwa barawirukana, haza icyo bise uburenganzira bwa muntu, babuza abana guha ababyeyi umuganura ngo ni ubwisanzure, ibi byishe umuco.”

Avuga ko aho ingoro z’Abami zari, ahenshi habaye amatongo, akobana ko kuba hari abato bakora ubushakashatsi kuri ayo mateka ngo hari ikizere ko umuco nyarwanda uzagaruka.

Kamanzi Joseph w’imyaka 68 yagize ati: “Birakwiye ko ababyeyi dutoza abana umuco, ndetse byaba na ngombwa Leta igashoramo amafaranga hakaba itorero rimara nibura amezi atandatu. Ubu hari ibyanyobeye umwana akodesha umubyeyi umuvugira imisango, uvugira inka akishyurwa, kubera ko urubyiruko ibi ntirubizi.”

Urugendo rwa Bigirinka yarutangiye ku wa 1 Nzeri 2019, ajya Nyabihu; azasoza mu Ukuboza 2019, avuga ko bizamutwara miliyoni eshanu z’amafaranga y’u Rwanda.

Bigirinka mu ngendo akora aganira na bamwe mu bakuze asanze aho yasuye akababaza amateka y’aho hantu
Bigirinka yize ibijyanye na Finance muri ULK ariko ngo ashaka gutanga n’umusanzu we ku kumenyekanisha amateka y’u Rwanda, aho yicaye ku giti cyo mu mbuga y’urugo rw’Umwami Rwabugiri i Kageyo ho muri Ngororero

NGABOYABAHIZI Protais
UMUSEKE.RW

Subiza

Your email address will not be published. Required fields are marked *